Facebook

I pawnto ang chaw ei khamte rual kimin
A eng nem duai kan tualah
Thian han sawm la, lungrual te in
Chhei, a chhei dur dur

Naupan lai-in thiante pawnto turin kan han ko a, pawnto hla chi hrang hrang sa-in kan han inkawm a, chutah inthengkah emaw, inbihruksiakin emaw a hmawr kan han bawk ngei a, a chang chuan kan intirameikai thin bawk. Mi kawmkar thim lai lai kan chuh a, kan lut kual thin a nih kha, thenawmte ar in-a tawm phei chuan ar hrikin min lo bawm nghal luai luai a, mut hnu-ah kan thak sup sup thin.

Aw, en teh an nun a dang ta tih hla ang maiin tunlai naupang chuan Pawnto hla pawh an sa ngai tawh lo, a awm tih pawh an hre lo hial zawk ta ve ang. Sikul an kal thei dek dek a, Computer an ti nghal ringawt tawh mai chu a nih hi. Naupang chu sawi loh puitling lam pawh a hmei a pa-in Computer hian kan tunlai khawvelah hi chuan min awmtlei zo hlawm ngawtin ka hre thin.

Kei ngial pawhin he Computer hi ka hmang tangkaiin Internet pawh ka luhchilh thuk ve tial tial a, heng website: Tweeter, Facebook, Orkut tih angreng te hi Social networking sites tia sawi a ni thin a, mite inzawmna siam tura duan a ni nghe nghe tihte pawh ka hre ve zel a, hei hi kan kristianna nen hian a inhmeh hlein ka hre thin. Kan Kristian nun hi mite nen inzawm leh midang te tana nun hmang tura beisei kan ni a, chutiang bawkin heng site hmang hian thiante nen inzawmna tha kan siamin kan ngaihdan te kan sawipui fo thei thin a ni.

Heng site zingah hian Facebook ah kumin hian ka in register ve chauh a, tunah hian thian 69 ka nei a, thian atana min duha min sawmtu apiang chu ka pawm vek a, thian tam tak neih pawh ka duh bawk, thian nei lote tana Thian nih inhuam kan Lalpa dung zuiin friend request pawh ka accept zel a ni.

Khawilai African ram pilril, tui leh power awm that lohna-ah pawh vanneih hlauh chuan Facebook profile a update theih a, Yahoo mail ka hawn theih loh pawhin Facebook chu ka hawng thei tlat a ni, chu chuan khawvel hmun danga thiante nen inbiak pawh theihin min siam a, hei hi chu a ropui tak zet a ni.

FB hian thiante nen inzawmna tha tak mai min siamsak a, ka hna avanga hmun hrang hranga ka awm thin vangin hun engemaw chen chu thian bik hnai tak pawh nei thei lo-in ka awm tawh a, ka thiante ngei pawhin a chang chuan min be pawp em em hran chuang lo fo, amaherawh chu engemaw tiin he FB hian thiante nen min thlunzawm leh ta a, ka College kalpui te leh School kalpui te mak tak takin ka chhar chhuak a, hei hian thian hmuh ngai tawh loh leh la hriat ngai lohte nen inhmelhriatna remchang min siam sak a, a lawmawm thin ngawt mai, kawng lehlamah chuan mi thenkhat mahni nihna thup a, midangte nihna hriat duh bawk si a, vak kual vel, mahni nihna dik tak dah duh lo, thlalak pawh dah duh lo hi an awm ve tho mai, heng mite hian pek aiin lak an duh zawk a ni tih a hriat, tin a takah pawh mi phakar tak an ni mai thei a ni.

Chutia han sawi zel takah chuan internet-ah hian Mizo site hrang hrang leh forum-ah te pawh thu pawimawh tak tak, hnam hnuk khawih thilte sawi ho a ni fo thin a, heng site hmang hian aizawl leh zoram chhunga thil thlengte rang takin hmun hla taka awmte pawhin kan lo hre thei thin hi ka tangkaipui hle. Chutih laiin Facebook ka sawi ang bawkin heng site-ah hian miin an hming lem an hmang tlangpui a, mi tam takin kan nihna an hriat loh avangin huai tak takin kan tawngin sawrkar dem zawng emaw, mimal hial pawh an nihna te kan duh loh zawng chu kan sawichhia-in a then phei chu ar chuk tui lo hial khawpa sawi chhuah maite pawh kan nei thin.

Hetianga thu leh hla tha tak tak nei leh ngaihdan ropui tak tak neite hi hetia inthup lo hian, kan ram hi kan vei tak tak a, a thatna tur kan duh tak tak a nih chuan ‘Keimah ngei hi a siamtha tur ka ni’ tiin bul tantu ni thei theuh ta ila kan tha tlang ngei ang.

Heng mizo site hrang hrang-a comment pe thin mi tam takte hi an rilru a chakin tawngkam an thiam a, thil an hre hlawm em em bawk, a chang chuan heng thalaite hian an ngaihtuahna ang hian kan ram hi min hruai ta se, kan tha viau ang a, tihte ka nei fo mai. Amaherawhchu heng mite hi mi dawihzep tak an lo ni ve thei tho mai. Hmaikawr vuah chunga ring tak taka huk dum dum a, a saseha tlanchhe leh tur chi, Sabengtung sakeibaknei vun sin ang mai an lo nih teh chuan a fuh chuang miah lo thei.

Miten min hriat loh a, inthup chunga huai tak taka pau pau lo hian, kan sawrkar pawh ralkhata dema, iak mai lo hian a bupui hi luhchilh ngam ta zawk ila, tha lo ni-a kan hriatte hi Dan hma-ah dik taka ti thin turin hruai ngam ila. Mi dik leh tha te chu chawisangin zah thiam ta ila, kan hnam a ropui ngei ang. Raltiang ram saw thlir teh u ti mai lo-in mahni ram ngei hi thlir teh ang u.