Wednesday, December 30, 2009

Krismas thunawi..

"I'm dreaming of a white Christmas
Just like the ones i used to know.."

... tiin han zai bu ve tluk tluk thin mah ila, White krismas tak tak hi chu kan hre ngai lem hlei lo a, hmaaaan-ah, hman tak takah khan, Lunglei kan awm laiin khua a vawt khawp mai a, zingah hian Baze mual-ah vur a lo tla var ve iar a, chu chu vur tla ka hmuh chhun a la ni, chuti chung chuan Boney M hla sak White Christmas hi nalh ti em emin kan ngaithla a, kan kurpui ve duam duam thin a nih hi.

Kumin phei chu a White Krismas lo khawp a, khua a lum uap churh a, Celsius Degree 35 chung lamah hi chuan zai tui pawh a har khawp, chutih laiin zoram angin ruai theh leh zaikhawm awm ve hek lo rei lote kan inkhawm bang chu mahni In lam hawi theuhah ti ang maiin kan ruaipui tin dial mai leh nghal a, a khawharthlak dan a thuah hnih ngawt mai.

Vanneih asiamin kan hotu ten an in lama hmang turin min sawm hlauh a, chawhnu lam chuan ka va phei teh poh a, anni an lo inbuatsaih nasa a, present te min lo pe a, chaw te ka ei nghal bawk a, kan hlim ta phian, ka va tlailam um pawng par ta nghek a ni ber e.

Chutiang a nih avang chuan Zoram lama Krismas nawn ni, ruai theh ni kan tih ni 26 te chu in lama hna thawh nan ka hmang a, lunglen thulh thaka ka buai tak kha...

Chawlhni a lo thleng a, thiante nen kan han inhmu a, engtinnge i hman kan inti hlawm, ka khawhar chu an hlau ve tho a ni chek ang, naktukah kan leng dawn nia an ti a.

A tuk (28Dec) chuan min rawn sawm a, chaw eiin kan chhuak ve ta dam dam a, han chhuah takah hi chuan rei hi a lo awl khawp mai, traffic lah hi a maka mak hian a lo tawt thin a.

Ti hian ka ngaihtuah a, krismas hi mihring tung chho-a kal, mi ang pangngai chuan kan hmang reng dawn a ni a, awmna hmun a zirin hman dan erawh a in ang lo thei hlawm viau mai, thenkhatin nuam an tih em em laiin, thenkhat erawh lusun mangangin an awm a, thenkhat lahin mahni nuam tawlna ringawtin hun kan khawhral bawk a, nula thenkhat hmang nuam deuh lah a result thla engemaw hnu-ah a lo lang rawl nen.

Engpawhnise, a piancham kan lawm Lal Isua tana kan thinlung hawn mai hi hman dan tha ber chu a ni e, malin kan awm emaw, chhungte nen kan hmang emaw pawh nise Amah Isua nen kan hmang em tih hi a pawimawh ber chu a lo ni e. Hei vang hi a ni ang e.. "Thinlung a lamah hawn ila ro thil dang a ngai tawh lo e"te hial an lo tih le...!!!

20 comments:

  1. Chuvang chu alawm hla phuahtu pawhin, "Aw, Krismas, ka dam chhungin ka nghilh lo'ng che" a lo tih reng ni. Mahse, he Mizo Krismas hla phuahtu hi Africa te, Australia-ahte Krismas hmang ta sela chuan, a 'mas lo riauvin an hre mai thei a ni.

    ReplyDelete
  2. Merry Christmas, Happy New Year...

    ReplyDelete
  3. I dinglama thu khi EM NI ? hehe

    Kumthar duhawm tak i hmuah thlen ka duhsak ache !

    ReplyDelete
  4. in tha phek phuk hlom e

    ReplyDelete
  5. Baje Mual vur tla ... vur ni lovin, frost a nih hmel! Hman zan khan mumang ka nei chiam ve ngial a, Agriculture mual thla Sobji bazaar leh Hostel Mual (Baje mual chhak hret) inkarah kawr a awm a; kan naupan laiin lei indawh chhete, chartin pakhat lek indawhah kan kal kai thin.

    Lunglei Serkawn ka pianna ... kum 7 vel Lunglei-a awm ka ni, ka thil hriat a once upon a time thei tawh hle, Baje Mual thlangah khan Chandmary Tuikhur —Buai Kuma silai puah tuk pawhin ka zu chawi! Ka lung i tileng riau mai!

    ReplyDelete
  6. "nula thenkhat hmang nuam deuh lah a result thla engemaw hnu-ah a lo lang rawl nen"

    Can't stop grinning. :D

    Nia, hotunu chu i rawn ziak tha ngawt mai. Sermon a tan pawh dah that chi hial. Kum thar chibai leh.

