Lunglen

Mihring tungchho-a kal tawh phawt chuan lunglen chang an nei vek ti ila kan tisual tam pui awm lo e, Kan pianhmang leh khawsakna te, khawsak dante a inan loh avangin kan lunlentu erawh chu a hrang nuaihin a rinawm. Phaizawla awm thang, coconut kung leh tuipui pawl ruih mai hmu reng thin tan chuan khamrang, tlang leh lungpui khawkrawk tak takte chuan an lung a len viau lo ang a, lem an ziah pawhin, tuipui lem, a kama coconut kung ding lai, tuipui piaha ni tla suar suar lem an ziak ang, a chhan chu, chu thil chu an hmuh zin tak, hmun danga an kal chang pawha an mitthla-a cham thin a nih avangin chu chuan an lung a len ta mai a ni.
Mizote lunglenna tlangpui chu Christmas leh engemaw hunpui pawimawh deuh kan hman thinte hian kan lung min len a, tin khamrang leh tlang hringdupte, luite luang dem demte, kham kara pangpar lo vul chiai-te. Lem kan ziah pawhin tlang kara ni chhuak lem kan ziak thin a ni lawm ni kha... chutah luite kha kawi ngiai-in a luang dem dem ngei ang a.
Mihring mizia a inanglo ang bawkin mi lungleng em em mai, thian leh chhungte ngai ngawih ngawih, an tel lova khawsa thei lo hial leh lunglen pawh a hre lo ang tih hialte an awm a, thenkhat ngawi renga lungleng veng veng an awm a, thenkhat chuan an lunglenna te an tilang nasa a, chumi hnem nan chuan hla mawi tak tak, lungkuai tak takte an phuah bawk a, thenkhat leh chuan thu ngaihnawm tak leh lungkuai thei takte an phuahin an ziak bawk a. Chumi hmang chuan anmahni ang bawka lungleng ve, puang chhuak thiam lo-ten inhnem nan an lo hmang ve bawk a. Zaithiamte hlei hlei hi an hlu ngei mai. Lunglen hnemtu tha tak an ni si a
Vankhama chuan
Ami'n suihlunglen an hril chang ni hian
Di zunah chhawl ang hian ka uai an ti
Ka suihlunglen ve chang han dawn ila
Chin lem a nei lo, khawtlang mai lo chuan
Hei hi maw an sawi khawtlang lunglen chu
Lungmawl tuara'n lairil a fan ve e
Khua san sikni sen, vanzawl a lo kai
Pengleng len thiam ten van dung an rawn thual
Fanglawr an liama sumtual lo dai
Hraichawi pipu leng zai sa e daikawma'n
Chun herawt pau, tui lawm arin chhawn e..
Val lunglen chang hnah lo kiu e chhuahtlanga'n
Tukkhum vilik rualten zamual an liam e
Dawng, ralkiu vaiva,
Awmkhua a har em e...
a lo ti a, ani chuan a han hawi vela a lung ti lengtu chu hla-in mawi takin a phuah chhuak nalh mai nia.
Ka thiante leh chhungte pawhin ka lung a leng ti-a ka sawi hi an hre khat khawp ang. Lunglenga kur duam duam chi ka ni lem lo bawk a, ka awmna hmun apiangah hian lunglenhnem tur tawk chu ka hmu ve zel pawh ni fahmiang. Vankhama ang deuh hi ka ni ve thin, ngaih bik nei lo, khawtlang lunglen ka nei a nih hi. Tu zunzamin nge min phuar han ti ila, tu zun mah a ni si lo, mahse lung hi a leng veng veng bawk si chu a nih hi.