Thursday, November 5, 2009

Chawlh hahthlak..!!!

Sap ho chuan, "Miin hna a thawh rim viau chuan chawlh a la ngei tur a ni" an ti thin an ti a, chumi chang chawi chuan chawl ve ila tiin Zoram lam panin ka thlawk haw ve vau vau a, mahse chawlh hman meuh chu rin aiin a lo hahthlak daih mai.

Ni 3 October-ah Maputo chhuahsanin zanlaiah Mumbai ka thleng a, Chhungte, Pa Rama, Nu Kawli Manuni leh Zomuana ten min lo hmuak, rei pawh awm lo-in Kolkatta lam-ah ka thlawhsan leh nul nul a, zanlai laia hah taka min lo hmuaktu te chu an zahawm duh ang reng hle. Kolkatta pawh tluang taka thlengin thiante nen chawhlui te kan kilho a, ka hlim tan hle, mahni rama awm ang maiin ka ri le lu tawh.

Ni 5 October chuan Zoram ngei-ah chuan ka han tum ta, a nawm dan a dangdai ngei mai. Mite chuan kumpui linglet mai ni lo, thangkhat lian lai pawh ani mai thei Zoram an chhuahsan a, kei ve chuan kum khat erh awrh ka chhuahsan hnu-ah ngai takin ka haw a ni a, Lengpui atanga kan han haw te chu, "E Khai, kan kawngte chu a lo zimin a lo va han chhe em!!!" ka'n ti tan pang a, a ni lah taka a kualin a zim si a, motor a tam ve si a, ni danga hlau eih ngai lo khan ka han hlau thar leh deuh vel a, hei vang hi a ni ngei ang sap lo kal thin ho hian Mizoram kawng an sawi nasat theih em em tiin kan ti ti chho bawrh bawrh a. Min rawn hruaitu Mafaka chuan, Hman deuha Sap ka hruai pakhat phei chuan a mit a hup asin a ti.

In kan thleng chu min hmuak tura an lo chhuahbo hlanin kan in chu an rawk chu lo niin. Gas bur 1, Consumer card 3, DVD player, Digital Camera, towel leh Bag te an lo la. Tui pump khawl pawh lak mai tuin Bag-a thun sa ap-in TV bulah a lo la in hung a, an hmanhmawh phelengin an la theihnghilh ta nge ni dawn ni???

Upa-in "Sawm thah ni-ah pawh vawi khat lungngaih a awm chawk" an lo ti mathlawn lo-in hlim takin In ka thleng chu kan ri chel chul ang chu tih nak alaiin kan thil Bo buaiin kan han buai leh rih a, tum lutuk loin Bawngkawn Police station-ah chuan kan han report a, anni lah an hmanhmawh lem lo khawp mai leh nghal. A ni hnihna velah kan inhnuai luahtu tlangval-in Digital Camera hralh an awm a, in ta a ni em va en teh u a ti a, thenkhatin an zu enzui chu a leitute chuan man to zawkin an lo hralh chhawng leh tawh a lo ni a, a pianhmangte an sawi danin kan ta ngei niin kan hria a, kan han zawng kual leh a. Police hnenah report-in a zuar hmasa bertu te inah chuan an han kal a, ani a lo awm lo, a Bialnu Kolasib-ah a zin a, a kal ve a niang an ti a, Police ho chuan nangman zu be chhin teh min ti, ka duh i-khaw si lo, anmahni chuan an zu be ta nge nge a, ani chuan Kan inhmu lo reng reng a lo ti si.

Kan misualpa chu ni 12-ah pawh chuan an la zawng ta zak zak a, tlai lamah chuan Aizawl lam-ah ni 8 khan an lo man daih tawh a ni tih kan hre ta a, thaw khat chu a veng deuh huai a, mahse kan thil ru-tu chu a ni ngei em tih zu fiaha zu dawp turin Police te chu an kal ang a, an zu ti fel mai ang chu tih laiin engmah an ti ta hlei lo a, vawiin thleng-in chanchin engmah kan la hre zui ta lo.

An hnu chhui tur pawh dik tak chuan keimahni kawhhmuh a ni a, a misuala ber an man hma-in Aizawl lamah an lo man tawh leh nghal nen, chumi bawhzui chu thil har vak pawh ni tawh lo-a kan hriat laiin engmah reng reng an ti lo chu mak leh hrilhhaithlak, thinrimthlak tak bawk si a ni. Bawngkawn Station lam kan biak lahin a case i\o Assembly-ah a duty an ti, amah puitu lah Darlawnah a zin an ti thul a mak thei khawp mai, Ka nu phei chuan, "Ka phone chhen dawn, an hmuhchhuah hma chu ka phone zel ang" a ti. Chung vel chu ka buaina pakhat a ni.

Thiantha leh chhungkhatten min lo ngai der-in chaw ei-ah te min han sawm ve a, a chang chuan kan thil bo vel chungchangah rilru pangkhing taka ka kal chang a awm a. chaw ei kham veleh thut pawh thu muang hman lo-a baklenga ka tlan haw chang a awm bawk.

