Thursday, November 19, 2009

Hmangaihna chu...

South Africa International Transit-ah chuan ka next flight nghakin ka thu a, hun ka nei hnem bawka Lehkhabu chhiar tur la chhuakin thut hmun chu ka rem sauh sauh a, ka lehkhabu chu ka bih ta ngar ngar a. Chutia ka thut lai chuan ka bulah hian sap nu pakhat tar lam tawh, kum 50 chu a ni ngei tawh ang tih hi a rawn thu a, ka en thuak a, lehkhabu chu ka chhiar san leh ta a. Nakinah chuan chu nu chuan phone a hmang ta a, a tawng zet zet a, a pasal a bia a lo ni a, a han be zo chuan, “Bye, love you..” a ti a Tar kiring zet tawhin a pasal a bia a, Love you a la ti zarh zarh khan ngaihtuahna thui tak min neih tir pek a.

He thumal pathum lek, sap tawnga I LOVE YOU tih leh mizo-in KA HMANGAIH CHE kan han tih hi a ril dan chu a in ang rengin a lang. Thusawi awlsam tak erawh a ni hauh lo. He thumal tawite chhungah hian thu ril inthup thuk tak leh sei tak, dam chhung daih tur a inphum tel a, khawlaia zurui pai mai mai sawi pawh nise, thuhriltu ropui takin a sawi nen a ropui dan leh a ril dan a lem chuang awm lo e. Hei vang hian kan Bible ngei pawhin thu ropui ber tiin a lo sawi reng a nih hi.

Hmangaihna hi enge ni ti ila, sawifiah dan a hrang nuaiin a rinawm a, kan hun tawn leh kan tawn dan angin hmangaihna kan hrilhfiah dan pawh a dang nualin ka ring. Tlangvalin nula a han hmangaih tawh vek vek hi chuan a inhuam thui thei khawp a, Kawlthei kung pawha lawn thei uk lo khan, “Ngiat lang, Siar ka man nang che..” an han ti ve thla rawk zel a.

Nimahsela, Tlangvalin Nula hnenah,‘I tan chuan si-ar lak pawh ka huam a, lui kawr thuk ber leh tlang sang ber kaltlang ngai pawh ni se, nang hmu tur chuan ka lo kal zel ang, nang nen hian thihna chauh lo chuan min then thei lo ang’, ti zuah zuah mah se, ‘Zaninah ruah a sur loh chuan ka lo leng ang’ ti-a a thusawi a tlip leh si chuan a inhuamna leh thusawi zawng zawng kha thu va-uk mai a ni.

Hmangaihna hi mi hrang hrangin an hrilhfiahin a awmzia an sawi a, nimahsela sawia fiah mai chi leh tawp mai chi erawh a ni lo a, tawna fiah chi a nih hmel. Mihringin hmangaih a neih chuan thiltihin a zui a, Nula tlangval karah chuan chu hmangaihna chuan par a chhuang a, rah duhawm tak thlenin chhungkua an din thin. Chu Hmangaihna chu mi pahnih inkara thil thleng tur a ni a, pakhat ringawt hmangaihna chu a famkim thei lo nachungin mi pakhatin a hmangaih em em khan a hmangaih let ve lo tlat thei.

Hmangaihna dik chuan lei leh van pawh a thlunzawm mai a, tuilian leh ral hlauhawmnain awmzia an nei thei lova...nu leh pate hmangaihna leh duhsaknate pawh an tlanchhiatsan dawr dawr a, chutiang hmangaihna chuan engkim hi a siam rem a, kum leh khawsak dinhmun inang lote mai mai chuan hranna aiin thlunzawmna nghet a siam zawk thin

Mizote hi hmangaihna la na viau hlawm si hian Induat hi kan thiam hlawm lo viau niin ka hre thin. Han ngaihtuah mah teh. Kan hmanlai Pi leh Pute phei kha chuan nupa an nih hnu-a mi hmuha induat hliau hliau kha an tih zawng a ni bau lo mai a, “I bai chhuan a so, rawn vil rawh” te hi an ti khur khur a, inbiak bak hluk tur emaw an ti tlat thin. Hmangaih thu chu nulat/tlangval laia an inhrilh kha an duh tawk ta mai em maw ni tih turin an inhrilh ngai tawh mang thin lo. Nimahsela, inneih hnu hlei hlei hian In Hmangaih thu hi inhrilh tawn fo tur a lo ni.

