My INNERMOST

Ti leh tawh ang e..

2011-09-26T20:36:00.000-07:00

Mahni blog-ah pawh Ar khual ang deuhin ka ti leh dek tawh mai, aizawl thlen meuh chu thil a danglam lutuk a, blog lam pawh ngaihven a har talh talh hle mai. Tun atang chuan regular deuha update leh zel theih ka in beisei.

26th July-ah Mozambique ka chhuahsan a, chawlh hmangin London ka teihawi kual nghal a, Londona ka thleninte an fel lutuk a, min duat bawk sia, cham hlen mai pawh ka chak rum rum laiin haw ngei a ngai leh bawk si, ni 12 Aug-ah chuan Heathrow airport atangin India ram ka pan leh ta vung vung a, mahni ram han thlawh luh chu a dan a dang zar zar khawp mai.

Aizawl ka han thleng chu Nu leh Pate khua chu nuam singkhaw kan ti a, ka leng ta ziai ziai mai a, blog lam reng ka hrechang dawn lo a nih hi.

15th September ah hna ka tan ve leh ta a, rin ai takin a lo buai leh theih a, chawlh a zo a, mawng vawm ba ang seka phet a ngai leh ta.

Ruih theih chi hrang hrangte

2011-07-12T23:47:00.000-07:00

Poli-tricks nge Po-lie-tics nge Politics tih pawh kan ngaihtuah ngai lem lo, naupan laia MLA inthlanpui awm dawn apianga political party hrang hrang inauhkhum thin dan leh an inchirhtheh tawn dante ka rilru-ah a lo lut mai mai a, khang lai khan a phuk aphak kan hrethiam tak tak lo-in kan lo uipui-tuilian-thlir ve mai mai thin kha a ni a.

1989 kha ni ta-in ka hria, MNF ho campaign khan an ramhnuai mite film an chan kha an chhuah thin a, kan kawt kha kawn zawl nuam leh zau deuh a awm avangin kan kawtah khan screen lianpuiah an chhuah thin a, narrator khan thiam tak maiin, "Kan pasalthate chuan remna leh muanna duh avangin ui tak chungin an silaite chu an tung ta" tiin a'n sawi a, ramhnuai mi lubuk tak tak khan uluk leh dim takin an silai kha an han tung a, chutah a tawp lamah zaithiamin "Zoram hmangaihtu Lalpa, kan ram hmangaihtu Lalpa, Kan ram hruaitute hi min pui la, i Lalna puang chhuak rawh" tih hla kha an han sa ngei a, a pui kan ti thei teh e. Keini naupang chumchiap mai mai pawh kha kan mittui te chu a hnâm ve sawk sawk a, vote -te phei lo nei tawh ila chu MNF kha kan vote chiang ngawt ang chu.

Khatih lai khan "MN ka sawi thei lo, zoram hi kan ram a ni" tihte,

"Tlaitla-in lenkawl khua a lo thim hian,
Riakmaw sirva leng iangin,
Riahna run kan vai tuk loh ram daiah
Piallei hmun rem kan bel e"

tihte chu kan be pui ve awl awl a, hriat erawh kan hrethiam tak tak lo. Party hla chu ka pa khan inchhunga sak a remti lo bur a, keini chu Neutral kan ni a, party hla sak ve vak vak loh tur a ti a, naupang a thu chang inkhualtelem chang chuan kan sa fo tho.

Party dangte lah an lo diau bik awzawng lo a, "Zoram thim chhah ber su kiang turin, Zoram Congress lo chu an awm lo" an lo ti ve zel a.

PC lah chuan,
"PC kan ni e, kan lawm a sang tual tual
Kan hlimin kan lawm kan ram ngeiah hian
Foreigner kan duh lo, ram pek kan tum hek lo
Kan pek sa pawh lakkir leh hi kan tum zawk a ni" an lo ti, tute nge Foreigner an tihte kha kan hrethiam ngai der lo.

An party office-a mi pakhat thusawi ka la hriat reng chu "Eng anga kutphah hlai pawh rawn kalpui mahse kan bukna hian kan lo buk zel ang a, an tling thei lo ang" a ti lauh lauh, PC ho symbol kha Patla a ni miau a!

Eng thil pawh hi a ruihchilh pawl hi awm zel a ni a, zu chauh hi emaw ruih theih kan ti mai thei a, a lo ni hauh lo, RUIH a nih tawh chinah chuan thil tha tak pawh hi a tha lo lamah a chhuak zel ni awm a ni. Politician te hi ram hruaitu tura Pathian ruatte an ni a, dik leh fel taka rorelin Pathian tih chungin ro an rel tur a ni kan ti thin. Mi hlemhle leh dik lo te an awm thin avangin ramin a tuar a, eirukna leh hlemhletna chuan hlet nasa tak chhuahin kan Mizoram zimte-a mizo, uihum lekte hian hmalam beiseina pawh nei thei lo lekin kan innekchep -in kan in the thu tawh chu a ni a, hmabak thlir chuan tu emaw Pathian thu sawi ang maiin "A pikin a pik chun" hian a hriat tak tak thin.

Politics tuinu-a inbual laklawh tawh hi chuan vawk tuihawka inbual ang maia silfai har a ni hial ang, mi dik tam tak awm thin mahse, mi dik lo an awm thin avangin politician te hian dem an hlawh fo thin reng a ni.

Ruih tih takah chuan Kohhran pawh hi a ruihchilh theih ni awm tak a ni, kohhran thenkhat, an kohhran ni ve lo chu Vanram pawh kai miah lo tura inzirtir te an awm a, Kristian theuh theuh kan rin dan hi a intum pel-inpul hlawm a, ti sual a mual mual pawh kan awm mai thei a ni. Engpawhnise, kohhran ruihchilh a, thlarau meuh pawh ruihchilh hian pawlah leh kohhranah rah tha lam aiin rah tha lo a thlen zawk chang a awm thin, hei hi ven fimkhur a tul a, kohhran hruaitute an pawimawh hle a ni.

Zu hi mi tam ber chuan In thiam a pawimawh, khap kher a ngai lo an ti, mahse in thiam an tlem bawk si. In tam chuan ruih theih a ni a, zurui nge nge hi chu rilru a fim lo a, rui lo ai chuan buaina siam pawh an sam zawk, hei vang tak hian zu hi a tha lo a ni ti-a sawi theih a lo ni thin. Zu khap lo-a in thiam tur chuan mizo te hian inzir chu kan la ngai deuh niin a lang.

Ruih nei reng reng hi chu an nu phût vek a, pangngai takin an nung thei thin lo. Politics a ni emaw, Kohhran emaw, Zu emaw pawh nise, RUI a nih tawh chinah chuan a buai nak thin.

Hetih lai hian Ringtute chu zu in leh rui buaia awm lo tura zirtir kan ni a, chhuna awm anga mawi taka awm turin Tirhkoh Paula'n min zirtir. Chuvangin politics leh kohhran te pawh hi ruihchilh lo a, min siam tha tura hman chi a ni e.

Ziak mite hi

2011-07-03T09:24:00.000-07:00

Lekha chhiar peih tak hi chu ka ni kumkhua a, a ziak lam ka timi lo thung, ziah tumna em em pawh ka nei ngai lo, kumtinin Diary erawh ka nei a, ka ziak peih mual mual thin viau. Tunlai, computer kan hman uar hnu leh internet a awm hnu hian lehkhabu chhiar lam hi ka hlamchhiah nasa ta hle, blog leh website hrang hrangte duh hun huna chhiar tur a lo awm tak vangte pawh a ni mai thei.

Thuziak hi - thawnthu, article, hlahril pawh nise - a famkimlohna lam hi hmuh a awlin a langsar fo a, sawisel a nuam a, han ziak ve dawn ila tlar khat pawh ziah tur hre lo hlei hlei hian sawisel tur kan hmu hnem fo. Ziakmite hian an va bei nasa in an lo va thawkrim awm em, rilru te pawh an va seng nasa awm em tihte hi tunhnaiah ka ngaihtuah thar.

Thuziakmi ni tur hian huaisen a ngai ngawt ang - Mahni irawm chhuak leh mahni ngaihdan mite hriat leh chhiar tura han tlangzarh chu insit a na duh ngawtin ka ring, a chang chuan thudik puanzar hian nghawng thalo leh rah duhawm lo tak a ziaktu chungah a thlen theih avangin huaisen taka thu dik lailan chu a har hle thinin a rinawm, chanchinbu mite hian he huaisenna hi an mamawh hlein ka ring.

Thil chik mi nih hi a ngai tak zet ang. Mite chhiar tura ziah ngam ve tawh ting si chuan thu lawilo leh dawt ngawt chu ziah mai mai chi ni dawn hek lo, an thil tawn apiang mai chik leh dilchhut taka zawh keuh keuhte a ngai thin dawn a, thu dik leh belhchian dawl an ziah a ngaih avangin an thil ziahah an chian a ngai a, a fik afak an hriat a pawimawh. Hemi tur hian kalna lam apiang, hmuh leh hriat apiang chik taka belhchian a ngai, tha leh zung, rilru leh ngaihtuahna tam tak an sen a ngai ngei ang.

Hman deuha Vanneihtluanga Malaysia zinte khan an shopping mall kha engtia zau nge tihte, an street pakhata dawr awmzatte kha a hre thlip thlep a, chu chuan a thusawi dang pawh kha a ti awihawm ve hranpa tlat. Keiin kan veng chhung, nitin ka kaltlang kawtthlerah hian dawr engzatnge awm pawh ka lo hre der lo.

Mi dilchhut takte hi ka ngei zawng tak an ni fo thin, an tana tul lo tur an zawt hnem hian ka hre thin, mahse dilchhut na na na chuan an hre hnem leh nge nge thin chu a nih hi, ziaktu tha leh hlawhtling tak ni tur chuan mi ngei hlawh deuhte pawh hi a lo ngai ta'ng. Lalhmingliana Saiawi pawhin a tia lawm, "thawnthu ziah tum chuan tunlai tleirawlte rilru leh an nunchan te hi hriatthiam a ngai thin si a, Bus-a chuante hian dilchhut tak takin thil ka zawt thin a, thenkhat chuan Tar hur te pawh min lo ti ta ve ang" a ti. A ni duh khawp ang.

Hriatna tha tak neih hi a pawimawh hle, mahni rau rau pawh hi intihhmasawn theih ni awm tak a ni, thil chhinchhiah reng mi chuan hriat reng pawh a awlsam deuh nge nge. Chik tak, dilchhut taka zawhchhuah tawh sa kha ziah dawnah theihnghilh ta tlat ila a ho duh ngawt ang. Chuvangin ziak mi chuan hriatna tha tak a neih a ngai hle.

Taimak hi tih makmawh a ni, kan Bible-ah ngei pawh "Taimak kawngah chuan thatchhe suh u" tihte hial kan hmuh hi. Ziakmi hlawhtling tak chu mi taima tak a ni ngei ang tih ka ringhlel lo. Tawngka-a inhlan chhawn ngawt hi a famkim mawh hle, a hun laiin ziak ta thlep thin ila, chanchin kimchang kan nei ni mai tur hi kan chiang lo leh tlat thin, thil pawimawh tak pawh kan theihnghilh hmin thak thak thei tlat. Ziak mite hlutna hei hian a tilang chiang hlein ka hria. Pu C Rokhuma hi ziaka thil chhinchhiah peih tak a nih hmel, kumina ruahtui tla zat te hi a chhinchhiah a, rial a tla em, eng tiat nge, ruahthimpui a sur em tihte thil te tham te nia kan ngaihte a chhinchhiah a, kum 10 hnu-ah sik leh sa awm dan kum 10 chhung a khaikhinna a ziak a, kan chhiar duh leh hle.

Tawngkam bungrua-ah hian hausak a ngai khawpin ka ring, mitin hian tawngkam bungraw hman bik deuh hi kan nei vek a, a tawngkam atangin hei chu chumi ziah a ni maw te kan ti thei thin. Thenkhat tawngkam thiam tak, tehkhin thu nen dak hlarha ziak thei an awm laiin a then chuan bung deuh nghutin an ziak a, a ngaihnawm thova. Mizotawnga ziak a nih chuan theih hram chuan mizotawng veka dah thin hi a tha hle, chhiar pawh a hahdam bik. Tin, ziak tura intintuah ve tawh ting tang si chuan tawngkam bungraw mawi leh tha zawn leh thlan thiam pawh a tul hle.

Thil ngaihtuah leh ngaihruat thiam mi nih hi ziaktu tana pawimawh tak pakhat a ni, unau thawnthu sawi pawh a dang an ti mathlawn lovin, a ziaktu azir leh tawngkam hman azira thu pakhat rau rau pawh ngaihnawm bik riau a awm thei thin, ziaktu chuan a chhiartute lungawina zan a chhawpchhuah a ngai a, thudik ngau ngau ziah tum mah se, a ngaihnawm tur zawnga thu leh hla a rem chhuah a ngai thin, chu chuan ngaihtuahna leh ngaihruat thiamna a neih a pawimawh tih a ti lang, hei hi thil namai a ni lo, thawnthu ziak a ni emaw thil thleng chanchin a ziak a ni emaw ngaihnawm taka ziak tur chuan ngaihtuahna sen a ngai hle thin.

Ziakmi nihna hi mahni inpek chawp mai chi niin a lang lo, midang, a chhiartutena an pek tur ni awm tak a ni. Ziakmi han tih hian chanchinbu-a open letter in thawn zur zut lam emaw, tute political party emaw sawi chhia a, a dang fak emaw vak lam kha a ni lo a, Ziakmi tak tak chuan quality a nei tur a ni. Ziak mi tia inchhal ve si, an thuziak chhiar peih miah lohte hi awm thei tak a nih hmel e.

Chuvangin, ziakmite hi kan han sawisel ve leh chiam thin na-a, a nihna takah chuan mi ropui tak an ni e.

Dawn chang ni hian ka ngai Nunhlui liam hnu.

2011-06-06T01:41:00.001-07:00

Ti leh hluai teh ang, rilru-a a lan chang changin. Nunhlui liam hnu hi dâwn kir mai loh chuan koh kir rual ni tawh si hek lo, tah hian lunglen hnemah dah leh ang..

Pitar putar, nu leh pa tam tak hi zawt ila an nuna hun hlimawm leh ngaihawm berte hi an naupan lai tiin an chhang furin ka ring thin. Keini tak ngial pawhin lunglenna chhan tur kan ngah ve em hi maw!

Thingtang kuai rual kan nih atangin mizo hmeichhia in an tih thin ang hi chu ti kim ve vekin ka inhria. Ka nu hi nu azawnga mizo nu ber mai, kut âwl ngai thei hlek lo a ni mauh mai a, kan âwl ber ni pawhin a puan tah tur la kan hlum tal thin. Hahchawlh pahin la hlum rawh u a ti hmiah zel. Chuti a nih loh vek chuan sikul chawlh leh kar tawp chawlh hi chuan ram lamah êm nen kan in um liam ziah a, kan thawh a tlem emaw a tam emaw, kan tih theih awm tawk hi min thawhtir tur a hre ziah leh nghal. Unau zinga milai nih vang emawni, hruai chik takah min neih nghe nghe.

Ka Pa thianpa Pu Thangkhuluaia hian êmte, hnang sin taka hlaiin nalh deuh maiin, te fel at mai hian min tah sak a, chu chu ka phur liam ve ziah, ka Êm-sin chu a nalh em avangin feh pawh a phurawm deuh sawt thin nghe nghe. Thiante nen kan han kal ho bang bang a, annin paikawng pangngai lian tak tak an phurh laiin kei chuan ka êmte ka phur bam bam thin a, nuam ka ti thin teh e..

Haw dawnah phur kan han siam a, Vaimin, fanghma, hmazil leh thlaifur chi hrang hrang, a lian tha tha phurh kha ka chak ve a, ka bei vum ve viau thin. Haw kawngah “I phur chu a rit em?” tiin min han zawt a, “Rit lo, a khin” tiin ka chhang tlat zel zu nia. Mahni phur rit tih chu ka hreh deuh ni tur a ni. Chuti chu ni mahse, in ka thlen hi chuan ka phur hi a phai thei hle, kalkawngah a rukin ka nun min lo chhawk a, ka phur a lo la then zeuh zeuh thin a lo nia, Nu hmangaihna hi chu a lo mak teh e!

In kan han thleng a, inti FEH tak maiin, chhungte tui lum sa-in kan han inbual phar phar a, kan phurh hnem leh hnem lohvin kawngro a su tawh lo, thlai phur hawtu kan ni tawh tlat a, in nghaktute chuan phur an han phawrh a, hahna zawng zawng theihnghilhin hlim takin Vaimin te chu kan rawh puak pawp pawp tawh mai thin.

A chang chuan Inrinni hian thiante nen Tumbu khawrh turin kan inzui liam ve leh hluai thin, tumbu hi thil tui chu a ni hran lo hle, mahse han veh vel hi a nuam ve hranpa a, a khaileng kan hmu a, kan han fik hmawk mai a, a lum tawp tawp a, a hnai-ah lei leh hnahthel ro a bet duh si, a ban duh bawk si, kut a bal duh thin teh e. A hmuam hmuh fuh chuan kan lawm thei hle, changel erawh a hek deuh, kan kih hnan tawp zel si a. Lairawk tumbu han hmuhfuh hnem deuh tum hian a nuam kan ti thin, lairawk hi chu a phak lo bik tlat a, a tui kan ti bik thin.

Tumbu khawrh hian Aidu hmuh fuh hlauh chang a awm thin a, a lawmawm thuah hnih thin, a sentil han mal malh malh phei chu a nuam dangdai ve riau, Aiduria hi a tui mah zawk na-a.

Mautuai khawrh erawh chu thil namai a ni lo thin, mau hung tha deuh kan han hmu a, mautuai a awm chuan kan han thutchilh chat a, a hmun a hnawn deuh chuan thosi leh vaihmite, thomitchhaih chenin min rawn vir nghal luih luih a, mautuai mê nen thak hiah nen, kan inhiat vual tet tut a, puan a lo mê tawh thin bawk nen, kan meng phelh phung mai thin a, hmai vung burin kan haw ta thin kha ania.

Naupan lai khan Gas tih vel a la awm lo a, kum 13 ka nih hnu chauh niin ka hria gas kan neih ve kha, chu pawh a to hle a, kan hmang zen zen lo, Diakkawnah Pu Ruata te dawrah Rs. 57/- a ni thinin ka hria, thing nen kan hman kawp reng tho thin. A chang chuan khawnvartui stove kha kan hmang thin a, chhem hlum a har thin ngei mai, a chhin hlumna kan lei hnu-ah erawh chuan kan chhin hlum ta hmak mai a, a awlsam ta hle, mahse a rim a chhe duh hle.

Chutia gas a la van em avang chuan thingphurh chu hmeichhe hna ber a ni a, hun awlah thiante nen kan phur ve thin. Daihnai-ah thing kawi chhe te te kan han fawm a, in kan thleng a, chhungten “In va phur tha em em ve, thuro a tap ang a..” min han tihsak a, kan lawm ve em em thin. Thing ding ro tha tak hmuh fuh tum phei chuan a hlimawm ve hranpa duh khawp.

A chang chuan mauhakah mau ro mai mai te pawh kan phur a, dai hnai te a ni a, hun a duh rei lo a, chawhnu lam school chawlh remchanah te pawh a phurh mai theih zel a, kan chhek hner hnur thin, amaherawh chu mau hi a alh hluai a, a rem leh duak a, a vam ve tawh si lo a, tuah a hek bik thin.

Mau phurh hi fimkhur a lo ngai khawp mai, vawi khat chu kan mau phur kan chawl hahdam a, kan han kal leh tur chu ka u-in a phur a han kuai a, mau atang chuan Rultuha a rawn dak lawr vang mai a, kan te nasa teh e, rawn kal remchang mipa tleirawl ho-in an rawn that a, chuta tang chuan mau phurh kan tih ta riau.

Vawi khat chu Serchhip kan awm laiin ka u leh kan thiante 3 nen hmeichhia hlir Sakhisih ngaw lamah thingphur turin kan chhuak a, kan kal hla bawk a, thingzai ho thing phaw tha tak tak kan hmu a, kan ek teuh a, kan hlim hle. Hlawhtling inti takin kan haw a, thui vak lo kan kal hnu chuan Hauhuk an rawn hualreu ta vak vak mai, atu-amah khan Hauhuk hualreu lo la hre ngai hek lo I le, kan hlau ta khawp mai a, bak lengin kan tlanchhia, a hauhuka pawh chu khawiah nge an awm kan hria a ni zeng lo, kan tlan tawp mai a ni. Kei leh ka thiante 2 chuan kan thing phurh lai chu kan keuh a, kan Êm chu kan khai lawp lawp mai.

Thui tawk fang kan tlanchhiat hnu chuan kan veng tlangval kebai, kan ngei thin deuh mai leh a thian pakhat sapel tura chhuak hi kan tawk hlawl mai a, kan thla a muang suai suai nia.. Ramsa hram kan hria tih kan hrilh a, anni pawhin an lo hre ve reng a, kah an tum a lo ni, Hauhuk a nih kha an ti et a, a hlauhawm loh, tikhan thlamuang deuhin haw rawh u an ti a, kan mi ngei deuha pawh chu kan ngei loh phah ve ta deuh. Haw kawngah chuan kan hmuh theih ang ang thing kan fawm tha leh ta ringawt.

Tum khat chu Kolasib kan awm lai tho hian ka Pute khua, thingtlang leh chhawngah kan zin a, ni khat chu an chúl-ah kan feh a, ka Putea fate ho nen kan ni a, nuam kan ti phian mai a, tih tur bik em em nei pawh kan ni lo a, kan feh chak kan feh ve mai mai a ni.

Lo kan thleng a, bawkbawn leh samtawk tang rahte leh a chi tura an zuah lian pui pui hmin lek lek tawhte chu kan lo ta vek mai a, bawkbawn chang deuh deuhte chu hei chu a lian tha lutuk tiin kan lo vek a, a hnu-ah ka Putea fapa te an lo thleng a, kan bawkbawn lawh sa te chu a chang lutuk tiin thlam tlaitlanah chuan an theh chhuak zung zung mai a, kan haw teh e.

A hnu-ah chuan pangbal leh kawlbahra te kan cho e kan ti a, a bul kan hmuh chu kan bawhzui zel a, tlema bawk lil lel tawh chu kan vaihma vek a ni ber a, kan cho mai a ni lo a, a laih hian kan lai a ni zawk, kan hai vung terh turh mai a, kawlbahra chawhna te chu a kaw rel rul mai, tlaia in kan thleng chu kan râl atanga min hmutu te chuan “Vawiin chu in lovah Sanghal a chhuak emaw kan ti mai a!” an ti a, an then tha hlawm mai. Keini lah titha kan inti ve em em si a.

Hetiang hi kan naupan lai hun tam ber kan khawhral ve dan ania, dai hnaia sava veh leh thang kama kan vah kual dante, tawlailir ke tur thingtuai kan sah leh kan tawlailir siamte zawng zawng pawh ziah tham fe chu a la awm ngei ang.

JUNE

2011-06-01T03:59:00.001-07:00

Vawiin June ni 1 a ni ta vuah mai. 2008 March 19-ah Mozambique-a rawngbawlna bul tan turin ka thleng rawih a, a mi chengte eng ang nge tih leh eng tawng nge an hman tih pawh ngaihtuah lo lekin ka arkawh chhuah ve tawp kha a ni a, Airport-a kan han tum chiah khan buaina namen lo-in min hmuak nghal, Portuguese an lo hman avangin Immigration ah ka tang tep, min hmuaktu 1 a rawn lut a, min rawn chhanchhuak ta hlauh a ni.

Kum thum awm tura ruahman ka ni na-a kan hotuten thla thum dang min awmpui leh rawh an tih avangin June 2011 hi ka awm pumhlum leh dawn ta a ni, ka term pangngai ang kha chu nise April thla-a haw thei tur kha ka ni a.

Tichuan ni 1080 vel awm tura inbuatsaih kha ni 1200 vel lai chu ka awm dawn ta a ni.

He rama ka awm chhung hian thil hrang hrang ka zir chhuak nasa khawp mai, dawhtheihnate, hmangaihna te - he hmangaihna hi nula tlangval inhmangaihna lam chu a ni lo ania - rinawmna leh huaisenna te kawng hrang hrangin Lalpan min zirtir a, a chang chuan beidawnthlak tih ngawih ngawih chang leh hlawhchham let der nia inngaih changte pawh a awm ngei mai.

Amaherawh chu ka kal hma atanga a rawng bawl tura min thlangtu leh min kotu kan Pathian hian nitin a rinawmna leh a hmangaihna hi ka nunah a tharin a lantir reng a, ka tan a rinawmna hi chhiar sen rual a ni lo. Zawlnei Jeremiaina "I rinawmna a ropui e, Lalpa chu ka chanpual a ni, ka nunna-in a ti a" a tih ang mai khan, Lalpa hi ka chanpual a ni a, midang ai hian min hmangaihin min enkawl bik em ni tih chang ka nei fo thin, nimahsela, chutia Pathian chungchang sawi chu a fair lo ang tih ka ring "thlei bik nei lo Pathian" a ni si a.

Engpawhnise, dam taka ka hun tawp thlenga min kaihhruai avang erawh chuan Lalpa chu ka fak a, he kum thum chhung hian natna hrehawm leh damdawiin luh ngai khawp harsatna vawi khat mah ka tawk lo a, ka hna avang leh thil dang vang ni lo, mimal harsatna leh dammawh hritlanna avangin chawlhni inkhawm vawi khat chiah ka thulh a, office erawh ni hnih ka thulh thung.

Mi tam tak khawvel hmun hrang hrangah Missionary hna thawkin hmun hrehawm tak takah an awm a, chung mite nena han intehkhin rualah chuan ka inngai lo. Thenkhat dang erawh mahni pawimawh hna dang thawkin an kal chhuak bawk a, chutiang zinga pakhat ve mai chu ka niin ka inhre thin.

He rama ka awm chhung hian mite tan malsawmna ka ni em tih pawh ka inzawt let fo thin a, min tirtu tan hian ka thawk nep hle pawhin ka inhre thin, nimahsela ka theih tawk ka tih ve erawh mal min sawmsak ngei tih ka ringhlel lo.

Haw tura ka han inbuatsaih takah chuan lung te pawh an ti leng ve deuh roh a, kal leh tawh ngai lo tura inngaihna hian min ti hrehin ka lungngai! Hmalam thlir erawh chuan ka phur a, mahni ram ngei, mahni tawng ngeia han ti ti suam suam hun tur ka suangtuahna mitthla ah a awm reng.

A Aw B Hla.

2011-05-05T03:44:00.000-07:00

Naupan laia A Aw B kan zir dan hi a awlsam ang reng ngawt mai, kan sa zet zet a, thiam a awl bik riau. Nakinah thangthar ten an lo hriat ve nan leh kei ngei pawhin ka theihnghilh loh nan helaiah hian ka'n dahtha ang e.

Sikul ka luh tirhin, mikhual ang ka ni a
Ka pawl min siamsakin, ka hming an han ziak a
Mak ti awm tak maiin A ka han ti phawt a
Lungleng awm tak maiin Aw ka han ti a

B ka han sa ta a, chhawn tur van vei vei nen
Ka kawibawm min ti ngai, kan tualzawl nuam tak nen
Ban hma loh phei hi chuan Ch ka lam ka lam thin
Ei tak tak si lovin D hmun ka thleng thin.

Phul emaw ka lo ti, E a ni awzawng lo
F ka lam phei hi chuan a lo awzia ta zawk
G ka lam phei hi chuan vai rim a nam rum rum
Aieng awm si lovin Ng ka tih tak chu.

Hahchhiau chhuak awm takin H ka han ti a
Zungchala kawk zelin I ka han ti chiam a
Mal rawl teuh ang maiin J ka ti thel thawl mai
K a kal si loin thui tak tak ka kal.

Lo zir hmasa te hi L ngawt ka tum ta a
Lum ti awm tak maiin M ka ti em awm mai
N lovin ka zir thin dangnal hnu-ah phei chuan
O ka ti o o thin vawn ka tum vangin

P kianga ka awmin ka Pu pawh ka hre thin
R ka lam erawh chuan kan sumhmun ka hre thin
S ka lam erawh chuan ka saisik seih seih thin
T ka lo thleng ta a, ka ti ti ta thin.

Vai ral kian hnu pawhin T ka ti leh dek thin
U kianga ka awmin ka lo uang em em a
Khuai lamte pawh zirin V ka ti veng veng thin
Z ka lo thleng ta a, ka chhiar zet zet mai.

I kir leh ang u, vangkhua-ah
Nu leh pa unau thenrualte lawma'n

A her chhuak leh ta.

2011-05-01T11:01:00.000-07:00

Thing delh loh, lung delh loh nafam chu Pathian zarah pianchamphaphak ka lo thleng leh ta reng mai. 'A tam tawh e mai' tia paih then ngawt chi lah ni hek suh, lawm taka lo dawnsawn leh mai kha kan tih theih awmchhun a ni.

Kumpuilingleta kan nghah, Tlumtea thlir taka dingdihlipa kan thlir thin, naupan lai phei chuan a tluka hunpui duhawm leh nuam awm thei chuang tawh lo tura kan ngaih, kawr thar, thawmhnaw mawi neihna hun remchang, hnianghnar taka ruai kan theh mup mup thinna, Nu leh Pa lungleng thei deuhte pawhin lunglen hrikthlak na atana an vauchher ber pawh Lal pianchamphaphak lawmna a nih hi maw.

Naupan laia upat kan chak vak lai khan eng vanga puitlin vat chak viau thin nge kan nih le? Puitlingte ah khan hmuh kan nei a, duh duh ti thei nia ngaihna lian tak kha kan nei ve hrim hrim a ni ngei ang, an kum ang zat kan han thlen meuh chuan Naupan lai kan thlir kir leh lawi si!

