Thursday, May 28, 2009

Thu puarpawleng

Tukin chu ka post ka enlet hlawm a, a van sei thei hlawm diah duah tak, tu pa sermon emaw ni se a ninawm ngawt thinin ka ring a ni.

Sermon sawi takah chuan, Pa pakhat sermon pawh kha a bei rei khawp mai a, darkar khat lai a sawi a, a ngaithlatu pakhat chu inah khan Vawiin chu eng thu nge in ngaihthlak? tiin an lo zawt, ani chuan Sual thu tih chauhin a chhang a, Sual thu chu engtinnge an sawi a? an ti leh, ani chuan A do-a do tur a ni awm e.. a ti ringawt e an ti. Darkar khat lai thusawi ngaithla si chuan sawi chhawn tur a nei chaurau khawp mai.

China dawr ka hmu fuh:
Hmanni lunch eia ka chhuak chu ka haw lam China dawr ka hmu fuh a, thawmhnaw nalh deuh deuh tlawm te te-in an lo zuar a, ka kual den den a, hun leh hai ka lo ngaihtuah miah lo a.

Nakinah chuan an nula pakhat hi ka bulah a lo kal a, Excuse me, a rawn ti, an chhun chawl turin dawr an khar duh chu lo niin, (Dar 1pm-ah an chawl a, dar 2-ah an hawng leh thin a lo ni.) ka han hawi chhuak chu thawktu zawng zawng chuan ding chungin min lo en thap tawh a, sorry tih paha chhuah mai loh chu hmabak awm tawh lo. Anni lah chuan Chinese i ni em? min la ti zui, a mihang ho-in min hai chu ka la hrethiam, anmahni chinese leh zelin Emaw, min ti chu mak ve tak a ni.

Englo lo chhuahna:
Hmanlai hian pa pakhat hian Sa Bel a ru a, a ei hma chuan a ek a chhuak ta tlat mai a, hmun pakhatah a bel chu a dah a, a ek san ta a, chutia a ek hlan chuan a sa bel chu a lo bo daih mai a, a thinrim hle. A han zawng chiam dawn a, ani pawhin a ruk ve tho ni bawk si, a ek hlan ber khera bo ni bawk si chu auchhuahpui ngaihna a hre lo hle, ti hian a rak ta chiam mai a ni.. “Tu nge helaia ka englo englo kha, ka englo hlanin lo englo, a englo duh ve leh englo ve se a ni mai a, mi englo sa lo englo te chu a..” a ti ta chiam ringawt a, chuta tang chuan ENGLO tih hi a lo chhuak ta ani tiin mithiam ten sawi lem lo mahse a nih hmel ve riau.

13 comments:

  1. Thu sawi rei a ka hriat chu darkar 3 vel a sawi hnuah, "Bung li in ka thena, bung hnih na ah kan lut thei ang" a ti e an tia lawm.

    Dawrah pawh chuan i va awm rei awm ve :))

    Pa huihphai tak pawh hi ui talh apiangin a hmel a ti lang ve ziaha. Vawikhat chu an ning deuhin, "Uisa tui sa ver vawr hi hawp tir ila a sim mahna" an ti a. Mahse a ni a han hawp chiah kha, "Chhak dawn chuan uisa tui hâng chhak nih a duh silo, a lem dawn chuan sâ a ti bawksi - A chhumna bel ah khan a chhaklut leh ani awma, a bel chawpin an pe vek" an ti alawm.

    ReplyDelete
  2. chhangte_ll
    Awm rei nang, ka chhun chawl zo haw lam ka nia, anni chhun chawl duh ve tho khan dar 1-ah an lo inkhar thin a lo nia, ka han edit nghal nghe nghe teh ang.. :))

    ReplyDelete
  3. Hmanlai Kolasib pa asin thu sawi rei, Kristmas urlawk zanah a sawi a, Zawlnei Isaia te hrilh lawk dan atangin an tan chho va, Thuthlung tharah an kai chho leh, zan dar kaw vel a ni tawh a, naupang thenkhat an lo muthlu a va hmu fuh a, ava hau. "Lo la mu thlu reng reng suh u, kan ti dawn chauh alawm, Mari pawh a la rai lo a nia" a va ti a. Mari rai chhungin a duh rei bawk si, a pian meuh chuan lengkhawm peih meuh pawh an awm tawh lo a ni awm asin.
    Kolasiba kan zirtirtu Mr Vanlalchhunga (L) chuan 'hmeichhe titi chuan a pawimawh lai zawng zawng hi englo in an thlak vek zel e' a ti thin.