Hmangaihna-a pawimawh ber mai chu mi pahnih inhmatawna an inen mai ni lo-in thil thuhmun an thlir dun emaw thlir dan in anga an thlir emaw hi a ni, Nupa ni ve si engtik lai mai pawha an inhawitawn loh a, Ashoka Pillar ang maia an inhnungchhawn reng chuan Nupa nun hlawhtling an nei ngai lo ang.

Vawi khat chu Hnahlana ka awm laiin ka awmnate fapa chuan Aizawl lam nula a rawn ru haw ve ngawt mai a, a pa chuan eng dang a sawi lo, “Hmeichhia hi chu in huai teh e, in pasalte chauh in hriatna hmunah pawh in kal dawr dawr mai a..”a lo ti. A ni tak a, Hmeichhia leh mipa, ni danga in hmu leh inhre ngai hleilo, han inhmangaiha, kumkhua-a chen dun an han huam zui hi a mak ngawt mai.Hei hi Pathian remruat dan chu a ni tlat bawk si. Thenkhat duh leh hmangaih em em nia in ngaiin an han innei ta cheng a, khawsa dun rei hleithei lo a inthen leh an awm chawk. Hei hian khawvel mihringte in hmangaihna chu a tluantling lo a ni tih a ti lang chiang hle bawk. Hmangaihtu dik tak thinlungah erawh chuan a hmangaih kha nei thei lo mahse ani chu hlim taka a awm phawt chuan lawmawm a tiin tha a ti a, “Ka thai chang mah lo la, khiangawi mi tawnah, Hmangaih lung i dum phawt chuan lawm zel tang e,” a ti thei thin a ni. Hmangaihna in mahni hma a sial lo tih ti diktu pawh a ni thei awm e. Amaherawh chu hmangaihna dik tak inhlan tawnte inkarah chuan rinhlelhna leh huatna in hmun a chang ve thei lo a, an inhmangaihna chu a par vul reng thin, tin, rinhlelha awm turin a hmangaih tak chu a phatsan ngai bawk lo ang.

He Hmangaihna vang hi a ni ngei ang Pu Vankhama’n “I sakhmel tawn changin thinlai a eng a, I sakhming an sel leh kawl ang ka hnim a..” a lo tih le…

Hetiang a nih lai hian a hmei apa-in tih tur pawimawh kan nei theuh mai, chu chu RINAWMNA hi a ni. Nupui Pasal te laka rinawmna vawng thei lo-in a hrinchhuah chu chhungkaw buai a ni mai.

Eden huanah khan Evi khan ama thutlukna-in Pathianin thei ei loh tur a tih tlat kha a lo ei ta mai a, a pasal chu a pe ve a, a ni lah chuan ihe loin a lo ei ve mai ni awm tak a ni. Kha thutlukna pawimawh lutuk, an Nun pum ti chhe vek thei thutlukna Evin a siam lai khan Adama kha khawnge a lo awm bo ni ang le? Ramhnuai pilril zawkah a lo inthiar nge ni ang a, ramsa dang ngaihvenin a lo tei bo nge, boruak thianghlim dawn tumin a lo tei hawi ni ang? Evi teh reng pawh khan engvangin nge a pasal tel lo-a thutlukna pawimawh tak mai chu a lo siam mai le? Nupa chu khawsa duna thil engkim sawiduna thutlukna pawh siam dun tur an nih teh lul vei nen.

Bible chuan Hmangaihnain a dawhthei a, ngil a nei bawk thin; hmangaihnain a itsik lo va; hmangaihna a infak lo va, a uang lo va, a che mawi lo lo va, mahni hma a sial lo va, a thinur duh lo va, sual lamah a ngaihtuah lo va; fel lohnaah a lawm lo va, thutak erawh chu a lawmpui thin a; engkim a tuar hram hram a, engkim a ring a, engkim a beisei a, engkim a tuar chhuak thin.…. a ti. Chu chu hmangaihna dik Kristianten kan nunpui tur leh kan nupui/pasal, u leh naute laka kan nunpui tur chu a ni e, chu hmangaihna chu Pathian atang chauhin kan nei thei ang.

