Hun danglam tawh lohna-ah..???

Hmanni tlai chu tlemin ka bang har hret a, dar 4:30pm velah hian ka thian pakhat Canada ami-in yahoo-ah min rawn bia a, "E khai, i awm lai ka nang ve teh khiah a, a va lawmawm ve,"a rawn ti, Canada-ah chuan dar 9:30am chauh a lo la ni a!!

Chutih laiin Australia lama ka thiannu chu zing hna kan tan chauh hian ka mu dawn tawh a rawn ti ve hem zel mai bawk a, a chang chuan ka chhungte hian zing dar 4am velah min rawn ti harh fo, keini lamah zing dar 4 chauh la ni mah se India-ah chuan Dar 7:30am a ni vung tawh tlat a, an rilru lamah ka tana a la hma zia an ngaihtuah hman thin lo, an rilru-a a thawh ang ang hian zu che hlawm thin a!!! aw khawvel hi chu a, Pathian teh reng pawh hi, hun in ang lo lutuk-a a siam reng reng ni te ka han ti leh lailawk bawk thin.

Kan pi pute kha an ngaihdan a mak ve khawp a, tihian an sawi thin a ni awm e, "Kan lei hi a zau khawp a, Van pawhin a khuh zo lo a, a khuh bak chu a hmuar uar mai a ni" an ti thin.

Kan lei hi a mum a ni tih hi scientist ten hmuchhuak kher mah suh se, kan khawvel hun inher vel dan hrethiam tan chuan a tawngpawng phek ngawt lo ang tih chu a rin theih ve deuh a, sikul kal laiin Geography kan zir a, Tropic of Cancer, Tropic of Capricorn tihte leh hun inher dan hrang hrangte kan zir thin a, kan lei hi a mum a ni a, keinin chhun kan hman laiin khawvel lehlam ami te chuan zan an hmang mek a ni tihte kan zir a, chuti chu hetia lehkha kan zir laite hian thenkhat chu an la hnar bur bur dawn a ni maw, kan ti thin a nih kha... chuti chung chuan he kan hun in ang lo hian kan nunah eng teh chiam nghawng a neih kan hre ngai lo.

Tlai lamah ni a tla a, a tuk zingah a lo chhuak leh mai thin. Thuhriltu chuan "Ni hnuaia thil awm te hi engmah lo mai a ni, Ni chu a chhuak a, a tla leh a, a chhuahna tur lam hawiin a hmanhmawh thin" a ti, chutiang chuan nitin mai hian a her mup mup reng a nih hi. Amah Pu PS Dahrawka thu khawchang ang deuhin Nu pahnih hi an lo ti ti a, a tia lawm, pakhat chuan, "Ni khi vanlaizawlah darkar khat ding ta tlat se, khaw thim hma-in kâwl a ban hman angem?" a ti, a thiannu chuan, "I ti duh e a, nilenga chawl lova a kal pawhin a thim lut ziah alawm" tiin a chhang. Ni zawk hi kal turah kan ngai reng mai thin kha a ni a.

Mithiamten kan lei hian Ni a hel zawk ani an tih hnu pawhin keini ang duang chuan Mah reng reng se, ni khi a kal tlat a ni" kan la ti fan thin zu nia. Kan lei hi a vir miau avangin a thenin ni kan hmuh laiin a thenin an hmu ta lo a lo ni a, a mak zozai ngawt mai, Pathian thil siam dan hi. Heng hian khawvel ram hrang hranga kan sana hman pawh a ti in ang thei lo ta ni awm a nia.

Kan training laia kan hun hman dan kha - Zing dar 5:30-ah Chapel-ah kan tawngtai a, kan haw, quite time kan hmang leh a, lehkha kan zir a, chuan hna kan thawk a, class kan kal a, chhun kan chawl a, zanriah dar 4pm-ah kan ei a, zan dar 9-ah vesper (tawngtai) kan nei leh a, kan mu ta thin a. A fur a thal-in chu chu kan hun hman dan reng a ni. Thlasik lai chuan zing thawh a har thei khawp a, dar 6-ah pawh khua a la en that loh laiin dar 5:30-a tawngtai tura kal chu khawvawt nen a inrem loh dan chu sawi kher loh pawhin a hriat, chutih laiin nipui laia tlai dar 4-a zanriah ei chu zanah ril a tam leh hman ngei ngei bawk. Kan hotute hnenah kan zualko, "Kan hun hman dan hi nipui leh thlasik timing nei hrang ila" kan ti chu eng dangin min chhang lo, "Hei hi kan hman dan reng a ni a, a changin a hma ang a, a changin a tlai ang a, a changin a tawk chiah ang, thlak kher a ngai lo," an ti a, an duhtawk der.

