Friday, September 10, 2010

Awi.. awi.. awi..!!!

Darthlalanga mahni sakruang ngunthluk taka han bih chang hian lung hi a awi thei mawlh thin lo, hmazawnga in en hi chuan zia ve viau thin mah se, a nâk pek zawnga han en hian Dul hian hma a hruai lurh mai thin a, a manganthlak thin ngawt mai. Nula a pumpa hetia Dul hmahruai kan nih reng chuan hmelin puak a ti lo nen, Tiam tlat e tih ni a awm thei dawn tak ngial lo tiin in tih cher ka'n tum ngial thin a, a harsa lam hret a ni. A chang chuan Ka dul kiar hi awm lo se chu ka thau deuh hi chu pawi lo mawle tiin ka inhnem ve leh ngawt thin bawk a. A hrim hrimin ka búkte hi a rit lutuk reng reng, ka weight pawh hi tih hniam a ngai a ni.

Hmanni lawkah BP ka check a, a lo sang vawh vawh khawp mai, exercise lak chu tih makmawh a ni ta. Ka thian pakhatin Gymnasium ah ka kalpui ang che, a ti a, hun engemaw chen kan tum tawh hnu-ah kan khaihlak reng a, kan ti hlei thei lo. ni 9 tlai lam khan kan va kal ve ta teh poh a. Ka pian ahnu lama ka vawikhatna a ni.

A hmasa berin Cycling min tihtir phawt a, minute 15 chhung tur an ti a, chet chak a har hle mai, chak deuh hlek rawh an tih pawhin ka thei tawh lo hei bak ka ti zel a, minute 15 a rei duh ngawt mai. Ka zo chu hrui min pe a, zuanna tur, Inhruizuante lek lek chu naupan laia kan tih than a ni a, huphurhawm loh viauin a lang, ka han ti dawn a, ka zuang thei ta der lo, a hma-a ka lo cycling nasat avang khan ka ke a zâwi tlat a, ka tlu thlawrh. Minute 10 chhung zuang rawh min ti, chawl chungin ka zuang a!!!! Minute 10 chhung chuan hah namenin ka hah lo. Hahthikulin ka zo hram a ni ber.

A hnu lehah chuan ban exercise kan ti leh, thil rit deuh mai min pawhtir a, vawi khat.. vawi hnih... vawi thum... a bak chu ti leh thei tawh nang.. awi, awi, awi... van beidawnthlak tak. Min kalpuitu chuan, "I tih theih loh chuan tilui suh, a hmasa ber hi chu a har thin a nia" a ti a, ka pawm khawp mai.

Ka tha te chu a khur der der a, ka zawi ruih mai, ka luak a chhuak nghulh a, ka mit mengte chu a fiah lo ruaiin, ka meng phe ruai mai a ni. Bathroom ah ka lut a, ka luak thei bawk si lo, chhuatah chuan ka thu thlawrh a, chau hmel pe chhe ve chiang ngawt mai. Heti em em hian a ni maw ka lo fit loh le, College kallai te khan kan inkhel ve nasa thin a, racing ah pawh Gold medal te ka lo la ve thin kha a ni a, rilru chuan a la zuam khawp mai mawle, taksa hian a lo tlin tawh awzawng lo.

Mizotawnga Insawizawi kan tih hi a dik ngawtin ka hria, taksa hi a zawi loh-a a khawng tuh chuan hnathawh leh thil tih hi a lo har em em mai a ni, taksa ti zawi a, ti hahdam turin kan sawi zawi fo a ngai a lo ni.

22 comments:

  1. Hehe! Gym a i che vel chu ka van hmu chak che e! :-)

    Hmahmawh lovin, vawikhata ti trawk lovin, han ti la; i pian chu analh leh zar mai ang :-)

    ReplyDelete
  2. Sekibuhchhuak - hmanhmawh viau mah ila, taksa hian a tlin thlawt lo a ni e :-) han pawh dawh zawk zawk atan hian ka it asin!!!! hmun danga chet deuh bawrh bawrh ang chu ni lo nasa mai.