Kum apun ang zelin bûk pawh a lo rit ve chawpchilh a, intihcher te chu tum enah pawh kan en tawh chiah lo a nih hi. Darthlalang hma-a han din chang hian lungawina hmuh tur a vang thin.

Thenkhat chuan kum 30 kai chiah hian hringnun bul kan tan an ti a ni awm e. Kan dam chhung hun hi a rei lo a, Mosia chuan Chakna avangin kum 80 a ni thei a, nimahsela, a reina chu thawhrimna leh lungngaihna mai a ni a lo ti a. Mi tam tak naupang te te-a thlanmual liam ta te ngaihtuah chuan kan Nunna vawngtu leh kawltu-in pian champha vawi khat dang dam taka min hruai thleng leh hi lawm viau tur ka ni.

He hringnunah hian lungawi lohna leh kim lohna te, duhtawk loh riauna te a awm fo a, kan phunnawi fo thin. Nimahsela kan tawn apianga lungawia, tuarna pawh malsawmna tia dawnsawn zel theihna hian he khawvela kan damchhunga kan nun chu a tinuam mai a lo ni.

Ka sumdawng ve

2011-04-21T06:49:00.000-07:00

Tlem lai deuh khan Solomon’s Cave ah thawmhnaw dawr kan nei thin a, Krismas dawn hi Buh lu chuh lai ang maiin sumdawng zawng zawng mai an hmanhlel vek thin. October emaw November thla hian bungraw la turin theihna lam lamah an intir chhuak sung sung a, Bangkok, Hongkong, Kolkatta, Kalimpong, Katmandu lam thlengin an chhuak suau suau thin.

Ka unaute ho chu bungraw la in kil tin kil tang an hrut a, kei pawh a sakhaw rawngbawltu ber ni mah ila thahnem an ngai bawk nen, ka kut awl chu an hmu thei der lo, Katmandu lamah kal ve mai teh min ti a, kei pawhin unaute tang em em a, lo awl reng chu tiin mi zui tur tha an awm bawk a, an hnung zui a, bungraw hawn tawp tur chuan ka arkawhchhuah ve ta rawih a.
Zarkawt atangin Sumo-in Guwahati kan pan a, Guwahati atangin Rel-in Siliguri thleng, chuta tangin Bus-in Katmandu kan pan leh a, kan zin chau hneh hle.

Katmandu chu zing khawvar rual in kan thleng a, Hotelah kan invawm lut rawih a, kan inphihfai, kan inhnawhpuar a, bungraw zawng tur chuan kan phek chhuak ta. Dawr nghak ngai lo ta chu bungraw kal tur leh tha ka hre lo khawp mai a, kan kalpui U Ungtea chuan “Madin, nang enge I ngaihdan, enge I lak dawn” min ti a, “U Puitei tih ang ang a ni mai” ka ti zel a, U Puitei chuan min tihpui ta vek a. A B.Com graduate ber kha bungraw thlan kawngah chuan ka lak tlak loh ber a! Pawisa chhut vel thu-ah erawh ka tangkai ve hlauh, Indian Rupee leh Nepal Rupee kha 1.6-in khatih lai khan a inthlau a, thil man an sawi apiang kha ka lo convert zung zung thin a, chutih kawngah chuan ka tangkai ve hlauh, ni lo phei se chu Lota nupui chikhawn ding reng ang maiin ka laktlak loh ang.

Katmandu ah bungraw duh ang kan lak zawh hnu-in Carrier kan ruai a, keini chuan bungraw nghak turin Dulabari kan pan thla leh ta thung. Kalpuite an zei bawk a, bungraw lak leh dawr velah harsatna nei lo-in kan tluang khawp mai. Dulabari-a kan bungraw nghah pah chuan kan bazaar kual leh a, kan tei nasa fu mai. Tlai lamah chuan kan kalpui Mafela nen Siliguri lam pan turin kan inhawl chhuak a, thian dangte chu bungraw thawn tur carrier zawngin an cham a, keinin Siliguri lamah a dawn dan tur kan lo va chingfel hmasa dawn a ni, kei chuan rucksack tereuhte ka ak a, cue case ka hawl chhat chhat bawk, Mafela chuan bag lian vak lo a ak thung. Cycle Rickshaw in Nepal ramri chu kan kan a, Ramri-a custom duty te miin an hlauh theih nen keini lah chu tuman pip e pup e pawh min ti hlei lo, tuma tihbuai lohin ramri kan pel fel der a, ka cue case te chu rawn hmu fuh na se chu an man duh ngei ngei tur a nih vei nen.

Siliguri pan tur Bus chu ramri-ah kan chang a, Mafela lah kei aia la naupang ve leh chhawng, chinchang hre bik vak lo kha a nia, U Ungtea’n Pani tanky bulah in chhuk ang a, Hotel room hnih in book dawn nia a ti a, chutiang chuan Pani Tanky chu kan rin zawn ta.

Kei lah motor ka la rui zui, Siliguri khawpui chhung kan lut tawh, traffic jam lai takin tukverh-ah ka’n luak puat maia..h., pawn lama awm vai ho chu an thinrim teh e, min rawn melh raw raw hlawm a, kan tlan liam san ta daih a..

Hotel chu kan zawng hmu ve ta mai, room pahnih kan la a, pakhat chu bungraw thuhrukna tur, pakhat kan awmna tur a ni. Dulabari-a kan bungraw thiar tur chuan thiante chuan carrier an ruai a, bungrua chu chumi nileng chuan hotelah kan lo nghak ta a. An rawn thleng chhawr dawh ta ut ut reng mai, a lo thleng hmasa ber a lo thlen chuan ka hawihai ngei mai.

Kawngka an rawn kik a, kan hawng chu vai ngal ria zet pahnih hi an lo ding zum reng a, Mr.. ni em an ti, aw kan ti a, hei bungrua a lo thleng an ti a, room ah chuan an lo lut a, Ip tereuhte bak an nei si lo a, bungrua chu an la rawn la lut turah ka ngai a. Anni kan carrier chu an han inphelh ta ale… An chawnte chu thawmhnaw hlir hi an lo tawnbet khat tlat a, pheikhawk chu bag-ah muk em em hian an lo hnawh bawk a, kawr an hakthuah chu an hlip teuh bawk a, an pahniha an han inphelh zawh chuan Air bag pahnih chu a khat ti tih der a! An chhuah veleh keinin chu bungrua chu kan room pakhatah chuan kan sawn leh ta vek a. Room pahnih kan lakna chhan pawh kha kan Carrier te khan sual an chhuah hlauh chuan Custom ho hnenah min hekin kan room kha an lo kawhhmuh hlauhthawn thu-ah a lo ni a..!! Ven ngai apui a lo va tam em.

Bungrua chu a rawn thleng nileng a ni deuh ber a, an chhuah veleh hmanhmawh mangkhengin Mafela nen chuan room dangah kan lo sawn nghal char char a, kan hah ve hle mai. Tlai lamah kan thiante pawh chu an lo thleng ve ta a, kan bungraw dangte nghakin a tuk chu kan cham a, chumi pahin chung bungrua zozai chu engtinnge Mizoram kan luhpui ang tih ngaihtuah a la ngai cheu.

Siliguri-a sipai hmunah kan va kal ta a, Mizo sipai chhuti, Zoram lam haw tum an awm em tih kan ngaichang a ni, an lo awm hlauh chuan an bungraw zingah kan thawmhnaw chu kan thawn ang a, thawn man kan chawi thung ang, haw remchang an awm loh pawhin Guwahati thlenga bungraw thiara inhlawh duh tawk chu an awm ve reng thin, chutiang chu kan zawng a ni. Vanneihthlak takin kan hmu ta hlauh.

Bungraw thawn tur kan hmuh hnu chuan Hold-all, sipai ho hman ang, an bungrua ni-a ngaih theih tur leh thingrem lian tawk kan lei a, thingrem chu rawng dum kan hnawih vek bawk. Tah chuan kan buangruate chu kan rem ta a, kan inrem tlaivar thak a, zingah chuan kan zinkawng kan chhunzawm leh nghal. Kan bungraw min kensak turte chu Rel Station ah kan va chang a, kan bungrua chu kan thawnfel a, keini pawh kan chuang ve nghal. Guwahati chu him dam takin bungrua ten en kan thleng tar up mai, thaw khat chu a veng.

Guwahati – Aizawl hi a hautak leh dawn mang e, thawlhna-a phurh rual loh bungraw rit kan hawn si. Sumo kan la a, bungrua zawng zawng vawikhata phur duh an vang em em leh nghal a. Aizawl kan panna kawngah chuan ka kalpui U Puitei hnenah chuan “Hetiang hrepa sumdawn mai chu, Aizawlah hian thil hi to deuh mahse a awm hliah hliah, risk a sang si, ven tur tam si, in hah si. A thlep thum pawh chhiar se, a awm hluah hluah” ka ti a, u Puitei chuan, “Chutiang chuan mi hnenah pawh sawi zel rawh.” a ti ringawt.

Heta tang hian a ni sumdawnna hi tih mai mai a lo ni lo e tih ka hmuhchhuah ve tak ni.

Chhangchhiat ka zir!

2011-04-18T06:19:00.000-07:00

Thian thenkhatte chuan ka thenawmah Zimbabwe lam mi an rawn awm thar tih kha in hre mai thei. DC ni turin an lokal a, portuguese an la thiam ve loh avangin inti thiam takin tawngte ka lehsak vel vei thin a, an lo thlen hlima lo dawngsawngtu leh an in leh lo buaipuitu ber ka nih bawk avangin kan khawsa ho nasa ta hle.

Fa pahnih, mipa kum 9 leh hmeichhia kum 14 mi an nei a, anni pawh an vengva phian a, ka in chu an Inpui ang deuhah an neih chawt a, an bungrua a lo la thlen kim loh avangin ka TV an rawn en awl lo a, Movie an duh duh an thlang a, zan dar 10 thleng rak rakin, chhunah lah School an la kal loh avangin ka inah chuan an lo sapa tal thin. A naupang zawk hi a kawlhrawngin a'n harh khawp a, a bulah chuan Tuirini zawng pawh a thu hle hle mai thei a ni. Ka u fate ho, naupang rual ka kawikhawm thin ai mahin he mipa naupang pakhat hi a tawrhhlehawm zawkin ka hria.

Tlai ka office ban veleh in atangin a rawn chhuak nghal a, I In kan tihnawk lutuk tih chu min lo welcome na tawngkam hmasa ber a ni fo. A sawi ang ngeiin In ka'n lut chu Thlipuiin a nuai ta emaw tih mai turin a lo hnawk nuai a, hah hnepa office atanga haw e ti lo hian In tifel reng rengin ka hmanhlel leh thin, han hau chiam dawn ila thian dang kawm tur an la nei chai si lo a, an khawngaihthlak ang reng bawk si.

Ei rawng ka bawl leh, purun chan ve phet a lo tum a, tomato a lo rawt thul, puan ka suk leh darthlalang nawhfai a lo tum ve zel a! Puan ka nawh lahin ka drawer zawng zawng a lo hawng a, make-up a lo khawih kim vek a, ka bawm, hawn theih chi zawng zawng chu a hawng kim vek tawh. Duh lah chu a ngah em em mai, hei hi min pe rawh a ti zo vek, Ngatan nge i tih a? han ti ila, thil tha deuh ka siam dawn te hi a ti ringawt zel a.

Nu, fapa pahnih/pathum nei hi an lo va buai thin awm e tih min ngaihtuah tir ta vel mai mai.

Buh tuh hla

2011-04-12T02:13:00.000-07:00

Benvawn fengin kawltu chawi la

Ngur hnemtu sawmfang mal za
Tuhin mualpui liam zel ila
Lawm te u, sir sawn phei ru
Tang ula cheh khata thlak zelin
Kan ral mi u lawm lungrualte chhing turin

Kan engkim tur, kan silh leh fen,
kan hak, kan khim kan ei tur
Tiakin to la, ka Lawmi nen lungrual ten kan veng ang che
Chhungtin kan lawm nan thang del del la
Kan vangkhawpui sakhming tisang turin

Chhim leh Hmar, Thlang kawl a lo hnim e
Chung vanrial pawh rum mahse
Virthlileng khuang ruahsur hnuaiah
Siali, Vuaia phang lovin
I bei zel ang eng siaua chun leh zua
Hrinhniang lunglawmna ber tur a ni e

(a phuahtu ka hre ta mai lo, naupan laiin kan sawi thin, rilru-ah rawn lang thut a, ziak vel mai mai.)

Intihhmuh.

2011-03-30T23:52:00.000-07:00

Mizote hi thil intihhmuh ching tak kan ni ve hrim hrimin ka hria, hnam dang hi engemaw an an ang ni, ka hre lem lo a.

Damdawite hi thiante chawh chawt chawt kan ching, natna in ang ni-a kan hriat chu Kei pawh ka ei a, a tha, ei ve rawh te kan ti ngawt zel a, kan chawh loh vek pawn kan zawt tal a, kei tak pawh hi damdawi lam hriat engmah nei uk lo hian sawi mai mai ka ching khawp, sim daih chi a ni.

Zuk leh hmuam pawh hi chuti tho, thianten an ti liam liam a, tih ve mai kan ching a ni awm e. A bikin Mipa hian meizuk hi Paa riau-a hriatna an nei a ni ta'ng, High School naupang, mei zuk ching an tam riau. Kan High School kal lai-in mipa ho hi chawlhlawk veleh an tlan chhuak a, Tuizem bulah mei an zu ru thin a, an bial luih a, a khu luih luih thin, kan Miss-in a hrem hlawm, Tuizem hal in tum em ni? a ti a, an nuih chu a za ang reng hlawm khawp mai.

Incheina hi kan intihhmuh thin langsar tak pakhat a ni bawk. Thianten pheikhawk nalh deuh an nei a, neih ve kan duh zel. Kawr chi dang deuh a rawn chhuak a, a design kan entawn a, thui ve zel kan tum hlawm. Kan nulat laia Levenday puan an tih mai thinte kha nei phak lo nih a va hrehawm tak em ve aw... Tunlai nula, tleirawl te hi chuan korean style an in tihhmuh mek niin a lang.

Internet leh Blog - Kan lo changkang telh telh a, mizote pawh internet kan hnimhnai in kan hmang nasa tial tial a, mahni pual-a blog, website etc siam thei apui kan tam ta, kan intihhmuh hneh leh pek khawp mai, mahse regular taka update thei chu ar chil zat lek an ni leh lawi si, internet khawlai hi kan va tihnawk hneh tak em! leh peka.

Facebook - Facebook mawlh mai hi a chang chuan ka nuih a za thin, rin loh tak tak hi an rawn lang nawlh nawlh a, kan va chhangchhe tak e aw.. Min rawn invite chawt chawt a, han accept ila hnara khawn ang maiin an bo leh thin si, active viau ila, i va hman awm ve kan inti leh lawi bawk si, ka tan chuan chanchin hriatna leh lam hla thian kawmna tha tak a ni a, tha chu ka ti ang reng viau tho, mahse ka ti mah mah em aw chu ka inti deuh, Hmanni pawh ka nau thian pakhat-in min rawn bia a, FB-a chat vel hi i inhmeh lo e.. min ti, enge ka inhmeh niang aw.. tih erawh min ngaihtuah tir thung a!

Hetiang hi a ni e, tunlai ka rilru a awm mai mai chu. Tirhkoh Paula erawh chuan Timothea hnenah khan " I naupanna tumahin ngainep suh se; thusawi kawngah te, chetze kawngah te, hmangaih kawngah te, rinna kawngah te, thianghlimna kawngah te ringtute tihhmuhtu ni zawk ang che" a ti. I Tim. 4:12

Thil tha lam intihhmuh hi i teh tum ang u.

Ka tunlai boruak tawn

2011-03-13T22:50:00.000-07:00

Pathian zara dam te-a han awm hi chuan eng eng emaw hi kan tawng kan tawng mai a, tihian awmhmunah tunhnaia ka thil tawn thenkhat ka'n hrilh leh mai mai che u 'nge.

Thalai ho hla zirtir - Ni 19-20 March hian kan Territory lawmna pahin Territorial Congress kan hmang dawn a, kan inpuahchah nasa ve hle, chumi atan chuan thlalai ho hla ka zirtir e ka ti a.

A tu amah Solfa thiam awm hek lo le, ka vai hma vek a ngai a, a ni hmasa berah chuan Soprano leh Contralto kan bei phawt a, a hnu-ah chuan tih dan tha deuh ka ngaihtuah chhuak a. Contralto leh Tenor chu ka aw ka record a, hla zirna ah chuan Lap top nen ka thawk chhuak ta rup mai a, Tenor leh contralto chuan ka aw thun chu an lo Bethel pui laiin Soprano leh Bass lam ka lo buaipui ta thung a, a tih chi phian mai.

Chutia rei tawk fang an pil vang vang hnu chuan kan in kokhawm a, kan han zai ho ta. Ka aw thun aia Key sang hretin ka la a, Contralto chu an buai ta tlat mai, Tenor ho sawn kan part an sa ve an rawn ti, Tenor chu a malin ka zaitir a, an sa dik si, Contralto chu kan tihtir leh a, an buai ta tlat. Eng dang a ni lo, a key ka san vangin an man lo kha a lo ni a! A key chu ka thlak leh ta ringawt a, chutah meuh chuan an sa dik ta awl awl a..

Judge tenau ah ka tang - Vawi khat chu kan thawhpui pakhat hian "Capt, Beauty hnenah thil sawi duh ka nei a, i awm laiin sawi ka duh a, i hman em?" a ti deuh kher a, eng thu leh hla nge a sawi duh pawh hre hlei lo-in "Hman e" kan ti satliah a, tichuan ka room-ah kan kal a, Beauty chu a ko a, kan pathum chuan kan thu ta tham a.

Celeste chuan "Capt, tawngtai phawt rawh" min ti leh a, "Eng atan nge ka tawngtai ang a?" ka ti hu a, ani chuan, "kan tan hian" ti leh mawl tawp a, ka tawngtai ta poh a, thiam a har hle. Kan Amen chu a sawi duh chu a sawi ta.

Anni pahnih chu a hma deuh khan an lo in the thu deuhin an thu leh hla a lo in bakkaih deuh ni awm a ni, Celeste chuan Beauty hmel atangin a thinrim tih hre si, enge a chhan chiah hre si lo khan hriat chian a duh a lo ni, a zawt ta vel a, Beauty lah chuan "Ka thin a rim hleinem" tiin a lo pha tang kawh tlat thung, ani lahin, "Tunah ka thinrim lo i ti mai mai, a hun lai kha chuan i hmel leh chezia, tawngkamah i thinrim tih a lang reng a, midang pawhin, Enge a awmzia, an ti sup sup alawm" a ti si, an inhnial ta char char mai a, ngawi rengin ka lo ngaithla tawp.

Thu ngai an sawi an sawi a, an thu a inhmu thei dawn ta lo-in ka hria a, a hnu-ah chuan "Ngawi teh u, in sawi ngai hlir in sawi mai a, tawk rawh se, hei in sawifel tawh a, Beauty pawhin ka thinrim lo a tih hi, duhtawk tawh mai rawh u"ka ti a, dik tak chuan Beauty chu a naupang zawk bakah anmahni ka hriatchian ve ve avang leh an thusawi ka ngaihthlak atangin a thiam lo zawk tih ka hre mai a, Celeste lah chuan "I bula awm dan tur hi ka hrethiam lo, a changin i tha em em a, a changin i tum kawh leh tlat a, engtik huna biak tur che nge, engtika pehhel tur che nge ka hrethiam lo" a ti, kei pawn chu chu Beauty laka ka rilru put dan leh ka hmuh dan chiah a ni a, mahse sawi ve hun a ni lo.

"Celeste, hei leh chen min hre tawh a, ka nungchang chu hrethiam turin min zir ta che, min hriat chian chu a hun tawh alawm" a ti. Chuta Beauty chhanna chuan min dek zawk, ka tawng ve lo thei ta lo, "Beauty, tuna i chhanna kha tawngkam mawi lo tak a ni, khati zawnga tawng tur kha i ni lo. I aiin a upa zawk a, 'Ka nungchang zir rawh' tih ai khan 'keimah hi in adjust ka ngai a ni' ti zawk tur i ni" ka ti a, dik tak chuan ka ngei deuh hle.

Chutia ka tih takah chuan Beauty pawh tlemin a dul deuhin a lang a, a hnu deuhah chuan an in tha then ta a, thian tha tak erawh an ni kumkhua lo ang tih a lang reng.

Misual ka tawng - Nimin tlai maia thil thleng kha a ni. Helai ka awm hnu hian thil duhawm lo hi ka tawng lem lo hle, ka teihawi tam loh vang a ni pakhat a, tin, ka chhuahvah hian mahniin ka chhuak ngai lo, ka In atanga vei lam phei chu a kuma kum ka kal tlang tawh lo, ding lam hi ka office kawng, kawngpui leh bazar vel panna a nih avangin chulam bak chu ka kal meuh lo.

Ka thiannu a lokal a, min thlah rawh a ti, Bus stop lam, peng ding lamah emaw a kal dawn ka ti a, ka zui hnawk hnawk, vei lamah a kal ta si, helam hi ka kal tam lo teh ania, ka rawn kal thui duh lo, keimahin let a ngai dawn si, ka ti sa reng a, kan ti ti a, kan kal zel a, Field kan thleng a, football an lo khel, an awm luih luih, ka rawn kal duh tawh lo ka ti a, kan inthen, keimahin ka let ta hnu hnu.

Dan pangngaiin China, chhing chhi chhia,.. tih vel, chinese ni awm taka an hriat chuan min lo aukhum leh vak vak hlawm, ngawi rengin ka kal hmiah hmiah a, nakin deuhah chuan mi pakhat hian min rawn pel thuak a, ka hma-ah chuan a kal a, min rawn thlek zuk zuk reng a, ball a pawm tut nghe nghe, a sam a phiar kak sur bawk. Min beih a tum deuh ni-a ka hriat avangin kawngsir lehlamah ka phei a, nu pahnih lokal mek bulah chuan ka va kal, chutah chupa chuan an local language sanghana chuan engemawni a sawi a, ka hrethiam lo, a tawng pah chuan min en tih pawh ka hre reng, mahse ka en duh lo lui a, ka kal hmiah hmiah a. Ka chhan loh avang chuan a thinrim emawni, ka hlau niin a hria nge, a pawr tulh tulh a..

Portuguese in a rawn tawng leh a, ka chhang duh chuang lo a, tawng thiam lo awmin ka awm tlat, nakinah chuan English a rawn hmang leh, "Fuck you, i will fuck you, you know that, i am a violent man, i will come to your house tonight" a rawn ti vak vak, a tawng ring ropui si, chhang miah lo-a kalsan mai ka tum laiin, ka lam chu a rawn pan hnai a, "I pa hnenah ka rawn sawi ang, ka sual ania..." etc tiin a rawn au, ka thin tertek a chhuak leh ta zak mai a, a rawn kun hnai bawk a, ka en let ve ang kel kawl a, "stop talking to me like that" ring tawkin ka ti a, ka beng bulah chuan "Fuck you." a rawn ti leh.. "i va zakthei lo ve a, kalsawn vat rawh" ka ti tuar a, chumi hnu-ah zawng a let ta hnu hnu a.

Bial fang ang u aw..

2011-03-02T22:43:00.000-08:00

Mahni lo maha buai ve nak lai hian Blog update hi a bata bat ni-ah kan ngai ve bawk si, thu leh hla lama tuihnang mi nih loh phei chuan hawi hil mai a awl khawp. Chuta chhapah hmun hla tak takah kan zin kual ve leh bawk thin nen. Tun tum update pawh hi bial ka'n fanpui lawp lawp mai teh ang che u.

Division account enfel turin ni 19th Feb, ah Maputo ka chhuahsan a, tawng ka thiam that loh avangin Hotute hnung zui lo chuan mahni-in ka zin chhuak ngai lo a, tun tum chu thih leh thih tiin mahni hna pawimawh a ni bawk nen, ka arkawhchhuah ve tawp mai a ni a, a zamawm duh thin hle.

Patling pui pui, Heti hian ziak rawh kan ti a, thuawih takin an ti ve mai thin hi a vanneihthlak thin ngawt mai

Hetia han zinkualina a kaihhnawih pakhat chu Sermon a ni a, hanthawk ringawta tum tlak theih ni hek lo le, chawlhni-ah inkhawm a ngai a, a hminga tlawhtu nih chuan thusawite a chawh leh zel a, hetah tak hian buaithlak a awm leh thin. Hlauhthawn lawk ang ngeiin Thingtlang lamah chuan tawng lettu an awm lo a, loh theih loh avangin Portuguese-a thusawite a ngai leh thin a, chu chu an local language Bitonga te, Tchena te'n an han let leh thin ania, a chanve pawh an hril zo lo tih hla hi kan hrechhuak vung vung thin, ka thusawi kha hrethiam hlawm tak maw aw.. te ka ti leh hnuhnawh.

A sawi chu ka sawi ve ngei!

Han inkhawm hian mi thahnem tak lo kal se kan duh rual rualin an thahnem poh leh rim a na a ni leh thin si, hnar han hup mai te pawh a chakawm rum rum thin, in chibai nan Bianga fawh an uar viau leh nghal a, ner reng chunga biang insik a awl hle, a mawi lo hle thung si. Khua a lum a, an thlan hluam phei chuan kan han in chibai zo hi biang hrukhulte a ngai thin. Hmun pakhata kan inkhawmna-ah phei chuan Biakin bang dap, lian lem lo takah naupang 80 vel leh nu leh pa, thlalai te nen kan in êk beng a, rim a tak tha khawp mai.

Naupang ho hi an thu bit teh mai ania..

Thinghlim hnuaiah Lunch pawh kan ei mai

He mite ho hi an buaithlak teh asin, thu ka sawi a, kan DC chuan an tawng, Bitonga-in a let dawn a, ka thusawi dawn chuan Portuguese hrethiam miah lo in awm em? in awm chuan ban han phar teh u.. ka ti a, an ngawi thap, in hrethiam vek a ni maw? ka ti a, Aw an ti dual, chuti chu Portuguese in ka sawi ang a, Bitonga a leh a ngai dawn lo tihna ni maw? ka ti a, Ngai.. an ti leh si!!

Kan Mizo pi/pute khan thangthar hla phuah tur a phuah zo tak ngial dawn tiin Pi Hmuaki kha a nung chungin an phum a, kha kha mizo thawnthua a nung chunga phum kan hriat chhun chu a ni awm e. Chu pawh hmanlai thil a ni a, tunlaiah chuan a thleng tawh awm lo e. Mozambique ah hian thil mak tak tak hi a thleng chawk a, an puithuna leh serh leh sang avang te, dawi thil avang te a ni thin. Nhamaxaxa hmun kan tlawh a, thingtlang ve tak mai a la ni a, helai hmunah hian Nu pakhat a nung chungin an lo phum a ni awm e, a hming Luisa a ni. He nu hi khawtlangah pawh pawimawh ve tak, Kohhranah pawh pawimawh leh challang ve tak a ni. Hman deuh lawkah a pasal a thi a, a chhungte dang pawh natna neuh neuh nei leh thihna hial tawk tunhnaiah an awm zeuh zeuh a, Luisa chu Dawi thil hmanga a pasal leh chhungte chu tihlum niin a chhungte chuan an ngai tlat a.

Nhamaxaxa, a nung chunga mi an phumna chu.

Nikum December thla kha a ni awm e, Luisa chu a fate leh a pasala chhungten an dawp ta a, ani chuan Dawi thil a lo hmang reng thin a, hun rei tak a lo ti thin tawh a ni tih a inpuang ta a, chuvang chuan a chhungte chuan chumi ni la la chuan a Nung chungin an lo phum hmiah a nih chu. An phum hnu chuan an thenawm khawvengte hnenah thil awmzia sawiin Luisa chu an phum thu an hrilh a, annin Police an pun a, Police te chuan hemi ni vek hian a thlan chu an hai leh a, a lo ti fel der tawh a ni.

Mumang.

2011-01-26T23:29:00.000-08:00

Chaltlang-ah hian pa lar ve tak mai, a tial thawl ve lampang, lenvah taima zet mai hi a awm a, kekawr tight tak mai ha-in a kal tah tah thin. Chuvang chuan a hmingah Dotighta an ti a.

Zan khat chu a mumangah an veng nula hmeltha kha a lo khuaikhem ni tur a ni, a hlim khawp mai a, a tukah amah chu a hmu a, a chhaih vel.. " Nizan kha.." a ti, nula lah chuan hrethiam der si lo a, "enge nizan?" tiin a zawt let a, ani chuan "Ehh... hre lo der velah.." a la ti hram a ni awm e. Mumang na na na a tak emaw a ti tlat a, chu chu a mi an lohna tak kha a ni si.

Mumang hi a mak khawp a, thenkhat chuan kan thil ngaihtuah deuh hi kan mangphan thin an tih laiin ngaihtuah miah loh, hriat miah lohte kan mang nawk nawk thin bawk si. A chang chuan ka manga ka hmuhte hi, Hetiang chiah hian a takah a thleng tawh, hei hi ka hre tawh a ni tihte ka nei thin. A chang chuan thil lo thleng tur ni-awm tak, kan mangah kan hmu a, chu chu Kelchal mangman tiin Upa te chuan an sawi thin.

Josefa khan a chunga thil thleng tur kha a kelchal mang man a ang khawp mai. Thuhriltu chuan Mumang a tam poh leh thu lawilo a tam a lo ti a, hla siamtu lahin Zingah mumang a lo ral thin, kan in ang rintlak loh a ti bawk a, mumang hi an sawi ho viau.

Thenkhat chuan kan mumang hi kan hre reng a, a sawi pawh kan sawi leh vek thei thin, a then erawh chuan kan ngaihven lem lo a, sawi pawh kan sawi ngai lem lo. A tlangpuiin zing ka harh hi chuan ka mang hi ka hria a, a hnu-ah ka theihnghilh leh mai thin. Kan college kal laiin kan thiannu hi mang sawi a uar khawp a, zingah Tuition kan kal thin a, haw kawng tluan hian a mang a sawi thin a, kan thianpa pakhat chuan a tlanchhiatsan a, a um dawr dawr a, a hrilh hrep zel :D mangneiin kan tih phah.

