Thursday, September 24, 2009

Africa - A thim chhah lai!!!

Kawngpui, alkatra luan chu pensanin hnimbuk kara kawng tereuhte awmah chuan kan lut a, hnimbuk kan kal pelh chuan kawng atanga hmuh mai phak lohah khua a lo awm reng mai, he hmunah hian mi hausa ten khawvel hi ka ta emaw tia nuam tinreng an chen laiin mual eng hmu ve pha lo mi tam tak an lo khawsa ve mek a ni.

Kawng chu vaivut chhah takin a khat tlat a, kephah pil dawn dawnin kan dai thawih thawih mai, heng kawngah hian vaivut hian kal a ti harsa hle. Chu kawng ngeiah chuan nitin kalin, an duhtakte nen pawh an lo inhmu ve thin a, an hnathawhna panna kawng a ni a, khawpuiah leh khawdang leh an thenawmah an kal dawn pawhin he kawng tho hi an lo zawh thin. He kawng vaivut sen thurin a bawh khah vek hi an nitin chakkhai lam nana an hman rim ber a ni ve tlat.

Chhungkaw hrang hrang chu ram bial bik neiin in-te 4/5 emaw an sa thlih thliah a, chung inte chu zana an riah nan an hmang a, chaw erawh pawn lamah an chhum mai thin. Inleng an neih pawhin pawnah an inkawm a, inchhung chu an in hmuhpui tam lo hle awm e. Tin,Hmeichhia-in nau a neihin thla 3 chhung chu a naute nen pawnah an riak tur a ni an ti, duat ngai hmeichhe nausen pawm chu pawn-ah a mu a, a khawngaihthlak hle.
(Pawnah mei an chhem a, rawng an bawl mai thin.)

Naupangte chuan pheikhawk bun tur nei hek lo, an ke khir chat bir ber chuan vaivut an dai thawih thawih a, kelawnga kal a nih miau avangin rannung seh thei apui a tam a, hei vang tak hian Uihli sehna mai mai pawh a pan a, thenkhat phei chuan an thihpui hial mai. Damdawiin lian an khaw hnaiah a awm lo, Sub centre hnai ber pan turin km 12 emaw vel kal a ngai a, chapa(bus) chuan man Mt 20/- a ni, an han thleng ta teh cheng a, sub centre-a duty te chuan hetiang damdawi kan nei lo ti-a an lo hnar loh leh mi an tam, lo nghak rawh u tiin thingtlang atanga lokal te chu an ngaihthah em em mai a ni tih an sawi, an tan sum neih a harsat tehlul vei nen. Heng uihli seh atan hian damdawi an nei lo a, Baygon an tih mai Insect killer hi an spray thin a ni awm e, a na a chhawk em ni ti-a kan zawh chuan, “a thak lutuk tur a ti nep deuh a” an ti. “Hetiang in spray chuan vun tan hian a tha lo ang,” ka ti ve ringawt na-a a thlakna tur damdawi ka pe thei chuang si lo, an hman theih hnaivai ber chu insect killer kha a ni tlat, an hmang leh thin ang.
(Naupang ke, uihli sehna hmuamhma)

An thawmhnaw mai bakah an taksa a bal hle, han tawh nak alaiin hmuh nuam an ni lo khawp mai. Intihfaina turin Tui duh tawk nei miau hek lo le. Thenkhat chuan tuichhunchhuah an lai chawp a, hei hi Meter 20 chuangte kan lai an ti, a thuk khawp mai,mi nazawng neih theih a ni lo, NGO thenkhat chuan a laihna hmanruate pe-in hmun thenkhatah chuan Tui pump te pawh an siam, mahse hei hian khawtlang a chawm zo lo nasa, tuichhunchhuah pakhat hi chhungkaw engemawzatin an inhman tawm a ni.(An tuichhunchhuah laih hi a thuk khawp mai)

Power supply phei chu vana rah ang a ni, an mumangah pawh an la nei chhin lo ang, an transportation neih that ber pawh thirsakawr a ni a, a chhia repair thiamte hi an luck ve thin khawp mai. An tan HIV/AIDS chu a hlauhawm loh letling zawk, thil dang ngaihtuah tur apui an ngah lutuk tlat.
(An khaw cycle repairing workshop..)