    ReplyDelete
  3. I lung chu lo ti awi ve hram teh siamtuin a duh dan a a siamah ngai mai rawh

    ReplyDelete
  4. I zoram haw tur in buatsaih dan hi a dangdai ang reng, mahse a tih chi khawp ang. chutiang chu i ni tih an lo hre sa dawn a. Finance a thawh chu hna a hautaka an cher duh an tia maw ka tia, i hneh sawh lutuk a ni ang, a dang pekbelh che sela a tha ang!!!!!

    ReplyDelete
  5. Awi awi awi min ti nui nasa lutuk. Gym a thlansa phul kai a i han che vel tur chu ka mitthla a. Mahse i ti tha e, kei ka peih reng reng hlei nem. Ti zel rawh.
    Thau hi chu a pawilo, dul hi kiar tel kher lo se!!

    ReplyDelete
  6. hehe! I va awi nasa dur dur ve! Ka sawhthing phurh ka sawi kha, a boruak i man chiang tawh hle ang chu maw?? lolzz

    ReplyDelete
  7. Cher duh vanga insawizawi, a ho em mai. I cher phah chuang lo vang. I ei lam kha insum zawk rawh. Hahthikulin insawizawi mahla, i ei leh in lam i invawn si loh chuan awmzia a awm lo. Ka my dear-i hi tlaitin a walk a, kei inah ka lo awm a. Ka rih lam ka vawng tha zawk daih! I awih loh leh ka inbuk rawn en la. Hriselna atan chuan insawizawi chu a tha.Cher thik thiak ai chuan thau chumbat hi an nalh zawk.

    ReplyDelete
  8. Aizawl haw dawn kar hnih-khat la awm hian i ti leh vak zel!!

    -bmw

    ReplyDelete
  9. Thau hi chu in buaipui khawp mai. kan nu pawh a buai thei khawp asin, ka walking dawn a ti a, chaw ei ti tui tawk chauhvin a walking a, cherna damdawi ka lei a tihte lah, a kha lutuk ka ei peih tawh lo, a ti leh bawk si. Lo leng la sawi dun teh u, tichuan in cher deuh mahna.

    ReplyDelete
  10. dr_feelgood - teh reng mai, ka lo haw dawn, biak che ka duh ania aw...

    hmingtea - Siamtu pawh hi a lungawi meuh dawn mawni le.. tih lam zawk a ni.. :-)

    Kiamlova - Ka awmna hi chu a zia alawm.. thu chunga hnathawh hian taksa a heh vak lo aniang e..!!! Haw dawn vanga inbuatsaih chu ka ni chiah chuang lo ania.

    aduhi - nia, dul mawlh mai hi, ngaihdam a har tlat.. thlansa phulkaia han tan chuan luak vak mai pawh a chakawm alawm le...

    Zaia - nia, a tirah pawh sawhthing phurh vel kha chu ka hrethiam lutuk alawm..

    Zl - cher duh vang ngawr ngawr pawh a ni lo, Dul tih thep lam zawk a ni.. ei leh in lam pawh fimkhur chu ngai tho mai, tunah tak hi chuan ka ngal a na rapthlak.

    bmw - lolzzz... aizawl lam chhass an tha deuh a, in uluk ngai ve pawh ni fahmiang!!!

    Te-a - Damdawi lam chu ka ei duh der lo ania kei chu. Sawi duna cher theih chu nise, ka lo thlawk vang vang tur a!!

    ReplyDelete
  11. a 1st para khi keimah nen a inhmeh... ka lo hriat leh tih ve tawh thin te a ni.

    hman niah thisen ka va pe a, thau tawh viau e ti lo chuan ka BP te chu a tha viau, mahse min vittu khan 'thau belh tawh lo la' a tia ka bo khawp mai a, 'engati maw?' kan ti haw a, ani chuan 'i vein a thuk tawh, vih a huphurh awm' tiin min chhang a, a nuihzatthlak rualin ngaihtuah a ti tam khawp mai. Blog-ah a hlimawm zawngin ka ziak ang ka tia hun ka nei thlawt lo a ni.