Miin ka mang a ang riau mai an tih hian, a mumangah chutiang thil chu a hmu tawh a, ka mang a va ang ve a ti tihna a ang hle mahse chutiang chu a ni miah si lo, ka mang a va ang tak em kan tih hian kan rilru a buai a, harsatna lian tak kan tawk tihna a ni. Engatinge ka mang a ang kan tih kher thin le. Kan mangah kan buai vak vak thin vang emaw ni dawn le..??

Ka USB Modem ka ti bo a, ka online thei lo... ka mang a ang tak zet a ni.. :D

The High Council 2011

2011-01-17T04:23:00.000-08:00

Salvation Army-in High Council ti-a kan sawi thin hi Council dang anga active reng a ni lo a, General thlan dawn apianga Chief of the Staff kaihhruaina hnuaia siam chawp zel a ni. He Council-ah hian active officer, Commissioner rank nei zawng zawng leh, Territorial Commander leh Territorial President of Women Ministry post chelhtu apiang te an tel thei a ni. Rorel khawl dang angin he council hi a function chhunzawm ngai lo a, General thlan zawh veleh tiam chin awm lo-a khar leh mai thin a ni.

High Council hi 1904 khan General William Booth-an a din tan a, chutih lai chuan Genral tang lai te chuan thih thak thleng an chelh mai thin. Zawi zawiin tih dan a danglam ve zel a, tunah chuan General tang laiin kum 70 a tlinin emaw, General Office kum 5 a luah hnu-ah General thar tur thlan a ni ta zel a ni. General ni mek Shaw Clifton chu 1, April 2011 zanlai atanga a retire dawn tak avangin amah thlaktu tur thlang turin he High Council hi 21st January 2011 hian United Kingdom, Sunbury Court-ah an thukhawm dawn a ni.

He High Council memberte hian Council member ami emaw, Officer tawh phawt chu General atan an nominate thei a, heng nominate te hi nikhat chhung inngaihtuahna hun pek an ni a, an pawm emaw pawm lo emaw, Council-ah an thlen a, an pawm a nih chuan General tura Candidate a ni ta a ni. He General Candidate hian zawhna siamsa chi hrang hrang 40 vel a chhang a, a nupuiin 6 emaw vel chhan tur a nei ve bawk. Chungte chu an chhan bakah thusawi tur an inpuahchah bawk a, boruak a tang tawh hle thin a ni.

Candidate te chuan an zawhna chhanna te chu chhiarchhuakin thusawina hunte an nei a, an thusawi tur hi tuk bik awmlo, duh lam hawi hawi sawi theih a ni a, amaherawhchu, midangte thusawi an copy mai mai loh nan, a hma-in an thusawi tur hi ziakin an dah sa thlap thin a ni. Heng inpuahchahna hrang hrang an tih zawh hnu hian member ten secret ballot in vote an thlak ta thin a ni.

Vote hi chhawng 4-a thlak a ni thin a, chhawng khatna-a 3/2 vote hmu nghal an awm chuan chu chu tlinga puan a ni a, chutiang hmu an awm loh chuan chhawng hnihna vote an thlak leh a, heta tang hi chuan vote awm zawng zawng zatve an hmuh a ngai thung, chuta tling an la awm loh chuan vote hmu hniam ber apiang kha an chhuak zel tawh a ni.

He High Council hi London-a Sipai pawl hmun pakhat Sunbury Court an tihah chuan an nei thin a, International Headquarters atangin anmahni puitu tur mi thahnem tak an kalkhawm thin bakah, volunteer engemaw zat anmahni pui tur hian an inpe bawk thin a, khawvel hmun hrang hrang a kalkhawmte hi a then chu tawng leh chawp ngaite pawh an ni bawk a, tawng lettu erawh chu an awmna room-ah awm ve a thiang lo a, room dang atangin an let thin a ni.

Candidate an neih hnu-a vote an thlak dawn ni hian an awmna pindan puanzar chu zar phui vek a ni thin a, General thar an thlan chhuah hma chuan pawn lam atangin engmah a hmuh theih loh. Inthlan a zawha General atana vote hmu sang ber thlan tlin a ni ta tih hriat a nih veleh Sunbury Court-a an thutkhawmna pindan chu mipui hmuh theih turin puanzar an hlip ta a, pawn lama an thu ngaichanga lo awmte chuan room chhung hmuh theiha hawn a nih veleh General thar kan nei ta tih an hre thei thin a ni.

Kumin High Council ni 21 January atanga neih turah hian mi 109 an tel dawn a, Mipa 52 niin, hmeichhia 57 an ni. Heng member chhuanawm tak tak zingah hian mizo 5, Commissioner Lalkiamlova, Commissioner Lalhlimpuii, Colonel Lalzamlova, Colonel Nui leh Colonel Lalngaihawmi te an tel ve a ni.

Pathian hriak thih ngei, heng member kalkhawmte hian an thlan theih nan i tawngtaipui ang u.

Khuhhawnna - Victoria Falls

2011-01-09T21:53:00.000-08:00

Chutia Colonel Varughese te in kan thleng ta chu zing lam dar 4 a lo ri der mai a, dar 8-a tho turin kan mu ta dial a, Dar 10a.m. ah Christmas hmangin kan va inkhawm ve zuai a, chubak chu in lamah kan tlingtla ta.

South Africa airport-a ka thian chhar nen khan kan in be pawp a, ka ticket tur pawh a lo tifel diam, mihang ka tawn tawhah chuan a rintlak pawl tak a la ni ve tlat. 27th Dec chuan Victoria falls lam panin kan thlawk ta a.

Business class - Chawpchilh taka book a nih vangin ka ticket tur chu Economy lo awm tawh lo, darkar 1 vel lek thlawk kha Busibess class min lo book sak a, a va zialo teh reng. Pawisa ka chawi nghek a, a rei lo ropui si. Service erawh a tha hle, a hma ni lawka South Africa Airport-a kan thinrim khumte kha an ni ta lo emaw tih turin Business ah chuan an awm leh si, ei leh in tur min pe reng a, mamawh min zawt reng, ka inti lal thang ve si lo a, ka ning zawk phian, Min thlahthlam mai mai teh u ka ti tep a ni. Business class seat 12 awmna-ah chuan mi 2 chiah kan thu a!!

Airport kan thleng a, Hotel kan pan nghal, thiante chuan thil ei an rawt, ka ril a tam an ti, kei lah thlawhna-ah khan fatlum duat taka duat kha ka nia, arbawpte kha kan khel vel a nia, ka ril a tam lo khawp, economy-ah chuan sandwich chiah an sem lo niin.

Kan thlenna Kingdom hotel pang sir lehlam

Victoria Falls chu - 'Mosi-oa-Tunya' ti-a a ram miten an vuah (Smoke that Thunders) hi Scottish Missionary leh explorer hmingthang David Livingstone a hmuh hmasak ber a ni e, an ti. Chutih laia an Lalnu Queen Victoria hmingchawiin a phuah a, a ram mite erawh chuan Mosi-oa-Tunya ti te pawhin an hre lar tho. Khawvela thil mak pasarih te zingah a tel ve ni-a ngai pawh an awm nual awm e, kei pawn a tel ve emaw ka'n tih ngawt pek kha. Khawvela tuikhawthla lian ber erawh a ni chiang, 1708mtrs a zau, 108 mtrs a sang a ni hem mai. Zambia leh Zambezi inrina lai velah Zambezi lui luangin a siam a ni a, a khawhthla ri hi a ring khawp a, a zu khawhthlak hnu a hu rawn let leh pawh a force a chak khawp a, a kam lehlamah chuan ruahsur ang mai a ni a, thla la-a kan han hnufual deuh bawk avangin min nan huh hman hle.

A khawthla lian ber lai

Zambezi river, Victoria Falls siamtu ber chu

A area hi zau takin an hung a, luhna gate lian siamin chutah chuan ram dang mi tan US$30/- a ram mi tan US$5/- an lo khawn a, phunchiar ta na na na chu ka kalpuipa bulah chuan "An va ti fair lo e, ramdang mi tan an ti to bik" ka'n ti leh pek a, ani lah chuan awlsam fe-in "Ram danga kan kalin kan chawi hnem ve thin tho alawm" a ti duh lek a, dik vei phian bawk si.

Falls thlirna tur hian View point an siam thliah thluah a, awlsam takin a thlir mai theih a ni. Ram pahnih inkara awm a nih vangin he Falls hi Zambia leh Zimbabwe hian an inchuh deuh roh thin a ni awm e, he mite ram inkarah hian ram awl thui fe mai a awm a, No Man's Land tiin an vuah a, a piahah chuan Lei thui zet an dawh a, chu lei lai takah chuan ramri an siam a ni.

Bazar Ni - Ka kalpui te chuan a hma tanga an plan vek tawh avangin ni 28 chuan Botswana lam an pan a, kei INDIAN passport humtu hian VISA ka'n mamawh leh pek a nih kha, nawhchih taka visa neih theih ni hek lo, Botswana lam an kal chhungin Victoria Falls khawchhung velah ka lo tam tal mai ang tiin kan inthen a, hmelhriat tumah nei bawk si lo chuan lawm lo ten laitual ka leng hne hne tih ang maiin, mahniin bazar vel chu ka hrut kual ta nghek a, a khua a zau lo bawk a, ka fang chipchiar hman leh pek kher mai.

He dawr hi an hawn rei theih hmel ngawt asin :-)

Kalna apiangah Khawi atangin nge i lokal tih min zawt ziah a, kei lah chuan "Kingdom Hotel atangin" tih hlirin ka chhang a, an nuih a za thei hle, an mi zawhna tak ka chhang lo tih ka hre reng, a chang chuan Harare atangin ka lokal ka ti bawk, ni miau hek. Indian ka ni ti mah ila, an awih leh dawn chuang lo a, ka inham buai peih vak lo bawk a ni.

Dar 12-ah chuan dawr ka lut kim deuh vek tawh, tlai lamah sunset cruise ka ti ta thung. Mahni chauh lo deuh nen kal ila chu nuam tak tur a ni.

Helicopter - Helicopter hi ka la chuang ngai miah lo a, kan chung ah chuan a thlawk kual pup pup reng a, Victoria Falls an en a lo ni, hnial rual loh-in ka chuang chak leh ta em em mai a, zanah chuan, "Naktuk chu Helicopter chuang ang u" ka ti a, kan thian Japanese pa chu a lo phur khawp mai, pakhat erawh chuan "Thih ka la duh lo" a ti deuh ngauh thung, a hlauh vang mai mai a ni, "Kan thih leh kan thi tlang ang chu" ka ti a, a ngam chuang lo. Thianpa Tanaka nen kan chuang ta vut vut a, boruak hip a sangin a thiang vuk mai, nuam tak a ni. Hnuai lam lah chu a lang chiang em em mai si a, Pathian pawh hian min chhuk thlir a ni awm si a, a hmu chiang viau ang tihte chu ka ngaihtuah mai mai a. Kham lo takin minute 10 emaw vel kan chuang a, thlate kan la nual bawk. Helicopter ti veltute hi an zei khawp mai a, kan chuan dawn khan shooting kan han nei hmasa te te a, Falls vel video an neih sa nen an mix a, min entir leh ta a, in duh chuan a lei theih ania, an ti zaih, mahni lan vena na na na chu kan duh leh ta vek a!!

Thil dangte pawh - Official-a zin ka ni lo na-a ka thlenin te hi an fel a, ram khat Chief Secretary ve meuh an ni bawk a, programme an lo siam duah a, awl ni nei lek lo-in ka inhmang khat ve tlat. Ni 1 January ah Territorial Commander in expatriates a inah lunch a kilpui a, min sawm ve, a fel khawp mai.
2nd January hian Warren Parks Corps min tlawhpui a, thusawina hunte min pe nghe nghe, Corps lian tak mai an ni, an zaiin an lam tui thei hle, Blanket lian tawk min present nghe nghe.
3rd January-ah ka thianten min rawn lam a, an in lamah zanriah tuihnai tak min buatsaih sak. Hemi te hi 2009 khan Mozambique-ah an rawn awm zuai a, an pa hi professional pilot a ni a, Mozambique airlines a rawn pui zuai a, chutih laia inhria chu kan ni a, min lo la hre reng a, an fel hle mai.

Ka thian Maureen te In.. an han bei lian khawp a..!

4th January - Headquarters min fankual pui a, an nei changtlung in a pui khawp mai, chumi zawhah Balancing rocks enin kan kal kual zuai zuai bawk.

- Thlalak ka upload peih tawh rih lo, in tan pawh a ninawm zozai ang, Facebook lamah ka dah teuh bawk si :-P

Khuhhawnna - Zimbabwe zin thu

2011-01-07T00:47:00.000-08:00

Nikum chhung zawng khan South Africa zin tumin ka hmanhlel a, VISA ka hmuh mai theih loh avangin ka pamtul ta thak a, Christmas tal hmang turin ti-a rilru ka siam meik laiin Lalpan kawng dangah min hersak a, Zimbabwe lam Visa ka hmu hlauh a, ka kal ta zawk a ni.

Zimbabwe hi British ho awp thin a ni a, April 8, 1980 khan an independence a, an Politician te corrupt lutuk leh rorelna tha lo avangin an economics a tlachhe nasa hle, 2009 atang khan lei rem an rap tan dek dek chauh a ni, an pawisa te phei chu a'n hlu lo khawp a, zillion dollar note te an nei vel a, 2009 atang khan US Dollar lah South African Rand an hmang a, tunah hian anmahni pual Currency an nei lo, USD nge ZAR an hman ang tih an inbuk vel mek niin a lang.

Mingo ho-in an awp chhung hian an ti rethei viau niin an sawi, Mihang kal phal lohna area te a awm a, tuna khawpuia an chenna hmun tam tak hi tunhma-a mihang kal phal lohna hmun a ni. A ram leilung a hausa a, sum leh pai tam tak thawk chhuak thei tur an nih laiin, mingo ho-in a hmun zawng zawng an pumbilh vek a, a ram neitu zawk chu hnathawkah bak an chhawr ngai lo a ni awm e.

Tuna President Robert Mugabe hi nasa taka ram tana bei leh dotu a ni, tualchhung indona nasa taka beitu a ni, politics avangin kum 10 chuang lung inah te pawh a tang a, indo a lo tawp a, ram chhunga a lo luh hnu chuan pasaltha chawimawina dawngin mipuite thinlungah a tla na hle a, Prime Minister hmasa ber a ni nghe nghe. Nimahsela, thuneihna leh lalna duh luat avangin a lalram hi midang a kian phal lo a ni chek ang, 2008 inthlan-ah pawh tling lo chungin a tling a, mipuite rikrap, tualthah leh pawngsual thlenga a mite an chet avangin an vote lo ngam lo a ni ber mai. hei hian a ram chhungah chhiatna nasa tak a thlen a ni.

Chuti taka an politics leh economy a chhe chung pawh chuan Sap ho sulhnu avangin a khawpui indin dan a felfaiin a nalh a, a nuam phian lawi a, a ram chhungah Ndebele leh Shona chu an local language ni mah se, saptawng chu an Official language a ni a, an zirna a tha a, sapram based vek anih avangin naupang te te pawh saptawng an thiam em em vek a, tar kiring pawh an tawng nalh hlei hlei.

Ka zinkawng chu - Mahni sum senga chawlh hmang tur ka nih avangin ticket tlawm ka'n zawng phawt a, a tlawm na na na chu a lo tha lo thin khawp mai. Maputo - Johannesberg zing dar 7-ah ka pan a, dar 9:30am chu J'berg - Harare a ni, thlawhna an lo delay ta pang mai. Transit ah chuan kan han in report ve sasawi a, Board-ah lah chuan Harare - Indef Delay tih an tar kuau reng. Air Zimbabwe a thlawh tum ka ni, South African Airways a thlawk turte chu an kal zung zung a, keini erawh dar 1:30pm ah rawn ngaichang rawh u min ti ta lek a.

Dar 1:30pm ah chuan ka va kal dek dek a, enge chanchin ka ti a, kan thlawhna chu a thlawk dawn nge dawn lo engmah an hre chiang thei lo, an phone a, Zimbabwe lamah meeting an nei mek a, chumi zawhah chuan a hriat ang an ti. Pilot ho an strike lo ni lek-in! Nakin deuhah chuan boarding pass min pe a, tlai dar 7-a thlawk tur an ti.

Zing dar 8 velah Jo'berg thleng tawh, tlai dar 7-a thlawk chhuak leh tur chu hun hi ka han ngah em em khawp a, airport chhungah chuan sum nei lem hlei lo-in ka vak kual ta chiam a, vawkhniakzawnthla ang chu nise, ka hniak chu a chiar dup ngei ang.

Rina loha ui buk sa - Thinrim deuh, engmah tih theih si loh, lunghnur deuh reuha ka vah pur pur reng lai chuan mi pakhat hian Hello hi a rawn ti pawr huar mai a, ka han hawi chhuak chu "Japanese i ni em?" tih zawhna ka dawng chawpchilh nghal a, ka ni lo chiang kuang tih ka sawi pawhin a awih lo a, passport phawrhin kan in hrilhfiah tep a ni. Chu mi chu Zimbabwen, kum 10 chhung Japana hnathawka awm tawh, Holiday hmanga haw tum a lo ni, Japanese ang min tih avangin min rawn be tawp a lo ni a. Kan ti ti ta a.

Victoria Falls kal ka duh a, ka thlenin turten min hruai theih loh thu leh Hotel a full vek tawh thute ka sawi thuphung a, ani chuan Kan kal dawn asin, mahse kan thlawk dawn a, ticket kan la vek tawh a, i duh chuan ka lo ensak ang che a ti teh hlauh a. Ani chu SA Airways-a thlawk tur a ni a, Harare-a in be pawp turin kan inthen ta a.

Zan atangin zingah - Kan thlawhna lah chu a reh vung vung mai, departure gate chu chauhthubarawhah kan han pan ve a, Dar 9-a thlawk turin an lo tar leh tawh, dar 9 a lo ni a, 11 an ti, an tawlh zel mai a, passenger chu kan mangang hlawm tak zet tawh. Dar 11-ah chuan gate an hawng a, kan thlawk mai dawn emaw ti-a kan hlim hle laiin thlawhna pana Bus kal hmasa zawk chu Passenger zawng zawng nen a rawn let leh. Counter-ah chuan kan awmkhawm a, an han âng hlawm tak tak mai ah... kei pawh thinrim engphiar mah ila, ka aiawh lal hma-ah a ding tih ang maiin ka sawi duh tur ve ang zawng zawng chu Nu pahnihin an sawi zo vek a!! "Manager ko thla rawh u, nangni aia thunei, a lal chin kan hmu duh" tiin counter duty te an ankhum, a thenin "Kan pawisa min refund rawh u" an ti thul, kan ri luih luih mai.

Thlawhna pakhat chu pilot strike vangin passenger tel lo-in a lo thlawk haw a, thlawhna 1 zawk khawl lam felloh vangin an repair an ti, thla a va han muang lo tak. Dar 12, zanlaiah chuan thlawhna kan lut ta, lung a dam kim chuang lo na-a kan thlawk chhuak ve ta poh a, dar 1:30am, Christmas Ni-ah Harare International Airport kan tum chu a hma-a thinrima ang phiar phiar ho khan kut an beng leh ta dar dar a.

Airport-ah chuan Colonel Wilfred Varughese te chhungkua-in min lo hmuak, Col Premai- ka hmu thut chu tah te lam lam a chhuak dawn, India mi, Kerala lam an ni a, India ah chuan kan hran teh reng nen, mi ramah zawng unau inhmu ang maiin kan lawm a ni. Zan dar 9 atang khan min hmuak-in airport ah an lo awm a, kan thlawh mai loh avangin haw lo-in min lo nghak reng a, motorah te an lo mu mai mai a, immigration kan kaltlang meuh chuan dar 3 a ri thuak tawh a, kan haw nghal par par a, zing dar 4, 25 Dec 2010, Christmas ni tak chuan In kan thleng ta a nih chu....

CHIBAI

2010-12-21T21:45:00.001-08:00

Chi chu kan hria, a tangkai dan pawh sawi tam a ngai lo, Bai pawh kan hria, chaw ei a ti tui. Bawkbawn, Hmarchapui, Chingit, Samtawk, bahkhawr leh a dang dang han bai pawlh nuai ila, chi han al ngei bawk ila, laipawng thle lawl lawlin chaw kan ei tawh mai thin. Zawngtah mu pum el awl han ziat ila, chaw bar khat zelah mu khat zel han seh keh sawk sawk bawk ila, pawnfen kawng elastic fan duai duai-in si hluam hluamin kan ei tawh mai thin.

Hmanlai khan Chi hi a vang khawp aniang, chi teng turin Chipuikhur-ah an kal thin a, khawng ian uanin an chi ten sa chu an phur haw a, lei leh hralh pawh la awm lem lo ni tur a ni. Hnahthial hnaha funin rappuichungsangah, naupang ban phak bakah an han dah a, chawhmeh ah ren takin an thlak thin. Chu chi chuan an chaw ei a ti tui ve ngang aniang tawngkam tha induhsakna tawngkamah pawh Chi tel ngeiin bai lo chhuang ve rawh u an intih nan "Chibai" an ti thin e an ti. He thu hi Luka ziak ang tluta rinawm leh dik a nih erawh ka ring lutuk chuang lo.

Chibai tih tawngkam chu eng vanga lo hmang tan nge tih hre kher lo mah ila, chhiartu zawng zawngte, Lalpianchampha a lo thlen leh hian lawmna CHIBAI ka buk vek che u a, kum thar lo thleng tur atan duhsakna tha ber ka hlan bawk a che u.

Rulh vek a ni e.

2010-12-09T05:24:00.000-08:00

Account khawih reng reng hi chuan thlarau lam ngaihtuah tel hi a har thin aniang, mi tam zawk hian, Finance-a thawk ho chu an RAU lo, an RO min ti fo a, keini kan lo inngaih rau ve riu riau thin nen. An ngaihdan chu a dikna lai chu awm mai thei, mahni lo maha lam rui leh vir chung mi nih loh nak alaiin nitina sum leh pai che vel ngaihtuah ringawtin kan hmanhlel chu a nih hi. Ama'rawhchu, "keini Finance-a thawkte hi kan rau ber zawk, thlemna hmunah kan awm reng zawk asin" tiin ka chhang thin.

Nitin rim takin, tihsual hlau reng rengin thawk thin mah ila, tihsual palh a awm fo a, a changin pawisa a chuang a, a changin a kim lo bawk a, kan in zawng leh fe thin. Mi aia tlaia haw a ngai fo. Pawisa a kim lohin kan mangang a, a chuan lahin kan ta a ni chuang bawk si lo. He phurrit hi khawvel awm chhung chuan a tawp mai dawn lo, kei hian khawih lo mah ila, tu emaw chuan a khawih tho tho si a.

Kan pawisa hmanral thenkhat hi IHQ lamin min rawn pek let tur an nei thin a, chung chu IHQ 'B' account kan ti mai a, chutah chuan kan charge a, kan hmanral list siamin kan thawn a, min rawn rul leh thin a ni. Chutiang list chu ka siam fo a, zawhna min zawh let loha rulh hmak hi an nei ngai meuh lo.

Kumin July-November B account ka siam chu a bo abang awm lo-in zawhna pakhat mah min rawn zawt let miah lovin an rawn rul fai vek a, mak ka ti lutuk a, ka Hallelui lo chauh a ni, ka thiannu hnenah ka sawi a, a lawmawm zia hrethiam pha lo ta chuan pip e pup e a ti hlei lo.

Krismas kan lo thleng leh dawn a, Lal Isua kan tana inpe, kan sual chhiar sen loh, ngaidam a, kan bat chhiar sen loh rul tura a thlawn liau liau-a kan tana a rawn inpe lawmawmzia hi kan ngaihtuah chiang ngai em le?

A bat miah loh a rul a, keinin rulh sen loh kan Ba thung si. Chung kan sual leiba zawng zawng chu Lal Isua kan tana a rawn inpek avangin RULH VEK a lo ni ta si a.

Khawngaihna thuk, ngaidama thinlung ti thianghlimtu
Khawngaihna thuk, kan sual zawng aia nasa zawk chu.

Rilru-in arbo a zawng

2010-12-07T02:05:00.000-08:00

Tak tak alawm, tunlai chu thu leh hla ka nei lo khawp mai, rilru hi a vak darh deuh nuai nuai a, hmanlai-ah te ka let a, ka kual ka kual a, Primary school kai laite, Middle school kai tantirh lai leh High school rah hnute a lo inlar zut zut mai.

Hmana kan kawm thin, inhuat tak vang pawh ni lo, awmna hmun, khawsak dan leh eizawnna a hran tak vanga hmun hrang hranga inthendarh tawhte Internet kaltlangin ka chhar chhuak bawk. Chutih rualin blog ah enge ka ziah ang aw tih ka ngaihtuah tel bawk a, ka ngaihtuah thenkhat angte chu mi thenkhatin an blog-ah te, site hrang hrangah te an lo ziak kur ngiai nguai a, ka va chhiar zut zut a... Ni, hei hi ani ka rilru-a awm chu tihte ka ngaihtuah, hla phuahtu-in "ka thinlungah hla mawi a awm a..." a tih ang mai ka ni, ka rilru teh nuai hi, han hlawmkhawm vel dan pawh ka thiam hlawm khawm lo ka ti.

Kumtin hian kumin Krismas chu engtinnge niang tih hi mitinte inzawhna a ni fo, Kohhran ah pawh engtinnge kan hman ang, Ruai atan enge ni ang a, vawi engzatnge ruai kan theh ang, Biakin engtinnge kan chei ang tihte. Khawtlangah pawh engtinnge Ruihhlo kan khap ang, zan kan duty angem tiin YMA lamin tan an la bawk a, khap rem tih erawh a awm ngai hlei lo. Chhungkua-ah nise, thil thar lei tumin kan hmanhlel a, in kan chei a, ei leh in tur tuihnai tinreng kan buatsaih bawk thin a nih kha.

Eng ka ti nge ni kumin chu Zawlnei da lam ang mai-in ka hul huk mai a, Mas lam reng rilru-in a hawi thei lo, ka awmna hmunin a zir loh vang a ni mai thei. Hei vang hian ni maw hun kal tawh ka thlir kir ruai ruai a, rilru-in ar bo a zawng tan tlat.

1997 vel kha ni ta-in ka hria, ka thiante 4 nen, zan inkhawm kan peih loh chhuanlamin zaikhawmna In-ah thingpui kan lo lum dawn kan ti a, kan lo awm mai mai a, thiannu pakhatin a Nu Puakzo a rawn ru chhuak a, kan kang puak pep pep, tapchhakah chuan kan ri le lu a, inkhawm an rawn bang a, thingpui erawh kan lo peih nghal lem hlei lo.

Kan bulah chuan Pu Pawihbawiha bengchhet zet, a beng bula au vak pawha "I tawng ka hre mang hlek lo" rawn ti hû thin hi a thu ve reng a, inkhawm bang an rawn zai tawh si kha, kan awmdan kha bengchhen hmel min ti deuh nge ni "In bengchheng lutuk" tiin min han khap ngei a, keini lah kan nuih a za leh zual sauh a. Kan thiannu Puakzo ruk chhuah lah a nu-in a man chhuak a, "Khawnge puakzo hi a awm zawh vek" tiin thinrim takin a zawt a, ani lah chuan "Dini te êk inah" tiin a chhang hmiah, ei zo tawh vek hek. Khang hunte kha kohkir rual lohin an liam vek tawh si a le..

He hla hian krismas ka'n lo hmuak teh ang -

Sakhming khuavel he lei chinah
Tu sakhming maw mawi chuang kim ber
Silhfen tha mawitin par nen a thlen ni kan lo thlir
Thangthar tung chho kal zawng reng hian
A hming lah hai awm lo le
Siklipui duma lo lang
Krismas kan lawmna ni ber

A lawm nan zaimawi tinreng leh
Ei leh bar kan neih apiang nen
Hmuakin lenrual lungduh ten kutpui awmni kan kham
A pianna leh a awih hla reng
Van lal chhungkua an lai thuril
Hmangaih mihringte hnenah
Rem leng se tih a lo ni

Eng vang maw a hming mawina ber
Hmanah Bethlehem phullengan
Van leh hnawl hnu lei sual kar
Sa ui lo tanna kha
Van zaipawlin a rawn puang chia
Lei thiamloh chang a rawn uap ta
Van in lawm lai nau ngei kha
Riang chawi nau ang a hlan ta

I pianphung leh i nihna hian
Leimi tan lung i dum mai reng
Kan lawm che Krismas duhawm damseia kan lo tawn
Kan runah lo lawi ve ang che
In tin veng tinah lawi ang che
Kan ei kan in krismas se
Hlimin min awmpui ang che

Fanu thar ka nei e!!!

2010-11-28T09:38:00.000-08:00

A hming chu Denise a ni, a pai lai atang renga a nu-in a Godmother i ni dawn nia a tih a ni nghe nghe. A Nu nen kan inkawm ngeih a, thu chhia thu tha engkim hrilh berah min neih ve thin. An Inneih hnu, fa 3 lai an neih hnu-ah a pasal chu HIV(+) a ni tih an hmuchhuak a, treatment an la char char, a rilru a hah thei hle, heng hi a chang chuan tap zawih zawihin ka bulah a sawi thin.

Nikum December khan tih palh thil tak meuhin nau a pai a - condom an hmang ziah thin a, an hmang lo palh a ni mai thei ni :-) - Pregnancy test a ti zo chu ka bulah a rawn tlan a, a tap zawih zawih mai, kei chuan tih theih ka nei tlem. Dik tak chuan thil dangah ka tha tihna ni lo-in Counseling lam hi ka thiam loh zawng tak a ni leh pek a, ka lo tawngtaipui leh ringawt thin. Naute chu Sept 11 khan a piang a, vanneihthlak takin a positive lo leh nghal, kan lawm tlang ngei mai.

