Friday, May 22, 2009

Thil tereuhte atangin...

Zan khat chu thlipui leh ruahpui a rawn thawk nghek mai a, kawlphe, tek leh khawpui ri-te nen a maka makin a thawk a, kan ram atan chuan a mak hle.

A tuk office kan kal chu le, chhe thei zawng zawng hi a chhia a niang tih mai turin kan chhe nual ta mai. Power supply kan nei lo, Kan internet line a chhe bawk, kan mangang khawp mai.

A siam thiamte kan ko, anni lah an rawn kal mai thei nahek lo, “Pawih hren kang mahin muang marin an tih kha..” tihte chu an hre ve ni awm fahran hian quotation an rawn fax te te a, chu chu keiin ka lo sign a, seal nena kan tih thlap hnu-ah kan thawn let leh a, tuna duh tawha thlam bang pin nghah te chu tih ang vel hi kan ni..!!!! chumi hnu-ah technician an rawn kal chauh teh reng aaa… hotute zinbo lai lo ni vei nen Khawte Lal ang maiin ka vir chuk mai.

Chutah, kan technician chuan a han en vel a, a that lohna a hmu mai ta lo tawp mai. Mechanic thiam tawp ang deuhin a khawih ngai a khawih a khawih mai. A hnu chuan a main switch ka ti mai a, a bawm pui ber chu hawn a ngai a ti a, kan han hawng dawn, chabi kan hmu ta awzawng lo mai a, chabi hrang hrang kawlkhawmtu kan hotu pakhat lah a zinbo, kan han phone, a awmna a hre mai bik lo, buai tau a tet a ni ta hawt mai.

Chabi lam buaipui tur midang kan ko leh, ani a rawn kal, kan locker chu sam te-in a rawn hawng a, duplicate chabi kan siamtir nghal bawk. Chumi hnu-ah chuan kan Internet chhiatna chu an zawng hmu ta hram a. Chabi tereuhte hi a lo va pawimawh ngai emmm.

He chabi ang chiah pawimawh deuh mai te reuhte ni si, thunun har em em mai hi kan taksa bung hrang zingah hian a lo bet tel reng mai, chu chu kan LEI hi a ni.

Lei hi a te hle na-a ven zawh a har riau mai, kan sawi duh loh tha tha min sawitir a, midangte chhiatna leh tlin lohna lai ringawt maite hi min sawitir a, a ngeiawm reuh ngawt mai. Thenkhat leili phei chu hmunphiah bul ang maia nal hi a ni a, thenkhat erawh chu khandaih ang maia hriam a ni thung a, khawi ngam a har ber ani ti-a tirhkohin a lo sawi hi a mak hauh lo mai.Chuvangin, Thuhriltu pawhin Pathianina i kal laiin i lei veng tha rawh a lo ti hial reng a nih hi.

Class IX kan zir laiin, “A spark neglected burns the house” tih kan zir thin a, Meisi ngaihthah-in in a tikang e tihna ni awm tak a ni. Chhungkaw pahnih chanchin a ni a, Ivana leh Gabriel te chu inthenawm mai an ni a, an pa-te ve ve an dam that lai chuan chhungkaw inngeih tak an niin, thil engkim mai tlakchham nei se an inban tawm reng a, an inpuitawn reng thin. Naupang-in inchhunga ro an rel chinah thil a danglam ta, Nu pakhat-in tawngkam a chhehsual avangin an phek buai ta vek mai.

Ivana monu chuan arpui tui lai a nei a, tuk khat chu an pal zuan khumin an thenawmte ram chhungah a tui a ni tih hriain a va kal a, “Ka arpuiin kan pal a zuankhum a, in huan chhungah a lo tui mial lo maw?” tia a zawh dek dek laiin, thenawm pitar chuan “Kan arpui pawh a tui mek a, keimahni artui lo chu kan khawm ngai lo, tin, thenawmah artui zawng turin kan kal ngai lo bawk..” tiin mei nei takin a lo chhang khauh mai chu, nu thin tertek a chhuak a, an inhau ta chiam mai, an inhau thui zel a, sawi loh tur tha tha an sawi chhuak ta, kar hmasa-a kan nghawngkawl in hawh pawh min la pe lo, I pasala pa pawh I chawm zo lo an ti thul. Inhauhna chu a punlun zel a, an inbe tha hlei thei ta lo, a tawpah phei chuan Ivana-te in chu Gabriela chuan a hal ta mai a, a khaw chanve lai a kan phah ta a ni.

Ivana pa chuan thil awmdan a natna khum atang chuan a lo hmu vek a, pawi a ti em em mai, Ivan enge ka hrilh che kha, mei chu a kan hma khan meisi hmet mit turin ka hrilh che a ni lawm ni? A ti lawm lawm mai. Ni e, nu pahnihte khan an tawngkam lo veng fimkhur deuh ta se chuan thil a danglam ngei tur hi a nia le..

