Hlau suh

Mi-te hian engtinnge maw khawl lian pui pui hi chabi tereuhte hian an control bik le?

1st Step : Driving seat-ah ka’n thu ang el awl a, chutah seatbelt ka hreng a, seat ka’n pawt hnai hrawk bawk a. Switch kan on a, nung ve ta vut vut mai, accelerator ka’n rap chiah chu hmalamah hian BUR ni nghal mai. Het.. shala ngatinge ni ta mai, ka’n en chiang chu back tum na na na 1st gear-ah ka lo dah vung niin. Gear chu ka’n thlak leh te te a, garage atang chuan hnung lamah zawi muangin ka tawlh chhuak thei ve ta a.. Number plate erawh a khi ta thung a ni.

2nd : Ka tlan chhuak ve ta ngei, Driving School-ah chuan khawpui chhungah kan khalh a, Traffic light fel tak kara khalh chuan hlauh tur a lo awm lem lo a, in atanga ka inkhalh chhuak chu motor dang tam tak karah mipui nasa tak nen, traffic light awm lohna hmun atangin ka inkhalh chhuak bawk nen, ngaihtuah tur apui a tam ta lutuk, hnung lama mit nei ang kara awm a ngaih laiin hmalam en a ngai, sir lam nen, steering ven ngai bawk si, speed a dik em tih ngaihtuah ngai bawk, ka veng seng lo a ni ber mai a, chutah le, hlauh ang ngeiin ka hma-ah chuan mi pakhat coconut nawr hi a lo awm, a sira hel mai tur ka nih laiin amah tak chu ka pan ta chher chher mai a, ka bula thu Beira chuan “Captain kual rawh, kual rawh,” a ti lawm lawm na-a hmalam chu ngai patin ka pan a, atawpah tihngaihna ka hre tawh lo, kan break thut mai chu kan bu dawrh mai.

3rd : Tluang tak chuan kan tum ram kan thleng a, haw lam chu kawng ngai-ah kal lo-in motor tam lohna lam deuh tur min zawnpui a, kan tlan ve ta par par a, chutah le, helai-ah hian kual tawh rawh min ti thut a, kan kual mai chu ka dawk zawk mai a, slowly, slowly an ti chul mai a, ka tihzawih tumna lamah clutch tel lo-in ka’n break leh tuar pek a, kan insawi nghar nghar mai.

Hetiang hi a ni motor khalh chu, thil tam tak ka zir tawhte zingah passed har ka tih ber mai a ni. A chang chuan a uih zawn ang vut vutin ka tlan a, a chang leh Zawhte kawchhungna an sawi ang maiin ka zuai leh si. He thil teh hrep hi mite chuan Phone-a mi be mawlh mawlh chungin an khalh thei a, ti ti chungte’n kut khingkhatin an khalh a, kei ve lem tawng chu sawi loh, ka sangmar tlat mai thin a, engtinchuan ti bik ni maw??

Mario chuan Driving seat-a I awm tawh chuan I motor chauh ngaihtuah la, I kutah kan innghat a, hlau miah lo la, insangmar tun lo-in inthlahdul la, hla deuh en la, a ti, dan ni si lo zawm tur apui a va tam tak em. He khawl ropui tak hi ka kutah a awm a, ka thunun dan danin a awm mai a nih chuan keimah chu a mawhphurtu ka ni ta daih mai a, thu ka pek ang apianga awm tur a lo ni si a, Motor khalh chu chabi tereuhte-a bul tan leh steering control amaw ka tih laiin ka thluak lam daih hi a lo pawimawh a nih hi tih ka ngaihtuah ta a, Enge mawle, mihringte thunun tura siam na na na chu tih theih hun a la awm ve chek ang tih chu ka inhnemna dawrawm tak a ni mai e. Pathian-in Josua hnena Hlau suh a tih ang tho kha Motor khalhna atan pawha ka mamawh chu a lo ni fan a nih hi.

INNEIH

Ram hrang leh hnam hrang hrangte hian mahni tihdan hi kan nei theuh mai a, tun tum chu kan ram (Mozambique) Inneih an sawngbawl dan hautak zet mai hi kan sawi ang e...

Dan tlangpuiin an Inneih hian ni thum a awh a. Zirtawpni-ah tanin chawlhni thleng an bei thin. Mizo in-a Man inhlanni kan tih ang hi anni chuan Lobolo an ti a, mahse an hmang nasa zawk mah. Mipa lam palai ang ve kha an lo kal a, gate an rawn luh dawn atangin thawm an rawn nei tan a, an zai a, gate-ah chuan hmeichhe lam chhungte chuan an lo chang bawk a, tichuan zai chungin in chhung an rawn lut a. A hma-in hmeichhe lam hian inneihna atana an thil mamawh turte list chhuakin an lo pe lawk vek a, hei hi an rawn keng a, suitcase khat tunin an rawn inbeng a ni. Chhuatah pher an phah a, manpui Mt 3000/- chu an han rem phawt a, chutah Mo Pa thawmhnaw, a Nu leh Pi leh midang thawmhnawte an han inpe leh a, chhuatah chuan an pharh zel a, an list en chung zelin an phawrh a ni.