Tichuan, sawi lawk angin ni 28.11.2010 (Sunday) khan nau hlanna chu an nei a, Godmother-ah ka tang ta, he leia ka tawn vawi khatna a ni a, ka tawng leh zen zen tawh bawk lo ang. Mozambique mite hian Inneih, Nau hlan, Naupang Puitlinga lawm luh vel reng reng Ceremony hi an ngai thupui-in an la thu tak hle a, Godmother, Godfather an neihtir zel thin.

Mizote hian hetiang hi kan ching lem lo a, godmother lakah chuan enge an beisei, eng ti turin nge an duh tihte ka zawt chiang hmasa a, dik tak chuan a bangbo ve theih viau.

A tlangpuiin Inneihna-ah chuan senso zawng zawng deuh thaw leh thil tul hrang hrang buaipui hi an godfather/mother te hian an tum vek thin a, inneih zawh hnu, thu chhia hla chhia an neih pawha anmahni kaihruai thei tur mi puitling tak an thlang thin a, an mawhphurhna an dah sang khawp mai.

Nau hlan-ah pawh hetiang deuh tho hi a ni, Naute a lo thanlen a, Tisa leh Thlarau lama a mamawh sawipuitu tur, zilh a ngaih hun pawha zilha kaihruaitu tur, dam mawh hritlan -a enkawl tu tur, theih phei chuan zirna chungchangah pawh theih chen chen puitu tur a ni ber. Chuvangin chhungkhat hnaivai tak hi an ruat tlangpui.

Tichuan, kei ram dang mi, rei lote-a mahni rama haw mai tur kha chu dinhmun pawimawh tak mai chelh tur chuan min thlang ta a, mawhphurhna chu a sang ngawt mai, tih theih dang engmah nei lo mah ila, ka FANU thar Denise tana bang lo-a tawngtai chu ka tih theih awm chhun a ni tih erawh ka chiang.

Ka lo lang leh e..

2010-11-17T05:22:00.000-08:00

Blog ka rial rei lutuk a, ar khual ang deuhin ka lut ti deuh duk mai, khatia kan ram lama chawlh hmanga ka haw ta kha, ka rial ta vang vang a, kei pawh ka khawhar hman hle.

Chauhthubarawh-a Tata Photon ka'n hman ve lah Sa-tah-chhuak-pek chauh, a kal hian a kal tha duh der lo a, ni hnih/khat hnu-ah phei chuan ka pamtul ta nghe nghe.

Ka hun neih ang ang erawh, khat tunin, tul takin ka hmang tluan thak. Ka teihawi tam hman falua lo khawp mai.

Khaw'nge a bul tan na atan, thlalak hrang hrang hmang hian ka chawlh report chu ka'n pe thuak thuak mai ang e -

Thirhrui hnawk tam tak awmna Chanmari kawn...

Thian-te nen pawh chaw kan han eikhawm ve raih raih a, anni chuan khiangawiin hraileng-te an kai diah tawh bik.. :-(

Misual Inhmuhkhawm-na Hmuifang ka va kal ve zuai.. hmelhriat ngai loh thian tha tak tak an ni hlawm..
Ka Nau-in nupui a nei ve ta hial.. ka TAR tan ta :-)

Mi ka Inneihtir ve ngei bawk.. Suih tak ngei a ni e.. :)
Officer's Field Session, International Secretary te nupa hova neih-ah vanneihthlak takin ka tel hlauh bawk a, thlalak erawh ka nei lo tlat.

Corps hrang hrang-in report pe leh Thuchah sawi turin min sawm a, ka kal kual nual, ka lawm hle mai.

Chhas thutpui tur nei ve lo ta nafam chu thiannu nen tlai thim dawnah kan han thu dun ral a..

Awi.. awi.. awi..!!!

2010-09-10T23:33:00.000-07:00

Darthlalanga mahni sakruang ngunthluk taka han bih chang hian lung hi a awi thei mawlh thin lo, hmazawnga in en hi chuan zia ve viau thin mah se, a nâk pek zawnga han en hian Dul hian hma a hruai lurh mai thin a, a manganthlak thin ngawt mai. Nula a pumpa hetia Dul hmahruai kan nih reng chuan hmelin puak a ti lo nen, Tiam tlat e tih ni a awm thei dawn tak ngial lo tiin in tih cher ka'n tum ngial thin a, a harsa lam hret a ni. A chang chuan Ka dul kiar hi awm lo se chu ka thau deuh hi chu pawi lo mawle tiin ka inhnem ve leh ngawt thin bawk a. A hrim hrimin ka búkte hi a rit lutuk reng reng, ka weight pawh hi tih hniam a ngai a ni.

Hmanni lawkah BP ka check a, a lo sang vawh vawh khawp mai, exercise lak chu tih makmawh a ni ta. Ka thian pakhatin Gymnasium ah ka kalpui ang che, a ti a, hun engemaw chen kan tum tawh hnu-ah kan khaihlak reng a, kan ti hlei thei lo. ni 9 tlai lam khan kan va kal ve ta teh poh a. Ka pian ahnu lama ka vawikhatna a ni.

A hmasa berin Cycling min tihtir phawt a, minute 15 chhung tur an ti a, chet chak a har hle mai, chak deuh hlek rawh an tih pawhin ka thei tawh lo hei bak ka ti zel a, minute 15 a rei duh ngawt mai. Ka zo chu hrui min pe a, zuanna tur, Inhruizuante lek lek chu naupan laia kan tih than a ni a, huphurhawm loh viauin a lang, ka han ti dawn a, ka zuang thei ta der lo, a hma-a ka lo cycling nasat avang khan ka ke a zâwi tlat a, ka tlu thlawrh. Minute 10 chhung zuang rawh min ti, chawl chungin ka zuang a!!!! Minute 10 chhung chuan hah namenin ka hah lo. Hahthikulin ka zo hram a ni ber.

A hnu lehah chuan ban exercise kan ti leh, thil rit deuh mai min pawhtir a, vawi khat.. vawi hnih... vawi thum... a bak chu ti leh thei tawh nang.. awi, awi, awi... van beidawnthlak tak. Min kalpuitu chuan, "I tih theih loh chuan tilui suh, a hmasa ber hi chu a har thin a nia" a ti a, ka pawm khawp mai.

Ka tha te chu a khur der der a, ka zawi ruih mai, ka luak a chhuak nghulh a, ka mit mengte chu a fiah lo ruaiin, ka meng phe ruai mai a ni. Bathroom ah ka lut a, ka luak thei bawk si lo, chhuatah chuan ka thu thlawrh a, chau hmel pe chhe ve chiang ngawt mai. Heti em em hian a ni maw ka lo fit loh le, College kallai te khan kan inkhel ve nasa thin a, racing ah pawh Gold medal te ka lo la ve thin kha a ni a, rilru chuan a la zuam khawp mai mawle, taksa hian a lo tlin tawh awzawng lo.

Mizotawnga Insawizawi kan tih hi a dik ngawtin ka hria, taksa hi a zawi loh-a a khawng tuh chuan hnathawh leh thil tih hi a lo har em em mai a ni, taksa ti zawi a, ti hahdam turin kan sawi zawi fo a ngai a lo ni.

Buaina râl a lian.

2010-09-03T09:06:00.001-07:00

September ni 1 zing ka tho chu tuk dang ang bawkin Office kal turin ka insiam mawlh mawlh a, khua a lum tan tawh avangin chet vel pawh a peihawm ta lo hle mai. Ka thiannu-in min rawn call a, 'In veng lam boruak enge, hei kan veng lam chu a buai lutuk a, kan rawn kal tlang thei lo mai thei a ni' a rawn ti a, 'ka hre hleinem, eng boruak nge' tiin pawnah ka chhuak a, boruak chu ka va thlithlai a, mipui chu an lo phu sup sup tho a, motor tlan pawh ka va hmu, lungmuang takin, 'engkim a pangngai e, kei pawh office ka kal dawn' tiin ka thiannu chu ka hrilh a, ka insiam chhunzawm a, office tur chuan hun pangngaiah kan chhuak ve leh ta mai a.

Thui tak kan tlan tawh tihah chuan kan hma lam chu a buai tan ta, midang chu an in turn a, an let ta zung zung mai, kawng an dang chu lo niin, keini pawh chu kan let a, kawng dang atangin eng tin tin emaw office chu kan thleng hram, kan staff te erawh kawng lakah buaina tawkin an let leh hlawm a, office thleng chu kan tlem hle.

Chhun lamah chuan boruak a tang chho ta telh telh a, Finance Council kan nei a, kan zo fel dar 12:30 velah chuan kan staff te chu haw mai rawh u tiin kan hawtir a, keini kan la awm hnufual deuh chu buaina ral lianin min dang ta thap mai, pawn a chhuah ngam ta lo, silai a ri ta ul ul mai a, thiante kan phone kual a, Office ah khan riak mai rawh u, boruak a tha lo lutuk an ti. darkar 3/4 chhung lek chuan mi 4 lai chu an lo thi hman der a, mi 11 lai an hliam bawk.

Kan han in en chiang chu mi 9 office-ah kan lo la awm a, Foreigner vek kan lo ni!!!! kan OC te nupa Brazillian, CS te nupa Angolian, Principal te nupa leh an fapa Argentina lam, kei Indian, ka thiannu Zimbabwen.. a khawtual mi chuan hetianga an buai changa a buaithlak zia an hria a, a then an lo kal lo a, a then an haw hma vek.

Tlaiah chuan muangmarin haw kan tum a, ti deuh takin kan tlan haw, kawnglaiah chuan lungtum leh thil dang motor danna turin an lo dah thluah a, Motor ke an hal alh hluah hluah bawk a, kan tlan lai chuan motor chu an lo vawm bawk.

Motor tang laklawh dang pawh an awm a, kan innghakkhawm a, Police motor a rawn tlan a, engemaw chen chu min thlah. Police motorin min letsan hnu chuan hmun pakhat, duty awmna-ah kan chawl lawk a, chutih lai chuan tleirawl rual hian min beih tumin min rawn pan ta mai, lung vawm tur an rawn keng a, an rawn tlan hul hul a, Police ho chuan silai hmet puakin tear gas an vawm khum a, an darh leh ta ham ham. Ke-a kal mai chu him zawka kan rin avangin ke-a kal mai kan tum tawh lai chuan Police motor a rawn tlan a, kan awmna hmuna duty te chuan kha kha zui nghal rawh u min ti a, chak tawkin kan lim chhuak ve ta a, kan veng chu him tak chuan kan thleng ta hram.

2008 February khan hetiang thil hi a thleng tawh a, Oil, Tui, power leh ei tur chi dang man sang chak lutuk vanga mipui thinrim tawngkhawng-in an lungawi lohna an lantir a ni ber a, Cabinet Emergency Session ko-in an han thukhawm ve chuk chuk a, President Guebuza chuan tlai lamah Radio leh TV lamah te thu sawiin, "Sawrkar chuan thil man tihniam turin theih tawp a chhuah ang" chu a ti na-a engmah Solution a awm loh avangin mipui an lungawi thei chuang lo, ram chhung mamawh 30% chauh Mozambique hian a thar chhuak a, a bak zawng chu lakluh vek a nih avangin he harsatna sutkian hi thil namai a ni lo.

Tun kum hnih kalta chhunga thil man san dan hi a namai lo hle, Chhangthawp tlawn khat man pawh 25% dawrhin a sang a ni, hei hian mi rethei zawkte dinhmun a nghawng nasa hle. Chutih laiin minimum wage chu 2550/-mt chauh a ni thung si. Chu-a-chhapah Politician te eirukna leh hlemhletna nasa taka an inhnamhnawihna mipui lamin an hre bawk si.

Hmanni deuha ka thiante nena kan inhnialna ka hrechhuak zawk mai, "Guebuza tunah in duh lo a, in sawisel a, nangmahni thlan tlin ngei a ni si" ka tih kha.

Motor dan nan kawngpuiah motor ke an hal nasa hle, bawlhhlawh leh thing leh lung lian pui pui an dah bawk.

A tuk-ah pawh chuan tumah pawn chhuak lo-in kan tawmin ta thap, kan veng lam tlangval ho chuan buaina chawh chhuah an chak khawp a, kan in kawtah an inhawrkhawm lut lut reng a, kawngpui chhuah an tum, Police-in an lo nawr let, annin lungin an vawm, an innawr chawhma thak a, police ho chuan a vanvawr zawngin mipui rikrap nan silai an hmetpuak leh thawr thin. In dang reng na na na chu tih ngaihna dang vak an hre lo nge tlai lamah chuan an darh ta hram a, hetih lai hian veng dangah erawh chuan an la buai hle tho.

Chabi

2010-08-22T12:03:00.000-07:00

Isuan a zirtirte hnena "Miin Mihring fapa hi tunge a ni min tih?" ti-a a zawh khan Petera chuan "Krista, Pathian Nung fapa chu i ni" tiin a chhang a, a chhang fuh lutuk kha Isua pawh a lawm ngang aniang, Petera kha Vanram chabi hial a pe ta mai a, kha vanram chabi kha eng ang chiah nge ni ang chu kan hre lo na-a vanram hawn theihna chu a ni ngeiin ka ring.

Chabi hi vai tawng atanga kan lak niawm tak a ni, thil tereuhte si hi a pawimawh em em leh nghal a, theihnghilh a awl phian leh nghal vei nen, a chang chuan he thil tereuhte avang hian kan buai pherh erh thin chu a nih hi.

Tunlai chu keima tawkah ka buai ve leh pek khawp mai, kan Training Principal te appointment dangah an kal a, midang Argentina lam mi kan neih dawn avangin a Quarters luah lai leh, Training College vel zawng zawng Inventory ka enfel pui a, Garage atanga tanin, Choka, Cadet ho room zawng zawng, office, store room leh anmahni Quarters luah lai nen, Training College-a bungraw awm zawng zawng kan han chhiar zet chu a hahthlak dan a ninawm ngei mai!!!

Engkim kan enfel zo a, kan tihfel apiang kan kalh nghal zel a, chabi chu min pe nghal zel a, Inventory list nen, chabi nen ka ri ruih ruih ta mai, kan han zo chiah chu Chabi ka hum hnem ngei mai. A tawp berah chuan anmahni chu gate pui atang chuan an inphurchhuak a, gate chu tuma hawn tawh loh tur niawm fahranin ka kalh ta rup mai a..

Hetia chabi ka hum khawm ruih lai tak hian ani, Isuan Petera Vanram chabi a pek tak hi ka ngaihtuah chhuah ni, keia chabi ho hian room hrang hrang a hawng thei a, kan thih hnu hian a pawimawh ber vanram luhna turin a hawnna tur chabi ka kawl tha em? tih hi in ngaihtuah ngun a va ngai em.

Mo thian... dinhmun laklawh!!!!

2010-08-13T06:43:00.000-07:00

Nula hi mo thiana vawi thum an tan chuan an leng rei duh an ti thin, kei chu vawi li lai ka tang tawh pek a.. Nula leng tul erawh ka la inti phal lo deuh a!!!

Ka thiannu Mary te inneih hian kan TC, Vaiin a inneihtir a, rehearsal kan nei ve thlap a, kan tih chhinna ah khan kan ding ho dal a, Mizo-in kan tih thin dan pangngai khan.. ani lahin pip e pup e a ti hlei lo.
Inneih tak tak na-ah chuan le... TC chuan Mo leh Mo neitu chu ding turin a ko ta a, keini an thiante ve ve chu kan ding ve mai a, tih dan pangngai ni miau hek. TC chuan Mo leh Mo neitu chauh ding rawh se, a ti teh tlat a, an thiante chu lunghnur zetin kan thu leh a, a van zahthlak tak e aw.... a zahthlak a ni.. engemaw chen chu hawi pawh ka hawi chhuak ngam ta hleinem. Inneih thute an han chham zo chu zungbun bun a lo hun a, Mopa khan zungbun a buntir dawn a, a thian chuan a va pe, ani kha chuan a kekawr ipte-ah a ah avangin a din a ngai hrim hrim a, ding chungin a va pe.. chutah mo-in a han buntir ve tur ka pe chu ding buai duh tawh bik nang, thu chungin zungbun chu ka han pe a.. ka tum deuh hmuau nghe nghe mai thei. :D

A tawpa a thuchah sawite lah kha, a han ngeiawm khawp a, Mo chanchin a sawi a, Mo pawimawhnate.. tihian zu han ti tel kher pek a "Vawiin-ah pawh hian Mothian chu nalh takin inchei ve mah se, engmah awmzia a awm lo, Mo hi a pawimawh ber chu a ni" a ti, va khawn lawlh ka va'n chak tak e aw, kei chuan pasal nei dawn ila, vai chu ka inneih tir lo chiang viau ang chu.

Sawi erawh a sawi dik ve viau lawiin ka hria, a tawngtu chu ni lo ila, ngaihnawm pawh ka ti viau mahna, mo thian ve mai kha, lo inchei dur ve viau mah ila, a pawimawh bera kha chu pasal neitu ber kha a ni tlat.

Mahse, engvangin nge Mo hian thian a neih thin, a mawi lohna te, zahna te khuhbo tur leh a thu hriatpuitu tur thian, rintlak, a rinngam tur a neih a ngai a, Inneih hnu zelah pawh nupa kara buaina leh harsatna neuh neuh a neih pawhin he a thian hi a hrilh thin tur, thurawn petu tur leh kawng engkima a rawn ber tur a ni ve tlat. Mo thiana tan hi thil namai a ni lo, an Inneih ni-ah Mo chuan engmah thil dang a ngaihtuah hman lo, thiante lo huikhawm leh chhungkaw aiawh pawha ding mai thei tur thian rintlak a neih hi tih makmawh a ni. Mothian hian he dinhmun pawimawh tak hi a pawimawh ang hian tam tak chuan an hrethiam lo zawk fo thin.

Inneih Ni-a mipui hma-a dinpui mai-ah hian he Mo thian dinhmun hi a tawp lo.. Inneih hnu-ah pawh thian chuan an dinhmun a thlithlai reng a ngai, naute an han nei a, nau en a ngai, nupa karah neuh neuh an nei a, thuchheremsak te thlengin, nu leh pate hnen an thlen hma hian thiante hi an hrilh chawk thin, chutih huna thurawn tha pe thei tur nih a ngai ve. Ka thiannu pakhat phei chu an inneih ni an ruat vek tawh hnu-ah pawh an inti tau rau reng mai a, thu chheremtu ka va ni ngun tak em!!! An nu ten min rawn phone thul, anni pahnih ka phone thul, khatih lai khan ka phone hi a luck ve ngawt asin. A tawpah zawng in hmangaih na na na chu tluang te-in an innei ta poh a, fate pawh an nei ve diah ta.

(Ka thu tum deuh buau mai..)

He dinhmun THIAN nih hi a va'n pawimawhin a va laklawh si em!!!

I zai ang aw...

2010-08-06T11:15:00.000-07:00

Engtik lai mahin zaithiam ti-a sawi ka ni ngai lo nachungin Zaipawl ah hi chuan ka tel ve chamchi a, nuam ka ti bawk a, mak deuh mai chu contralto hlir ka la sa zui. Zaipawl member mahni duhthu-a inpek a nih loh a, a thlana an thlan thin pawhin, thlan hi ka ni ve ziah thin, hmanlai nula fel an sawina “A alto hruaitu a ni” an tih thin ang mai khan hun engemaw chen chu zaipawl-ah hian ka lo alto (Contralto) ve tawh a, zaithiam lem lo mah ila, zaipawl chu kan pawlh mawi ve tho a, ka zaipui ten min rin berah te pawh min neih ve hial thin a nih kha.

Mozambique ka awm chu zai lamah hian keimah rau rau-ah ka tlahniam hle, hlabu hi ka keu ta meuh lo a, Solfa phei chu thiam dang awm hek lo le, ka en ngai ta lo reng reng. Chawlhni inkhawm kan han zaite hi a kel rawl a kel rawlin, key hran nuaiin kan han zai mai thin a, ka thlen tirh kha chuan ka mangang viau thin a, tunah chuan ngaiah ka neih leh tawh. Mizoram lama solfa dik taka, part hrang hrang nen mawi taka kan sak thin ang pawh kha helai-ah chuan an duh lai laiah an ti kuai thla a, a then an lo kuai sang bawk a, han hruai dik tum pawh hian keia awrawl chhe zet hi chuan a hneh ngang thin lo a, a chang chuan an sak dan chu dik lo a ni tih hre reng chunga han zawm maite pawh a awl thin. Tuikuk Pathian siam theih loh tihte pawh hi min ti hrechhuak thin. Ka u Tuikuk ho zinga a thawh thin lai pawh khan, ‘Anmahni zirtir tura kal si hian an tihdan hi kan entawn kan entawn mai a, buaithlak khawp mai’ an ti thin, tiang deuh chu a ni, mihang ho thil zirtir tum chu, beidawnna khur thuk taka tlak hlum a hlauhawm mah zawk thin.

Vawi khat chu kan CS te nupa ka inah an lo leng a, ka hlabu (Mizo hlabu Tonic Solfa awm) ka entir a, he hla hi I sa thiam em? Tiin hla pakhat ka entir a, ani a lo phur pherh nek a, “khawmaw hetiang hi alawm ka zawn ka zawn, helaiah tumah Solfa en thiam an awm si lo a, ka hmu zo lo a, ka lo copy teh ang” a ti ta hial a, a hla hriat ang ang chu, “chumi hla chu a awm em?” tiin min zawt a, a lo awm remchang hlauh zel bawk a, kan han keu a, kan han sa dun vei ngal ngal chu, Solfa ka lo bahlah tawh zia ka inhmuchhuak chiang ngei mai. A kuma kum en tawh lo ka ni bawk a, modulator ka bo nasa lutuk a, ka nuih a za zawk, ani pawh chuti tho, “ngawi rawh, Office ah hlabu hi lo keng la, ka lo Xerox ang a, chuan Officer ho kan zirtir dawn nia, a part kim ngeia sak ka duh a ni” a ti a, a phur surh surh khawp a, “In lama mahni a zir ka duh” a ti a, a copy ta nghe nghe. Kei pawh chuan nakinah amah pui roh hian midang zirtir tura min tih takin ka ti a, ka Hlabu chu ka han keu ngial a, awiii, a va beidawnthlak tak, d r m f.. atanga in en that leh a ngai nasa khawp a.

Tunhma-a, s d l f m d r... s d l t d’r’d’ ti-a kan au zuap zuap thin laite kha a ngaihawm ngei mai, hetia tonic solfa ah pawh ka buai chuan Staff notation phei chu ka theihnghilh vek tawh hial ang ka ti rilru a, ka hlabu dang ka keu a, ka hla thiamsa atangin ka inzir tha leh vel.

Hei hi maw lo ni hringnun an tih ang maiin, kan hringnun hi zirlai a ni reng mai, thil thar kan hmu, kan hria, kan zir a, kan hriatsa hi kan theihnghilh then leh mai bawk a, theihnghilh thei lo ta ila, mihringte hi kan turu viau ang nge, a buaithlak viau ang le tihte ka ngaihtuah ta mai mai a.

Engpawhnise, solfa dik emaw dik lo emaw, "Ka aw neih chhun lo mawi tawp se, ka tih hle hi Chawimawi nan" tia fak hla siamtuten an lo siam ang deuh hian a pawimawh ber chu Pathian faka zai hi a ni e, Amah chawimawi nan chuan eng ang pawhin zai ila a lo tha vek e, kan zai chhan ber Krista hriatchian hi thil tul ber zawk a lo ni. I zai zel ang aw...

Kar awl hnawh khah.

2010-08-02T00:27:00.000-07:00

Thu thar teh chiam han hlui tur che u ka nei hran lo, ka sawi tawh ang khan, kar hnih kal ta chhung kha Auditor IHQ atangin ka mikhual a, atan ka in pumpek a ni ber a, Zirtawpni-a ka thlah liam, In ka thleng chiah chu ka chauhzia ka hrechhuak chauh a ni, Inrinni leh Chawlhni chu ka inkhawm zuai tih bak chang dang kân lo-in ka chawl nileng a ni ber e.

Heti taka min tibuai tu chu in hmu ve duh hlawm ngeiin ka ring a, tlem azawng thlalak ka'n hlui ang che u. Inrinni khan City tour te kan neihpui a, kan kal kual nasa ve fe a, a chauhthlak ve hle.

He Rel lem hian khawpui chhung kan han suartluan reuh a nih kha, City tour train an tia, a hma-in ka la hmu ngai lo a, kan kal ve tawp, 'tiang hi a lo ni a!!! Boogie 2 chu a nei ve ran a, seat hi hnawhkhat ta vek ila, mi 200 chu kan leng mai awm e, chutih laiin keini group, mi 4 leh American nupa chiah kan timing-ah hian kan awm a, kan kual ve ta vauh vauh a.

Kan American nupa 2 chuan a laklawh laiin min chhuksan zui - kan ticket hi nilenga vahkual nan a valid avangin duh hun huna chhuk a, lawn leh mai thei a ni a, anni pawh hian chawhnu lama lo man leh mai turin min chhuksan a ni - chuti chuan mi 4 chu guide chuan min hruai ta zel a. Mi tlemte hruai kual chu Hit vak lo-in a hria nge ni kan guide chuan, "in duh chuan in chhuk ve thei ania, kan round leh hunah kan rawn lam leh ang che u" a ti fo teh fahran leh nghal, kei lahin ka duh bik bau lo, a phakar reuh tlat a, chawhnu lamah tih tur dang kan nei ve tho bawk si. Kan kalna hnuhnung berah phei chuan "Hun a tlem tawh a, kan tlai si, in fangkual hman tawh lo" min ti a, ka ngaihdan ni bik ta hek lo, "E, va bei fair lo ve, tiangte chuan kan pawisa chawi man a awm lo e mai a, nidangah pawh ka hmang tawh miah lo ang che u, ka thiante pawh ka hrilh ang" ka ti, kan guide chu a nuih a za khawp a, "anih leh, minute 8 vel va kal rawh u" a ti, kan han fang kual leh ta hram a nih chu, kan let leh chuan, "ti kha chuan min hmang leh thin ang chu ti raw?" a lo ti a,"kan la ngaihtuah ang chu" ka tihsan.

(National Museum kawt)

Kan ni hnuhnung ber zan hian Dinner min treat a, kan lawm hle, mahse ei tur kan chah sual nasa khawp mai. Kan kal hma-in "enge kan ei ang, kan thianten enge an eia i rin" tiin min zawt sa diam a, "ka hre lo le, enge niang aw, CS te nupa chuan Bawngsa an ei ngei ang a, Colonel Deise chuan sa hring a ei duh lo a , a pasal chuan arsa a ei mai thei a" ka ti zut zut a, "nih chuan enge kan ei ang" a ti, "sangha kan ei dawn mawni le" ka ti a, "Nia, chah hmasa la, i ei ang ang ka ei ang" a ti ve diam. A hmun kan thleng Seafood lam kan han en kual den den a, sawi lawk ang ngeiin CS te nupa chuan beef steak chu an lam ta ngei, kei chuan chakai leh kaikuang tel deuh nuai kha ka duh a, anin Chakai a ei duh si lo, sangha ni-a kan hriat pakhat kha atan kan chah ta, a lo thleng chu "hei enge?" kan ti he haw, Squid a lo nia, a ban vel kha Octopus a ang sia, Majora chuan "Enge, octopus a mi?" a ti a, ka nuih a za si, nui put put chungin "Ni lo, Lula a nih hi" ka ti a, "a tui lutuk, hei ka ei turah pawh a tel hi" tiin ka thleng ami chu ka thai lang a, a ei ve ta poh a, a rilru a nuam zat lo aniang, a tuk thlengin "Nizana ka ei kha Octopus ti raw?" a la ti fan.

Major Francis hi mihlim thei tak mai a ni, Auditor e ti lo chuan rin aiin a tawh pawh a khirh lem lo a, mi inngaitlawm leh tawng duh tak mai a ni a, kan ti ti leh luam thin a, mikhual pawh a nuam khawp mai.

Suih-tung-tu-rut..

2010-07-20T22:45:00.000-07:00

Hrui suih hi suih dan hrang hrang a awm a ni awm e, a then chu nghet taka thil phuar nante, a then thil phihawh nante, suih mawi hrim hrim te pawh a niang chu. Suih tak ngeia suih chu a nghet a, phelh mai mai pawh a har, suihtungturut hi chu a hmawrah hian han pawt ila a phelh leh mai thin.

Ka naupan laiin la kan phiar thin a, ka nu la chhum zawmkhawmin puanbu lemte siamin puan kan tah thin bawk, suih taka suih hi ka thiam lo a, suihtungturutin ka suih a, a dûk leh zur zur a, a manganthlak thin hle, puan tah khawn a tla tha thei lo a, a chang phei chuan tah a chhuak hial thin. Ka nu suih lah a nghet thei hle si a!!! A hnu chuan suihtaka suih min zirtir ta a, a nghet ve ta hle, han pawt vak vak mah ila, a nghet ting ting a ni mai, suihtungturut kha chu a hmawra pawh hian a phelh tlat zel.

Mizote mahni-a la an deh thin lai khan nula nungchang tha leh tha lo en nan an la deh lai an chik thin a ni awm e, ka nu sawi ka la hriat reng chu Tlangval thenkhat an thiannu an rimin a la chhum an lo khawl ruk sak a, an haw pahin Sumah an dah a, a lo tam tham deuh aniang, a zing buh deng turin a hmu chu a zak hle a ni awm e.

Nupui pasal inneih hi hrui suih nen hian an tehkhin teh chawk bawk a, suihtak chu a nghet ang bawkin inneihna hi chu nghet taka suih a ni tur a ni. SA Officer pakhat pawn Nu pakhat hnenah "Suihtungturuta ka suih mai mai, in innei rei ta zek mai" a ti fiamthu a, ani lah a nuihza khawp, inneihtirtu lam ai chuan a inneia te an pawimawh zawk daih bawk a ni.