Sunday-ah report pe tur leh thuchah sawi tur ten Corps hrang hrangin min lo sawm ve bawk a, ka chhuak reng mai bawk, kei akar thusawi hi tu tan mah malsawmna a ni lo ang tih hre reng chungin lawm tak-in ka kal zel a, vawi li lai chu thu pawh ka sawi tak kha. A hlimawmin a lawmawm khawp mai.

Ni 28-ah haw a lo hun leh ta reng a, dan pangngai te-in Mumbai chu zanlaiah bawk chuan ka thleng thla leh a, Nu Kawli leh a thuihhruaite ho, ka u fanu Manuni nen, kan nau Chhuansanga leh thianpa Zomuana te chuan min lo hmuak leh thap a, kar lo-ah ka tihdan pangngai bawkin ka thlawhsan leh ta vek hlawm a.

Mumbai atanga International flight-a chhuah hi a foreign ruih tawh mai hian ka hre thin, mi an tam ngang mai thin si, Kolkatta atanga connecting flight nei ka ni bawk si a, ka hnung hle. Ka hma-ah mi 1, hnungah 3, kan vaiin 5 kan la awm tihah chuan seat a full an rawn ti ta mai, a manganthlak leh ta khawp mai a, kan han buai deuh laih laih a, Mauritius lam kal turah kan thawn kual mai ang che u, Johannesburg chu dar 12-ah in thleng hman tho ang, an ti a, J´berg - Maputo flight chu dar 5pm a nih avangin ka hman tho turah ka in ngai a, Mauritius lam thlawhna ah chuan min beng liam leh ta a.

Mauritius kan thleng chu, J´berg kal tur thlawhna a lo inpeih leh ut tawh mai lo niin, keini ho chauh chu min lo nghak tawh a, hmanhmawh takin kan han in check vel leh zung zung a, security te pawh chuan anni kha tih hmasak tir rawh u an ti zel a, kan hming chu an lo lam lauh lauh tawh mai a, kan han in check fel a, Thlawhna bawkah chuan J´berg lam pan turin kan lut leh ta a, ka kalpui Sap nu pakhat chuan "Kan thiam loh a ni hleinem.. a pawi lo e" a lo ti ve bai bai a. J´berg kan thlen chuan dar 12 chu a ri chiah a, ka next flight chu ka nghak leh ta a, buaina dang ka la nei, ka bungrua kha J´berg thleng chauh an book thei si a, ngaihven ngei a ngai dawn a, counter ah lah chuan an la thu si lo, kal dawn tepah ka transfer fel thei ta chauh a, buaina a awm ang tih kha ka hlau sa reng a..

Rin ang ngeiin Maputo kan thleng chu ka bungrua a lo thleng ta hlek lo mai, hawihai rap, mahse midang 5 emaw vel lai pawh chu an buangrua a thleng lo a, next flight ah an rawn thawn a, lo nghak rawh u an ti, min hmuaktu te ka va zawng, ka va hmu mai lo, phone ka tum lahin ka Phone battery a ral thak nun pawh nung thei si lo, Security-ah chuan phone hman ka dil, anni lah an lo strick em em zui, phone hman an phal awzawng lo, mahse mi pakhat chuan hman tur kan zawnpui ang che a ti a, an office pakhatah chuan min luhpui a, thiante chu kan phone thei ta, anni lah inchung lamah an lo awm niin, an rawn chhuk thla ta vat a. Bungrua pawh chu dar 9;30pm velah chuan a lo thleng ta a, hlim tak chuan kan haw ta nal nal a.

In ka thleng chu Hauhuk kah thlak ang dera mut tum nak alaiin ka bungrua an lo theh thal kual nasa lutukin an ti silawng a, a ke a chhe deuh vek a, a huh hnup bawk si, loh theih lohin ka han phelh darh leh a, ka chau nen, ka mu chu ka mu tui ngei mai.

A tuk zing dar 7-a thiante rawn phone pawh ka chhang tha peih meuh lo a, dar 11-ah kan hotupan min rawn phone leh pawn ka la mu a, I la mu a ni maw ati pawh Aw tiin ka chhang hmiah a, "E khai, chawl hahdam rih rawh" a ti, kei lah chakai thi khai ang hnuang ka la ni mai "Ka chawlh hmang chu chawlh hahdam ka ngai a nih hi" tiin ka mu leh ta reng a.

"Chawlhna nuam Krista-ah
Hlimna kim Krista chu
Innghahna nei lote, innghahna a ni si"

tih hi ka sa ka sa pek a, Lal Isua ngeiin, "Nangni thawkrim leh phurrit phur zawng zawngte u, lokal ula, keiman ka chawlhtir ang che u" a ti a, Lal Isua-ah lo hi chuan Chawlhna tak tak a lo awm lo a nih hi tihte ka ngaihtuah kai ta zel a...