He lei tereuhte hi kan ven zawh loh avanga thu tha lo pui pui kan chhakchhuah thin hian mi rilru engzat nge a tihnat a, mi pawi eng ang chiahin nge kan sawi thin tih hi mahni theuh in en chian a, fimkhur a tul hle a ni.

Keini aia chan chhe zawk ni-a kan ngaihte hi diriam leh cheksawlh kan ching hle thin, thil tha lo ti ni-a kan hriatte chu kan sawi chhe bawng bawng a, ar chuk tuilo khawpin kan chhuah a, kan theih dan kawng kawngin, kawngro a su emaw su lo emaw, kan hriat chin chin kan ramtha sawi hmiah hmiah zel mai chu a nih hi. Hetih lai hian enge keimah-ah a sawhkhawk lo thleng thei tih hi kan ngaihtuah tel a pawimawh. Vawiinah hian ka thianin Hmingchhiatna emaw mualphona a tawrh ang hi tuar lo mah ila, engemaw tawng thei reng kan ni tih hi kan hriat reng a pawimawh.

Ziaktu pakhat chuan “Thil diklo hmu thei tak ni lo la, chhuih leh pet zuitu ni bawk hek suh” a ti a, a tha khawp mai. Thenkhat chu mahnin thiam nei mang si lo hian mi thil tihsa lo sawisela ram tang tlat an awm thin, a thil sawisel ngei mai kha ti tha turin ruai ta ila eng ruai chu a ang bik lo mai thei si a. Chuvangin, he kan LEI tereuhte hi I veng tha teh ang u, buaina lian tham chawk chhuak theitu a ni si a.

7 comments:

  1. Mizo thawnthua Laruanga tawngthei lutuk an nu leh pa ten a lei an tan sak kha mawle. Kan Pipute atang renga tawngtam hnam kan ni ang :)

    ReplyDelete
  2. A dik lutuk. Lei hi sual hlawm a ni an tih thin tak kha mawle... Tawngtheih lutuk a tha lo a, chutih rualin tawngmawh lutuk pawh a tha chuang lo. Bible pawhin 'Tupawh a ka leh a lei veng tha chuan manganna lakah a nunna a veng tha a ni" a tih kha. Chuvang chuan kan tawng leh thusawiah tefimkhur luat a awm thei lo.

    ReplyDelete
  3. Haha! in internet a chhiat tum chu - in buai ve awm hle mai! Chabi pakhat te avanga room-a luh theih loh te, In chhunga luh theih lohte pawh a awm chawk. Ngeiawm duh deuh asin.

    Lei hi - veng tha turin thupek kan hmu, mahse ven that hi a har thin mang e! Class-IX zirlaite a bu ang thlapin i la sawi thei zel mai! I mak e!

    ReplyDelete
  4. a ni khawp mai Lei hi chu ven fimkhur thiam chu angai ani e...mihring mi ze hran hran kan kat nuk mai si a..huat zawng leh hlimpui zawng te hi a in ang lo nuaih mai bawk si a !

    ReplyDelete
  5. chhangte_ll -
    hahaha... Lalruanga, a lei an tansan ber lah khan a zawm leh bawk sia ti raw...

    Mizo chauh hi kan ni lem pawn ka hre lo, hei ka awmna ram mite ho pawh hi thu sepsel te te an sawi an sawi ve tho mai.

    Geminiboyz-
    ni e, tawng mawh lutuk hian pawi a sawi ve thei tho mai. LEI venthat, sawi leh ngawih hun hriat hi a tha ber chu niin a lang.

    Zaia -
    Buai teh reng mai, ka vir chuk mai asin.. kan chabi lah chu tereuhte mai hi a ni a..
    Ka thawnthu sawi khi chu nang pawn i hre chiang viau tho lo maw???

    avena -
    nia, fimkhur tura hrilhlawk hi kan ni vek mai chu a nia, insumtheihna hi thlarau rah an ti bawk em kha...???

    ReplyDelete
  6. Rikrum thila invenna (Risk management)neih that pawimawhna min ngaihtuahtir. Salvation Army IHQ hian Computer server London a mi a chhiat palh emaw Indona avanga a operate theih loh thut thulha invennan Switzerland-ah Server reserve a dah a. Switzerlanda an dahna chhan chu Khawvel Indopui a la in hnamhnawih ngai lo ram a nih vang a ni.
    Lei chu ven that a tul vang a ni ang chu, pal mawi taka a hung tlat ni ti rawh!!! tha ka tih loh ve pakhat chu, mi rilru tina tur leh tithinur tur zawnga 'chumi chuan chuti khati chuan a ti che' tih ching LEI hi.

    ReplyDelete
  7. Kiamlova & Puii -
    Lei Pal... hahaha.. Saw lama an sawi dan anih duh hmel e..

    ReplyDelete

Followers