Thursday, May 7, 2009

Lei Ro Hlu

“Khawvela thiltithei ber chu engnge ni?” tiin inzawt ta ila, kan dinhmun azirin kan chhanna a hrang thluah awm e, ziaktu pakhat chuan, “Khawvela thil tithei ber chu HMEICHHE MITTUI ANI” tiin a ziak a, he thu hi kawng tam takah a dik viau mai. Mipa, inti paa ve tak mai pawh hi Hmeichhia-in mittui nena an thlem chuan an duap zul fo thin nia.

Hmeichhia hi Pathian kutchhuak, mipa kawppui atana siam a ni a, Mipa-in a rahbeh tur atan emaw a thunun atan ni lovin a thurualpui tur a kawppui, amah tanpui turin mipa nakruh atangin Pathianin a siam a ni.

Kum 1872 khan Julia Ward Howe chuan United States-ah Nute Ni hman a rawt a, hei hi a hmasa ber ni-a ngaih a ni. Kum engemawchen hnu-ah Boston khua-ah Nute Ni pual inkhawm a huaihawt a, Mary Tawless Sasseen Kentuckey-a zirtirtu chuan kum 1887 khan Nute Ni lawmna a siam bawk a. Chumi hnu-ah chuan Anna Jarvis Grafton khua-a mi chuan ram pum huapa he Nute Ni hmanna tur hian a campaign tan ta a, May thla chawlhni vawihnihna chu hemi ni pual atan hian a thlang a, hemi ni hian Carnation pangpar a kawrah a tar thin a ni.chuan NUTE Ni hi an hmang a, Andrew Methodist Episcopal Church-ah chuan Anna Jarvis-I Nu Pi Anna Reeves Jarvis hriatrengna atan NUTE NI hi an lo hmang ta a ni.He NUTE NI hi Ram pum huapa hman a nihna leh hriat tan a nihna chu May 9, 1914 khan a ni a, hemi ni hian US President Woodrow Wilson chuan Nute Ni chu ram pum huapa hman a nihna tur thu chu a nemnghet a ni.

He Ni bik Zoram lamah kum hnih ka hmang ta lo a, ka blog lamah ka han riam ta hret a ni.

Miss Universe emaw America President emaw khawvel mi thiltithei ber pawh ni raw sek sek, an bul tanna chu an Nu te vek a ni. Nu-te hi an hlu em em a, tlema nu pharvar deuh, fa-te enkawl tha lem lo ni-a kan ngaihte pawhin Pai lai hrehawm thla kua chu an paltlang vek a, nau hrin natna hrehawm an tuar vek a ni. Khawvel eng hmu tawh zawng zawngte tan chuan he nu tawrhna hi theihnghilh leh hlamchhiah chi a ni lo.

Ka Nu hi nu azawnga nu mawl ber pawh ni mahse ka tan chuan a hlu a, unau hmeichhia hlir pathum pian tawh hnu-a a palina ni tura ka pian pawhin (Mipa neih an beisei tawh hle a ni..) phunnawi lo-in duat takin min enkawl a, min enkawlna zawng zawnga vawiin thlenga ka lawmna ber chu Krista hriatna kawnga min hruai hi a ni. A chhan chu Ka naupan tet atangin tah belh leh zakzum ka ni a, chhung inkhawm-ah pawh tawngtai ngam ngai lo ka ni. He ka hun harsa hi paltlang turin theih tawpin, Nu-in an tih theih ang zawng zawng chu a ti vek a, atawpah chuan Bible chhiar ringawt lo-a tawngtai ka ngam ve ta a ni. Vawiin ni-a ka dinhmun min hretu leh ka tunhma dinhmun hre tu chuan ka tun dinhmun ka thleng hi mak an ti vek ang, mi zakzum leh tahbelh, tuallim lo, thiante zingah pawh inkiltawih reng mai kha Pulpit-ah te sermon a thlak ve ang tih chu tuin nge ring pha teh lul ang.