Chutah hmeichhe lam aiawh khanan thil rawn kente chu a kim em tiin a check leh a, a kim ni-a a hriat hnu-ah Mo chu an ko ta a, mo dik tak ni lo a unaute chu an rawn chhuak hmasa a, hei hi kan duh a ni hleinem mipa lamin an ti ve thung, an han inhnial vel a, chutah Mo dik tak chu an ko chhuak ve ta a, a man chu puana funin an pe a, hei I man tur an rawn pe a, engtinnge I tih dawn le? An ti a, ani chuan Ka pa thu thu a ni e, ka pa ko rawh u a ti ve leh. A pa chu an han ko chhuak leh a, Mo chuan a pa chu a man nen chuan a va pan a, a hma-a thingthi-in a va pe dawn, a pa chuan Nangte chu hmeichhia Mo I ni a, engvanginnge I man tur I rawn ken, mipa chhungten min pe tur alawm a lo ti, Mipa lam atanga lokal pakhat kha a rawn kal vat a, a rawn dilpui a, chutah chuan a pa chuan a lo dawng thei ta a, i pasal te inah hian kumkhua-i awm ang em? tihte eng pawh thleng se he inah hian i rawn let tawh tur a ni lo a,i pasal bulah i awm reng tur a ni ti te-in a pa chuan eng eng emaw a lo hrilh a, man chu an inhlan fel thei ta a. An thawmhnaw tur chu an ha tawk hlawm em tih check turin room lamah an inhruai a, an han ha chin vek a, an tawk vek tih an hriatchian hnu-ah chuan engkim an tifel ta a, ruai kan theh ta mup mup a.


Mo leh Mo neitu thian hi kan tih dan anglo takin, Hmeichhia-in thian Mipa a dinpui a, Mipa-in Hmeichhe thian a dinpui thung a, kawng thenkhatah chuan a remchang zawk phianin a lang. Inrinni chu Vantlang hriatpuia Inneihna Ni a ni a, Sawrkar dan anga Inneihna a ni bawk.


Inneihna In an nei hranpa a, chutah chuan register marriage an nei thin. Hetah hian Innei tur apiang an kalkhawm a, an innghak thup mai a ni. Mo hruai motor chu a Mo hming inbelin an ding tuar mai a, pakhat an inneih zawhin midang an lut ve leh mai a, ralte vahai no la ang maiin a ri nuai nuai tawh mai a ni. A zo hmasa apiang an chhuak a, pawnah thla la-in an han ri leh hlut a, chutah park lam pang thla la turin an pan leh thin a ni. Inneihna-ah hian Zaipawl member 10 vel zel an awm a (Cartejo) an ti, an zai char char mai a ni. Thlalakna hmunah pawh neitu chan chang takin an zai reng a, an lam pah zel bawk a, heng ho hi an hah hle ang.

Hmun hrang hranga thla la-a kan kual fe hnu-ah reception tihna hmun (Salao) an tihah chuan kan kal ta a, he hmunah hian ruaipui kan kil a ni. Hetah hian Inneih Sawmna card kha ken vek tur a ni a, a chhan chu Card-ah khan kan dawhkan kil tur hming an ziah tel vek vang a ni, card keng lo chu luh an tum lo hrim hrim, kei pek chuan hre hek lo I, card ka keng lo a, mahse vanneihthlak takin Mo thianpa kha kan motor-ah kan phur hlauh a, gate-ah motorin kan lut a, ka tlang ve hram. Chumi hnu pawn mahni dawhkan hreta lo chu ka hawihai angreng dawn a, mahse buatsaihtute an lokal a, ka dawhkan an rawn sawi ta a, Milan a lo ni a, dawhkan hi hming hrang hrang an vuah a, Manchester, Barcelona, Chalsea, Milan etc tiin. Mo-te chu an thiante nen, zaipawl nen kan inrem fel zawh chuan an rawn ri lut leh ta chel chul a, kan lo ding vek a, chuan dawhsan an pan a, cake-te an zai a, cake zai zawh hian dawhkan tina an chhawpsa Champaigne an han tauh hawng ta hlawm a, a rik hian a ri pawp pawp mai a, an au dur dur zel bawk a, keini dawhkan chu officer ho min dahkhawm avangin zu an dah lo a, chhang an chhawp thung.