Tleirawl chhoh laia ka thian kawmte pasal an nei vek tawh a!!! A then chu an inthen leh tawh hial (:P) Kan thiannu pakhat chu naupangte-in a High School teacher a nei vei a, fa 1 an nei chauh tihin a tlan hnu hnu, a nu chuan "I haw tawh lo ang" a ti a, ani chu lungleng leh si niang a rukin a haw leh, a nu thinrimin "I haw rau rau chuan i lo haw tawh lo ang" a ti leh thung, mahse a hnu rei lote-ah fa 2 an neih hnu-in a haw leh tho, an inthen hlen ta nghe nghe. Pakhat leh thung chu a pasal kha a tlangval laia Zu in thin pawha a hriat loh, fa 2 an han nei a, rui thei em em ta mai, an buai thei khawp a, nikum ka haw khan ka hnenah a lo sawi koh koh a, "Tihian ka tuar tang tang ang a, ka fate enkawl thei ni-a ka inhriat hunah a awm dan hi a sim loh chuan ka then nal nal ang" a ti bai bai mai, buaithlak hlawmin!!

Nupui pasal inneih hi hun rei lote atan mai ni lo-in dam chhung atana intiam an ni a, a nuamah leh a hrehawmah, hrisel leh bawrhsawm pawhin ti-a chham vek kha an ni a, an han innei ta cheng a, an ze thup thin lo lang chhuak an tuar zo lo fo thin. Hmeichhia hi kan pawimawh khawp mai, pasal neih hnu-a nun thlahdah, inchei tha duh mang lo, Nu te te inchei vurte chu tih rilru pu-a inthlahdah, pasal te tana iaiawm tak tur an awm nual mai. Hei hi tih loh tawp tur niin ka hre ve mai mai. Mipa lah hi nupui nei reng chunga nula hmeltha hre riau an awm bawk a...

Chuvangin ti hluai teh ang.. nupui/pasal neih chuan Suihtungturut ni lo Suihtak ngeia neih tur a ni e. Engkim huama nei an ni si a.

(Auditor ka mikhual a, thu leh hla pawh ka nei hlei thei lo, ka hunawl remchangah ka han ziak zuai a ni, a chung pawh a hawl fai zo ngut na maw chu???)

Beer-lahai-roi

2010-07-13T01:43:00.000-07:00

Mahni seh seh mual hranah ti-a office chhunga hna thawh mual mual hnu-a Thingpui In chawlh han neih hi chu a nuam ve hranpa thin ngawt mai. Choka-ah kalkhawmin duh zawng zawng sawiin kan ri luai luai thin. Kei, a tawng thiam lo ber hi a bengchheng leh tawng hnem ber ka la ni ta dah thin a!!

Tukin chu ka thlen thlak hma-in Politics lam an lo khel a, ka ngaithla kur reng a, ka inrawlh lem lo. Tuna kan rorel lai mek Frelimo party hian term hnih an chelh tawh a, kan President Armando Guebuza hi duh lo an tam hle, chuti chung chuan 2009 October-a inthlanpui neih khan an thlang tling leh tho si. Inthlan dawn khan Renamo leh MDM party thawm a lian hle a, result a chhuah meuh chuan a ngai bawk an lo tling leh, hei hi eng dang vang a ni lo a, Frelimo party hi an lian laklawhin sum leh pai an nei a, Campaign laiin Puan, Bag, Lukhum leh sum hial pawh an sem chhuak nasa khawp a, mipui chu an awn leh dual mai niin a lang.

Chutia Frelimo an han sawisel leh vel chu "Nangmahni thiamloh alawm, duh thlan theihna in nei a, in Vote a, Frelimo tho in thlang tling a, ngah nge tuna in sawisel leh si, in duh loh tak tak te chuan inthlan lai khan vote mah ta che u" ka ti vel a, anni paw'n dik chu an ti tho, "Nia, suma lei theih an tam em a ni, a bikin Nu-ho hi puan an dawn chuan an lungawi a, an tam nasa mai si a, nuho pawl hi an chak bawk si a.." te an ti.

Chuti'n ka sawi ngawt tak na-a kan Mizoram dinhmun nen a danglam nasa vak chuang lo, kan in ang vel reng a ni e, tiin ka ngaihtuah leh hnuhnawh. Hmana kan sêl tawh bawk kha kan thlang tling a, hmana kan duh kha kan sêl leh vel mai mai a ni e, "Uiin a luak a ei leh a, Vawk tuihawkah bawk a inbual leh thin" tih zawng zawng kan neih zo a ni awm e.

Engpawhnise, famkim lo mihring kan ni miau a, a famkim a lo lan hunah chuan Thu tak zawng zawngah a hruai lut ang che u kan Bible-in a ti a, chumi lo lan hun chu nghakhlel takin kan thlir thin a nih hi.

Hagari, a Pi Sari'n a fapa Ismaela kum 13 emaw lek nena a hnawhchhuah khan thlaler hmunah kalna lam tur hre lovin a vak a vak a, chutah an tuithawl a lo ruak ta bawk nen, lungngai manganga rumin a fapa tuihala thi mai tur chu en ngam lo-in thingbuk hnuaiah a mut a, Pathian hnenah a tawngtai ta a, chutah chuan Pathianin a mit tih var sakin Tui a pe a ni tih kan hria. Bawihnu, ro luahtu tur ni lo, a piin a hnawhchhuah hnenah pawh Pathian chu a inlar a, a mamawh a pe a, chu hmun ngei chu a hmingah Beer-lahai-roi, Nunna Tuichhunchhuah tia vuah a nih tak kha.

Hlim leh lawm lai leh engkim a kal tluan lai hian Pathian hnena lawmthu sawi hi a awl deuh a, manganna leh harsatna tawh hian Pathian dem mai, beidawn mai hi a awl thin, Amah kan mamawh hun lai tak a nih thin vei nen. Kan chak lohna leh tlin lohna te hre vektu hnena inpumpek mai hian Nun a nuam mai a lo ni, khawvel thil ten min tibuai thin mahse, Hagarin Lalpa a tawhna hmun ngei hi tun thleng pawhin a la pangngai reng a, kan chak lohna zawng zawngte min hriatpui turin Amah chu a la rintlak reng zawk a ni.

Nawngsawhnawh..

2010-07-05T04:31:00.000-07:00

Tunlai chu kan inkhel hah bawk a, hahchawlh nan hmanlai thil, ka rilru-a riak reng thin ka'n sawi mai mai teh ang.

Kan la naupang hle, 1986-7 bawr vel kha nita-in ka hria Nongsohnoh lar em em lai kha. Kan hlau thei khawp mai a, naupang tap thlem nan nawngsawhnawh in a man ang che tiin an sawi thaih thin.

Chutih lai chuan Kolasib-ah kan awm a, kan in awmna chu a fal ang reng hle na-a, tuilut kawng a ni bawk, mi feh kawng a ni bawk a, ram kal tur hian an rawn paltlang nasa thin, a chang chuan chu kawng chu a lun ve viau thin bawk.

Tlai khat chu nu pakhat feh hawng hi hlau thlabarin a rawn tlan haw a, thaw hlawp hlawp chungin tuilut vel-a a kal laiin mi mangang thlabar au rawl a hriat thu a rawn sawi a, “Tuilut-ah heti mai hian maw ka thih dawn, ni tla tur ka va ngai em..” a ti niin a sawi. Mite chuan nawngsawhnawh in tu emaw a la ta ni ngeiah an ngai a, an ngaihven hle, chu achhapah Tuilut ah ber kher leh nghal a ni vei nen. Tuilutah mangang au thawm an hria tih chu kar lo-ah a khaw khahin a khat a ni mai, tichuan, tlawmngai-in chu mi mangang chu chhanchhuak turin leh nawngsawhnawh chu man ngei turin Tuilut lamah chuan tlangval leh pa valai deuh, kal thei tur ni-a inhria chu an tlan thla ta zut zut mai a, chutih lai chuan khua a thim tawh a.

Mi chu an rawn pung khawm tam zel a, thenkhat hmanrua engmah keng lo-a rawn tlan chhuakte chuan kan thingkhawna thingfak chu an rawn phawi chawt hlawm bawk. Ka Pa Aizawl kal rawn haw hlim hlawt pawh chaw a bar sawk sawk a, iptepui-ah Chempui dahin a chhuak ve nghal bawk. Nawngsawhnawh chu man a, mi mangang thlabar chu chhanchhuah ngei an tum ruh hlawm hle, Kolasib Venglai atangte pawh chuan an rawn tlan thla zut zut a.

Nakin deuhah chuan nawngsawhnawh hmu zo lo beidawng an rawn haw tan, keini unau chu kan veranda ah kan thu a, hlauthawng em em in mi lo haw chu kan lo thlir a, kan tui pawh a hek ngei mai, a rawn haw a piang chuan tui an rawn lam vek bawk si a, ka u chu tui sem reng rengin a lo buai hle.

Nakinah chuan val upa lam deuh hian tlangval pahnih hi an rawn khalh haw ta tak tak a, kan kawtzawl ah chuan an pungkhawm a, chu tlangval pahnih chu a laiah an dah a, an au lawng lawng a, an thin a rim hle, chanchin ti hian tlangval pakhat zawk chuan a sawi ta a.

An hming chu Vena leh Rammawia an ni. Vena chuan “Thingzai turin kan thiandun hian kan kal a, zu kan keng a, tlaiah khan kan in a, ka thianpa hian inawhhlum a tum der a, a rui lungpuam khan ‘Tuilutah heti mai hian maw ka thih dawn, Ni tla tur ka va ngai em..’ a ti a” tiin a sawi. Chumi au thawm chu nu pakhat khan a hria a lo ni. Anni pahnih lah khan anni vanga buai tih hre lo-in an mi zawn chu an lo phek zawnpui ve chiam mai a lo ni a.

Val upa te chuan an zilhhau a, tlangval thenkhat chuan han khawih deuh hlak an chak hle, an thum mam mam a, mahse an in khapdai thei ta hram, mipui ti ralkhel zawnga che tawh lo turin an vau a, an tindarh ta hlawm.

Khata tang khan nawngsawhnawh ka hlauh thinna hi a reh hmak a, tun thleng hian nawngsawhnawh kan tih thin kha eng tak ni maw? Ka la ti reng mai.

Tling thelh apiang...

2010-06-29T23:33:00.000-07:00

Naupang hi “Vanram kai lek lek nge i duh, kai loh lek lek” tia zawh hian “Kai lek lek” tiin an chhang khut duh riau, an ngaihtuah nawn leh a, a lo tha lo zawk daih si a.

Hmanah ka mangah khawvel hi a lo tawp a, vanram kai tur leh tur lo hi hming kan lo zawng sup sup a, bangah hian school-a kan exam result an tar ang hian hming an lo tar a, mahni hming kan lo zawng sup sup, kan ri suau suau a, gate lianpui a awm a, mahni hming hmu apiang chu chu gate Vanram-ah chuan an lut zel a, ka hming ka hmu ve mai lo, ka mang a ang rapthlak.

Nakinah chuan barel bangah hian ka hming chu ka hmu ve ta a, alphabetical order in an lo dah kha a lo ni a, ka hming chu a hnung rap, mahse ka hming ka hmu chu ka thaw huai a, a vanramah tak pawh chuan lut ta lo chuan ka thangharh ta hlawl a, ka thaw huai huai mai nia.

Zanah inkhel ka en a, a chak lo lam an rilru a na lutuk, an inkhel zo chu field sirah a then chu an mu tawp, a then an tap bawk a, a lo thlirtu te tan lah hrilhhaithlak, nula ho chu men tuau chung hian an hawi ho hlawm mai a, a thenin hmui an pet fan fan bawk, ngaihtuahna a ti thui ngei mai. An thlen san poh leh chak loh tawrh a na ting a ni tawh mai si a. Khawvela infiamna mai mai pawn a tah tir zawih zawih a nih chuan, khawvel tawpa rorelpui hunah rin loh lam deuha kal angaih thut chuan aw, a van rapthlak dawn em tih ka ngaihtuah.

Mi vanram kai leh kai loh turah te hian kan lo buai ve em em thin a, mahni leh Pathian inkar vek a ni a, he thu ah hi chuan sawi theih kan nei tlem hle. Kan veng pa Pu Pahlira pawh Pu Chunga hian “Pu Pahlira khi vanram a kai chuan ka chhuk leh ang” a ti a, mi thenkhatin an hrilh a, a thinrim ngang mai a, palai hial a tir a ni awm e, chutia, palai hial tira a thinrim thu a hrilh takah chuan a ni chuan “E, chutia a thinrim te chuan kan chhuk leh lo anga ni mai lawm” a lo ti a, an thubuai chu sawi zui vak theih lohin a tawp ta a ni awm e.

Kan veng pa tho, Chaltlang Ruam veng pa lar thin Pu Pawihbawiha pawh kha kan thian Tataui ten, “Pu Pawihbawiha chu I inkhawm peih lo si, I pianthar pawh ka ring lo, vanram I kai miah lo ang” an lo ti a, ani a ngawi vung vung a, “In thlan tur a ni hleinem” a ti ta daih a, a fiamtu te chu an hawihai zaw lel a ni awm e.

Kan dam lai la la-a rorelsak tur ni hlawm ta ila, thiamthu sawi tur nei lo fe fe kan tam awm e, ngaidam theitu Pathian ni lo ta se, kan thiltih angte-a thungrulh nghal zel ni ta ila, kan va tuar nasa dawn tak em.

Kawng lehlamah chuan ti hian ka ngaihtuah thin, Pathian hi a fel lutuk a, nilenga hnathawktu leh, chawhnu lam chauha thawk leh tlai dar 3-a kal pawh hlawh in ang a pe tho hi a va che fair lo e ka ti fo thin, amanherawh chu vanramah pawh hian engemaw tal chu thliarna hi a awm ve ni tur ani, an thiltih ang zela pek turin ka lawmman ka hnenah a awm a ti miau a, chuvangin mitinte boral duh lo-a zahngaihna lantirtu hian kan thatna tura rorel dan chu a thiam em em ang tih hi ka thutlukna a ni mai e.

A pawimawh ber ta chu a tawp thlenga rinna ngheta kan awm hi a ni , “Tling thelh apiang pawi tih a zual” min tih khum ang tih a hlauhawm tlat.

Khawi atangin nge?

2010-06-22T23:26:00.000-07:00

Ka sawi fo thin, kalna hmun apiangah hian "Khawi atanga lokal nge i nih?" tih hi zawhna ka dawn chamchi a ni a, Indian ka ni ka inti chung pawh a, I ni thei lo reng reng, Indian kan hriat nen i inang lo, Filipino emaw, Korean, chinese emaw i ni ang an tih tlat thin avangin a chang chuan Chinese ka ni han tih mai changte pawh ka nei, Indian ka intih aiin an awih ziah leh nghal.

Vawi khat pawh ka thiannu Hair dresser-ah ka kalpui a, ka lut phat chu pa pakhat hian min lo en vang vang a, "Korean i ni maw?" a'n lo ti ngawt pek a, "Ni e.." ka ti ve ngawt bawk a, ka sawi thui peih vel lo a ni, ka thiannu chuan a lo ngei khawp a, "Khawi atanga lo kal pawh nise, enge i hriat kha a tangkaina ni a..?" a ti a, chupa chuan "Aw, a hmel-ah Mozambican a ni lo tih ka hria a, ka hrechiang chak a ni mai lawm, mikhual tih tlangnel te chu kan duh alawm.. etc etc" a ti a, an inhnial char char a, ka thiannu sam an khawih chhung chu zu inhnial thei a..!!! Ka nin em avangin an zawhna pawh ka hre lo der a, tawng thiam lo awmin ka awm tluan chhuak ta zak ringawt.

Pathian fa-te inlanna hmunah chuan Setana pawh a rawn tel ve a, Pathian chuan "Khawi atanga lokal nge i nih?" tiin a zawt a, ani chuan "He khawvela ka vahvaihna leh ka chhuk ka chhohna atangin" tiin a chhang a. Chutah chuan Pathian chuan a tana mi rinawm Joba chu Setana fiah turin a kutah a pe a.

A lo ni e, Khawi atanga lokal nge tih hriat hi a pawimawh a ni ang, Pathian meuh pawhin a hriat chian em em Lucifera kha a zawt tho alawm le te ka ti, chuvangin khawi atangin nge, khawiah nge a kal zel ang tih hi kan ngaih pawimawh a ngai hle a lo ni.

Kan hun tawn hi mawlmawng taka thlir liam mai lo-a "Hei hi khawi atanga lokal nge ni, Pathian duh dan a ni em, ka thil tih hi Pathian laka chhuak a ni em, he thil hi ka tan a tha ber em?"tih ngaihtuahna te kan neih a, kan inven lawk fo a tul thin.

Diabola hi a saseh tur zawngin a phi ruai reng si a.

Play for Africa..

2010-06-12T15:10:00.000-07:00

Kum tam tak a liam ta, Africa mite chuan football khelin khawmualpui hrang hrang an suartluan a, hun tam tak kal tawhah khan he game hian a koh avangin anmahni ram ngei Africa khawmualpui chu chhuahsanin khawvel dangah an chhuak thin. A chang chuan han thleng sang ve viau thin mahse, champion team erawh an ni thei lo, Africa khawmualpui atang hian World Cup football champion hi a awm theih angem tih leh engtikah nge mahni ram ngeiah he game ropui tak hi kan khelh ve ang tih chu an tan zawhna lian tak a ni kumtin thin.

Tunah chuan vawi tam tak an mangphan thin chu a takin a lo thleng ve ta, Africa khawmualpuiah ngei chu game chuan a ko let a, rilru a hlim a, pheikhai a zang a ni. A thlengtu chu South Africa tih ni mahse, Africa-a ram hrang hrangte chuan anmahni rama thleng ang maiin an ngai a, an hlim em em a ni.

He khawmualpui atang hian ram 6 chauh tel mahse, a tel ve lo-te pawhin an tawiawm tha em em a, hnamzia leh tihdan, culture leh tradition hrang thiau nei ni hlawm mahse he thilah hi chuan an inthurual vek a, an thupui ber chu Play for Africa tih a ni tawp mai. Hei hian anmahni-ah inpumkhatna thar a siam sak nasa hle.

South Africa ngei pawh hian world cup hi khel mah se an thlen thui chu an in beisei lem lo, interview leh public opinion hrang hrangah Quarter final tal kan thleng ang, second round kan thleng ang tih vel chu an in beiseina tlanglawn ber a ni pha chauh.
Chuti chu nimahse, an hlim em em tho, a vawi khatna a tana Africa khawmualpuia he khawvel zawng zawng ngaihven hlawh, world cup football khelh a ni ta mai hi, mumang ang maiin a mak a, a ropui em em bawk a ni.

Tunah chuan mahni ram ngeiah an khel ta bawk a, hun rei tak zin bo a, mahni rama haw leh teh chawk an in chan a, hei vang hi a ni, Play for Africa an tih tak ni, enge an an hlawm I lo thlir teh ang.

Football hi game a ni tih kan hre theuh a, he game-in boruak a neih san theih zia pawh kan hre awm e, he game hian pawl hote chu inlungrualna leh thawhhona tha neih a tulzia a lantir chiang hle a, game laklawh laia inthlahdah a pawizia leh, tha thlah a huatziate, inlak fit reng a ngaihzia leh mahni inthunun leh insawizawi a ngaih nasat ziate kan hria.

Players te chuan anmahni zirtirtu - trainer, Coach-te chu nei mahse khelmualah a rawn luhpui ngai lo a, pawn atanga lo thlirin an khelh dan a lo en thin, nasa takin zirtir thin mah se, a taka inkhelhna field-ah chuan a luhpui ngai lo a, chutah chiah chuan player tha a lo lang thei ta thin a, an chet mawi loh deuh chuan yellow card leh red card in a lo hmuak reng bawk nen. Mahni goal venghim chunga hmelma beih dan tactic hrang hrang coach ten an zirtir chu khelmualah tarlanin a awm thin a, vawi khat inkhelhin an hun tawn leh tur thui tak a hril bawk.

He game hi ringtu nun nen hian ka khaikhin a, a in ang hle in ka hria, ngaihtuah chhunzawm ve teh.

Lenrual hlui..

2010-06-04T02:40:00.000-07:00

Aw khawnge lenrual hlui zawngte kha
Hmanah chuan nau ang nui za thinin
Hlim leh lawmin tlaitla eng hnuaiah
Duhthu leng tinkim kan sam za thin

Mahse khua rei an chang leh si
Hei hi maw lo ni le Lunglen
Mahriakten luaithlipui nul zelin
Hlimlai ni kha ka tahpui ta'ng e

Min hnemtu awm hian ka ring love
Khuarei hian min la hnem ve mahna
Ti-a ka han dawn chang ni pawh hian
Lunglen ti zual tu mai lo ni e

Aw hlimlai, aw hlimlai, hlimlaini
Tap tap-in ka au ding zo si lo
Lenrual hlui zawngte kha khawiah nge
Damlai khawvelah tawng leh i maw?

Tun kar chu he hla hian inhnem teh ang.. Lenrual hlui ngaihawm tak tak te kha tawng leh hian kan mawi si lo.. !!!

World Cup thunawi..

2010-05-27T23:29:00.000-07:00

World cup Football hian engemaw ti takin âi hi a nei deuh roh a, thil thleng zen zen lo a nih bawk vang hi a niang e, mitin hlut leh ngaihsan a hlawh thin ni, keini ang duang inkhel ngai lem lo pawhin muthlu tur tal pawhin kan nghak chhuak hram hram thin anih kha maw. A lar em avang hian World Cup kan han tih ringawt pawh hian football khel a ni tih chu kan hrechiang nghal fur awm e.

1990 kha tih tak zeta World Cup ka en hmasak ber chu a ni awm e, khami kum kha chuan kan tang ve thei khawp a, kan tan zawng erawh hmeltha tha kha an ni mai, inkhelh kha chu an thiam dan a in ang put vek a-kan mitah chuan, a pet goal thei kha kan ngaisang leh deuh bawk, an hlapui To be Number 1 te kha a ke rawl a kel rawlin kan han sa ve a, a thu erawh a dik lo nasa viau ta ve ang, Argentina leh West Germany-in Final an han khel a, keini naupang deuh kha chuan an Goal keeper Goycochea hmel that vangin Argentina kan tan, a uar fal deuh phei chuan an biangah an ram flag rawngte khan an han ziak reng ngei a, puitling lam erawh chuan Germany National Anthem kha Sipai Pawl hla pui ‘Sipai puanzar ze thum ropui’ tih thluk nen a in an avangin an han tan deuh bawk a, an Music play laite khan an han sakpui tak lawng lawng a. Germany an han chak zet kha chu tlema a hnuk no deuh chu an tap hial mai..

1994 kha ka en nasat kum a ni, Atlanta USA kan ti reng anih kha, kan tlaivar deuh thaw reng a, chhunah Class-a muthlu an tam thei hle. Zan dar 12:00 kan thleng dek dek a, kan kawmchhakte fanu chuan “ehe.. kan tlaivar der nia..” a lo ti hmanhmawh bawk. Brazil leh Italy final-a intumin Brazil an vannei zawk hlauh kha aw… Italy kan tan laklawh si, a va hrehawm tak em. Inkhelh zawha ei tur Arsa kan la siam zui, ei a tui vak tawh lo.

1998 – hemi kum hi a nuam phian, Bukpui-ah Primary School-a ka thawh lai a nia, a khaw pumah khatih lai khan TV nei 4/5 bak an awm lo. Vengsang lamah Pu Biaa’n a nei a, Mualveng lamah Pu Thanga (Thangbawnga kan tih mai thin, dawrkai) leh Thanghuama leh mi dang 1, a hming ka hre ta mai lo. Ka awmna ka Pute-a ten an nei bawk a, TV nei in kha a lun thin luih luih ngei mai. Chutih laiin, electric current a awm tha lo thei si, Thangbawnga te khan Generator an nei a, power awm loh zan chuan Thangbawnga te in kan pan hul hul zel, a hunlai kha chuan a nuam thin ngawt mai. Anni lah kha an felin an zau khawp a, TV chu kawngka bulah an hung tawp a, pawn-ah thutna kan rem ta thin a, a khaw nawtin kan en a, kan ri hulh hulh mai thin, inkhel en a nuam dangdai thin teh asin.. Final khelh zan erawh chuan vanneihthlak takin power kan han nei ve hlauh mai a, inah thlamuang takin kan en a, TV room chu kan khat hneh khawp mai. France leh Brazil-in final an han khel a, ka tan lam France an chak zet kha chu a nuam ve khawp mai, Brazil tan an tam bawk a.

2002 – Korea leh Japan in an inthlen tawm a ni bawk a, a dangdai deuh turah kan ngai kha a ni a, Opening Ceremony pawh a puitham khawp a nih kha. West Phaileng-a C.O-a ka awmlai a ni, Hetah pawh hian TV nei an tlem a, kei phei chu mahni-a awm ka ni bawk nen, neih alawi kha ka nei lo hrim hrim a, Dinthar veng-a Pu Siama te inah inkhel en turin ka kal ve ziah a, kan tam thei hle, ka tawng peihin ka tang thei bawk a, ka en loh hi an hlau thei khawp a, ka kal loh pawhin Pu Siama Monu hian a fa-te min rawn lamtir ve ziah. Hemi kum hian Brazil ka tan ve teh tlat a, an la chak zui..

2006 – Hemi kum hi chuan Germany lam kan hawi ta a, en erawh ka en hnem vak lo, mi zawng zawng deuh thaw-in mahni in-ah TV kan nei fur a, tunlaia “Radio ngaithla tur insawm” ang deuhin World cup en tura insawm chu a hit vak lo, mahse thiante nena en chak hrim hrim chi mihring hi awm a ni a, a chang chuan kan han en ho leh ang dal dal bawk thin. Ka en tam lo a, tan bik pawh ka nei ta chiah pawn ka hre lo. Penalty shootout-ah Italy an chak ta a nih kha, ka tan pawh an ni lem lo, Italy hi kumtinin rin kai chu an ni ve ziah.

2010 – Kumin chu South Africa, ram nuam leh mawi tak, Africa Europe an tih mai ramin an thleng dawn bawk a, a phurawm ang reng a, inpuahchahna pawh an zo thawkhat ta hle, Lalhmei ang maiin an inpeih ap tawh a nih hmel, TV lamah pawh an ti ri chhen ta mai. Ram thenawm maite a ni bawk a, kal ve te pawh a chakawm rum rum, a hma-in ka lo va fang lawk ang chu ti-a ngaihtuahna ka siam laiin VISA ka nei mai thei lo a, tunah lah hna tau a tet leh tawh si, tin, kal man a to ta lutuk reng reng a, han kal theih ziazang niin a lang ta lo. Kan time zone a in ang bawk a, khêl lo-a en thei turah in dah phawt ang.

India ram hian engtikah tak World Cup Football te hi khel ve thei ang maw tihte ka ngaihtuah a, India-in an la khel dawn lo bawk a, kumin chu Brazil hi I’n tan phawt mai teh ang, kan Brazillian hotute hi an fel e mai. Tin, an champion ngei pawh ka ring e, tu nge rawn bid dawn????

Brazil, Brazil, Brazil…. ni 13 chiah a awm ta!!! World cup football 2010 khelh nan.

Facebook

2010-05-21T02:32:00.001-07:00

I pawnto ang chaw ei khamte rual kimin
A eng nem duai kan tualah
Thian han sawm la, lungrual te in
Chhei, a chhei dur dur

Naupan lai-in thiante pawnto turin kan han ko a, pawnto hla chi hrang hrang sa-in kan han inkawm a, chutah inthengkah emaw, inbihruksiakin emaw a hmawr kan han bawk ngei a, a chang chuan kan intirameikai thin bawk. Mi kawmkar thim lai lai kan chuh a, kan lut kual thin a nih kha, thenawmte ar in-a tawm phei chuan ar hrikin min lo bawm nghal luai luai a, mut hnu-ah kan thak sup sup thin.

Aw, en teh an nun a dang ta tih hla ang maiin tunlai naupang chuan Pawnto hla pawh an sa ngai tawh lo, a awm tih pawh an hre lo hial zawk ta ve ang. Sikul an kal thei dek dek a, Computer an ti nghal ringawt tawh mai chu a nih hi. Naupang chu sawi loh puitling lam pawh a hmei a pa-in Computer hian kan tunlai khawvelah hi chuan min awmtlei zo hlawm ngawtin ka hre thin.

Kei ngial pawhin he Computer hi ka hmang tangkaiin Internet pawh ka luhchilh thuk ve tial tial a, heng website: Tweeter, Facebook, Orkut tih angreng te hi Social networking sites tia sawi a ni thin a, mite inzawmna siam tura duan a ni nghe nghe tihte pawh ka hre ve zel a, hei hi kan kristianna nen hian a inhmeh hlein ka hre thin. Kan Kristian nun hi mite nen inzawm leh midang te tana nun hmang tura beisei kan ni a, chutiang bawkin heng site hmang hian thiante nen inzawmna tha kan siamin kan ngaihdan te kan sawipui fo thei thin a ni.

Heng site zingah hian Facebook ah kumin hian ka in register ve chauh a, tunah hian thian 69 ka nei a, thian atana min duha min sawmtu apiang chu ka pawm vek a, thian tam tak neih pawh ka duh bawk, thian nei lote tana Thian nih inhuam kan Lalpa dung zuiin friend request pawh ka accept zel a ni.

Khawilai African ram pilril, tui leh power awm that lohna-ah pawh vanneih hlauh chuan Facebook profile a update theih a, Yahoo mail ka hawn theih loh pawhin Facebook chu ka hawng thei tlat a ni, chu chuan khawvel hmun danga thiante nen inbiak pawh theihin min siam a, hei hi chu a ropui tak zet a ni.

