Rilru-in arbo a zawng

Tak tak alawm, tunlai chu thu leh hla ka nei lo khawp mai, rilru hi a vak darh deuh nuai nuai a, hmanlai-ah te ka let a, ka kual ka kual a, Primary school kai laite, Middle school kai tantirh lai leh High school rah hnute a lo inlar zut zut mai.

Hmana kan kawm thin, inhuat tak vang pawh ni lo, awmna hmun, khawsak dan leh eizawnna a hran tak vanga hmun hrang hranga inthendarh tawhte Internet kaltlangin ka chhar chhuak bawk. Chutih rualin blog ah enge ka ziah ang aw tih ka ngaihtuah tel bawk a, ka ngaihtuah thenkhat angte chu mi thenkhatin an blog-ah te, site hrang hrangah te an lo ziak kur ngiai nguai a, ka va chhiar zut zut a... Ni, hei hi ani ka rilru-a awm chu tihte ka ngaihtuah, hla phuahtu-in "ka thinlungah hla mawi a awm a..." a tih ang mai ka ni, ka rilru teh nuai hi, han hlawmkhawm vel dan pawh ka thiam hlawm khawm lo ka ti.

Kumtin hian kumin Krismas chu engtinnge niang tih hi mitinte inzawhna a ni fo, Kohhran ah pawh engtinnge kan hman ang, Ruai atan enge ni ang a, vawi engzatnge ruai kan theh ang, Biakin engtinnge kan chei ang tihte. Khawtlangah pawh engtinnge Ruihhlo kan khap ang, zan kan duty angem tiin YMA lamin tan an la bawk a, khap rem tih erawh a awm ngai hlei lo. Chhungkua-ah nise, thil thar lei tumin kan hmanhlel a, in kan chei a, ei leh in tur tuihnai tinreng kan buatsaih bawk thin a nih kha.

Eng ka ti nge ni kumin chu Zawlnei da lam ang mai-in ka hul huk mai a, Mas lam reng rilru-in a hawi thei lo, ka awmna hmunin a zir loh vang a ni mai thei. Hei vang hian ni maw hun kal tawh ka thlir kir ruai ruai a, rilru-in ar bo a zawng tan tlat.

1997 vel kha ni ta-in ka hria, ka thiante 4 nen, zan inkhawm kan peih loh chhuanlamin zaikhawmna In-ah thingpui kan lo lum dawn kan ti a, kan lo awm mai mai a, thiannu pakhatin a Nu Puakzo a rawn ru chhuak a, kan kang puak pep pep, tapchhakah chuan kan ri le lu a, inkhawm an rawn bang a, thingpui erawh kan lo peih nghal lem hlei lo.

Kan bulah chuan Pu Pawihbawiha bengchhet zet, a beng bula au vak pawha "I tawng ka hre mang hlek lo" rawn ti hû thin hi a thu ve reng a, inkhawm bang an rawn zai tawh si kha, kan awmdan kha bengchhen hmel min ti deuh nge ni "In bengchheng lutuk" tiin min han khap ngei a, keini lah kan nuih a za leh zual sauh a. Kan thiannu Puakzo ruk chhuah lah a nu-in a man chhuak a, "Khawnge puakzo hi a awm zawh vek" tiin thinrim takin a zawt a, ani lah chuan "Dini te êk inah" tiin a chhang hmiah, ei zo tawh vek hek. Khang hunte kha kohkir rual lohin an liam vek tawh si a le..

He hla hian krismas ka'n lo hmuak teh ang -

Sakhming khuavel he lei chinah
Tu sakhming maw mawi chuang kim ber
Silhfen tha mawitin par nen a thlen ni kan lo thlir
Thangthar tung chho kal zawng reng hian
A hming lah hai awm lo le
Siklipui duma lo lang
Krismas kan lawmna ni ber

A lawm nan zaimawi tinreng leh
Ei leh bar kan neih apiang nen
Hmuakin lenrual lungduh ten kutpui awmni kan kham
A pianna leh a awih hla reng
Van lal chhungkua an lai thuril
Hmangaih mihringte hnenah
Rem leng se tih a lo ni

Eng vang maw a hming mawina ber
Hmanah Bethlehem phullengan
Van leh hnawl hnu lei sual kar
Sa ui lo tanna kha
Van zaipawlin a rawn puang chia
Lei thiamloh chang a rawn uap ta
Van in lawm lai nau ngei kha
Riang chawi nau ang a hlan ta

I pianphung leh i nihna hian
Leimi tan lung i dum mai reng
Kan lawm che Krismas duhawm damseia kan lo tawn
Kan runah lo lawi ve ang che
In tin veng tinah lawi ang che
Kan ei kan in krismas se
Hlimin min awmpui ang che