Africa mite hi hun vawng dik lo tak an ni hlawm - ka hriat ve chinah - chuvangin thil tih reng reng, a minute mai ni lo, a darkar kar hian kan tlai ruih ruih zel mai a, a buaithlak thei, dar 10-a tan kan duh chuan dar 9 tan hun ti-a puan a ngai, tichuan dar 10-ah kan tan thei vel chiah chiah. Anni chuan African Time an ti mai, insiam that emaw, hun vawn dik emaw an tum ngai chuang lem lo, hei hi ka awmna Mozambique chauh lo-ah pawh thleng fo a ni awm e. Anni hi chu Time Zone tih vel chuan tihbuai a hnehin an neih sa pawh an la hmang dik lo a nih hmel khawp mai.

Tun hnaiah NE India ten Time zone hran kan mamawh a ni tih thu inhnialna ti tam tak mai tlangaupui a ni a, a ngaihtuahtu te chuan hun rei tak ngaihtuahin an chhut nasa thin viau ang tih a hriat a, NE hian hun hran kan mamawhna chhan point tam tak an ziak del dul thei tlat a ni.

Keia lungmawl lo ngaihtuah ve mai mai danah chuan, kan sana chu darkar engzat pawhin herh danglam mah ila, a hmangtu Mipuite hi mi tladah, zawmthaw leh thatchhia kan nih chhung chuan kawngro a su tak tak dawn em ni? Mi hlawhtling kan tihte chu thawk nasa te hi a ni tih zirna sikul kan kai tan tirh atangin a hretu te kan ni si a.

Kan office kai dan te reng hi han in en ila, zing dar 9-a office tan tur a nih laiin thenkhat chuan hmanhmawhna rilru nei miah lo-in dar 10-ah kan thleng a, thlen veleh kuhva hmawmin thingpui sen hang kan lam phawt thin em kha? Ka u-in "Vawi khat chu kan MR pakhat hi a rawn tlai lutuk a, 'I night dawn elaw' ka lo ti a, a zak khawp a, ka inthiam lo leh hnuhnawh hle" a ti. Chutia tlai taka thlen hnu-ah kan han insingsa fel a, dar 11 a ri tep tawh, hna tlem kan thawk a, chhun thingpui In a hun leh nghal mai, thingpui in zawh chuan a lo chawhnu leh ruih tawh a, hna tam a thawh hman tawh loh, dar 4:30pm-a ban tur pawh ni raw sek sek, dar 4pm-a chhuah hman talh tum pawlte kan awm zel. Chutih a hnu hmanah kal chhuahna tur hi kan han hre thei khawp a, thenawmte lah hi an thi thei em em bawk si (ka sawi sual chuan Lalpan min ngaisam se) Ka u bawk hian a tia lawm, an thawktu pakhat hi "Kan thenawm chumi khami chu a thi a" tiin chawlh hi a dil sek mai a, an Pu ber kha vai a ni bawk si a, a hrethiam ta mang lo, "In thenawmte chu dam alawi pawh an awm tawh lo ang a..!!!" a ti e, a ti.

Chutah mi inneih lawmpui kan duh eng eng emaw tih tur hi a tam em em mai thin a, kan hun neihsa tlemte hi kan hmang khawlo nasa thin hle. Hei hian hna pending nasa tak min neihtir a, kan thawh tur thawk zo hman lo-in kan chhehvel state dangte hnungah zawng hnuhnung ang luap luapin hmanhmawh takin kan tlan reng mai dawn a ni. Hetianga kan awm reng chuan tun atanga kum 10 a vei leh meuh chuan, kan chhehvel ami-te hian min tlansan ang a, "Hnungah kawl êk a thai" min tih khum mai ang tih a hlauhawm khawp mai. Kan sana hi eng ang pawhin herh danglam rawh i, a hmangtu mihring hi a pawimawh zawk kan ni si a.

Hawh u, kan sana chu herh danglam pawh ni ila, kan nundan pawh hi i herh danglam ngam ang u, Sawrkar hnathawktu chuan rinawm takin a hna thawk mai sela, thawh hun darkar bithliah dik takah thawk mai thin ila, Zirlai chuan a zirlai taima takin zir sela, thuhriltu chuan dik takin hril mai rawh se. Tichuan, kan ram pawh hian a thatpui zawk ngei ang.

He khawvela kan hunte hi chu a danglam thin a, a in ang lo thluah mai bawk a nih hi, thihna lui ral kai hun chuan hun a danglam tawh lo ang a, Beramno Ni ang-in a eng reng ang kan tih thin kha maw, chu hun chu a nghahhlelhawm hle thin mai. Hun danglam tawh lohna-ah chuan khawi-ah nge kan awm ang le..????

Aw hun, aw hun, chatuan khawvarna chu
Chatuan, chatuan aw hun danglam tawh lohna chu
Aw ka thlarau, tah chuan khawiah nge i awm ang?