    ReplyDelete
  4. Nia i blog post ho hi a thui thei, mahse a ninawm hauh lo thung, i ziah dan style hi chhiar a nuam tlat. Mi thenkhat thuziak sei lemlo deuh mahse chhiar ninawm deuh hi a awm tlat. I ziak thiam ka tihna chhan chu engtin emaw han sawi kual vel lo hian direct deuh hian i ti thiam tlat, han inlak tawngkam thiam vel tumna a awm lo, i thiam ve tawp.

    P.S. Ka lo link che aw?

    ReplyDelete
  5. Mi pakhat pawn ti hian thu a sawi:

    Tlang chhip a khaw awm chu thuhruk theih a nilo. Tlang chhip a khaw awm hi thuhruk a harsa em em a, thuhruk pawh an tum ngailo tlangpui a ni.

    ReplyDelete
  6. Hehehe, englo lo chhuahna khi a comics in ka chhiar tawh. Mizo comics chhuak thin, "Super Comics" tih kha i hria em aw, a rei tawh a chhuahna chu. khatah khan an rawn ti tawh a, ka ngaihtuah chhuak neuhneuh a, ka nuih a za tet tet. haha

    ReplyDelete
  7. van hre ril thei e... Englo lo chhuahna hi ka vawi 1 hriatna. I thuziah chhiar a nuam thin khawp mai

    ReplyDelete
  8. Hehe! tun tum chu, tunlai hmeichhe pawnfen ang mai lah ni!!

    Englo hi, ka englo loh lam a lo ni kher si a, ka englo vak ta lo mai. Duh leh, nakinah, ka la englo tha leh ang!! :D

    ReplyDelete
  9. Kiamlova&Puii -
    Major Saibuanga a ni hial lo maw, a thusawi ka hriat pakhat chu, 1969 vel atangin a tan teh reng a, darkar 1 dawn a sawi hnu pawh khan 1990 kha a la sawi thleng thei lo a, thalai ho chu kan zi kan zi mai asin...

    aduhi -
    i ti lawmawm e, tawngkam hi thiam teh vak ngai pawh ka ti lo, hmeichhe tan phei chuan.. hehehe

    Kei pawh ka link che.

    Naupang^fel-
    Tlang chhipa khaw awm chu thuhruk a harsa dawn em alawm...

    Joseph L-
    Super Comics kha ka ziah alawm... han ti vel ilah.. i awih ve tho em????

    Geminiboyz-
    i ti lawmawm e, a ril ru riau ami.. ehhh

    Zaia -
    Hehe.. han englo nghal law law la tha tur, englo hun hi i englo tlat zel nang chu..

    ReplyDelete
  10. Q. Lal englo, englo kha i englo tawh em?
    A. Englo lo

    ReplyDelete
  11. Hre ho thei si, ngaihnawm thei si! Si hlir ni ringawt...

    ReplyDelete
  12. "Englo" khi ka tan lutuks :D

    Ka nu leh ka ni pawh hi an han in man mai mai khawp a. Ka ni in "englo kha i englo tawh em"? a tih pawhin ka nu chuan "Aw" tiin a chhang thei thin :D

    p.s: I blog ka hawn apiangin ka firefox a crash zel...hei a vawi 4na ah a fuh thei hram :P

    ReplyDelete
  13. Fela-
    Englo vat rawh, chuti lo chu i englo mai ang...

    VaiVa-
    Hahaha.. ho deuh deuh dang pawh a la awm ania aw..

    luliana-
    Ti nge i FF chu a lo crash zel a, keimah ka ni lo ania aw.. :) A crash a nih pawhin awmze nei deuh khan lo crash se.... hahaha

    ReplyDelete

Followers