FB hian thiante nen inzawmna tha tak mai min siamsak a, ka hna avanga hmun hrang hranga ka awm thin vangin hun engemaw chen chu thian bik hnai tak pawh nei thei lo-in ka awm tawh a, ka thiante ngei pawhin a chang chuan min be pawp em em hran chuang lo fo, amaherawh chu engemaw tiin he FB hian thiante nen min thlunzawm leh ta a, ka College kalpui te leh School kalpui te mak tak takin ka chhar chhuak a, hei hian thian hmuh ngai tawh loh leh la hriat ngai lohte nen inhmelhriatna remchang min siam sak a, a lawmawm thin ngawt mai, kawng lehlamah chuan mi thenkhat mahni nihna thup a, midangte nihna hriat duh bawk si a, vak kual vel, mahni nihna dik tak dah duh lo, thlalak pawh dah duh lo hi an awm ve tho mai, heng mite hian pek aiin lak an duh zawk a ni tih a hriat, tin a takah pawh mi phakar tak an ni mai thei a ni.

Chutia han sawi zel takah chuan internet-ah hian Mizo site hrang hrang leh forum-ah te pawh thu pawimawh tak tak, hnam hnuk khawih thilte sawi ho a ni fo thin a, heng site hmang hian aizawl leh zoram chhunga thil thlengte rang takin hmun hla taka awmte pawhin kan lo hre thei thin hi ka tangkaipui hle. Chutih laiin Facebook ka sawi ang bawkin heng site-ah hian miin an hming lem an hmang tlangpui a, mi tam takin kan nihna an hriat loh avangin huai tak takin kan tawngin sawrkar dem zawng emaw, mimal hial pawh an nihna te kan duh loh zawng chu kan sawichhia-in a then phei chu ar chuk tui lo hial khawpa sawi chhuah maite pawh kan nei thin.

Hetianga thu leh hla tha tak tak nei leh ngaihdan ropui tak tak neite hi hetia inthup lo hian, kan ram hi kan vei tak tak a, a thatna tur kan duh tak tak a nih chuan ‘Keimah ngei hi a siamtha tur ka ni’ tiin bul tantu ni thei theuh ta ila kan tha tlang ngei ang.

Heng mizo site hrang hrang-a comment pe thin mi tam takte hi an rilru a chakin tawngkam an thiam a, thil an hre hlawm em em bawk, a chang chuan heng thalaite hian an ngaihtuahna ang hian kan ram hi min hruai ta se, kan tha viau ang a, tihte ka nei fo mai. Amaherawhchu heng mite hi mi dawihzep tak an lo ni ve thei tho mai. Hmaikawr vuah chunga ring tak taka huk dum dum a, a saseha tlanchhe leh tur chi, Sabengtung sakeibaknei vun sin ang mai an lo nih teh chuan a fuh chuang miah lo thei.

Miten min hriat loh a, inthup chunga huai tak taka pau pau lo hian, kan sawrkar pawh ralkhata dema, iak mai lo hian a bupui hi luhchilh ngam ta zawk ila, tha lo ni-a kan hriatte hi Dan hma-ah dik taka ti thin turin hruai ngam ila. Mi dik leh tha te chu chawisangin zah thiam ta ila, kan hnam a ropui ngei ang. Raltiang ram saw thlir teh u ti mai lo-in mahni ram ngei hi thlir teh ang u.

Anthûr lek lo niin..!!!

2010-05-13T22:50:00.000-07:00

Ka compound phaitual hnim chu vawi khat na reng reng chu ka'n thlo fai teh ang ka ti a, ka ti fai ve vur a, hetia thlawhfai takah chuan pangpar huan siam ila that dawn hi tiin pangpar chi ka lei a, ka tuh ve ngial a, tui pe-in ka duat ve khawp mai. A rawn to tir te chu a hmuhnawm dan a dang riau a, midang pangpar huan mawi tak tak ai chuan ka pangpar to tir chu a hmuhnawm zawk daih.

Duat deuhin tui ka pe a, a bul vel chu ka thlofaiin ka rih vur deuh reng mai. A lo thanglian zel a, ka pangpar chuan pangpar a ang lo ta riau mai, a chi kawmah chuan hnah bial lam, a par pawh a bial, zam thei deuh reuh ni-a lang kha a hnahte chu a kak deuh tru a, a thap deuh hruih mai. Nakinah a rawn danglam dawn a niang, nghak chhin zel ang ka ti.

Hmun dangah kar khat zet ka zin san a, ka zin chhungin kan huanpu-in ka huan vel chu a lo ti fai a, thenawmnu-in ka pangpar chu zuah turin a lo hrilh bawk, hnim dang a thlo fai vuk a, ka pangpar chauh chu a lo zuah ngauh a, a thangduang bawk a, a lo lian tawh hle.

Thawnthu ziak ang deuhin han thlawh kan duai ila, :) Hun a lo kal zel a, ka pangpar ni ngeia ka hriat chuan a nihna tak a rawn lanpui ta, mizoten Lakher Anthur kan tih lek hi a lo ni a... A par a, a rah ta teuh mai a, a nuihzatthlak vak loh kher mai.

Zawlnei Isaia ziakah khan grep suak chungchang kan hmu a, a huan neitupa chuan a grep huan a sam fai a, uluk taka a enkawl hnu-ah grep suak a ni tih a hmuchhuak chu a thinrim ve teng teng khawp a, a suat vek a, a hling palte chu la bo-in a lung palte chu a tichim vek a ni tih kan hmuh kha maw.. kei chauh hi tisual ka ni bik lo e. (Isaia 5:1-7)

Kan hring nun erawh chu a dera nunna chi a ni hauh lo, piangthar, Pathian ringtu inti ve si a, a dera nunga, a changa rinawm a, a changa tlu leh thin kan nih chuan vawilehkhatah kan ring tih tih tliahin a awm ang a, tihdamna a awm tawh lo ang tiin Bible-in min hrilh. (Thufingte 29:1)

Zirlai, Sawrkar hnathawk, Sumdâwng, Pathian rawngbawltu kan ni emaw, kan hna chu eng pawh ni rawh se, kan tih apianga rinawm taka kan tih hi a pawimawh a, zirlaiin a dera a zir chuan a tawpah a hlawhtling ngai lo angin Rawngbawltu pawhin a der maia Lalpa rawng a bawl chuan ama lu chungah meiling a chhekkhawl mai a ni tih a inhriat a pawimawh.

A chang chuan keini ringtute pawh hi hetiang dinhmunah hian kan ding fo thin, kan nundan hi thup tum thin mah ila, lan chhuah hun a awm leh thin, Thima thiltih chu engah a lang chhuak tih ang khan, he leiah hian tuman min hre lo mah se, a Der maia nung thin kan nih chuan Pathian Lalthutphah hma-ah saruak leh inhawngsa-a kan din hunah meuh chuan zep theih ni dawn hek lo le, a rahah a lang mai dawn a ni. Chuvangin zawlnei Jeremia sawi angin kan nun hi fimkhurpui hle teh ang u, miten kan rah an hmu zel dawn si a.

In awih zawng a ni em???

2010-05-07T05:52:00.000-07:00

Betty tih tur hre lo chu dating dot com tihah chuan a in register vel mai mai a, kum 18 a tlin lohna chu thla thum emaw lek chauh a nih tawh avangin kum 18 angin a inziak nghe nghe, chu chu 2000 kum kha a ni.

Chu site-ah chuan nula tlangval, thian zawngte, chhas zawngte an kat nuk a, chung zingah chuan Carl pawh a awm ve a, ani chu Colombia-ah rau rau chuan a hausa pawl an ni a, mi hausa-te zinga khawsa thang a niin, a nu leh pa-te chu Australia-ah sumdawnna eng emaw thawkin an awm reng a, ani pawh Australia-a piang a niin hun engemaw chen an awm hnu-in Colombia-ah an rawn let leh a ni.

Chu site atang chuan Betty chu chharin a be tan a, an thlalak an dah loh ve ve avangin eng hmel nge an put an inhretawn lo, nitin an inbia a, an inhrechiang telh telh a, an inbiakna atang chuan an inngaina chho tan ta tlat mai, hmel inhmuh hial an duh ta a, Carl chuan an veng lama kal turin Betty chu a sawm a, ani pawhin a lo hnar bik lo.

Mahse Betty Nu chuan chutia net atanga a hriat ringawt tlangval hmu tura mi hausa veng lama kal chhuak turin a fanu chu a phal awzawng lo, “Nangman helama lokal turin sawm zawk rawh” tiin a fanu chu a hrilh a, anni chu mi rethei veng lama cheng an ni a, Betty pawh chuan an veng lama kal zawk mai turin a ngen a, Train station-ah a lo nghak dawn a ni.

Hun tiam a lo thleng a, phur tak, hreh ru deuh si chuan nalh taka incheiin a thianpa hmu tur chuan station chu a pan ta a, a rilru chuan Hmelchhe deuh hi a lo ni mai anga-h tih a ngaihtuah tel bawk. Train a lo thleng a, nu lian a nih loh avangin mipui tam tak karah chuan a dak arh arh a, nakinah chuan Tlangval lian tak, sam sei deuh, tarmit lian tak bun hi a rawn phei ta thung thung mai a, Aw Lalpa, saw chu ni lul suh se.. a ti rilru, mahse a mi nghah ngei chu a ni tlat si, “Hello, Carl ka nia, Betty I ni em?” tih chu a hre chawpchilh nghal, a ni pawh chuan ban deuh chat-a chibaiin “Betty” chu a ti ve ta hram a, khawlaia din reng thu awm hek suh le, khawilai dawr emaw-ah chuan a hruai lut ve ta poh a.

An luhna dawrah chuan engemaw in tur an han lam a, Carl chuan beer a han lam a, duh ang zawng chu dawr lian leh changkang-a an zawrh thin ang hlir a nih avangin a lam apiang chu chu dawrah chuan an nei lo zel mai si a, tui bottle a dil ta ngawt a, chu pawh an lo nei lo, Tui, a bottle-in an nei ngai lo, Tap atanga an herh haw chu a ni mai, tih ngaihna a awm lo, dawr dang, tlema changkang zawkah chuan an insawn ta ngawt a. chutah chuan mumal deuhin an ti ti thei ta.

Thil chi hrang hrang an sawi-in an inkawm a, rin ai takin Betty pawh chuan nuam a ti ta viau a, a rilru-a a chak reng thin Australia-a kal a chak thin thu-te chu a hrilh ta siam siam a, chutih lai chuan Carl chu Australia atanga rawn haw hlim hlawl a ni tih a hre hauh lo, Carl pawh chuan a sawi duh chuang lo a, ngawi rengin a lo ngaithla a, Betty chuan, “Ka rilru-a ka chak ber thin chu Australia-a kal a, chuta hnathawh chu a ni” a tih pawhin “Engatinge Australia ber kher, Sap tawng an hmang a, I thiam der si lo, engatinge Spanish hmang dang, Spain-ah emaw South America ram dangah kal I duh zawk loh?” tiin a zawt a, ani chuan “Aih, Australia kal alawm ka chak chu, tawngte chu ka zir mai ang chu” a ti ve tlat a, ani chuan a hnial thui chuang lo, tiang chuan an inhmuh hmasak ber chu an tlingtla a, nuam an ti fu.

A hnu thla thum chhung chu an lengchhuakin an inkawp ta chawt a, thla thum hnu-ah chuan Betty chuan phone call a dawng ta, Carl chuan, “Ka nu leh pa-ten Australia kir leh an rawt a, kei pawh ka kal a ngai dawn a ni” a ti chu Betty tan chuan hun hrehawm tak a ni ngei mai, Australia chu kal chak hle mah se a tan a remchang ve rih si lo. Carl chuan, “Ka kal phawt ang a, thla thum vel hnu-ah ka rawn let leh ang a, nang pawh I lokal ve dawn nia” a ti, ani chuan “Thla thum tiam suh, thla ruk hnu-ah bak I lo let lo ang” a lo ti ve ngawt.

Carl chu a kal ta a, nitin net hmangin an inbe reng a, a ngaih pawh an inngai khawp mai. Thla thum chu thla rukah a insawn a, thla ruk atangin kum hial a vei ta mai, Carl chu a rawn let mai thei lo, kum khat hnu-ah a rawn let ta chauh a ni. Chutih chhung chuan Betty pawh chu University kalin sap tawngte a zir bawk a, a zirna man chu Carl hian a pe vek a ni.

Australia atangin zungbun a rawn thawn a, chu chu inhualna zungbun a ni nghal mai, an dinhmunin a zir loh avangin inhualna mumal pawh siam lo-in chu zungbun chu a bun ta a. Betty tan Australia kal a harsa, Visa neih a awlai lo hle mai si a, a tih ngaihna a vang khawp mai, Kum khat hnu-a Carl a rawn haw chuan kawng khat kan tih theih a awm a, Fiancé angin rawn lut mai rawh, kan innei dawn nia a ti ta, tichuan nupui hual angin visa pawh an dil ta a, December 2001-a kal turin an in ruahman a, Carl chu a haw leh ta phawt a, Australia-ah Betty awmna tur In a lei a, Car nen, a mamawh tur engkim ngaihtuahin a lo buai em em mai.

Hetih lai hian Betty Nute-I, US-a awm, kum 2 emaw lai a hmuh tawh loh chuan an hnena Christmas hman a tum thu a rawn sawi leh ta thut a, Betty tan a nutei lokal laia hmun danga chhuahsan daih chu thil tih chi a ni ta tlat lo, Australia kal hun chu a pawtsei ta ngawt a, kum thar veleha kal turin hun chu a pawtsei a.

Chutiang chuan eng eng emaw avanga rokhawlhna neuh neuh neiin 2002 March-ah a kal thei ta chauh a, hetih chhung hian Carl pawhin dawhthei takin a lo nghak a, a dik tak chuan March thla-a kal tura a intiam chu bawhchhe leh na se chuan “Awle, a tha alawm, lo kal lo mai rawh, Thu a tawp e” tih mai a tum tawh a ni a, March thla-a a kal thei chu a tihzia hle a ni.

Betty, mahni-a hriat ngai loh ram Australia-a a kal chu a zam rilru ve hle, mahse rin ai takin tawng thu-ah pawh harsatna a nei lo. Airport-ah pawh an thusawi chu a hrethiam ve zel, a mah te te chuan, “Chhe hei, an tawng hi ka hre ve zel mai, ka thiam ve tho a nih hi”tiin a ngaihtuah neuh neuh thin. Australia-ah chuan nun bul chu a han tan ve ta poh a, thian a nei lo a, Carl chu a chhungte nen an awm a, thiante pawh a nei a, Betty erawh chu amah maiin a ni, a chang chuan a khawhar thei khawp mai, thla thum a awm hnu-ah hna chhete, dawrah inhlawhna a hmu a, chutah chuan Sap tawng pawh a thiam nal lehzual ta a.

A visa chu fiancé visa a nih avangin thla sarih hun a nei a, chuta a pasal hual nen an inneih loh chuan an ram lama haw leh a ngai dawn a ni, chuvangin hmanhmawh takin September 2002 chuan inneihna chu an buatsaih ta chung chung a, a chenna hmun buatsaih nana sum an sen nasat avangin inneihna ropui buatsaih thei an ni lo tih an hria a, thian pawh an sawm lo. Innei turte leh an thiante ve ve, Inneihtirtu, Carl nu leh Pa, Betty Nu, Carl Boss, Betty thawhpuinu leh a thianpa pakhat Saxophone tumtu leh piono tumtute te chu inneih hriatpuitute an ni mai. An vaiin 12 chiah an ni.

Betty chu University-a Advertising graduate a ni, chumi zulzui chuan company eng eng-ah emaw a thawk kual thin a, mahse atui tak tak thei lo, “Hei hi ka duh tak a la ni lo”t iin engemaw tak tih tur nei niin a inhre fo a, office-a thut a, miin Hei hi ti rawh an tih nghah ngawt chu a ning em em a, Website a enkual a, hnaruak a ngaihven reng thin.

Ni khat chu Salvation Army Website-ah hna ruak dil theih a hmu a, Hei ngei hi a nih hi ka zawn chu tiin a Resume a theh lut nghal a, ina a haw chu a pasal hnenah He hna hi ka hmu dawn a ni, hei hi ka thawh duh chu a ni a ti ringawt mai. A tih ang tak chuan a dilna chu an hmu a, an rawn ko ta a, interview a kaltlang a, chu hna chu Salvation Army International Development Office-ah 2009 atangin a thawk ta a ni.

Kumin hi an inneih kum 8-na tur ani tawh. An hlim khawp mai.

(internet atanga in chhar, innei hial ka hre tam lem lo, in awih zawng a ni em??? An phalna la-in he mite love story hi ka ziak a ni, an hming erawh ka ti danglam..)

Hun danglam tawh lohna-ah..???

2010-04-27T00:30:00.000-07:00

Hmanni tlai chu tlemin ka bang har hret a, dar 4:30pm velah hian ka thian pakhat Canada ami-in yahoo-ah min rawn bia a, "E khai, i awm lai ka nang ve teh khiah a, a va lawmawm ve,"a rawn ti, Canada-ah chuan dar 9:30am chauh a lo la ni a!!

Chutih laiin Australia lama ka thiannu chu zing hna kan tan chauh hian ka mu dawn tawh a rawn ti ve hem zel mai bawk a, a chang chuan ka chhungte hian zing dar 4am velah min rawn ti harh fo, keini lamah zing dar 4 chauh la ni mah se India-ah chuan Dar 7:30am a ni vung tawh tlat a, an rilru lamah ka tana a la hma zia an ngaihtuah hman thin lo, an rilru-a a thawh ang ang hian zu che hlawm thin a!!! aw khawvel hi chu a, Pathian teh reng pawh hi, hun in ang lo lutuk-a a siam reng reng ni te ka han ti leh lailawk bawk thin.

Kan pi pute kha an ngaihdan a mak ve khawp a, tihian an sawi thin a ni awm e, "Kan lei hi a zau khawp a, Van pawhin a khuh zo lo a, a khuh bak chu a hmuar uar mai a ni" an ti thin.

Kan lei hi a mum a ni tih hi scientist ten hmuchhuak kher mah suh se, kan khawvel hun inher vel dan hrethiam tan chuan a tawngpawng phek ngawt lo ang tih chu a rin theih ve deuh a, sikul kal laiin Geography kan zir a, Tropic of Cancer, Tropic of Capricorn tihte leh hun inher dan hrang hrangte kan zir thin a, kan lei hi a mum a ni a, keinin chhun kan hman laiin khawvel lehlam ami te chuan zan an hmang mek a ni tihte kan zir a, chuti chu hetia lehkha kan zir laite hian thenkhat chu an la hnar bur bur dawn a ni maw, kan ti thin a nih kha... chuti chung chuan he kan hun in ang lo hian kan nunah eng teh chiam nghawng a neih kan hre ngai lo.

Tlai lamah ni a tla a, a tuk zingah a lo chhuak leh mai thin. Thuhriltu chuan "Ni hnuaia thil awm te hi engmah lo mai a ni, Ni chu a chhuak a, a tla leh a, a chhuahna tur lam hawiin a hmanhmawh thin" a ti, chutiang chuan nitin mai hian a her mup mup reng a nih hi. Amah Pu PS Dahrawka thu khawchang ang deuhin Nu pahnih hi an lo ti ti a, a tia lawm, pakhat chuan, "Ni khi vanlaizawlah darkar khat ding ta tlat se, khaw thim hma-in kâwl a ban hman angem?" a ti, a thiannu chuan, "I ti duh e a, nilenga chawl lova a kal pawhin a thim lut ziah alawm" tiin a chhang. Ni zawk hi kal turah kan ngai reng mai thin kha a ni a.

Mithiamten kan lei hian Ni a hel zawk ani an tih hnu pawhin keini ang duang chuan Mah reng reng se, ni khi a kal tlat a ni" kan la ti fan thin zu nia. Kan lei hi a vir miau avangin a thenin ni kan hmuh laiin a thenin an hmu ta lo a lo ni a, a mak zozai ngawt mai, Pathian thil siam dan hi. Heng hian khawvel ram hrang hranga kan sana hman pawh a ti in ang thei lo ta ni awm a nia.

Kan training laia kan hun hman dan kha - Zing dar 5:30-ah Chapel-ah kan tawngtai a, kan haw, quite time kan hmang leh a, lehkha kan zir a, chuan hna kan thawk a, class kan kal a, chhun kan chawl a, zanriah dar 4pm-ah kan ei a, zan dar 9-ah vesper (tawngtai) kan nei leh a, kan mu ta thin a. A fur a thal-in chu chu kan hun hman dan reng a ni. Thlasik lai chuan zing thawh a har thei khawp a, dar 6-ah pawh khua a la en that loh laiin dar 5:30-a tawngtai tura kal chu khawvawt nen a inrem loh dan chu sawi kher loh pawhin a hriat, chutih laiin nipui laia tlai dar 4-a zanriah ei chu zanah ril a tam leh hman ngei ngei bawk. Kan hotute hnenah kan zualko, "Kan hun hman dan hi nipui leh thlasik timing nei hrang ila" kan ti chu eng dangin min chhang lo, "Hei hi kan hman dan reng a ni a, a changin a hma ang a, a changin a tlai ang a, a changin a tawk chiah ang, thlak kher a ngai lo," an ti a, an duhtawk der.

Africa mite hi hun vawng dik lo tak an ni hlawm - ka hriat ve chinah - chuvangin thil tih reng reng, a minute mai ni lo, a darkar kar hian kan tlai ruih ruih zel mai a, a buaithlak thei, dar 10-a tan kan duh chuan dar 9 tan hun ti-a puan a ngai, tichuan dar 10-ah kan tan thei vel chiah chiah. Anni chuan African Time an ti mai, insiam that emaw, hun vawn dik emaw an tum ngai chuang lem lo, hei hi ka awmna Mozambique chauh lo-ah pawh thleng fo a ni awm e. Anni hi chu Time Zone tih vel chuan tihbuai a hnehin an neih sa pawh an la hmang dik lo a nih hmel khawp mai.

Tun hnaiah NE India ten Time zone hran kan mamawh a ni tih thu inhnialna ti tam tak mai tlangaupui a ni a, a ngaihtuahtu te chuan hun rei tak ngaihtuahin an chhut nasa thin viau ang tih a hriat a, NE hian hun hran kan mamawhna chhan point tam tak an ziak del dul thei tlat a ni.

Keia lungmawl lo ngaihtuah ve mai mai danah chuan, kan sana chu darkar engzat pawhin herh danglam mah ila, a hmangtu Mipuite hi mi tladah, zawmthaw leh thatchhia kan nih chhung chuan kawngro a su tak tak dawn em ni? Mi hlawhtling kan tihte chu thawk nasa te hi a ni tih zirna sikul kan kai tan tirh atangin a hretu te kan ni si a.

Kan office kai dan te reng hi han in en ila, zing dar 9-a office tan tur a nih laiin thenkhat chuan hmanhmawhna rilru nei miah lo-in dar 10-ah kan thleng a, thlen veleh kuhva hmawmin thingpui sen hang kan lam phawt thin em kha? Ka u-in "Vawi khat chu kan MR pakhat hi a rawn tlai lutuk a, 'I night dawn elaw' ka lo ti a, a zak khawp a, ka inthiam lo leh hnuhnawh hle" a ti. Chutia tlai taka thlen hnu-ah kan han insingsa fel a, dar 11 a ri tep tawh, hna tlem kan thawk a, chhun thingpui In a hun leh nghal mai, thingpui in zawh chuan a lo chawhnu leh ruih tawh a, hna tam a thawh hman tawh loh, dar 4:30pm-a ban tur pawh ni raw sek sek, dar 4pm-a chhuah hman talh tum pawlte kan awm zel. Chutih a hnu hmanah kal chhuahna tur hi kan han hre thei khawp a, thenawmte lah hi an thi thei em em bawk si (ka sawi sual chuan Lalpan min ngaisam se) Ka u bawk hian a tia lawm, an thawktu pakhat hi "Kan thenawm chumi khami chu a thi a" tiin chawlh hi a dil sek mai a, an Pu ber kha vai a ni bawk si a, a hrethiam ta mang lo, "In thenawmte chu dam alawi pawh an awm tawh lo ang a..!!!" a ti e, a ti.

Chutah mi inneih lawmpui kan duh eng eng emaw tih tur hi a tam em em mai thin a, kan hun neihsa tlemte hi kan hmang khawlo nasa thin hle. Hei hian hna pending nasa tak min neihtir a, kan thawh tur thawk zo hman lo-in kan chhehvel state dangte hnungah zawng hnuhnung ang luap luapin hmanhmawh takin kan tlan reng mai dawn a ni. Hetianga kan awm reng chuan tun atanga kum 10 a vei leh meuh chuan, kan chhehvel ami-te hian min tlansan ang a, "Hnungah kawl êk a thai" min tih khum mai ang tih a hlauhawm khawp mai. Kan sana hi eng ang pawhin herh danglam rawh i, a hmangtu mihring hi a pawimawh zawk kan ni si a.

Hawh u, kan sana chu herh danglam pawh ni ila, kan nundan pawh hi i herh danglam ngam ang u, Sawrkar hnathawktu chuan rinawm takin a hna thawk mai sela, thawh hun darkar bithliah dik takah thawk mai thin ila, Zirlai chuan a zirlai taima takin zir sela, thuhriltu chuan dik takin hril mai rawh se. Tichuan, kan ram pawh hian a thatpui zawk ngei ang.

He khawvela kan hunte hi chu a danglam thin a, a in ang lo thluah mai bawk a nih hi, thihna lui ral kai hun chuan hun a danglam tawh lo ang a, Beramno Ni ang-in a eng reng ang kan tih thin kha maw, chu hun chu a nghahhlelhawm hle thin mai. Hun danglam tawh lohna-ah chuan khawi-ah nge kan awm ang le..????

Aw hun, aw hun, chatuan khawvarna chu
Chatuan, chatuan aw hun danglam tawh lohna chu
Aw ka thlarau, tah chuan khawiah nge i awm ang?

I haihawt em?

2010-04-19T04:29:00.000-07:00

Bru (tuikuk) ho thufing chu, “Haihawt chu vawihnih kal chiah a ni,” tih leh “I theihnghilh tur chu keng nghal rawh” tih hi an ti.

Mi thenkhat thil hre thei riau leh, hre rei thei tak hi an awm. Hmeichhia hi a bikin kan haihawt viau bik nge mawni ka ti thin, khawilo han kal dawn ila, in atanga chhuah hnu hian vawi khat tal hi let leh a ngai thin a, a chang chuan kei pawh han let at at chang ka nei thin, vanneihthlak takin a chang erawh a zing lem lo. Nu-ho chhuak pawh hian pawn atangin an fate an au let leh fo. Hei hi enge a chhan niang, hmeichhia hian mipa-in an mamawh lem loh thil te tham te te kan mamawh thin vang leh ngaihtuah kan ngah deuh zawk vang a ni thei angem?

Vawi khat chu Cashier hian thil tih tur pawimawh tak mai hi a theihnghilh a, kan Hotupa chuan, “Finance Department tih vanga kan han haihawt bik em em mai hi enge maw a awmzia le?” A ti a, “A.. mi pawh an haihawt ve tho alawm, keini chu kan hna hi a pawimawh a, kan haihawt a langsar mai mai alawm”tiin ka lo chhang a, “Nang lah hi thil hi Logic deuh deuhin I sawi a” te chu a ti ta mai mai a.

Thil kan theihnghilh tlat mai thin leh mamawh hun taka thluak a han chawl ta tlat mai thin hi eng vang nge maw ni le? Thenkhat chuan kan thil ngaih pawimawh loh hi kan theihnghilh mai mai alawm an ti thin, mahse a dik ber dawn em mawni le, kan ngaih pawimawh em em Chabi bawrte kan theihnghilh tlat thin si a….!!

Thil engemaw vei leh ngaihtuah bik riau kan neih hian thil dang theihnghilh hi a awlsam bik a ni awm mange ka ti ta, a scientific taka hrilhfiahna pawh a awm mai thei a, chulam chu mithiam te kutah dah ila. Engpawhnise, kan ngaih pawimawh leh theihnghilh kan hlauh chu ti hmasa zung zung mai ila a finthlak maiin ka hre ta.

Ka note bu-ah hian Things to do ziah duat ka ching, ka keu let dun dun fo, theihnghilh tur pawh ka hrechhuak leh nge nge thin. Mihringte hi chu heti mai mai hi kan ni, kan hriatrengna aiin hriatrenglohna te hi a tha zawk fo thin si a.

Kan Pathian erawh chuan engtiklai mahin min theihnghilh lo a, min awmpui rengin, kan chak lohna zawng zawng min hriatpui bakah kan hun lo la awm tur thlengin a vawng vek a, Nu-in a fa theihnghilh mah sela, kan Pathian erawh chuan engtikah mah min theihnghilh lo ang.

I Pe nge I La???

2010-03-31T03:46:00.000-07:00

PEK tih lam hi tunlai chu ka rilru-ah a la riak laklawh tlat, ka'n sawi chhunzawm leh law law teh ang, Thir chu a lin laia den tur an tih kha maw..

Hmanlai-a kan officer hmasa-te hlawh la kha a buaithlak awm thin ngawt asin, an awmna Corps-in Headquarters-ah pawisa ba an neih chuan an hlawhah an deduct sak thin a, cash counterah hian an awm rei thei, an hlawh han la te pawh kha "I pe nge i la..?" an ti fiamthu thin a ni awm e.

Chaltlang Ruam Veng kan awm laiin kan thenawm nu pakhat, upa ve lam tawh thil hre thei zet mai, sawi liam puat puat mai thin hi a awm a, tarte e ti lo khan Nula Tlangval in ngaizawngte hi a hre thei em em mai a, thlalai duh zawng, an ti ti leh an nundan te, Drug Addict te, an chhungkaw khawsak phungte hi a lo hre teuh thin a, mak kan ti thei khawp a, Engtinnge thil hi heti em ema a hriat le, kan ti a, kan thiannu pakhat chuan “A thawnchhuah zat a la lut a nih hi”a ti et a, a sawi awmzia chu amah pawh a tawng duhin zawhna a zawt hnem a, a sawi hnem bawk a, a bulah pawh miin thil an sawi hnem a, thil a lo hre thei em em hi a lo ni a.

