In awih zawng a ni em???

Betty tih tur hre lo chu dating dot com tihah chuan a in register vel mai mai a, kum 18 a tlin lohna chu thla thum emaw lek chauh a nih tawh avangin kum 18 angin a inziak nghe nghe, chu chu 2000 kum kha a ni.

Chu site-ah chuan nula tlangval, thian zawngte, chhas zawngte an kat nuk a, chung zingah chuan Carl pawh a awm ve a, ani chu Colombia-ah rau rau chuan a hausa pawl an ni a, mi hausa-te zinga khawsa thang a niin, a nu leh pa-te chu Australia-ah sumdawnna eng emaw thawkin an awm reng a, ani pawh Australia-a piang a niin hun engemaw chen an awm hnu-in Colombia-ah an rawn let leh a ni.

Chu site atang chuan Betty chu chharin a be tan a, an thlalak an dah loh ve ve avangin eng hmel nge an put an inhretawn lo, nitin an inbia a, an inhrechiang telh telh a, an inbiakna atang chuan an inngaina chho tan ta tlat mai, hmel inhmuh hial an duh ta a, Carl chuan an veng lama kal turin Betty chu a sawm a, ani pawhin a lo hnar bik lo.

Mahse Betty Nu chuan chutia net atanga a hriat ringawt tlangval hmu tura mi hausa veng lama kal chhuak turin a fanu chu a phal awzawng lo, “Nangman helama lokal turin sawm zawk rawh” tiin a fanu chu a hrilh a, anni chu mi rethei veng lama cheng an ni a, Betty pawh chuan an veng lama kal zawk mai turin a ngen a, Train station-ah a lo nghak dawn a ni.

Hun tiam a lo thleng a, phur tak, hreh ru deuh si chuan nalh taka incheiin a thianpa hmu tur chuan station chu a pan ta a, a rilru chuan Hmelchhe deuh hi a lo ni mai anga-h tih a ngaihtuah tel bawk. Train a lo thleng a, nu lian a nih loh avangin mipui tam tak karah chuan a dak arh arh a, nakinah chuan Tlangval lian tak, sam sei deuh, tarmit lian tak bun hi a rawn phei ta thung thung mai a, Aw Lalpa, saw chu ni lul suh se.. a ti rilru, mahse a mi nghah ngei chu a ni tlat si, “Hello, Carl ka nia, Betty I ni em?” tih chu a hre chawpchilh nghal, a ni pawh chuan ban deuh chat-a chibaiin “Betty” chu a ti ve ta hram a, khawlaia din reng thu awm hek suh le, khawilai dawr emaw-ah chuan a hruai lut ve ta poh a.

An luhna dawrah chuan engemaw in tur an han lam a, Carl chuan beer a han lam a, duh ang zawng chu dawr lian leh changkang-a an zawrh thin ang hlir a nih avangin a lam apiang chu chu dawrah chuan an nei lo zel mai si a, tui bottle a dil ta ngawt a, chu pawh an lo nei lo, Tui, a bottle-in an nei ngai lo, Tap atanga an herh haw chu a ni mai, tih ngaihna a awm lo, dawr dang, tlema changkang zawkah chuan an insawn ta ngawt a. chutah chuan mumal deuhin an ti ti thei ta.

Thil chi hrang hrang an sawi-in an inkawm a, rin ai takin Betty pawh chuan nuam a ti ta viau a, a rilru-a a chak reng thin Australia-a kal a chak thin thu-te chu a hrilh ta siam siam a, chutih lai chuan Carl chu Australia atanga rawn haw hlim hlawl a ni tih a hre hauh lo, Carl pawh chuan a sawi duh chuang lo a, ngawi rengin a lo ngaithla a, Betty chuan, “Ka rilru-a ka chak ber thin chu Australia-a kal a, chuta hnathawh chu a ni” a tih pawhin “Engatinge Australia ber kher, Sap tawng an hmang a, I thiam der si lo, engatinge Spanish hmang dang, Spain-ah emaw South America ram dangah kal I duh zawk loh?” tiin a zawt a, ani chuan “Aih, Australia kal alawm ka chak chu, tawngte chu ka zir mai ang chu” a ti ve tlat a, ani chuan a hnial thui chuang lo, tiang chuan an inhmuh hmasak ber chu an tlingtla a, nuam an ti fu.

A hnu thla thum chhung chu an lengchhuakin an inkawp ta chawt a, thla thum hnu-ah chuan Betty chuan phone call a dawng ta, Carl chuan, “Ka nu leh pa-ten Australia kir leh an rawt a, kei pawh ka kal a ngai dawn a ni” a ti chu Betty tan chuan hun hrehawm tak a ni ngei mai, Australia chu kal chak hle mah se a tan a remchang ve rih si lo. Carl chuan, “Ka kal phawt ang a, thla thum vel hnu-ah ka rawn let leh ang a, nang pawh I lokal ve dawn nia” a ti, ani chuan “Thla thum tiam suh, thla ruk hnu-ah bak I lo let lo ang” a lo ti ve ngawt.

