Rulh vek a ni e.

Account khawih reng reng hi chuan thlarau lam ngaihtuah tel hi a har thin aniang, mi tam zawk hian, Finance-a thawk ho chu an RAU lo, an RO min ti fo a, keini kan lo inngaih rau ve riu riau thin nen. An ngaihdan chu a dikna lai chu awm mai thei, mahni lo maha lam rui leh vir chung mi nih loh nak alaiin nitina sum leh pai che vel ngaihtuah ringawtin kan hmanhlel chu a nih hi. Ama'rawhchu, "keini Finance-a thawkte hi kan rau ber zawk, thlemna hmunah kan awm reng zawk asin" tiin ka chhang thin.

Nitin rim takin, tihsual hlau reng rengin thawk thin mah ila, tihsual palh a awm fo a, a changin pawisa a chuang a, a changin a kim lo bawk a, kan in zawng leh fe thin. Mi aia tlaia haw a ngai fo. Pawisa a kim lohin kan mangang a, a chuan lahin kan ta a ni chuang bawk si lo. He phurrit hi khawvel awm chhung chuan a tawp mai dawn lo, kei hian khawih lo mah ila, tu emaw chuan a khawih tho tho si a.

Kan pawisa hmanral thenkhat hi IHQ lamin min rawn pek let tur an nei thin a, chung chu IHQ 'B' account kan ti mai a, chutah chuan kan charge a, kan hmanral list siamin kan thawn a, min rawn rul leh thin a ni. Chutiang list chu ka siam fo a, zawhna min zawh let loha rulh hmak hi an nei ngai meuh lo.

Kumin July-November B account ka siam chu a bo abang awm lo-in zawhna pakhat mah min rawn zawt let miah lovin an rawn rul fai vek a, mak ka ti lutuk a, ka Hallelui lo chauh a ni, ka thiannu hnenah ka sawi a, a lawmawm zia hrethiam pha lo ta chuan pip e pup e a ti hlei lo.

Krismas kan lo thleng leh dawn a, Lal Isua kan tana inpe, kan sual chhiar sen loh, ngaidam a, kan bat chhiar sen loh rul tura a thlawn liau liau-a kan tana a rawn inpe lawmawmzia hi kan ngaihtuah chiang ngai em le?

A bat miah loh a rul a, keinin rulh sen loh kan Ba thung si. Chung kan sual leiba zawng zawng chu Lal Isua kan tana a rawn inpek avangin RULH VEK a lo ni ta si a.

Khawngaihna thuk, ngaidama thinlung ti thianghlimtu
Khawngaihna thuk, kan sual zawng aia nasa zawk chu.