Damdawi lam an nei chau bawk, invenna engmah nei bawk hek lo, Family Planning te chu hnai lo mai hi a ni a, an nawmchen vena awm chhun Sex chu dan rual pawh a ni lo, invenna nei hek lo le, kumchhirin fa an hring a, enkawl zo hek lo, chaw tha hmu lo naupang, ring rek ngit nget, dul kiar ling leng fa an nei teuh mai ani.(Hemite nupa hian fa 8 an nei, 2 dang an lo leng bo hlauh a ni)

He ram chhunga chengte nun hi a harsa, anmahni han kawm phei chuan an awki te hi a hniam chal mai bawk si a, an khawngaihthlak khawp mai. Chutih laiin mi tam zawk chu Pathian pawh hre lo, Pathian hming la lam reng reng lote an ni si. Ngaihtuah an ti thuiin hengte hi Pathian hmangaihte vek an ni si a, engvanginnge hetianga rethei tur hian a siam bik le tih mai palh awl a ni. Mi thenkhat ka kawmte chuan Africa mite hian Pathian anchhia an dawng niin an inngai ve tlat bawk. Eng tin tak awm zel ang maw le..????

"Thim chhahna lai ber pawh
A lo Eng thin,
A kutan an awm vek, Ama relin..."

15 comments:

  1. e khai, community khat lek i rawn focus pawhin khawngaihthlakzia leh an tan beisei tur a van turzia kan hre thei mai alawm le. Heti khawpa African countries an retheihna chhan hi chu an ram a ralmuan loh vang, hel an tam vang a ni pakhatin ka hria.

    ReplyDelete
  2. Captain- in hnathawh avan ropui thin em ! Hetiang anga khawsak harsatna hmun, thim chhahna lai ber su eng tura i inpekna a fakawm e!

    ReplyDelete
  3. Hi Captain, THQ nuam tak atanga fehchhuak a mipuite marphu hre phak tura hun i insiam thei hi i fakawm e.

    Fa khi an la nei tam tawk lo anih khi, Zambian ho an la tluk lo. Fa 8 chu a tlem em mai, fa 35 nei i hre ve tawh em!? Hetiang nei hi chhiar tham fe an awm.

    ReplyDelete
  4. In hnathawh hi a ropui ngawt mai, tlukloh rim in va han nam em!

    ReplyDelete
  5. Mite tluk lo ka inti thin. Vanduai bik niin ka inngai thin a, rethei bik emaw ka inti fo. Mahse..............

    Captain, in hnathawh hi ropui ka ti. Ni, tluk loh rim i nam e...

    ReplyDelete
  6. All the credit goes to Capt. and the glory to God :-)

    ReplyDelete
  7. An va han khawngaihthlak em em ve aw...

    khawi hmunah pawh hian ngaihdan atthlak tak tak hi chu a lo awm zel anih hi...naunei thla 3 pawna mut tir chu nausen dam chhuak zo lo an tam duh awm mange aw...vairam hmun thenkhatah pawh hian laihruaiah bawng ek tah an ching a, tetanus kaina awlsam tak a lo ni hlauh bawk sia...

    ReplyDelete
  8. Hla taka mi thim Pathian thu awih lote,
    Thlarau chhiarsen loh an boral mek e;
    Tutenge kal ang chhandmna thu hrilin,
    Isua lam ena engpawh huam zelin.

    I kalna apiangah Lalpan a malsawmna kengtu ah hjmang zel che rawh se.

    ReplyDelete
  9. Africa khawmualpui harsatzia ka hriat chang hi chuan Blood diamond movie a quote ka hrechhuak thin, " That diamond is my ticket out of this God forsaken continent' te, "“Sometimes I wonder… will God ever forgive us for what we’ve done to each other? Then I look around and I realize… God left this place a long time ago" tih te kha ka hrechhuak pek. An ram a retheih mai bakah chi leh chi inhuatna hian bu a khuar theui em mai a.