11 comments:

  1. Him tak a zoram to i awmna i thleng leh avangin ka lom pui a che .zin dan vel poh ngaihthlak a nuam khop mai .Kum thum zoram ka hmu ta lo .mumbay international air port te poh an ngaih awm toh khop mai zoram chu sawi loh.i han hahbuai anih rikngot chu a.ram dang a han awm meuh hi chuan mi ram kawng te hi a awh awm duh khawp mai .kan aizawl te hi youtube vel ah te ka hmuh chang te hian ka sit toh rap a lo inthlau lutuk trhin si a

    ReplyDelete
  2. I va'n tawng mak thei ve le aw!! Him takin i 'haw' leh thei a, a lawm awm e. Nia, chawlh lak hi kan hah fo zawk ania. Sorkar hnathawk ho phei chu office hi kan chawlh na hmun ani mah mah awm asin maw le..

    ReplyDelete
  3. Chawlhna hahdam lo tak i hmang a ni maw? A zialo hle mai. Mahse hetiang teh hrep hi tawng lo la, he thuziak ngaihnawm tak hi kan chhiar awm si lova...

    ReplyDelete
  4. Mizote chawlh dan alawm. Mahse, nitina kan hna atanga thil dang tia hah chu hah a dam tho. rilru leh thluak a refresh thung a lawm.

    Tluang tain i hmun i thleng leh a, a lawmawm e.

    ReplyDelete
  5. A va pawi ve aw chung tiang te in lo tawng chu. i chawl chu a dangdai ve kher mai. Tluanga taka i thleng leh thei te chu a lawmawm khawp mai.

    Chuanin, tum hnih lai Mumbai ah i rawn kal a maw???? Chuan min hrilh lo a maw???? Ka la na khawp mai! :(

    Natinge engmah i rawn saw lova i rawn kal dawn tih te? Hotunu chu ooooo... :( Airport bul lawk kha a sin kan in chu.

    Chuan Zomuana i tih khi, sam sei hmelchhe deuh kha mi?

    ReplyDelete
  6. Ekhai, a zialo ti phawt ang. Inhmuah ni a inchhung burua an/a lo ru chu hrilh a hai duh awm hle mai. Chawlh hmang tur haw chuan chawlh mumal pawh i nei thielo a ang ber a nih hi maw. Police ho chungchangah hian comment tlem ak telh duh. Kan Police ho hi anmani insawi dawn chuan Crime an solve hnem, India ramah pawh an record a tha lawar lak. Hei hi a chhan ber chu ka Society a YMA/VDP/ JAC an chak vang a ni, anmahni tih hi chu a tlem asin. Mi man sa, mi dawp chhuah sa an la a, crime an solve thin. Detective hnaah phei hi chuan an hopeless zia a tilang chiang hle mai

    ReplyDelete
  7. @hmingtea - nia chiah e, han ti ve khanglang ila, mi ram han hmuh chuan mahni ram tan thahnemngaih a na duh khawp mai, eng kan tih theih a awm si lo a le..!!!

    @dr_feelgood - Ka kal lama ka thil tawn thenkhat ka la sawi kim lo mah mah anih khi.. lolz Tunah chuan ka hna pangngai ka thawk a, ka zia leh tawh e.. ahaha

    @Zaia - Nia, hetiang teh hrep han tawn chak chak hi a nuam ve riauin zu hria ia.. sawi tur a ti tam ve alawm..

    @Fela - Ni ve tho e, buai dan danga han buai hi a nuam ve hranpa tho e..

    @illusionaire - Hotupa.. ka rawn kal leh hun chuan ka hrilh tawh hrim hrim ang che, ni hnih/khat tal ka cham thei tawh ang chu, hun ka nei lo lutuk a, ka chhungte pawh min lo hmuak suh u ka ti lawm lawm zawk a, darkar hnih/khat bak kan inhmu hman chuang lo a, awmzia lo alawm..

    Chuan Zomuana .. ni chiang e mawle... a lo khi teh sawng a!!!

    @vana - Police, i ti dik, duh aiin ka la ziak na lo mah mah anih khi hehe.. lo ngai haw deuhte an awm ang tih ka hlau deuh, an nep thlerh thlerh hi ka ti khawp...

    ReplyDelete
  8. a ngaihnawm khawp mai..kei lehkhazir a hmun dang a ka awm ve thin laiin mizoram lam a ka han haw te hian tumah in ah awm tur an awm ngai loh avang in a hrilhhai thlak hle hian hriat chang ka nei thin a...nang zawng chu aia hrilhhai thlak tur chu i tawng tlat mai a.... chu tah mizoram a ni 23 vel i awm chhung in buai reng reng in hun ila hman hmel bawk sia....!!

    ReplyDelete
  9. @dula - khawilo kal han haw-a in nghak tumah an awm loh chuan a hrilhhaithlak duh ngawt asin... In rawk han tawn hi a hrilhhaithlak piah lamah a zahthlak ngawt asin!!!

    ReplyDelete
  10. Zin chu a hahthlak alawm, hei kar hnih na chiah ani ta. Kar leh ah chuan kan zo tawh anga, ka haw thei tawh ang :)

    ReplyDelete
  11. @chhangte_ll - zin hi a hahthlak na-a nuam chu ka ti phian, buaina neuh neuh hi ka tawk leh mai thin pawha.. In training vel te chu in tluang maw?

    ReplyDelete

Followers