Pathian hmangaihna hian engkim mai a lo huap zo a, hmangaihna ropui ber chu a ni ngei mai - Chuvangin he hla hian I lo tlip teh ang…

Pathian hmangaihna ropuizia, Thu leh hla-in a hril seng lo
Van aia sang aw a zauzia, Sual hmun thim ber pawh a thleng zo
Sual bawih ata lungngai mangang, A fapa a pe a
Boral fate muanna a pe, An sual a ngaidam bawk

Tuifinriat zawng hlo tui chang se, Ziakna atan thing zar tinreng
Lehkha phekah Van khi chang se, Ziaktu atan chuan mitin reng
A hmangaihna ziak dawn ila, A kang zo ngei ange
A leng dawn lo, a hlai tawk lo, An hril seng chuang lawng e

32 comments:

  1. thiam dp dap ngei mai kum 50 tar i ti mai chu hmani ni chu damdawiin ah ka awm a kan ward ah 3 kan leng a om ve pakhat chu franch lam chhuak ani a a nu in a ron awpui a anu chu nula vang lai an vel in ka hmu a kan in kom chu zah dawn lovin a kum kan zawt chu ku 50 a lo ni rebg a fa poh 4 lianpui2 vek an ni a ter i lo zu ni a kan ti chu kum 50 ah kan tar mai in a ti heu mai mo le a ram a zir in tar leh tar lo te chu kum a tam hleih a nih dawn hi te ka ti ta vel mai2 a

    ReplyDelete
  2. "Hmangaihna aw, hmangaihna awm" tihbuai reng hi i ngah mai :D

    ReplyDelete
  3. Sap tawngah leh Mizo tawngah a thumal in ang reng, a thuk lam pawh in ang reng si a, Mizo pawhin 'Ka hmangaih che' tih aia 'I love you' tih sawi awlsam an ti zawk tlat hi a mak i ti ve em?

    ReplyDelete
  4. Kei pek hi ka mawl rohva, " Ka hmangaih che " han ti ngei hi a ril bik riau hian ka hre tlat pek ! :-) English a ' love' hi chu an phalrai ve deuh em aw ka ti. I love coffee, I love soccer etc ..

    Mizoin - hmangaih kan hman dan nen hi chuan a inang lo deuh em aw te ka tia ! Chuvang chuan emni tehreng; ka chass ve duehte pawh hi,' ka hmangaih che ' han tih hi chu harsa ka ti khawp mai.

    ReplyDelete
  5. @hmingtea - nia, kum 50 vel kan ti rawk na-a 60 pawh a tling zawk hial mai thei a ni, i'n sawi takah chuan.. anni hi chu an intinalh peihin an inuluk peih em mai. :-)

    @chhangte_ll - Aw, Hmangaihna.. buai chinfel pawh a ngah ve tho lo maw..?

    @Kiamlova - Keimahni tawng a nih loh vangin kan hmang awlsam zawk mai mai aniang chu ka ti..

    @Sekibuhchhuak - nia ti raw, awmze in ang rau rau sawi awlsam zawk a lo awm pawh a ni mahna.
    Kei pawh Ka Hmawngaih Che min ti na zawng hi ka ring ngai bik miah lo ania...

    ReplyDelete
  6. A ngaihnawm khawp mai!! Evi leh adama chanchin chhiar a ka rilru a lo lang ve fo thin chu, evi awm ve hma khan adama khan eng ang dinhmun chiah/eng ang chiah nge anih ang aw??? tih hi....

    hmeichhe hmasa ber evi ala awm miau lova, chuvang chuan a opposite sex a awm miau loh chuan adama kha physically chuan danglam miah lo mahse la mipa pawh ani lo anga, hmeichhia pawh ani thei chuang bawk si lova..chuvang chuan evi (opposite sex) alo awm ve tak avanga mipa ni ta chauh kha anih hmel a...mahse evi awm ve hma a adama mihring mihrinna tak tur kha ngaihtuah thiam a har ka ti thin a, tin, chhia leh tha hriatna thei an ei hma a evi leh adama mihring mihrinna leh an awmdan/dinhmun tur tak hi ngaihruat thiam har ka ti thin...a eng a pawh nise la evi leh adama atanga lang chiang em em chu hmeichhia ti hmeichhia tu chu mipa ani a..mipa ti mipa tu pawh hmeichhia ani ve leh tih hi!!