Computer hmang kan tam ang bawkin Internet hmelhriat leh hmang pawh kan tam a, thiam lutuk loh pawha tih ve nawk nawk theih dan a lo awm zel bawk a, a sakechek keini ang duang pawhin kan luh chilh ve nasa ta hle a, luhchilh thuk poh leh a dang hriat chakna min pe a, ni danga kan hmelhriat ngai loh leh hmel pawh kan hmuh ngai miah lohte nen inhriat theihna rem chang min siam sak a, mahni-a awmte tan hlei hlei hian a lo tangkaiin khawhar te pawh nasa takin a hnem a, a tangkai ngei mai. Heti zawng hian ka ngaihtuah a, he internet khawvelah pawh hian thian kan duh anih chuan keimahni ngei pawh inpek a ngai a ni tih a lang chiang hle.

Mi tam takin Blog te siamin kan rilrua thu awmte kan han ziakin kan han tarlang a, thiante leh hmelhriat lem lohte pawhin tha an lo tih ve zawng anih chuan comment te pein min lo chhiar sak ve a, hei hian rilru a ti hlimin phurna nasa tak min pe a, ziah zel chaknate, mahni inrintawkna thlengin thiante fuih na azarah kan lo nei ve thei a, hei hi hmasawnna ropui tak keima tan phei chuan a ni ngei mai.

Hetih lai hian miin ka blog rawn lut se, ka thuziah te rawn chhiar ve se ka duh a nih chuan midang blog-ah te pawh ka len luh taimak a, an thuziahte ka comment sak leh ka hlutsak te a pawimawh em em a ni tih ka hmuchhuak zel a, hei hian thawnchhuah zat lakluh tih hi min ti hrechhuak a, kan Pathian thu-in “Pek chhuah chu pun lehzualna ani”a lo ti ang hian, kan chet chhuah hnem poh leh a let leh a tam mai thin a lo ni.

Tui tling reng chu a thianghlim thei lo ang hian luang chhuak tur kan lo ni a, Pathian kan rinna kawngah pawh hian che chhuak a, mite tana thawk tur kan lo ni e, mahni awm hmuna awm mai lo-in hmun hla leh khawhar zawkah te kal a, mamawhtute tana thawk chhuak tu nih hi a pawimawhin kan mawhphurhna liau liau a lo ni. Kan thawh theih leh tih theih erawh a in ang vek lo tih chu hriat sa a ni a, kan kalna hmun pawh a in ang vek thei lo, amaherawh chu kan tih theih zawn theuhah rinawm taka thawk zel tur kan lo ni e. “Miin a theh apiang chumi vek chu a seng dawn si a” Galatia 6:7b

Taksa Khawnvar..

2010-03-23T05:41:00.000-07:00

Taksa bung hrang hrangah hian enge pawimawh ber ang ti ta ila, sawi bik tur a vang hle mai. An pawimawh dan a inang vekin tangkai tak an ni vek hlawm bawk a. Hetihlai hian kan taksa pum kan chet vel nana tangkai bik tak mai chu kan khawhmuhna mit hi a ni, hei vang hi ni maw Taksa khawnvar an lo tih hial ni.

Ka naupan lai chuan Pathian zarah ka mit hi a chakin a tha khawp mai thin a, lehkhabu te hi mu chungin ka chhiar mai mai thin a, naupang a thuchang tarmit han vuahte hi ka chak thei khawp mai. Ka Pa hian I mit hi dim rawh, mu chungin lehkha chhiar suh min ti fo thin. Kan training laiin vawi khat chu thian dangte mit entir pahin ka inentir ve a, tarmit vuah ka chak deuh bawk nen. Doctorin an han check chu, chhiar tur an tih zawng zawng kha ka chhiar thei vek a!!!! Tarmit chu min chawh lo chiang asin, I mit hrui a chak vak lo anih hi tiin vitamin mum sen til tel hi min chawh a, ka ei zo peih lo leh nghal. Hun engemaw atang khan Office lamah te Computer kan lo hman nasat tak avangin ka mit chu a chiangkuang ta lo hle mai a, ka lu-te a na ngut ngut thin a, Doctor chu ka rawn leh ta ngei a, kar lo-ah ka tarmit power chu -1.5 a lo ni ta mai a, tarmit vuah a'n ngai chiah chu ka ning leh hle si.

High School kan kal lai khan zirlaibu-ah mitdel khaw chanchin kan zir thin. Bagota khua chu mitdel hlir an awm a, an tawngah HMU tih thumal hi an nei lo, a chhan chu khua an hmuh theih loh miau avangin, chuvangin chu tawngkam chu an nei lo mai a ni. Hmu chu enge a nih pawh an hre lo. He ramah hian pa pakhat chu engemaw tihpalh thil thu-in a thleng hlawl mai a, mite chuan an rawn dap huai huai mai a, ani chuan Ka hmu thei a ti ringawt a, enge hmu chu? An lo ti let hu mai. Tichuan, hmu chu hrilhfiah a'n tum ta a, mahse an pian tirh ata leh an nun hrim hrimah engmah an hmuh ngai loh avangin hrilhfiah an har hle a ni.

He kan mit ber hi khaw hmu thei lo-in awm ta ila eng ang fakau a hrehawm nge tih hi I ngaihtuah ngai em? Thenkhat chu mitdel sa-in an piang a, chungte chu mi vanduai, rualbanlo, mi khawngaihthlak kan ti thin. Nimahsela heng tisa mitdel te hi Pathian hretu an nih chuan mit var aia nun hlim tak an awm thei. Keini tisa mit tha pangai pu-te hi thlarau lam mitdel reng mai kan awm em le..

Mizo-te pawh hi tun hma chuan Pathian hre lo hnam kan ni a, thlarau lam mitdel vekin kan piang a. Tichuan,Sap ram atanga missionary-te zarah kan thlarau lam mit chu tihvarin a awm ta a. Vawiin thleng hian mizote chu kristian tia chhal ngam kan ni ta a ni. Nimahsela, hei hian kan thlarau nun hi a chhandam tak meuh em. Kan pi leh pu-te kristian an lo nih avang khan keini hi kristian ti-a sawi chu kan ni ngei mai, hei hian thlarau chhandamna famkim min pe vek em? Mahni theuh in ngaihtuah a ngai.

Isua khan Khawvel Eng in ni e.. a ti a, Engtinnge chu chu kan nih theih. Tin, Johana chuan Eng tak mitin ti eng thin kha a awm a, khawvelah a lo kal mek a ni.. tiin Isua chanchin a sawi a. Isua chu khawvel eng a ni a, chu Isua chu kan nunah kan neih chuan Isua chu kan enna a lo ni ang a, eng kan neih phawt chuan khawvel eng kan lo ni thei dawn a nih chu. Tichuan, Isua vekin In eng chu mi mit hmuhin eng rawh se a ti leh bawk a. Chu kan Eng Isua chu mite hmuh theih tura nunpui tur kan lo ni a nih chu.

Mit ber a thim chuan khawvel pawh a thim vek thin. I nuna Isua, Êng pawimawh tak I neih loh chuan I nun pum chu thim chhah mupin a tuam reng tihna a ni ang a, I tisa mit chu eng ang pawhin meng zau-in meng fiah mah la, mitdel I ni tho tho a nih chu. Thlarau lam mitdel nun chu a va hrehawm dawn tehlul em..!!!!

Inkhel ila...

2010-03-11T02:39:00.000-08:00

Kan naupan lai chuan inkhelh hi kan han hrat ve khawp a - football a ni ngei a, a chang chuan a bladder a keh a, kan pet thawp sut sut thin - khup paw hrutin chawlhni tlaiah ngei kan inkhel a, ball boot te nei hek lo i le, a chang phei chuan ke zungpui pem nen nuan, khup pilh hret hrutin thim thut thut-ah bâl takin chhungte chaw ei lai ngeiin, Ui ei ru ang zul zul-in In-ah kan lut thin a nih kha maw..

Chuti taka inkhelh hrat e ti lo chuan inkhelh thiam vangin India ram-ah a hmingthang hle ti-a sawi tur erawh chuan vawi khat mah ka tel chuang lo, vawi khat erawh chu Chaltlang Hockey Club hmingin Tu emawni memorial-a Champion Team-ah kha chuan ka tel ve zeuh tak e, tin, College kal laiin ka inkhel nual bawk, vanneih asiamin Champion team-ah tel thei phian zel.

Tun hnu-ah erawh inkhelh chu sawi loh exer’ lak tak ngial pawh peih tawh bau lo, a en lamah ka ram tang ta thung a ni ber ang chu. Hetia English Premier League tihte, Champions League tih leh World Cup, European Cup tih vel en kan han hrat chhoh hnu hian khel lo-in ka en ve ziah a, a phuk aphak erawh ka hre lo-in ka luhchilh thuk teh chiam lem hlei lo.

Club hrang hrang-ah hian ka hriat theih tirh atangin Arsenal hi ka’n tan ve ngawt a, an bul bal erawh ka hre lo nasa, ka ngaihven em em lo bawk, ka lo tan ve ringawt thin, an Boss Arsen Wenger vang pawh hi a ni mai thei a ni. Vawi khat pawh Arsenal Jersey ha-in ka chhuak a, tlai thim dawn tawha ka haw chu mi pakhat nen kan intawk a, ani chuan hnai set sawta min en pahin “Nimin-ah kan hneh che u” a rawn ti ngawt pek a, a hma ni khan Manchester United-in Arsenal an hneh a lo ni a, ani pawh kha a tang thin awm tiah tiah ngawt mai.

Vawiin chu ka damsam mang loh vangin office ka thulh a, TV report ka en mai mai a, Champion’s League-a Arsenal-in FC Porto 5-0 a an sawpna report an lo chhuah mek pek a, an va hneh tiah tiah ve ka ti a, ka club te an ni bawk a, ka lo lawm ve leh viau a.

Inkhelh hi a mak ve ngawt mai, mahnin khelh hi chuan kan khel tha viau ni hian kan inhria a, midang khel en erawh hi chuan, “Awi, khi nawi nawi khi, a che thei thlawt lo a nih khi, ngatinge an thlak loh le..” ti hian kan lo phun kan lo phun ve ngawt thin. A kotlang-a awm hi kan thiam zaw ber thin awm asin.

Kan hringnun hi he inkhelh ang hi niin ka hre thin. Khawvelah hian Pathianin chhan neiin min dah a, Goal pahnih kan nei a, chutah chuan min khalh goal tumin nitin mai hian tha leh chhia chu keimahni-ah a inbuan thial thial reng a, kan Referee lah hi a ham strict nasa mai si a, tlema pen hlek pawhin a rawn ri fiak thak mai thin a nih hi.

Thenkhat chuan yellow card pawh kan hringnunah hian kan lo hmu nual tawhin a rinawm. Tha ni-a lang, mite hmuha mawi taka lang pawh hi chhungril tuiek tlat a awm theih a, Sawrkara hnathawka, hlemhletna leh eirukna tinreng zak kep chungin hlim takin chawlhni-ah Bible zak zehin kan chhuak leh thun thun a, sual tlenfaina hmangaih tui kan tana luanna chu kan zawng a, chawlhkar tluana kan tihsual chu Chawlhni vawi khata sukfai tumin kan hman hlel a, a fai mawh khawp ang.

Kristian Nula tlangval te chuan sual langsar lo tak puanhnuai chungin chhun engah tumah zah lo-in kan leng za dial dial a, nulat tlangval hlimhlawp leh nawmsip bawlna chu hnawl phal chuang si lo-in Kohhranah a kul ataiin kan inhmang a, hei vang hi a ni ngei ang thalai zingah Kohhranin Dan thianghlim a tih anga innei an khat theih em ni..

Infiammi ni lem lo pawh he kan khelmual zau pui maiah hian kan inkhel nuai nuai chu a nih ber hi, tu emaw chuan a ti fuh ang a, ti fuh lo fe fe pawh kan awm ngei ang, chuvangin a tlai hma hian fimkhur tak leh fel fai tak hian i inkhel teh ang u, kan khelh nalh loh viau chuan kan Pathian hian Red Card pe-in min hnawtchhuak hlauh dah ang e...

Tawngtaipui ngai..

2010-03-03T23:44:00.000-08:00

Nizan chu ka mu chiah tihin ka phone a rawn ri a, ka han en chu ka thenawmnu a lo ni a, tap deuh tuau chungin "Capt. Come to my house" a rawn ti tawng a, sana ka en a, dar 10pm a ri chiah...

Ka thenawmnu Regina chanchin hi ka post hmasa lamah pawh ka sawi tawh. A fanu Irene (tunah kum 11) hi kum 5 vel a nih tang khan Thin natna khirh deuh mai an hmu chhuak a, a thaw te a hah a, an buaipui em em thin. Mozambique-ah an enkawl a, Hmanrua an neih that loh avangin Brazil emaw France emaw-a kal turin an râwn a, sum an neih loh vangin an ti puitling thei si lo, a natna hi tihdam theih loh hial niin an sawi a, enkawl erawh chuan engemaw chen dam thei tura ngaih chu a ni.

Kan hotute hi Brazillian an ni a, anni puihna azarah nikum October thla khan Brazil an kal thei hlauh mai a, engemaw chen an enkawl hnu-ah March 16, 2010-a zai turin January thla khan hlim takin an lo haw a. Irene pawh a tha niin kan hria a, kan lawm hle.

Mahse kar hmasa atang khan a rawn chau ta deuh thut a, zirtawpni-a a nau nen an infiam lai chuan a tlu ta thut mai, damawiin an pan nghal a, amahah engmah puhmawh tur an zawng hmu lo, a lû na a ti em em a, a taksa a chau bawk, engmah a ei thei lo a, thut pawh a thu peih lo, a mu deuh ta chawrh chawrh mai a ni.

Tichuan, nimin (3.3.2010) khan damdawiin an panpui leh a, a chau hle a, a thawk a mumal lo hle bawk, Intensive care-ah la lutin oxygen pe-in an lo enkawl nghal a, a nu leh pa-te chu room-ah an lut ve thei lo a, pawna nghah chawrh chawrh ai chuan tiin zanah an rawn hawsan ta a ni.

Keini chuan an riahpui ringin an in lam kan va kal ta lo a, call kan tum lahin a tlang thei si lo, chutih laiin ani mangang chuan min rawn call ta tawp mai a lo ni.

Ka va kal chu amahin sitting roomah a lo thu a, a pasal Beira a lo inbual mek, "In rawn haw dawn lo turah kan ngai a, kan lokal lo a" ka ti a, a tawng thei lo, a bu nghat ringawt a, nutling meuh rawl chhuaha han tah chu, Ruang awm em si lo a inthiam lo ve deuh nge thutthlengah chuan vanvadakin a thu a, a mittui a tla zawih zawih reng mai, engmah a sawi thei lo, kei pawh chuan sawi tur ka van kher mai.

Beira inbual zo chu a lo phei a, kan ti ti thei ta nual, ani sap tawng a thiam si lo, an chanchin a han sawi pawh sa tah chhuak pek ang chauh mai hi ka tan chuan a ni a, amaherawh chu Pathian hi a tha khawp a, kan hriatthiam dan tawk tur zel chuan engtin tin emaw kan inbe ve zel thei a, atawpah chuan Pathian kuta nghah mai loh chu tih theih kan nei lo, aman engkim a hria a, i tawngtai leh phawt mai ang tiin ka tawngtai a, Regina pawh chu eng han sawi thei hek lo le, I tan chawlh hahdam a tha e, Irene a awm lo rau rau bawk a, mu hahdam rawh ka ti a, thuawih takin room lam chu a pan ve ta mai bawk a, tichuan ka tinsan ta a ni.

March 16-a zai tura inbuatsaih mek an ni a, ni 12 March-a Brazil lam pan tur an ni, Irene dinhmun a that loh viau chuan Doctor te chuan an zai ngam dawn lo a, tin, khualzin thei turin a taksa a tha tawk angem tih chu kan venthawn ber a ni bawk. Tun ang dinhmuna a awm reng chuan Brazil lam pan pawh a huphurhawm hle a ni.

Chuvangin tawngtaipui an ngai a, a nu Regina tak pawh hi a ngaihtuahawm khawp mai. Tawngtaina hian thil a ti thei a, Pathian kutah kan nghat tawp mai a ni, chhiartu zawng zawngte in fianrial tawngtaina-a lo hre ve turin ka han ngen che u a ni.

Chico...

2010-02-23T02:32:00.000-08:00

Tun tum chu mi pakhat chanchin ka'n hrilh mai mai teh ang che u, update loh ai-ah.

2008 kum tawp lam khan kan office bulah hian rawlthar pakhat hi a rawn tei a rawn tei thin a, chhungte a nei mumal chiah lo nge, khawlaiah a awm mai mai thin, khawlaiah a riak a, a hmuh theih theih a ei a, amah pawh a balin a rimchhe thin khawp mai. Mi thenkhat ei tur leina tur a dil a, a chang chuan an motorte a lo silfai sakin a inhlawh thin bawk. A hming chu Francisco a ni a, Chico tiin kan ko mai thin.

Chutiang a nih vang chuan kan office compound-ah duty a, motor-te sil a, kan mamawhna-a kan hman theih turin amah tanpui nan thla tin hlawh pe-in kan ruai ta a, amah pawh a phur khawp a, office sira room kaw khat chu a riah nan kan hman tir a, stove te a lei a, amahin rawng a in bawl a, nuam a ti vei phian.

A rimchhe lutuk mawlh hi kei chuan ka tuar thei lo. Mi tam takin intifai turin an hrilh thin a, nu leh pa enkawl loh, khawlaia tal mai mai a nih avangin thu tha hrilh a har ngei mai, a duh a chhuah chuan fai lutukin a lo inbual a, kamis leh kekawr nawh mar zaih ha-in necktie nen, pheikhawk fai tak nen a lo awm vei hlarh thin. A duh a chhuah loh chuan kawr tawp tak a ha a, a inbual duh lo a, a rim chhe kher thin mai. Kei ngei pawh hian "Chico zingah inbual la, fai takin in chei la, hei hi i inhnawih dawn nia" tiin Perfume (Roll on) te ka pe a, ni hnih khat chu a han ti ve a, a peih rei ngang lo hi a buaithlakna lai chu a ni thin. A hnu-ah "Engatinge i inbualloh, perfume te kha i hmang duh lo em ni" han ti ila, Zinga inbual chu chhunah hna kan thawk a, kan bal leh tho a, a sawt lo alawm a ti tlat a, sawi leh tur a vang thin.

Thla tin ni 15-ah kan hlawh lak rualin a hlawh kan pe ve ziah a, ni 16 tukah hi chuan Neck-tie nen, nalh tak, fai taka inthuamin Restaurant-ah Breakfast a ei thin.

Tumah han zahpah leh tih a nei lem lo hi a chang chuan a buaithlak a, a chang chuan kan hlimpui viau thin lawi.

Vawi khat chu Finance Council kan neih urhsun em em laiin kawngka a rawn kik dawt dawt a, a rawn lut hlawl a, kan Chief Secretary chu a rawn ko, "Major, Chave.." a rawn ti tawng a, CS chu a chhuak nghal vat ringawt. Ani, CS motor sil duhin a motor chabi a rawn dil a lo ni a.

Kan Hotu pa ber hian "Chico, vawiin chu ka motor lo sil rawh aw.." a ti a, ani chuan a thlek vang vang a, "Colonel, a balh loh hi, vawiin chu sil a ngai lo" a ti tlat a, Colonel pawh a nui ve tawp ringawt a, ni khat dang leh chu chhunah hmanhmawh thilah chhuah tumin a motor a zawng, Chicoa'n a lo sil phuan buah a, "Chico, chhuah ka duh asin"a ti, ani lah chuan, "Colonel, lo thu hahdam rawh, ka zo tep" tiin a lo zap, ani a hmanhmawh bawk si chu CS a in thlah tir ta tawp a ni awm e.

Vawi khat chu kan Choka-a Freezer-ah hian tui bottle hi a lo khat tuar mai a, "Hei tu dah nge.." tiin ka zawt a, "Chico" an ti a, "Enga tan em em nge hetiang tuite a tih a, lo zawt teh, a hralh em ni?" tiin kan thawktu pakhat ka hrilh. Ani chuan a lo zawt a, "Ka hralh lo, ka pe ringawt" a lo ti. Ama thu-in kan tui chu Fridge-a lo dah vawtin a lo sem ve hmiah hmiah mai a nih chu, "Electric bill te, tui bill-te hi kan chawi vek a, Sipai Pawlin tanpuina pe-a Tui kan semte anih loh chuan lo ti tawh suh se" tiin ka hrilh a, ani pawhin a tawp ve ta mai bawk.

A chang chuan zing office kan han thlengte hi tha lutukin min lo chiau-au a, ring deuh deuhin min lo ko a, a chang erawh chuan a lo tum buau a, han biak pawhin a teu deuh hlur thin.

Thenkhat chuan a rilru kim vak lo niin an sawi a, thenkhat erawh chuan In leh Lo pangngaia awm ngai lo, nu leh pa khuahkhirh loh leh thu tha dawng ngai lo a ni a, enkawl a harsa alawm an ti thin.

Kumin chu rilru dang a rawn pu ve a, School ka kal dawn a ti ta tlat mai a, a hlawh lak Advance min dil a, eng tur nge ka ti a, Admission tihna tur a ti. School chu a kal ta ngei aniang, chhuna a rawn haw hian Home Work ti turin a inchhawp hnawk thei hle.

Kan hnena a rawn awm tirh ngaihtuah chuan hma a sawn ta khawp mai, a hma aiin a fai a, ama thu pawhin a inbual thin, Chawlhni-ah a inkhawm thin-in Sipai Pawlah a inpe ani tih ka hre reng reng lo a, kan office hnung maiah hian Corps kan nei a, City Corps kan ti a, chutah chuan chawlhni kal ta mai khan Sipai lawm lut tur leh Thu sawi turin min sawm a, ka beisei loh ber mai Chico chu Uniform nen nalh tak mai hian a lo induang zuih mai a, min ti phu chiang kher mai. Chu mai bakah hla kaihruai turin an ko a, tha tak maiin a rawn ti.. a zai ring phian leh nghal.

Thil pek

2010-02-12T02:36:00.000-08:00

Mi tu emaw tal thil i pe tawh em? A dawngtu i ni thin nge, a petu i ni thin, thilpek hian hlimna a thlen thin che em?

Thilpek ka dawn ka hriat theih hmasak ber chu kum 5 ka nih-a Pi Khumin (Pu Remlalnghaka nupui, Venghnuai) kawr thuisa min pek kha a ni ta awm e, Levenday puan, a sen, a vara spot hi a ni a, hak a nuam a, sukfai a nuam a, a ro hma si, ka ngaina-in ka ha rim khawp nghe nghe. Zanah kan DC te (khatih laia Major Thanngura) nupa an lokal a, sweet tam tawk an rawn keng a, Happy Birthday to You tih an rawn sa a, ka la hre reng thin, ka zak khawp mai a, mahse ka lawm ngei mai.

Kan thuamhnaw hak hlui leh kan thansan, la tha si te hi ka nu hian a dah khawm thin a, thingtlang lamah a sem ve leh chhawng thin, nei le lu lo mah ila kan neih ang ang chu kan sem chhuak nasa ve khawp thin mai. Mi thil kan pek hian anmahni an hlim ai mahin keimahni lamah pawh hian lawmna nasa tak min siam ve thin tlat zu nia.

Hei, tunhnai maiah London atangin thilpek hlu tak tak ka dawng teuh mai a, ka dawn ni phei chuan hahni dai dukin ka khi reng mai a, "a ka pawh zen ila min seh lo ang" an tih ang chi kha ni berin ka inhria, kei ang tluk bawkin min thawn tute pawh an lawm ka ring. Commr Hlimpuii'n Lehkhabu, CD, Thlai rep, card leh epaulette min rawn thawn a, Major Sangpuiin kawr, ka hak tawk chiah min rawn thawn bawk, a man chhut ta ila a tam ngawt ang, mahse an mi duhsakna leh hmangaihna vangin a thlawn liau liau-in min rawn thawn miau si.

He ka thilpek dawn hian kan Lal Isua, Pathianin a fapa neih chhun kan tana min pek hlut zia min hriat thartir uai uai mai nia. Hmangaih vang a ni si a.

Tuh Rah Seng

2010-02-02T03:32:00.000-08:00

Ka nu hian naupangte ka nih atangin a fehna-a hruai min a ching a, hna hrâm erawh min thawhtir ngai lem lo, thlâm thlen veleh hna hmasa-ah Maian a sik bawrh bawrh a, thlawhlai a han fang a, thlai rah no te te khawmin a rawn dah a, keiin chhun chaw tur ka lo buatsaih a, thlamah ka lo awm mai thin.

Kum 11 vel ka ni ta’ng, tum khat chu thlai chi lo thlak ta che min ti a, Mai chi leh Vaimin chi saranga fun chu tuthlawh nen ka paipawn chhuak a, vau hrul den denah khan maimu 4/5 vel zelin I thlak ang a, vaimim hi chu khilai bialah khian i tuh dawn nia min ti a, ka han bei ve ta alawm.. Mai chi chu a phek bawk a, a kâm mawh khawp mai, Vaimim chi pawh theh thang zawh a ngai si, chhun chaw fak hun dawnah pawh ka la zo thei lo a, ka ning tawh lutuk, bi khatah chuan a thenah 10-te ka thlak ta chuai chuai mai a, vau chu ka hrut chhuak ta a, vaimim pawh bi inhnaih chet chawtah bi khatah ka thlak teuh teuh a, ka zo ta a, ka mai chi pawh a zo tep mai.

Ka thlai chi thlak tiah a hun chuan kei chu ka feh tawh lo, School ka kal avangin. Ka Nu feh lo haw chuan I Mai chi tuh pawh a tiak tha ngei mai, bi a khat tut mai alawm a ti, ka tuh lai khan fang 10-te ka thlak tih sawi lo mah ila, a rawn to a, a hre ta tho tho chu a ni. Ka nu hi chu bum a har teh mai ania..

Hetiang hi a ni, hringnun kan zin kawngah pawh hian mitin hian a rah kan seng tur chi pawimawh kan tuh theuh a, a rah sengtu tur chu keimahni theuh tho kan ni e. Kan chi tuh a lo to huna kan hmu angin thima thiltih kha engah a lang chhuak lo thei lo, chuvangin chi tha i tuh ang u. Galatia 6:7 “Miin a theh apiang chumi vek chu a seng bawk dawn si a…” - Ngaihtuah zui peihte tan...

Tukin chu...

2010-01-27T03:17:00.000-08:00

Tukin chu ni dang ang lo takin zing dar 3 vel atangin ruah a sur a, dar 6 velah phei chuan a maka makin a sur tawh, hna thulh theih hek loh i le, dan pangngai angin kan han chhuak leh teh poh a, traffic tawt lutuk leh khawlaia tuihawk nasa lutuk vangin dar 7am-a office kal tura ka chhuak dar 9:30am-ah ka thleng chhe chhe mai, (a tlangpuiin 7:45 velah ka thleng thin ania..) office lam atangin min rawn call sek leh nghal, duh thala kal theih ni hek suh, Satel mau la ang maiin rikna ngaiah kan ri rei thei hle a ni. Nin luat alei-ah hmuh phak apiang thla la tawp, tuihu avangin a fiah vak lo khawp mai, ka han vawmbei mai mai ang e..

Khaw that ni chuan helai hmunah hian Dawr awrh ho leh sumdawng dang an phu sup sup thin..

Motor chuang chung pawn nihliap an la khum cheu..!!!

Hemi-te pawh hi therhlo engemaw zawrh tur nen mi motor hnungah an bei mai mai a ni a, nihliap pakhat chauh an nei a, an huh zawr hneh khawp mai.

Kan kawmchhakah tuihawk a luang dem dem...

Kawnglai pawh swimming pool tenau a ni ngawt, kan hêl tawp..

Tapzawl ti ti

2010-01-20T23:45:00.000-08:00

Hmanlai chuan meilum ai pahin tapchhak zawlah ti ti an sep thin a, upa deuhte chuan khupa puan suih ngeiin an han thu awn ang diai duai a, an vanglaia an Sai ram chhuah thu-te, Maumual ram neih kuma Savawm ninhlei zia leh an kah dante leh an tlangval laia an luck ziate leh an lâwmte chanchin an sep rawtui viau thin a ni awm e, tunlaiah chuan tapchhak hria pawh kan awm tawh hmel loh e, lungthu la hmu lo thangthar zingah tam tak an awm ang a, Dawhthleng phei chu enge a nih pawh an hre kher lo ang a, tungchaw hi engtinnge an siam sawi thei kan vang viau tawhin ka ring. Thehlan te phei chu rannung hming emaw an ti hlawm mai thei a ni.

Hetia thupui hlapui vai lem lo-a thu sawprawp sawi ngaihthlak mai mai hi nuam ka tiin pi leh pu-te ti ti kotlangah chilthli far dawn dawnin ka lo dak vauh vauh thin. He tapchhak zawl ti ti mai mai tlak lek hi ania tun tumah pawh hian han sawi ka tum ni.

Hla hre sual - Vawi khat chu kan office bang motor-a kan chuan laiin ka thiannu pakhat hi hmm hmmm-in a zai a, a tawpah chuan "Michael Jackson hian a hla phuahah hian engatinge Spanish a telh le, naupang tam tak nen an sak vang em maw ni le.?" a rawn ti chhuak hlawl a, midang chuan "enge spanish chu" an ti, "Hei he hla hi mawle" tiin hla pakhat chu a han sa rat rat a, "Heta Fiesta tih hi mawle, Spanish a ang ka ti riau a" a ti a.