A tuk chawlhni-ah Biakin-a Inneihna kan hmang veleh thung a, mipa lam lawina kohhran-ah inneihna an buatsaih ve thin. Inkhawm banin mipa In lamah kan kal leh a, hetah hian ruai hnianghnar tak kan ei leh a, cake an zai leh bawk. Hun tawp lamah present pe duh tan hun an hawng a, a pe apiang hming an lo chhinchhiah zel a, pawl hming anih pawhin an insawi zel a, thianho pawh nise, hming putu an siam zel bawk. Zai leh lam chungin an rawn kal a, a ri leh nuai nuai mai a ni.

Naupangte

Ka thenawm naupangte hi an fel hlawm ania. Ka in-ah hian an rawn kal fo a, kan inbe thei tlem hle.

Min hmuh tawh chuan ka bulah a lokal vat a, "Captain," a rawn ti ringawt thin, chubak engmah sawi thiam tawh hek lo le.

Keiin, "Bom dia, como esta? onde está sua mãe?" (Good morning, how are you, where is your mother?) ka lo ti leh a

"Saiu" tih chu a chhanna ni leh mai.

Mahse ka bulah hian an rawn tawlh hret hret a, ka ina an rawn kal chuan, "É você com fome" tia ka zawh chuan, "Sim.." an ti ngei ngei. Ei tur angemaw ka pe a, an lawm thei hle.

Dawithiam

Bible-ah hian Dawithiamte hi an chan a chhe khawp mai a, uite nen pawnah an awm tur thu Thupuanah kan hmu a, dawi thil reng reng chu Pathian tan thil tenawm a nihzia kan hre chiang hle awm e.

Mozambique-ah hian dawi thil leh dawithiam hi an la lar hle mai a, an hmanrua pawh khawlaiah langsar tak takin an la zuar fer fur a, Kristiante pawhin dawi hmanrua a nih hi tiin an en liam ve mai mai bawk.

Hmanni deuh khan Gaza province-a nu pakhat nau nei chuan Thingpui In No 3 a hring chhuak a, sawi a hlawh hle mai. An sawi tirh chuan ka awih lo a, an thin a rim lek lek zawk, hetiang hi a thleng thin alawm an ti tlat. Thenkhat chuan miin an dawi a nih an ring a, a chhan chu he province lamah hian ramhuai biak leh dawi thil (Traditional belief) a la lar hle a, an rin dan chuan mite hi dawi hmangin nau an pai tir thei an ti tlat a, hei hi Kristian tam tak, ka awmna lama mite pawh hian an la ring tlat.

He Nu hian nau pai ni-a inhria-in a inentir a, mahse Nurse-te chuan nau I pai lo tiin an haw tir a, a inentir hnu thla thum-ah he naute (No) hi a hring ta a ni. TV-ah te an broadcast nasa hle a, kei phei chuan ka hmu ve chiah lo a. Ka awih lo hle bawk. No chu a dawlh a, an zai chhuak a niang chu ka tia, mahse nau neih pangai angin a vei a, a nei an ti tlat a, ka hmu ve chiah si lo a, awihsak tur nge awih loh tur ka hre thiam chiah lo.

Vawi khat chu ka office kal tur kan hma chiahah hian motor pakhat hi a awm a, chuta mite chu ka chuanpuite chuan Witchdoctor an nih saw an ti a, engtinnge in hriat ka ti deuh kher pek. Motor atang chuan thla ka laksak a, ka chuanpuite chuan an lo hlauthawng khawp mai a, an thlalak hi an duh lo hle asin, an rawn hmuh che chuan an dawi mai ang che an ti a, an sawi ang tak tak chuan min rawn hmu fuh ta a, an inhrilh a, ka lam chu an rawn hawi ta thup mai a, traffic jam avangin kan ding si, kan hma chiahah an awm bawk si, an rawn hawi a, min rawn kawk zoh zoh mai a, engtin chuan min ti dawn ni maw ka ti rilru a, thinphu dep dep chung chuan finrawl ka chhuah ta a, hlau lo awm taka awmin kut ka va vai a, ka nuih vei sang bawk a, anni pawh chu an rawn nui ve ta a, chuan motor pawh chu a kal a, kan hma lawkah chuan an motor chu a chhe ta tlat mai a, an ding a, kan tlan pelh lai chuan kut vai pahin ka va nuih a, anni pawh chuan nui chungin min rawn vai let ve leh ta mai a, ka thiante chuan mak an ti hle a, an lo hlauthawng hman hle bawk.

Pathian kan lama a tan chuan tu-in nge min DO thei ang?