Chu mai a ni lo a, Pathian rawngbawl tura ka inpekna kawngah pawh khawvel thil ngaihtuah chuan hna sang zawk leh awhawm, hlawh pawh tam zawk beisei ve thei tur ka nih lai pawha rawngbawlna kawnga kal ngei tura min fuihtu chu ka Nu tho hi a ni a, tlema ka rilru hnual deuh chang leh hwikir mai ka duh chang pawha min fuih harhtu chu amah bawk a ni.Ka pa-in min boralsan hma avanga a chunga mawhphurhna rip tak mai lo tla ta hi mi tam tak chuan an tuar zo lo ang. Nimahsela, ani chuan Pathiana rinna nghat tlat chungin tawngtaina-in min enkawl seilian a,“A dam chhung ni lo rei se, a thawhrim rul ve ila..” tih hi kan duhthusam a ni reng fo na-a eng chen pawh min dampui mahse kan tana a thawhrimna hi chu kan rul seng chuang lo ang. Nu-te hi kan lei ro hlu berte an ni e.

"Leimi hrinhniang zingah,
Chun anga Hlu awm maw..?
Senlai chun chawi loh lengte zawng
Rairah riang an lo ni"

21 comments:

  1. Chhiar a nuam leh hle pek mai. Nute ni hman tan dan te hei kanlo hriat phah a, a bengvarthlak hle mai.

    ReplyDelete
  2. I ti tha viau zel e. Chhiar a nuam e.

    ReplyDelete
  3. a hmasa in i blog hi ka lo follow ve a, poi ti lovang chu maw.
    Nu te hlutzia hi a hmu chiang apiang mi vannei an ni. Nu te ni chungchanga i han ziah hi a bengvar thlak hle mai.

    ReplyDelete
  4. a thra khawp mai, ka ziak ve dawn kei pawh. Mama chanchin hi mothers day poual hian ka la ziak ve deuh ziah

    ReplyDelete
  5. Ka dam lohvin a tlaivar a..
    Ka nu hi zah ber tur a lo ni,
    Ka nu, ka nu duhtak chu..

    He lei mihring zingah hian Nute tluka hlu, mihring nun kaihruaitu an awm kher lovang. Nute vangin mi tam tak an hlawhtling a, nute avang bawkin mi tam takin he khawvel hi thim hnuaiah an hmang thung.

    Nu-te hi kan lei ro hlu berte an ni e. Amen!

    ReplyDelete
  6. Jinx, Fela -
    In ti lawmawm e, ka han ziak ve leh rawih a nih hi.. Tu te lo hal emaw ang deuh-in a chung pawh a hawl fai ngut na maw chu...???

    Vana-
    Follow chu pwi ti awzawng lo e, blog chauh lo pawh rawn follow zel la...!!! (j/k)

    dolién-
    ziak ve rawh khai, ka lo chhiar ve ang e

    Zaia -
    I tidik khawp mai, Nu te pawimawhna chu an fate-ah hian a tha zawng leh tha lo zawng pawhin a lang ve ve thei tlat.

    ReplyDelete
  7. i nu hian i pa boral hnu poh khan,Salvation Army Officer ang a a tih tur tak kha a hlen zo hle thin.I pa kha a boral hma na a,Kolasib Corp a ka naupan deuh lai a thusoi kha ka hre reng thin...Mupui[Eagle]CC LEH RINGTU NUN a tehkthin na thu kha tun thleng hian thlarau nun a min tiharh fo tu a ni tlat

    ReplyDelete
  8. Ka ziak ve ang e ka ti a, ka ti hleithei lo. Kar hmasa atrang khan ka nu nen kan inthre thru a, ka ngaihdan a trawm thei lo va, a ngaihdan ka pawmpui thei bawk si lo... Kumin chu ka tifuh lo hle a ni e. Min lo trawngtraipui teh u :(

    ReplyDelete
  9. jessy -
    Nia, kei pawh kha sermon kha ka la hre reng mai, ka Pa sermon la hriatreng hi ka nei nual. Inchhunga ka fiamthu thawhte hi sermon-a sawi chhuahte kha a ching lutuk a.. :) i ti lawmawm e.

    dolién-
    a va zialo tak ve, tawngtaipui ngei ang che. Nu-te bulah na na na chuan tlawm zawk nih kha hreh lo phawt mai teh

