Friday, December 18, 2009

A hlui thei lo!!

Naupan laia Krismas hman dan ka hriat theih hla ber chu Lunglei kan awm lai kha a ni awm e.

Urlawk zanah Nula Tlangval an zai a, tlaivar an tum ngei ngei thin, keini naupang pawh tlaivar chu kan tum ve eltiang, mi zaikhawmna bulah kan lo bu ve lawp lawp a, dar 11 te kha a va rei thei tak em.

Zingkarah khaw vawt tak hnuaiah peih lo zetin kan tho a, a chhan chu eng dang vang ni lo-in Krismas Bawng talh lai kan hmuh chak vang mai a ni. Khawlaiah kan thaw khu hlat hlat a, zing daifimin a bawh hnim te chu kan pal pel sur sur a, hnim hnaha dai khalte chu Vur tiin kan la teuh a, chutah Bawng an pheh thluk lai hmuh ngei tumin fatu ho bulah kan tlan a, chumi zawhah Vawk talhna lamah, vawk talhna-ah hi chuan kan awm rei peih ngai lo, a ril an phiar lai erawh hmuhnawm ka ti thei fu. Bawngsa an chan lai kan han en a, a tisa phu det det hi mak ti takin kan en reng a, kan hawlh de de thin.

Krismas ni-ah kawr thar ha-in kan han inkhawm ngei a, eng thu leh hla nge kan ngaihthlak pawh hre miah lo-in inkhawm ban hma-in chhuah phet kan lo tum bawk a, inkhawm banah chhangban, kurtai nen ngei mai kan ei ngei bawk.

Puitling ho chu an lengkhawm a, inti naupang fel takin zaikhawmna inah chuan kan han thu ve ren rawn na-a pawn lamin min hip nasat em avangin kan tlan chhuak leh thuai a, har mei khukna lamah kan in um kawi zawr zawr a, fatu ho-in thahnemngai taka sa an chawh sauh sauh lai chuan a kotlangah kan lo thu ve reng a, sa bel lian pui puite chu kan thlek dauh dauh a, ruai theh kha a phurawm thei riau.

Tlai lam a lo ni a, fatu ho chuan ruai siam tawh mai ila an han tih vel lai chuan zaikhawm ho chu an tui thar ta tlat mai, an la ri tluk tluk a, naupangin ei hmasa mai rawh se an ti leh ta nge nge, ka nu hi a ei hnuhnung pawlah a tang ziah zu nia!!!

Kum tam tak liam tawhin Krismas vawi tam tak hmang tawh mah ila, naupan laia kan krismas hman dan kha vawiin thleng hian a hlui tak tak thei lo, Kawrthar, inkhawm, lenkhawm leh ruai theh te hian Mizo te thinlungah thuk takin thu a la sawi reng a nih hi…

6 comments:

  1. Lenkhawm kan nei hian Isua pianna, a thihna leh vanlam ngaihnate min neihtir a, a tha thlawt a ni, thamral mai lo se ka ti. Naupan lai khan Christmas kha a Mas bik riauin a hriat. Vanram chu Napangte in (thil thar an neih) an lawm anga lawm lote chu a chhungah an lut tawp lo vang.

    ReplyDelete
  2. fatu ten ran kawchhung an han zen a aphing an raw lak chhuah kan chang a biakin kawt ah kan pet lir sawl biang biag trhin lai te kha aw .kan lian deuh a hnapu hlui min siam sak trhin lai te kha hnannnnnnnn lai an lo ni ve ta reng mai

    ReplyDelete
  3. Buartawn par vul var chuuk mai te khan a ti-Krismas a. Mas Bawng kai kha kan khaw daiah kan lo hmuak a, a vawh em avangin mei kan chhem a, rual uten thingtuah fawm turin min tir a, zan pawh ni se hlauh nei miah loin hnimte kha kan bawh eng thin. Bawng kan hmuak thleng a, Buartawn par bawkin kan chei vul chuk a, hemi atang hian talh a nih hma zawng kha chu naupangten Mas Bawng kha kan thlah thin. Chanvo ropui takah kan ngai thin a ni.

    I sawi ang hian Zan lam zaikhawmnaah pawh hian, chhun lama ei ban sa bang nawi zuh tur a awm hian zai a tui duh hlei hlei, kaw puar treuha a tuk zinga mahni in lam pan erawh a phurawm thin lo mai pawh a!

    ReplyDelete
  4. A dik ve tho mai a. Pistol leh a pâi han hre zar kha nuam ka ti thin khawp mai.

    ReplyDelete
  5. Kristmas laia khuangte nen a zaikhawm ai chuan program nuam deuh tak thalai tana buatsaih dan kha lo thiam sela tha tur. Tleirawl lai kha chuan kan tui pha em em si lo, nu leh pa te pawh hi anmahni hma an sial lua deuh em ni chu aw, ka ti hnu hnawh a nih hi.

    ReplyDelete
  6. kei krismas hman ka hriat hlui ve ber chu naupang te tak te kan nia, tuichawi/thingphurh/hnahlak etc vel pawh la ti rual kan ni lova..chuan ruai an peih tawh hnu ah fatu ho in mahni chaw chhum theuh keng in ruai theh tawh tur tih min au tir a..." Pi thawm mahni chaw bel theuh ken tur.." ti vel a kan au rual dial dial ka la hre ve...chuan hnah ah ruai kan theh a,chawtrani kan keng bawk a...kan kil bial laih tak asin maw le....

    ReplyDelete

Followers