    ReplyDelete
  7. Ka zawh tum chiah che Pu Kiamlova'n a rawn zawt che a, i chhang dan pawh khi ka pawm khawp mai.

    Hmanah chuan Aizawl tleirawl ho chauh emaw ka ti thina, "Ka hmangaih che" tih aia "I love you" tih sawi awl ti zawk hi, mahse thingtlang ka fang khan a lo ni ve tho. "Ka hmangaih che" han tih hi chuan a ril tlat bik in ka hria kei chuan...

    Hindi film ah pawh a ni tho... Vai ho tak ngial pawh hindi a sawi ai hian sap tawnga sawi hi an thlang tlat :)

    ReplyDelete
  8. @ Varte: Keipawn ka hmangaih che a lawm... :-P

    ReplyDelete
  9. Hmai chhan a han in 'I love You ' chu a har khawp mai, hmangaih loh vang pawh ni chuang lovin. Ni kum khan Annivrsary kan lawma, mipui hma ah kan han in hlan ve a, ' a tha khawp mai, mi pui hmaa hmangaihna han sawi chhuah te hi a tha' min ti hlawm a,sawi tam deuh pawh hi thil tha tak ani.

    ReplyDelete
  10. hnam fing kan tih ho hi chuan sawi mai poh an san hmangaih na poh an ti lang mai trhin an zep lo in trhen leh mai poh an sam tho zel nia

    ReplyDelete
  11. @Dula - han ngaihtuah chiam pawhin i thuthlukna khi kei pawh ka thutlukna a ni ve mai e, i ngaihtuah thuk/ril peih mai mai... :)

    @illusionaire - Vai ho hi chuan sap tawng hi an uar ve rem rem ngawt mai. mahni tawng ngeia Ka Hmangaih Che han tih mawih sat mai hi chu har deuh asin, a sak deuh tuk zu nia, chu vang aniang ril bik riaua i hriat..

    @Alejendro - haha.. ve teh ngawt a che, i sawi awlsam e mai a ril vak lo ang.. :P

    @ daniel - nia, bel chhunga sa ti mai lo-a han induat a, hmangaih thu han infah nawn leh thin pawh nupa tan chuan thil tha tak niin a lang e, experience neiin i sawi chu ka pawm..

    ReplyDelete
  12. Va ngaihnawm dap dap ve. Hmangaihna hi zawng a ropui lutuka kan buaipui hle a ni ber hi.

    ReplyDelete
  13. Ka hmangaihche/I Love U tih hi sawi awlsam in alang na a chu sawi chhuah mai mai chi anilo khawpmai

    ReplyDelete
  14. Hriatthiam ahar,nge kalo phulo zawk Sawichhuak theilo a ka awm hi. Aril in athuk em ani.....007

    ReplyDelete
  15. @ Varte: Ka ti tak tak, "I love you from the bottom of my heart" in Mizo "Ka thinlung mawngdap a tang ka hmangaih che"

    ReplyDelete
  16. @che - niang chu mawle...

    @Anon - hriat loh chhingkhual mah ni la, i sawi dik e.. Lalzova te pawn, "Suihlunglentu ber chu Chhingkhuallenmawii" an tih kha mawle...

    @Alejendro - i va hrat eee... Illusionaire ka kick tir dawn che.. :)

    ReplyDelete
  17. Varte, ka hmangaihche I Love u anti kher lo pon an hmangaih thei tho ang tiraw.

    ReplyDelete
  18. @ Varte: Illusionaire hian min cho reng reng hlei nem, a chalah chil ka hnawm mai ang... :-D

    ReplyDelete
  19. @Anon - Thei tho ang ka ring, mahse maw, i hmangaih tak tak anih chuan Ka Hmangaih Che han ti hnap la a dawngsawngtu tan chuan a lawmawm ngawt ang chu....

    @Alej - a lo nih tak chu, a cho lo che a, i ngam chuang lo a ni lawm ni?