    ReplyDelete
  10. Ka NU hmangaihna aw nem chu
    Theihnghilh ni reng ka nei lovang
    Ka tan a tawngtaina te chuan
    Thlifim angin min rawn chhem thin

    ReplyDelete
  11. ziak tha hle mai, nu ropui leh pawimawh zia chu ka pa min boralsan hnu khan a lang chiang...ka nu lo ropuizia chu kan unauah a lang chiangin ka hria...what i am today is all because of God and my mother

    ReplyDelete
  12. "Ka Nu hi nu azawnga nu mawl ber pawh ni mahse ka tan chuan a hlu a"
    Mawl/aa hi kan ti leh mai thin a, nang ang fa enkawl seilian thei chu a mawl tawp lo mai tih ka sawi thei e

    ReplyDelete
  13. Geminiboyz - khitiang hla-te i lo hre ve a ni maw? kan naupan laiin kan sa nasa thei lutuk asin.. :)

    rinfela-
    I ti lawmawm e, lo leng ziah rawh. Nu-te hlutna leh ropuina hi kan upa telh telh a, kan hre chiang telh telh mai a lo nih hi.

    OpaHmar-
    Helam lam-te i lo thlen ve, i va ti lawmawm ve. Kei ang fa enkawl seilian tur hian Nu fing mai ni lo, Nu ngawhngawl deuh a ngai asin.. hahaha

    Ka Nu hi nu azawnga mawl ber chu ka ti phal bik hauh lo ania, ka han ziah awmzia khi chu 'Lo ni ta pawh ni se' ka tihna a nih khi.

    ReplyDelete
  14. Kei ka lo theihnghilh daih...in rawn ziak sap sap a ka hrechhuak chauh alom..nakum lam atan khek ve leh phawt mai ang...

    Tin, i thuziak hi i uluk hle thin tih a hriat ngawih ngawih..keep it up!!

    ReplyDelete
  15. The Salvation Army ah hian 'Mother's Day' an hmang nasa ti rawh. Kan Nu hi a ni ve thina, chumi hnua hreve chauh ka ni e.

    ReplyDelete
  16. luliana-
    hahaha.. nakum chu i ziak ngei dawn nia, kohhranah in hmang ve lem si lo a, theihnghilh pawh a mawh lo e.

    Ka thuziak chu.. i ti lawmawm e.

    chhangte_ll -
    aw, Army ho hi chuan kumtinin, thlasik anga khel lo-in NUTE Ni hi kan hmang a, naupangin Nu-te pangpar kan pe thin. I Nupui chu ka va hre chak veeee...

    ReplyDelete
  17. heipui...a ziak tam tual tual a, a ziak thiam tual tual mai nia, Mizo hmeichhe zingah lehkha ziak ngam hrim hrim pawh an tlem lai hian i thu awmze nei ziak i thiam fu tlat...u'r the best...!

    ReplyDelete
  18. Va'n ropui leh dap dap ve le(h)!! Manhla thrin hle mai...kei ang Fapa sual tan hian a ngaihnawm bik riua va ka hriat chu maw le...

    ReplyDelete
  19. Leh lawks...I thuziak hi thra ka ti em a..thian te chhiar ve atan Group mail ah ka Paste ve hmiah mai a nia..

    ReplyDelete
  20. EPISTEMOLOGY -
    ka lawm e, but i'm not the best.. i still have miles to go... i rawn len luh hian phuisui ka inti sawt thin. :)

    zovala -
    i va ti lawmawm ve. fapa sual i nih ka ring bik hauh lo mai... group mail ah chuan min lo telh ve la.. hahaha

    ReplyDelete
  21. Nikum khan vanneih thlak takin Nute Niah ka nu Pangpar ka pe ve thei a. Kumin chu phone in ka be thei chauh a. A duh zawng leina tur kan nuin a pe bawk a. Ka nu, ramhnuai pukah ralthuam nen khawsik na tak tuara ka nat lai pawh a, min rawn zawng chhuak a, sipai hlauhawmna pawhin tizam zo lova ka ralthuam phura, min hruai chhuak ngamtu ka nu hian Nu hmangaihna thukzia leh rilzia a tilang chiang khawp mai.

    ReplyDelete

Followers