    ReplyDelete
  12. Hotunu, Mahni pian(sakruang) a lungawi tak hi an tam lo viau ang.. Mi tin hian hei ai hian chuti khati deuh zawk ila, tih te hi kan nei deuh vek. Kei pawh ka Dul hi duh ai chuan a lian tan tlat. T Shirt thar neih chuan a hma a lo puar nghal deuh tan tlat. Mahse heng zawng zawng hian Keimahni theuh hi mi pakhatah min siam a sin. Duhthusam a pian nalh chu ni ila, kan in-ti-vei viau maithei a sin...

    Chhiar a nuam thin e.

    ReplyDelete
  13. Rka - chuti ve bawk maw? Thisen pek hi ka duh reng a, a remchang lo ve ziah, a mak ngawt mai. i Blog ah chuan han ziak ve ngei teh.

    b-buata - nia ti raw, intih-vei vel viau ai chuan heti vel hi ni nik nek reng ila tha zawk lawm.

    ReplyDelete
  14. Capt thau i duhloh bawksi chuan thisen chu pe duh loh tingtang teh.Kei ka pe ve nelnual tawh.Ka htau phah zek leh nghal a.

    ReplyDelete
  15. Tun atang chuan in sawi zawi ziah a ngai tawh dawn nih chu a. I nalh leh vat mai ang...haaahaaa

    ReplyDelete
  16. hmingtea - thau ka hlau lo, dul kerh chiah. *hihi*

    irene - nalh zeih zawih hi ka tum ber a ni thin a, ka hlawhtling thei ta lo a nih hi,, haha

    ReplyDelete
  17. E, Lengzema thuziak Varte kha i nih ka ring a, a dik ang chu maw. Hmalakna tur a tam hmel hle mai, nangmah atanga bul tan a ngai dawn lehnghal kha!

    ReplyDelete
  18. Capt, a pawi mawh khawp in ka hria kei pawh. Tunhma kan pi leh pu te kha chu physical lam a tam a mental a tlem a, tunlai hna tam tak hi chu physical awm tlem a mental lam a nasa thung a..an ti em ni kha..chuvang chuan life style disease tih te pawh a awm tak reng hi!!

    2001 khan training a kan zin kual chhen lai hian keini aia kum lam a upa deuh hlek tawh naga pakhat hi zing dar 6 a rik tawh hi chuan a mu thei tawh lova, mi dang tih harh hlau si kha khum lu ah hian kut kuang kuah hian a thru tung ut thrin a..keini zan lam a sawi phur em em , mahse a hun a lo thlen a thawh la harsat em em khan badminton khel tur a min rawn kaih thawh hian ka hmu ve thrin....mahse, alo mak lutuk lem lo e, zing dar 5 vel a harh tawh chuan muthilh leh ka harsat viau tawh mai. chuvang in zing a mahni veng chhung fang kual mai mai pah a han walk vel hi a nuam ka ti phian..mizoram erawh ruah a sur duh deuh thulh leh khut thin. kawng diak chhuan lam in!!
    step a kal te han ti ve chhin teh, phai a awm rei ve deuh tawh chuan tawi te pawh kal ila kan thaw nghal hlawi hlawi mai ani, naupan lai a kal pangai pawh ni lo in um pah a kan kal chhuah thin te kha han kal dawn chuan a huphurh awm rum tan tawh mai ani....(a hnu a i chawn vel rawl tur kha chu veng tel la ) :))

    ReplyDelete
  19. Varte, tunah i blog hi ka lo chhiar ve chauh a, i ziak ngaihnawm thiam hle mai!

    ReplyDelete
  20. avena - nia, chak viau emaw intih lai hian kan lo chak viau lo thei reng a nih hi...

    Maisek - welcome.. lo lut ziah tawh dawn nia, ka haw thla hi ka buai vel vei lutuk a, update pawh ka la hman lo nih pek hi.. in ngaihawm hle.

    ReplyDelete
  21. Awi awi awi.. nangmah lek i lo ni reng a.. lol.. kan va in man chhuak har ve!

    ReplyDelete

Followers