    ReplyDelete
  10. "Mi thenkhat ka kawmte chuan Africa mite hian Pathian anchhia an dawng niin an inngai ve tlat bawk"
    Mingo ho suahsual vânga hetianga awm anni alawm, "Kut pakhata Bible zakzeh in an tawngtai puia, kut lehlamin an ram an chhuhsak a. Chuan mahni ram awm dan a zirin ramri an siam leh a, chumi chhapah a ram leilung hausa tak pumbilh nân ralthuam an hralh leh a". Africa khawmual hichu mingo ho hian an tichingpen vek niin ka hria !!

    ReplyDelete
  11. @Fela - Ania sin, group dang ho kalna pawh keini kalna nen a dang teh chiam lo, rethei tak, hrisello tak an ni vek mai. Damdawi, Zirna leh Tui hi an mamawh langsar tak a ni vek mai.

    @Sekibuhchhuak - I ti lawmawm, mahse keini te chu a thimlai tak takah kan thawk lo zawk a, han luhchilh tak tak chakawm chang a tam mai

    @Thiama - E khai, Zambia lam chu fa neih lamah kan la tluk lo deuh maw?? 35 em em chu an nei ve lo anih hmel, 13 nei chu ka hria a, nu pakhat hrin vek. Tin, thingtlang lamah hian fa ngah chu an tam zual a, Morumbala-a kan Local Officer pakhat chuan 11 a nei a, amah phei chu a tar tawh khawp nghe nghe.

    @aduhi - khai, tluk loh rim nam han intih chu i ti zahthlak e a, heng mite tana thawk nasa tak tak hi an tam asin, USA, UK, leh Europe ram hrang hrang atanga lokal kum 6 lai helai hmuna khawsa tawhte pawh an awm asin...

    @Zaia - Khawvelah hian a BER nih hi a har a ni, rethei, pachhia ni-a inngaih chang chu a awm ngei mai, mahse keini aia tuar nasa fe hi tam tak an awm, mi tam tak chuan an rethei tih pawh an inhre pha lo hial zawk ang.

    @Alejendro - Thanks, may God be glory.

    @luliana - tunlai chu i va reh ve... nia, an khawngaihthlak asin. rethei bak berh e ti lo hian an puithu phian bawk si!!!!

    @KIamlova, Puii - I ti lawmawm e, tu nge kal ang chhan turin tih hi zawhna pawimawh tak a ni e.

    @Vana - Blood Diamond hi kei pawh ka rilru a hneh teh mai ania, a hmun ngeia han hmuh phei chuan God left this place a long time ago tih hi a dik hmel thin, anmahni zingah ngei pawh hian ka sawi ang khian Pathian anchhe dawng ni-a inngai tlat an awm. An vun rawng, an taksa leh an sam thleng hian an buaipui nasa ve thin khawp mai.

    ReplyDelete
  12. @chhangte_ll - Ngaihdan a tam, pawm dan a tam a ni e. Mingo ho hi chuan kawng tam takah bad influence chu an nei nasa, ka awmna ngei pawh hi Portuguese leh Brazilian hian an luah hneh khawp mai, tin mihang hian Mingo ngaihsanna hi an nei lian khawp.

    ReplyDelete
  13. alawmawm e..,hengho rawngbawlsak tur hian mihring mihrinna atang chuan chak teh mahila, Pathian, kohna diktak kan hriat si loh chuan thil harsa tak ani si a...
    Kan lo tawngtai pui zel ang che u...

    ReplyDelete
  14. @vla - i ti lawmawm hle mai, min lo tawngtaipui zel dawn avangin.

    ReplyDelete
  15. Tluang takin i thleng maw, Keipawh i sulhnu rim hre tur in Aizawl Tluang takin ka thleng leh tawh e.

    ReplyDelete

Followers