    ReplyDelete
  7. kum thar chi bai capt

    ReplyDelete
  8. I tawng sang khawp alawm! Pi leh pu berte bulah Mas i hmang thei a, an sawm che hi i vannei a, an vannei ve tho bawk e. An khua a har ve viau ang, nang awm lo la chu.

    Keini pawh 'boruak' lo zetin kan tlingtla ve hram e. Mizo 'thluk' ngat lo hi chuan thlarau lama malsawmna dawn pawh hi a har, in dem chi pawh a ni lovang e!

    Kum thar chibai! Lo zin tum teh, kum thar chu.

    ReplyDelete
  9. Hotunu, Kumthar chibai le! I tlip nalh thei lutuk a, a bul tanna en kanin last para kan en chut chut fo dawn mai ka ti! :-)

    ReplyDelete
  10. a piancham kan lawm-a hian kan lawm dan ah amah a lawm angem? tih ngaihtuahna min hriatchhuah tir zawk mai ka ti

    ReplyDelete
  11. @Fela - Nia, hlate han phuah thiam ve ila chuan kan hla key a dang viauin ka ring..

    @Alejendro - Happy New Year le..

    @Sekibuhchhuak - Aw, ka ding lama mi khi kan hotupa chu NI E.. hehehe.. Ka lawm e, nang pawh Kumthar chibai.

    @hmingtea - Hmai paratha hlawm ve ropui sia..h :)

    @chawnghilh - frost pawh chu ni fahmiang, keini naupangte chuan VUR kan ti mai alawm.. :-)

    I hre once upon a time tak hle mai, buai kuma silai puah tuk khan kei pawh khami tuikhur ami tho kha ka chawi tak asin.. ka mi tawh kha nangmah i nih chiah chu.. :) Kei pawh Lunglei sawi hi chuan ka lung a leng thin.

    @Zaia - Nangpawh kumthar chibai tha ber le..

    @illusionaire - Kumthar chibai. Sermon atan chuan lo dah tha ta ang la.. engtikah tak sermon ang che maw..???? :D

    @Thiama - Nia, ka vannei khawp mai, ka khawhar lutuk an hlau ve aniang, 'bakah anni pawh an fate tel lo-a an hman vawikhatna ania, an khawhar ve tho mai... kan in draw..

    Rawn zin chu a chakawm hle mai, in haw dawn lo em ni?

    @VaiVa - Hahaha, Chibai, i ti lawmawm thin e. kan College kal laia kan answer paper min ti hrechhuak rum rum mai, a bul leh a tawp hi tha deuhin ziak ila, a lai velah chuan, of the of the and of the tih mai maiin hnawh khat mah ila an chhiar tak tak chuang lo kan ti thin a..:P

    @dula - i ti dik, a neitu ber tel lo hian kan lawm fo mai thei a ni.

    ReplyDelete
  12. 'Khawi ah pawh Ni chhuahna a piang ah..' tih kha in hnem nan lo hmang mai teh.
    Happy New Year!!

    ReplyDelete
  13. @daniel - Happy New Year.. Hman deuha Praise and Worship Service, Temple-a in hman kha ka en thin, ka inhnemna ve deuh ber a ni e..

    ReplyDelete
  14. A ngaihnawn hle maia lung a leng...

    dawnga
    kohima

    ReplyDelete
  15. Hei ka rawn leng lut ve rawi mai o.

    Kumthar Chibai le.

    ReplyDelete
  16. @dawnga - in mas hman dan te ka lo hria a, a nuam awm bik hle mai, Mas manah ruai han theh ngei hi chu a nuam ve hrim hrim, puar vak lo mah ila. Lung i ti leng hle mai, Madini min han biak dawn nia.

    @Irene - Kumthar chibai, ka lawm lutuk i lo leng a, keini chu kan fel a, inleng kan hnar ngai lo ania.., hei thingpui aw... hahaha

    ReplyDelete
  17. HAPPY NEW YEAR !! Mizoram ngeiah hian MAS chu nuam nih hi :) keini chu HOT 2009 te kan hmang vel hot rap maw le he he :)

    ReplyDelete
  18. Lukhum eng khum khi ka star :) min duh chi lolz

    ReplyDelete
  19. @Boiha - HAPPY NEW YEAR le... lukhum eng khum khi i star tih ka lo hrilh ang, nuthlawi fa pahnih chauh nei a nih khi.. akekeke.. a lawm ngawt ang chu..

    ReplyDelete

Followers