I Pe nge I La???

PEK tih lam hi tunlai chu ka rilru-ah a la riak laklawh tlat, ka'n sawi chhunzawm leh law law teh ang, Thir chu a lin laia den tur an tih kha maw..

Hmanlai-a kan officer hmasa-te hlawh la kha a buaithlak awm thin ngawt asin, an awmna Corps-in Headquarters-ah pawisa ba an neih chuan an hlawhah an deduct sak thin a, cash counterah hian an awm rei thei, an hlawh han la te pawh kha "I pe nge i la..?" an ti fiamthu thin a ni awm e.

Chaltlang Ruam Veng kan awm laiin kan thenawm nu pakhat, upa ve lam tawh thil hre thei zet mai, sawi liam puat puat mai thin hi a awm a, tarte e ti lo khan Nula Tlangval in ngaizawngte hi a hre thei em em mai a, thlalai duh zawng, an ti ti leh an nundan te, Drug Addict te, an chhungkaw khawsak phungte hi a lo hre teuh thin a, mak kan ti thei khawp a, Engtinnge thil hi heti em ema a hriat le, kan ti a, kan thiannu pakhat chuan “A thawnchhuah zat a la lut a nih hi”a ti et a, a sawi awmzia chu amah pawh a tawng duhin zawhna a zawt hnem a, a sawi hnem bawk a, a bulah pawh miin thil an sawi hnem a, thil a lo hre thei em em hi a lo ni a.

Computer hmang kan tam ang bawkin Internet hmelhriat leh hmang pawh kan tam a, thiam lutuk loh pawha tih ve nawk nawk theih dan a lo awm zel bawk a, a sakechek keini ang duang pawhin kan luh chilh ve nasa ta hle a, luhchilh thuk poh leh a dang hriat chakna min pe a, ni danga kan hmelhriat ngai loh leh hmel pawh kan hmuh ngai miah lohte nen inhriat theihna rem chang min siam sak a, mahni-a awmte tan hlei hlei hian a lo tangkaiin khawhar te pawh nasa takin a hnem a, a tangkai ngei mai. Heti zawng hian ka ngaihtuah a, he internet khawvelah pawh hian thian kan duh anih chuan keimahni ngei pawh inpek a ngai a ni tih a lang chiang hle.

Mi tam takin Blog te siamin kan rilrua thu awmte kan han ziakin kan han tarlang a, thiante leh hmelhriat lem lohte pawhin tha an lo tih ve zawng anih chuan comment te pein min lo chhiar sak ve a, hei hian rilru a ti hlimin phurna nasa tak min pe a, ziah zel chaknate, mahni inrintawkna thlengin thiante fuih na azarah kan lo nei ve thei a, hei hi hmasawnna ropui tak keima tan phei chuan a ni ngei mai.

Hetih lai hian miin ka blog rawn lut se, ka thuziah te rawn chhiar ve se ka duh a nih chuan midang blog-ah te pawh ka len luh taimak a, an thuziahte ka comment sak leh ka hlutsak te a pawimawh em em a ni tih ka hmuchhuak zel a, hei hian thawnchhuah zat lakluh tih hi min ti hrechhuak a, kan Pathian thu-in “Pek chhuah chu pun lehzualna ani”a lo ti ang hian, kan chet chhuah hnem poh leh a let leh a tam mai thin a lo ni.

Tui tling reng chu a thianghlim thei lo ang hian luang chhuak tur kan lo ni a, Pathian kan rinna kawngah pawh hian che chhuak a, mite tana thawk tur kan lo ni e, mahni awm hmuna awm mai lo-in hmun hla leh khawhar zawkah te kal a, mamawhtute tana thawk chhuak tu nih hi a pawimawhin kan mawhphurhna liau liau a lo ni. Kan thawh theih leh tih theih erawh a in ang vek lo tih chu hriat sa a ni a, kan kalna hmun pawh a in ang vek thei lo, amaherawh chu kan tih theih zawn theuhah rinawm taka thawk zel tur kan lo ni e. “Miin a theh apiang chumi vek chu a seng dawn si a” Galatia 6:7b