Carl chu a kal ta a, nitin net hmangin an inbe reng a, a ngaih pawh an inngai khawp mai. Thla thum chu thla rukah a insawn a, thla ruk atangin kum hial a vei ta mai, Carl chu a rawn let mai thei lo, kum khat hnu-ah a rawn let ta chauh a ni. Chutih chhung chuan Betty pawh chu University kalin sap tawngte a zir bawk a, a zirna man chu Carl hian a pe vek a ni.

Australia atangin zungbun a rawn thawn a, chu chu inhualna zungbun a ni nghal mai, an dinhmunin a zir loh avangin inhualna mumal pawh siam lo-in chu zungbun chu a bun ta a. Betty tan Australia kal a harsa, Visa neih a awlai lo hle mai si a, a tih ngaihna a vang khawp mai, Kum khat hnu-a Carl a rawn haw chuan kawng khat kan tih theih a awm a, Fiancé angin rawn lut mai rawh, kan innei dawn nia a ti ta, tichuan nupui hual angin visa pawh an dil ta a, December 2001-a kal turin an in ruahman a, Carl chu a haw leh ta phawt a, Australia-ah Betty awmna tur In a lei a, Car nen, a mamawh tur engkim ngaihtuahin a lo buai em em mai.

Hetih lai hian Betty Nute-I, US-a awm, kum 2 emaw lai a hmuh tawh loh chuan an hnena Christmas hman a tum thu a rawn sawi leh ta thut a, Betty tan a nutei lokal laia hmun danga chhuahsan daih chu thil tih chi a ni ta tlat lo, Australia kal hun chu a pawtsei ta ngawt a, kum thar veleha kal turin hun chu a pawtsei a.

Chutiang chuan eng eng emaw avanga rokhawlhna neuh neuh neiin 2002 March-ah a kal thei ta chauh a, hetih chhung hian Carl pawhin dawhthei takin a lo nghak a, a dik tak chuan March thla-a kal tura a intiam chu bawhchhe leh na se chuan “Awle, a tha alawm, lo kal lo mai rawh, Thu a tawp e” tih mai a tum tawh a ni a, March thla-a a kal thei chu a tihzia hle a ni.

Betty, mahni-a hriat ngai loh ram Australia-a a kal chu a zam rilru ve hle, mahse rin ai takin tawng thu-ah pawh harsatna a nei lo. Airport-ah pawh an thusawi chu a hrethiam ve zel, a mah te te chuan, “Chhe hei, an tawng hi ka hre ve zel mai, ka thiam ve tho a nih hi”tiin a ngaihtuah neuh neuh thin. Australia-ah chuan nun bul chu a han tan ve ta poh a, thian a nei lo a, Carl chu a chhungte nen an awm a, thiante pawh a nei a, Betty erawh chu amah maiin a ni, a chang chuan a khawhar thei khawp mai, thla thum a awm hnu-ah hna chhete, dawrah inhlawhna a hmu a, chutah chuan Sap tawng pawh a thiam nal lehzual ta a.

A visa chu fiancé visa a nih avangin thla sarih hun a nei a, chuta a pasal hual nen an inneih loh chuan an ram lama haw leh a ngai dawn a ni, chuvangin hmanhmawh takin September 2002 chuan inneihna chu an buatsaih ta chung chung a, a chenna hmun buatsaih nana sum an sen nasat avangin inneihna ropui buatsaih thei an ni lo tih an hria a, thian pawh an sawm lo. Innei turte leh an thiante ve ve, Inneihtirtu, Carl nu leh Pa, Betty Nu, Carl Boss, Betty thawhpuinu leh a thianpa pakhat Saxophone tumtu leh piono tumtute te chu inneih hriatpuitute an ni mai. An vaiin 12 chiah an ni.

Betty chu University-a Advertising graduate a ni, chumi zulzui chuan company eng eng-ah emaw a thawk kual thin a, mahse atui tak tak thei lo, “Hei hi ka duh tak a la ni lo”t iin engemaw tak tih tur nei niin a inhre fo a, office-a thut a, miin Hei hi ti rawh an tih nghah ngawt chu a ning em em a, Website a enkual a, hnaruak a ngaihven reng thin.

Ni khat chu Salvation Army Website-ah hna ruak dil theih a hmu a, Hei ngei hi a nih hi ka zawn chu tiin a Resume a theh lut nghal a, ina a haw chu a pasal hnenah He hna hi ka hmu dawn a ni, hei hi ka thawh duh chu a ni a ti ringawt mai. A tih ang tak chuan a dilna chu an hmu a, an rawn ko ta a, interview a kaltlang a, chu hna chu Salvation Army International Development Office-ah 2009 atangin a thawk ta a ni.

Kumin hi an inneih kum 8-na tur ani tawh. An hlim khawp mai.

(internet atanga in chhar, innei hial ka hre tam lem lo, in awih zawng a ni em??? An phalna la-in he mite love story hi ka ziak a ni, an hming erawh ka ti danglam..)