    ReplyDelete
  20. @ Varte: A nih vel ka ring... :-D

    ReplyDelete
  21. ngaihnawm ve tho mai a.. mahse hmangaihna ka la na ..

    ReplyDelete
  22. kei chu nula/tlangval hmangaihna hi chu a lem ve mai2 a ni ka ti ve tlat. ka awih thlawt lo, nupui pasal kan neih hnu a hmangaihna chauh hi hmangaihna dik ah ka pawm ve chauh.

    ReplyDelete
  23. i ziak tha khop mai, a ni tak a mizote hian kan damlai hian kan hmangaih thu hi tam thei ang ber in hrilh hi kan zir a ngai, thih hnuah ruang chungah aupui vak2 hi a sawt tawh silo a.

    ReplyDelete
  24. @Boiha - Hmangaihna la na tawh vek vek hi chuan an la na thei asin..... :D

    @lalthlanmawia - chuti tur em ni? i tlangval laia i ngaihzawng nen in innei lo tihna a ni thei angem?

    @LS khawlhring - chu chiah chu lawm, ruang chungah hian mi thatna hi kan han sawi vak vak thin a, dam laia infak harsa ti hle si hian...

    ReplyDelete
  25. Boiha min tih hnâp chu.. :) Hmangaihna tel phei se chuan aw... Nia, kan mizo thawnthuah pawh hmangaihna la na tak tak kan hmu nual awm e. mahse, Pathianin mihring te a hmangaih dan leh mihringte kan inhmangaih dan hi chu inang lo deuh lo maw? i hla thuah khi chuan a chiang viau a, hmeichhe hmangih tak ten min han ban hnup mai hi chu a na ve ngawr ngawr em sin....

    ReplyDelete
  26. @varte,inngaizawngte inkar a hmangaihna hi chu tam tak chu a dik pawh alo awm ve mai thei a, mahse KA HMANGAIH CHE an han inti a a hnu lawkah an in then fel leh than mai zel chu a nisi a, hmangaihna dik tak chu ani thei dawn mi, KA DUH CHE/KA NGAINA CHE inti thin ta ila a dik zawk lo maw le aw ka ti ve mai mai.

    ReplyDelete
  27. lalthlanmawia sawi ang khian inngaihzawn lai chuan ka duh che/ka ngaina che tih tur, chuan inneih ni tangin a zawng2 te, a za vaite nih tawh vangin KA HMANGAIH CHE tih tawh tur. Hmangaihna chu thil tam tak belh khawm atanga lo chhuak a ni si a........
    inneih hma chuan tih famkimin kan la awm thei si lo a.

    ReplyDelete
  28. @Boiha - tih boih hnap mai loh chuan koh dan tur dang hre bawk si lo a... i sawi dik, Pathian hmangaihna hi chu tehkhin rual loha thuk a ni e.

    @lalthlanmawia - nia,i ti dik ka ti khawp mai, innei tawh mah pawh an inthen leh a ni si a ti raw???

    @LS khawlhring - va hre chiang tawh deuh ve....

    ReplyDelete
  29. Thiani Pu Vankhama (fam) hla thu khi( Ka thai chang lo...), kum tam tak ka lo chei ve tawh a. i thu tluk na khi kei pawh ka thu tlukna chiah a ni a sin. B.A second year ah khan ka zir a, kan hre thiam lo khop mai a, kha tih lai kha chuan khawvel taka ka thlir vang a nia, thil theih ah ka ngai lo. Mahse Pathian view atang chuan thil theih a ni. tih hi ka pawm ta !! Uncondition and endless love.

    ReplyDelete
  30. hei kan thianpa in blog a siam a, a huam zau khawp mai a, link tlak a ni. A ni hi Bazar Corps SAY Sport incharge a ni. vansipai.blogspot.com a ni e.

    ReplyDelete
  31. @GuiGui - A ropui hle mai, i lo inhmuchhuak a, Pathian hmangaihna ropui zia hriat chuan thil theih loh ni-a ngaih pawh hi theih a ni zel chu a nih hi ti raw..???

    ReplyDelete
  32. Chuan, i link min pek chu ka list-ah ka add e, thanks..

    ReplyDelete

Followers