Tling thelh apiang...

Naupang hi “Vanram kai lek lek nge i duh, kai loh lek lek” tia zawh hian “Kai lek lek” tiin an chhang khut duh riau, an ngaihtuah nawn leh a, a lo tha lo zawk daih si a.

Hmanah ka mangah khawvel hi a lo tawp a, vanram kai tur leh tur lo hi hming kan lo zawng sup sup a, bangah hian school-a kan exam result an tar ang hian hming an lo tar a, mahni hming kan lo zawng sup sup, kan ri suau suau a, gate lianpui a awm a, mahni hming hmu apiang chu chu gate Vanram-ah chuan an lut zel a, ka hming ka hmu ve mai lo, ka mang a ang rapthlak.

Nakinah chuan barel bangah hian ka hming chu ka hmu ve ta a, alphabetical order in an lo dah kha a lo ni a, ka hming chu a hnung rap, mahse ka hming ka hmu chu ka thaw huai a, a vanramah tak pawh chuan lut ta lo chuan ka thangharh ta hlawl a, ka thaw huai huai mai nia.

Zanah inkhel ka en a, a chak lo lam an rilru a na lutuk, an inkhel zo chu field sirah a then chu an mu tawp, a then an tap bawk a, a lo thlirtu te tan lah hrilhhaithlak, nula ho chu men tuau chung hian an hawi ho hlawm mai a, a thenin hmui an pet fan fan bawk, ngaihtuahna a ti thui ngei mai. An thlen san poh leh chak loh tawrh a na ting a ni tawh mai si a. Khawvela infiamna mai mai pawn a tah tir zawih zawih a nih chuan, khawvel tawpa rorelpui hunah rin loh lam deuha kal angaih thut chuan aw, a van rapthlak dawn em tih ka ngaihtuah.

Mi vanram kai leh kai loh turah te hian kan lo buai ve em em thin a, mahni leh Pathian inkar vek a ni a, he thu ah hi chuan sawi theih kan nei tlem hle. Kan veng pa Pu Pahlira pawh Pu Chunga hian “Pu Pahlira khi vanram a kai chuan ka chhuk leh ang” a ti a, mi thenkhatin an hrilh a, a thinrim ngang mai a, palai hial a tir a ni awm e, chutia, palai hial tira a thinrim thu a hrilh takah chuan a ni chuan “E, chutia a thinrim te chuan kan chhuk leh lo anga ni mai lawm” a lo ti a, an thubuai chu sawi zui vak theih lohin a tawp ta a ni awm e.

Kan veng pa tho, Chaltlang Ruam veng pa lar thin Pu Pawihbawiha pawh kha kan thian Tataui ten, “Pu Pawihbawiha chu I inkhawm peih lo si, I pianthar pawh ka ring lo, vanram I kai miah lo ang” an lo ti a, ani a ngawi vung vung a, “In thlan tur a ni hleinem” a ti ta daih a, a fiamtu te chu an hawihai zaw lel a ni awm e.

Kan dam lai la la-a rorelsak tur ni hlawm ta ila, thiamthu sawi tur nei lo fe fe kan tam awm e, ngaidam theitu Pathian ni lo ta se, kan thiltih angte-a thungrulh nghal zel ni ta ila, kan va tuar nasa dawn tak em.

Kawng lehlamah chuan ti hian ka ngaihtuah thin, Pathian hi a fel lutuk a, nilenga hnathawktu leh, chawhnu lam chauha thawk leh tlai dar 3-a kal pawh hlawh in ang a pe tho hi a va che fair lo e ka ti fo thin, amanherawh chu vanramah pawh hian engemaw tal chu thliarna hi a awm ve ni tur ani, an thiltih ang zela pek turin ka lawmman ka hnenah a awm a ti miau a, chuvangin mitinte boral duh lo-a zahngaihna lantirtu hian kan thatna tura rorel dan chu a thiam em em ang tih hi ka thutlukna a ni mai e.

A pawimawh ber ta chu a tawp thlenga rinna ngheta kan awm hi a ni , “Tling thelh apiang pawi tih a zual” min tih khum ang tih a hlauhawm tlat.

Khawi atangin nge?

Ka sawi fo thin, kalna hmun apiangah hian "Khawi atanga lokal nge i nih?" tih hi zawhna ka dawn chamchi a ni a, Indian ka ni ka inti chung pawh a, I ni thei lo reng reng, Indian kan hriat nen i inang lo, Filipino emaw, Korean, chinese emaw i ni ang an tih tlat thin avangin a chang chuan Chinese ka ni han tih mai changte pawh ka nei, Indian ka intih aiin an awih ziah leh nghal.

Vawi khat pawh ka thiannu Hair dresser-ah ka kalpui a, ka lut phat chu pa pakhat hian min lo en vang vang a, "Korean i ni maw?" a'n lo ti ngawt pek a, "Ni e.." ka ti ve ngawt bawk a, ka sawi thui peih vel lo a ni, ka thiannu chuan a lo ngei khawp a, "Khawi atanga lo kal pawh nise, enge i hriat kha a tangkaina ni a..?" a ti a, chupa chuan "Aw, a hmel-ah Mozambican a ni lo tih ka hria a, ka hrechiang chak a ni mai lawm, mikhual tih tlangnel te chu kan duh alawm.. etc etc" a ti a, an inhnial char char a, ka thiannu sam an khawih chhung chu zu inhnial thei a..!!! Ka nin em avangin an zawhna pawh ka hre lo der a, tawng thiam lo awmin ka awm tluan chhuak ta zak ringawt.

Pathian fa-te inlanna hmunah chuan Setana pawh a rawn tel ve a, Pathian chuan "Khawi atanga lokal nge i nih?" tiin a zawt a, ani chuan "He khawvela ka vahvaihna leh ka chhuk ka chhohna atangin" tiin a chhang a. Chutah chuan Pathian chuan a tana mi rinawm Joba chu Setana fiah turin a kutah a pe a.

A lo ni e, Khawi atanga lokal nge tih hriat hi a pawimawh a ni ang, Pathian meuh pawhin a hriat chian em em Lucifera kha a zawt tho alawm le te ka ti, chuvangin khawi atangin nge, khawiah nge a kal zel ang tih hi kan ngaih pawimawh a ngai hle a lo ni.

Kan hun tawn hi mawlmawng taka thlir liam mai lo-a "Hei hi khawi atanga lokal nge ni, Pathian duh dan a ni em, ka thil tih hi Pathian laka chhuak a ni em, he thil hi ka tan a tha ber em?"tih ngaihtuahna te kan neih a, kan inven lawk fo a tul thin.

Diabola hi a saseh tur zawngin a phi ruai reng si a.