Midang chuan "Fiesta tih chu spanish ni awm tak a ni, portuguese chuan Festa kan ti awm sia"an ti, a tirin an thusawi chu ka man mai lo a, spanish a ni em, ni lo em tia an ngaihtuahna lamah "Captain, he hla hi i hria em?" tiin min zawt a,"Enge ni, han sa leh teh"ka ti a, a han sa leh chu dan rual lohin ka nuih chu a za ta em em mai a, "He hla-ah hian Fiesta tih a tel hleinem, Entire tih alawm"ka ti a, kan thiannu chuan "Ka fanu Irene hian a sa thin a, Fiesta hi a ti mai thin a, inah pawh han sa teh ka ti mah ang a, a sa leh mai ang" a ti a, kan nui nasa kher mai. Inah chuan Irene chu kan han saktir ta ngei a, ani pawh chuan Fiesta chu a rawn ti ta lauh lauh a, nuihza tak chungin a hla pumpui chu ka ziah chhuahsak ta nge nge a.

A hla chu Michael Jackson-a hla "Heal the World" tih kha a ni a, han sa chhin teh mah.. Heal the World, make it a better place, for you and for me and FIESTA...

Kawng bo - Chawlhni vawi khat chu thiante nen Beach-ah kal ang kan ti, ka thiante hi Zimbabwe lam mi an ni a, kawng an hre chiang lo, "Kawng i hria em"min ti a, a hriat theih mai ang, Shopping Centre kal dan i thiam chuan ta tang chuan kan kal dawn nia ka ti a, thiannu pakhat motorin kan kal a,kawng chu ka hrilh zel a. Kal lam chu kan tluang viau. Rin aiin kan awm rei, kan haw tan tih chuan khua a thim tan ta mai. Kawng chung lamah haw mai ang tiin ka pentir a, turn left, right tiin ka sawi lauh lauh, khawpui chhung luhna tur kan thleng, turn left turah Straight ka'n ti palh mai chu kan kal lohna lam turah kan tlan ta vauh vauh a, thiannu chuan kan bo em ni, hei khawilai nge a ti, kei lah chuan, ka hre tawh lo, ka ti si, bo mai a hlauhawm, thlan a tla bat mai, nachina turn awm hmasa berah khan straight lo-a left turn tur ania, Polana lamah khan kal tur zawk a ni ka ti leh, U turn-na tur a awm mai si lo, block thum vel lai kan tlan hnu-ah kan let leh ta a, nuam lo duh ngei mai, anni lah chuan Adventure a ni mai lawm an ti et a.

Um hlum thak ang.

2010-01-13T00:49:00.000-08:00

"Sa a tla e," tia au thawm an hriat tawh chuan nula rim laklawh, hlim em em te pawhin Tlangval tlawmngai, huaisen nih duhin sa hnu chhui turin an tlan chhuak a, meichher siamin ram lam an pan nghal thin. Khua a thim a, ruah a sur lek phei chuan tlawmngaih a harsa duh viau ang. Tlangvalte in elna ber chu sa hnu chhuina-a hmasa nihte, sa kap thei leh an Leido te Lu la thei, mi huaisen nih kha a ni thin. Mi huaisen, sa kap thei Pasaltha chuan a sumhmunah Sa lu a tar thluah mai thin.

Khatih hun lai khan eng vangin nge sa kap thei, ral lu la thei, mi huaisen nih kha tlangval ten an chak? A chhan chu mite ngaihsan an nih vang a ni. Lei do nei reng renga khawsa, ral hlau thin an ni a, ral laka chhan thei chu mi huaisen an ni. Lo nei mi an ni a, ram lamah Sa chi hrang hrangin a tibuai fo a, Sakei pawhin mi a sehin an ranvulhte a la fo thin, chung laka an khuate humhim theitu chu mi ngaihsan leh entawn, zah kai an ni. Chuvangin tlangval chuan huaisen, tlawmngai, sa leh ral laka zam ngai lo nih an tum fo.

Tunlai hunah chuan Sa kap thei aiin, humhalhtu nih kan duh tawh zawk a, Mi lu la-tu chu Danbawhchhetu a ni a, khaihlum ve tlak a ni. Pawl hrang hrangin ramsa humhalh kan intihhmuh tawh avangin Tlangval tan tlawmngaihna tih lan nan Sa hnu chhui a ngai tawh lo a, sa kap thei nih lah a ngai tawh na hek lo. Leido nei lo, ralmuanga kan awm tawh avangin mahni mihring puite lu lak a ngai tawh lo. Enge kan buaipui tak le? Kan hriat loh laiin Ruihhlo chi hrang hrangin min rawn luh chilh a, kan tleirawl, tlangval tih tur nei lo te chu a rawn run ta hmiah hmiah mai, lo inveng turin kan in ring si lo, tha kan thlah laklawh tawh si. Chutih rualin thalai, hnathawh mumal nei lo, tei rawlai mai mai an kat nuk mai bawk si, Tualthah, rukruk leh sualna hrang hrang kan hmachhawn leh ta nuk mai.

Raldo nei lo-a awm leh sa huai beih tur neih loh hi a tha lo e tihna a ni lo a, tunlai hunah hian hmabak tam tak thalaite hian kan nei zawk a ni. Kristian-na in min luhchilha Pathian kan lo hriat hnu phei hi chuan kan lo fing var a, lehkhathiam kan lo pung ve zel bawk a -

"Raltiang ram saw thlir teh u,
Hriatna Thiamna Finna ram saw
Leng dang mi chu lal lai par tlanin
Min ngai loten hlimin an leng si" ti-a Pu Rokunga te an au lawm lawmna kha a la rei loh teh lul nen tunah chuan chu Raltiang Ram ngeiah chuan hlim takin Zo fate ngei pawh an leng ve a ni lawm ni?

Hetih lai hian enge kan ngaihsan chu ni le? Eng ti mi nge kan ngaihsan, Zaithiam, eiru thei, mahni hlawh phu lo-a lian in sa thei, thlam nei tha, motor nei nalh, mahni thawh chhuah ni lo two wheeler chhuak thar ber ber nei theite pawh an ni mahna.

Chu ai chuan eng hna pawh thawk sela, mahni thawh chhuah ringa khawsa thei, nu leh pa zah thiam leh mahni hnathawh rinawm taka thawk mi, eiru lo, Kohhran leh Khawtlanga inhmang mi - a kul ataia inhman vek erawh kan beisei thei lo - te hi ngaihsan kan zir a hun. A phawvuaka hlim dur dur aiin chik taka chhut chet chet kan mamawh. Zofate hi taima hnam kan ni kumkhua thin, chumi a chianna em em chu kan nu leh pa-te hi an taima tlat, keini thangtharte hian kan thlawp zo lo zawk. Kut hnathawka, ram lama kawla ni chhuak chhiara liam turin kan inti a ni lo a, mahni thawh tawk kan zawn thiam a pawimawh kan ti a nih chu.

Hetih lai hian mi tam tak chu Finna kailawn rapin an pen chhuak a, thalai zingah mahni inchawm, chhungte pawh pui thei hial tawh an pung ve zel tih he Internet khawvel luhchilh hian a hriat. Vawiin-ah hian kan Zoram hi a chhe tawh, sualna a pung, kan thatchhia ti mai lo hian a siam thatu nih tum ta theuh hlawm ila, nang leh kei kan thawh loh chuan tunge thawk chuang ang le tih rilru pu-in kan hmelma sual doral hneh tur hian kan mihring finna mai a tawk lo, Lalpa tanpuina dil chungin rinawm takin i pen ang u. Kan tanrual chuan kan chak ngei ang, he kan ram zimte, mihring pawh uihum lek hi kan inthurual phawt chuan thil ropui tak kan ti thei ngei ang.

Eng anga sual lian leh chak pawh lo thleng thin mah se, Mizo Ar sual huai ang-in kan doral hi I UM HLUM THAK teh ang u.

Mizo ar sual huai pawh kha, an te teng tawng na-a Vai ar lian pui pui kha an um tlan duai duai thin zu nia....

Kanaan Branch YMA ho hla sak UM HLUM THAK ANG tih hi han ngaithla teh mah.... (ka upload dik em pawh ka hre lo, vawikhat tihna ania..)

Titi phungleng...

2010-01-06T02:29:00.000-08:00

Vawiin ni 6 January 2010, a lo ni vung tawh mai, Lungpho nu pakhat tawng sual hrat pawh a fapa che muang lutuk a hau ve a, "Rintluang, i muang lutuk, i thiante an ding liam zo vek tawh" a ti chiam mai a ni awm e. Kei pawh ka lo muang lutuk a, ka uphuk lungmuan a ni mai thei, thiante hnungah kawl ek kan thai ang tih a hlauhawm, Kuminah ka blog ka update tawh emaw ka tia, ka lo update der si lo a, vawiin hian ka hrechhuak ve chiah a ni.

Sesawng Corps-ah CO-a ka awm laiin thalai ho-in inhlawh nan mi hlo kan thlo a, I thlo ve thiam dawn em ni min ti min ti fahran a, ka thiam ve chiang mai si a, ka naupan lai pawn ka nu ka pui a, hlo te chu ka thlo fo a, ka thiam ve lutuk tlat ka ti a, an zingah chuan ka bung ve, an thiam dan leh ka thiam dan a in ang ta lo tawp mai, min nawr min nawr a, tawlh rawh an ti reng mai bawk nen, mahni tawka hmazawn thlo et et thin, hlo thlo thiam inti ve tan chuan a hahthlak ta khawp mai a, tan a ngai reng mai bawk si, kan innawr ut ut mai a, hei ngei hi a nih hi kan hmanlai upa ten, "Lâwmte u, sir sawn phei r'u" an lo tih chu ni tiin ka ngaihtuah a, sir chu ka sawn ve ta ruak ruak zel a.

Chhun chawfak a lo hun dawn chuan tlangval chak deuh pakhat hian kan hmalam chu a rawn pal buan buan a, kan hmazawn chu a rawn rit deuh hlawih hlawih a, chawfaka kan chawlh hma-a kan hlen tur chin, Hma a rawn tar a ni tih an lo hrethiam nghal mai, chumi kan han thlen chuan kan chawl ta a. Chawfak zawha bun leh chu a huphurhawm duh kher mai, chuvang chu a niang, "Chawhnu bun hi awm lo se chuan mitthi pawh an lo tho leh duh ang" an ti thin.

Chhuanlam tur han nat chhin eih pawh ka neih loh avangin chawhnu chu ka bung ve leh ta poh a, chau hnepin nitla vanvuaiin ka thawk ve ta erh a, hlim erawh kan hlim tlang khawp mai, kan hlawh teuh bawk nen.

Ka nu hian kan lehkha zir lai hian hlo thlawh leh lehkha zir hi a tehkhin awl lo, "Lo neitu pawh hlo a thlawh taihmak loh chuan kham khawp a thar thei lo ang bawkin in zirlai in zir that loh chuan kum tawpah in pass lo ang," a ti thin, a tehkhin thiam ve dan a ni a, a in ang hle mai bawk, mahni thawh rah seng theuh theuh.

Kum tharah rilru tharin, ngaihtuahna thar nen, ruahmanna thar leh inhlanna thar nen kan ti thin a, kum a thar a, danglamna erawh a awm lo, kum kalta a kan ni hman ang tho kha a bul atangin kan chhiar a ni lek fang a, a number a dang a, kan kum pawh a pun belh a, kan upa leh ta sawt tih mai a ni.

Chuti a nih chuan kumthara inhlan thar pawh awmzia a awm lem lo a nih chu mawle, pawimawh ta ber zawk chu Vawiin hi a lo ni e, vawiin zel hi Pathian duh danin hmang ila, inhlan tharin rilru thar nen, tawngtaiin kan hma-a awm, kan HMA TAR Krista lam enin, tiam chin lam chu pan zel a, sirsawna pheilai khai tur kan lo ni e.. Chu hmatiam chu kan hlen hun chuan Lallukhum hlu chu kan chang dawn si a.

Chhiartu zawng zawngte kumthar 2010 chibai vek ule, Nitin Lalpa Nen i ti ang u hmiang maw...

Krismas thunawi..

2009-12-30T00:25:00.000-08:00

"I'm dreaming of a white Christmas

Just like the ones i used to know.."

... tiin han zai bu ve tluk tluk thin mah ila, White krismas tak tak hi chu kan hre ngai lem hlei lo a, hmaaaan-ah, hman tak takah khan, Lunglei kan awm laiin khua a vawt khawp mai a, zingah hian Baze mual-ah vur a lo tla var ve iar a, chu chu vur tla ka hmuh chhun a la ni, chuti chung chuan Boney M hla sak White Christmas hi nalh ti em emin kan ngaithla a, kan kurpui ve duam duam thin a nih hi.

Kumin phei chu a White Krismas lo khawp a, khua a lum uap churh a, Celsius Degree 35 chung lamah hi chuan zai tui pawh a har khawp, chutih laiin zoram angin ruai theh leh zaikhawm awm ve hek lo rei lote kan inkhawm bang chu mahni In lam hawi theuhah ti ang maiin kan ruaipui tin dial mai leh nghal a, a khawharthlak dan a thuah hnih ngawt mai.

Vanneih asiamin kan hotu ten an in lama hmang turin min sawm hlauh a, chawhnu lam chuan ka va phei teh poh a, anni an lo inbuatsaih nasa a, present te min lo pe a, chaw te ka ei nghal bawk a, kan hlim ta phian, ka va tlailam um pawng par ta nghek a ni ber e.

Chutiang a nih avang chuan Zoram lama Krismas nawn ni, ruai theh ni kan tih ni 26 te chu in lama hna thawh nan ka hmang a, lunglen thulh thaka ka buai tak kha...

Chawlhni a lo thleng a, thiante nen kan han inhmu a, engtinnge i hman kan inti hlawm, ka khawhar chu an hlau ve tho a ni chek ang, naktukah kan leng dawn nia an ti a.

A tuk (28Dec) chuan min rawn sawm a, chaw eiin kan chhuak ve ta dam dam a, han chhuah takah hi chuan rei hi a lo awl khawp mai, traffic lah hi a maka mak hian a lo tawt thin a.

Ti hian ka ngaihtuah a, krismas hi mihring tung chho-a kal, mi ang pangngai chuan kan hmang reng dawn a ni a, awmna hmun a zirin hman dan erawh a in ang lo thei hlawm viau mai, thenkhatin nuam an tih em em laiin, thenkhat erawh lusun mangangin an awm a, thenkhat lahin mahni nuam tawlna ringawtin hun kan khawhral bawk a, nula thenkhat hmang nuam deuh lah a result thla engemaw hnu-ah a lo lang rawl nen.

Engpawhnise, a piancham kan lawm Lal Isua tana kan thinlung hawn mai hi hman dan tha ber chu a ni e, malin kan awm emaw, chhungte nen kan hmang emaw pawh nise Amah Isua nen kan hmang em tih hi a pawimawh ber chu a lo ni e. Hei vang hi a ni ang e.. "Thinlung a lamah hawn ila ro thil dang a ngai tawh lo e"te hial an lo tih le...!!!

A hlui thei lo!!

2009-12-18T04:26:00.000-08:00

Naupan laia Krismas hman dan ka hriat theih hla ber chu Lunglei kan awm lai kha a ni awm e.

Urlawk zanah Nula Tlangval an zai a, tlaivar an tum ngei ngei thin, keini naupang pawh tlaivar chu kan tum ve eltiang, mi zaikhawmna bulah kan lo bu ve lawp lawp a, dar 11 te kha a va rei thei tak em.

Zingkarah khaw vawt tak hnuaiah peih lo zetin kan tho a, a chhan chu eng dang vang ni lo-in Krismas Bawng talh lai kan hmuh chak vang mai a ni. Khawlaiah kan thaw khu hlat hlat a, zing daifimin a bawh hnim te chu kan pal pel sur sur a, hnim hnaha dai khalte chu Vur tiin kan la teuh a, chutah Bawng an pheh thluk lai hmuh ngei tumin fatu ho bulah kan tlan a, chumi zawhah Vawk talhna lamah, vawk talhna-ah hi chuan kan awm rei peih ngai lo, a ril an phiar lai erawh hmuhnawm ka ti thei fu. Bawngsa an chan lai kan han en a, a tisa phu det det hi mak ti takin kan en reng a, kan hawlh de de thin.

Krismas ni-ah kawr thar ha-in kan han inkhawm ngei a, eng thu leh hla nge kan ngaihthlak pawh hre miah lo-in inkhawm ban hma-in chhuah phet kan lo tum bawk a, inkhawm banah chhangban, kurtai nen ngei mai kan ei ngei bawk.

Puitling ho chu an lengkhawm a, inti naupang fel takin zaikhawmna inah chuan kan han thu ve ren rawn na-a pawn lamin min hip nasat em avangin kan tlan chhuak leh thuai a, har mei khukna lamah kan in um kawi zawr zawr a, fatu ho-in thahnemngai taka sa an chawh sauh sauh lai chuan a kotlangah kan lo thu ve reng a, sa bel lian pui puite chu kan thlek dauh dauh a, ruai theh kha a phurawm thei riau.

Tlai lam a lo ni a, fatu ho chuan ruai siam tawh mai ila an han tih vel lai chuan zaikhawm ho chu an tui thar ta tlat mai, an la ri tluk tluk a, naupangin ei hmasa mai rawh se an ti leh ta nge nge, ka nu hi a ei hnuhnung pawlah a tang ziah zu nia!!!

Kum tam tak liam tawhin Krismas vawi tam tak hmang tawh mah ila, naupan laia kan krismas hman dan kha vawiin thleng hian a hlui tak tak thei lo, Kawrthar, inkhawm, lenkhawm leh ruai theh te hian Mizo te thinlungah thuk takin thu a la sawi reng a nih hi…

Ka Pasal tur..

2009-12-10T01:38:00.000-08:00

Tunlaiin hmun tam takah, Hmeichhe chungchang hi a lang nasa hle a, a bikin internet hmangtute zingah pawh sawi hlawh ber pawl a ni hialin a lang, thenkhat phei chuan kan ning viau tawh mai thei, nupui/pasal neih chu sawi loh Ngaihzawng neih thleng hian kan mizo mipa te thikthu hi a chhe ta hle mai a, hei hian ngaihtuahna thui tak min neihtir ve leh tlat mai pek a. Ka’n ar mit tet khuan ve leh chiam mai ang e.

Mizo te hi hnam dang nena inchiahpiah ngai lo tak kan ni a, kan vela kan hmuh theih hnaivai Vai kan han tih maite phei chu kan ngai thei lo viau thin, Vun ngo ho Sap kan han tih maite erawh kan ngaisang leh phian lawi si.

Hei hian nupui/pasal neihna kawngah pawh chi inthliarna ramri thui takin min kham sak a, hmeichhia te tan lah awm thiam a har em em. Engemaw ti atang khan kan mizo mipaten ruihhlo an ching a, lehkha zir tha lo leh mahni pawh inenkawl leh inchawm thei lo-in rawlthar tam tak thlanmualah an liam a, chung zinga a vannei thenkhat erawh vawiin thlenga la dam an awm mai thei, amaherawh chu a hun laia lehkha an zir that loh avang tein ei tling lo-in an awm thung a, thenkhat chu tun thlenga mi duk dak mang lo-a chhuak ta an awm nuk ang.

1980 hnu lama piangte hi tlemin an vannei deuhin a lang, an nunah Drug-in hmun a luah ve hman lo a, mite chu zirna lamah an lo intlaksiak tan tawhin kan Zoram pawhin hma a lo sawn ve hret hret a, mipa fel tak tak an tam ta.

Tlema hranghlui deuh Nula zingah khan Mizo mipa neih tlak ka hmu lo ti an awm an ti thin, an hunlai kha chuan dik pawh a dik ta ve ang, mizo mipa, rui, zawi ngei nguai, ban puam lian tak, hnathawk tura rin tlak si loh kha an tam thin tlat.

Tunah erawh chuan kan changkang ve zel a, Ruihhlo hman ringawt hian hmasawnna a thlen lo tih leh ei tur a pe lo tih thalaite zingah hria an tam tial tial a, zirna lamah intlansiak nachang kan hre chho a, mi tam tak, zirna sang zawk bel turin Vai ram lamah an liamthla ta sung sung a, neih phak bak thleng pawha sen hnial lo-in zirna chu kan pan ta ruih ruih a, hei hi mi tam tak tan a that rualin thenkhatin kan chhiatpui leh ta niin a ngaih theih.

A bikin hei hian hmeichhia-te ah nasa takin a tha lo zawngin hna a thawk niin a lang. Phai lamah chuan ei leh in te a lo buaithlak a, rin aiin senso te a lo hautak bawk si a, thiante nen In inluahtawmte, han khawsak ho maite kha a lo awlsam a, thian in nel takte chu an han awm khawm ta reng a, chu chuan nghawng tha lo a rawn hring chhuak ve lo thei lo.

Thil reng reng hi a tha a awm chuan, tha lo in a zui nghal zat thin, a tha lo chu a langsar zawk ziah bawk. Chu chu mi tam takin kan hriat sa a ni. Mi fel tam tak phaia lehkhazir, mi hlawhtling tam tak an awm laiin a hlawhtling ta lo, zuzi leh mit ti mim zawnga khawsa te kha an lang lian zawk fo thin, hei hian a nawlpuiin mi zawng zawng kan tha famkim vek thei lo a, tha vek turin kan inbeisei thei lo tih pawh a chiang a ni.

Hetih lai hian a khawi lam zawkah nge kan awm tih hi mahni theuh in enfiah a hun. Kan chanchin a than dan hi a tha lam nge a chhe lam tih kan in enfiah ve fo a pawimawh. “Mi sawi ka pawisa lo, Ka Hringnun hi tu sawi phak a ni lo, ka duh danin ka awm ang, Zalen ka ni lovem ni?” tiin mahni awmhmunah lo tang kawh ve sateh thin mah ila, chu chuan nghawng tha lo a nei fo thin si a, thenawm hnam dang tlangval lo fawrpui lawp lawp kha kan ngaihin sual a ni lo mai thei, nimahsela chu chuan engnge a hrin chhuak kan ngaihtuah tel thin lo hi a pawina chu a ni.

Kan kawppui tlangvalte khan khawi lam mi nge kan nih tih kha an chhinchhiah ru ve kiau thin si a, ka hnampui nula chu keimah ang maia sihhnipah an ngaih ve phah ta vek mai thin, chu chuan keimah avangin ka hnampui nula te chu dinhmun hlauhawm takah a dintir a, Se hnuhnung vuak tuar an tih ang maiin, pawi sawi lo mi tam takin, pawngsual, chhaih nawmnah leh mualpho an tawk ta a nih hi.

Hmeichhe pawisawi hlei lo-in pawngsual a tawk a, kan ngawi bo thei lo, kan thin a rim em em thin a ni, hmeichhiate pawh hi kan in enfiah a hun, Misual ka tawng fuh nge ka awm dan hian a cho chhuak ve hrim hrim, hetia ka sawi avang hian mi thenkhat chu in thin a lo rim mai thei e, mahse ngaihtuah chiang teh. (Naupang kum tlinglo leh Pitar pawngsualte chu lo dahtha tai la.)

Vawi khat pawngsual case, court-a thubuai rem chungchang an sawi ka hre reng thin. Pawngsual I tawh laia I thawmhnaw hak han la teh an ti a, ani chuan Kawr ban bul, pan tak leh pawnfen chhing tak mai a rawn khai chhuak a, “E, pawngsual awm reng pawh I lo nih hi” an ti e an tih kha, tak tak a nih ka ring lem lo na-a thil ni thei awm tak chu a ni.

Kan incheina leh kan mizia hian thu tam tak a sawi a, tawngka-in pawngsual hi ka hua, kei chu nula thianghlim ka ni tiin kan vaupung ti lian mah ila, kan nun lama a lan si loh chuan thu va-uk mai a ni ang. “A niang I sawi mai, I sawi zawngin I nihna a lang e” tih hla ang mai a ni.

Hei hi I ngaihtuah chiang teh ang u. Pathianin Israel fa-te hnena dan tam tak a pek lai khan hei hi sawi tel a ni tlat nia.. Numbers 36:6 Zelophehada fanute chungchang thua LALPAN thu a pêk chu heti hian a ni, 'Tha an tih apiang nei sela, amaherawhchu an pate hnampui zinga mi ngei an nei tur a ni,' tiin

Pathian pawh hian a ngai pawimawh hle ni tur a ni, thupek khirh tak a pe tel tlat. Chuvangin Hnam dang nupui/pasal neih hi a tha nge tha lo tih sawia iak iak lo hian mahni pa-te hnam ami ngei neih tum ta theuh ila, Mizo hnahthlak kan nih chhung chuan “Hnam dang kan nei dawn lo,” lo zu ni reng a…!!!

A hmingah chuan..

2009-12-03T02:45:00.000-08:00

Mihring kan lo pian chhuah phat hian min kohna tur atan kan nu leh pa-te emaw chhungten hming min phuahsak nghal vat thin. Chu chu midangte nena kan inhriathran theihna tur atan a ni a, Pathian ngei pawh khan thil nung tinreng, leia kal chi leh bawkvak chite leh boruaka thlawk chi a siam zawng zawngte kha Adama hnenah a hruai a, anin hming a lo phuah vek a nih kha. Adama erawh chu Amah Pathian ngeiin hming a phuahsak bawk a, chumi hnu-ah amah awmpui tur awm mi a siamsak chu a hnenah hruai lehin Adama chuan hming a lo phuah a, Evi tiin.

Hmanlai kan pi pu-te chuan Pathian an la hriat loh avangin an vela an thil hmuh emaw, an nundan nena inmil turin chumi hming chu an chawitir mai thin. Saikapa tia an phuah chuan chumi Pa emaw a Pu emaw chuan Sai an kap a ni thin. Tin, mi hausa deuh an nih chuan an sum neih leh dar emaw silai emaw an phuahchhan thin bawk. Darpuii, Sangkhawli tih velte. An hming atangin eng chhungkua nge tih a hriat theih thin hle. Tin, Lal hmingsak bik dan a awm a, chumite chuan Ngur emaw Sai tih emaw an hmang tel tlangpui a, chuvang chuan hnamchawmte chuan hming tha an phuah ngam lo a, Lal hming sakna dal lo an ti thin.

Kolasib-ah Pu Bawngleia a awm a, mak kan ti thei rap, Bawng lei (tougue) amaw kan ti thin a, mahse Bawng lei (Buy) zawk a ni mai awm mange tih ngaihdan hi tun hnu-ah ka nei leh a, chuti a nih chuan an hun laia bawng lei thei chu hausa tak an ni tih entirna daih a lo ni. Pu Bawngleia pa chu Thingrema a ni e an ti nghe nghe.

Pathian kan lo hriat hnu hian kan hming phuah dan pawh a dang ta hret hret a, Lal tih hi hmingah kan hmang tel tlangpui ta. Lalremruati, Lalchhanhimi, etc. emaw Vanlal.... tihte in.

Ka nu hi Laichhingi a nia, awmzia a awmlo hle hian ka hre thin. A lai (Navel) awmna hi a chhing viau aniang ti dawn ila, midang awmna ang bawkah a awm si. Tihian ka ngaihtuah leh ta thung a. Lai han tih chuan Laina, chhungkhat, vua leh vangte sawina a ni a, Chhing chu huapzo emaw khum tih nana hman a ni a, chuti a nih chuan ka Nu hming chu hming tha tak a lo ni reng mai.

Ka hming hi Zobawk upa pakhat Lianlunga phuah a ni a, Ka nu leh Pa-te Zobawk an awm laiin Sipai Pawl hian hma a sawn nasa khawp mai a, Baptist Kohhran chutih laia kohhran lian ve tak mai chu an rawn inlet vek a, an Biakin chawpin an rawn pem a ni awm e, chumi chawi chuan Ramdinthari a ti a, ka Nu chuan ka pian veleh Lalremruati tiin min phuah a, chutia Zobawk upa-in phuah chhan nei tha inti tak maia ka hming a rawn phuah avang chuan ka lai-ah hming chu pu lo-in Ramdinthari tih chu ka pu ta zawk a.

Ka hming hi a common lo bawk a, ka duh lo hle thin mai, ka pa hian a bulah LAL a telh thin a, a sei teh duah a, ka telh duh ngai lo, lehkha min thawnna ah hian a telh chawk a, ka ngei thei hle. Mahse min koh erawh chuan Mate min ti leh daih thung a. Thiante chuan Dini min ti ta zel a, ka hming phuahtu-in Zobawkah Ram in rawn Din Thar a ni ngawt alawm ti-a a phuah chhan bak chu ka hming hian awmze hran a nei lem lo hle. Ka hming ang pu ka hmuh hian enge an phuah chhan ni ang aw, ka ti fo thin, an tam lem lo.

Eng hming pawh pu ila kan nun dan hi a ni, lo pawimawh ber mai chu ni, Lalnunmawii KS tihte, Rinawma rukru tihte chu a inhmeh loh dan Rappuichungsanga Kawrchung Var khai ang vel a ni.

Lal Isua kha chu a pian hma hauhin hming awmze nei, hnamtin damna tur phuahsak a ni sa a, “Vawiin-ah hian in tan Davida khua-ah Chhandamtu a piang ta, Lal Krista chu” “A hmingah chuan Maka, Remruattua, Pathianchaka, Chatuanpa, Remna Lal” tih te a ni duah mai. A hming ang reng a mak, chak, ropui leh thiltithei chu a lo ni ngei e.

He Isua ngei hi hnam tin dam nana kan tana lo piang a ni a, kumin a piancham kan lo thlen leh dawn hian a hming awmze nei hi awmze nei lo-in liamtir lo ila kan tan Damna thlentu a tharin lo ni leh rawh se.

Hmangaihna chu...

2009-11-19T23:29:00.000-08:00

South Africa International Transit-ah chuan ka next flight nghakin ka thu a, hun ka nei hnem bawka Lehkhabu chhiar tur la chhuakin thut hmun chu ka rem sauh sauh a, ka lehkhabu chu ka bih ta ngar ngar a. Chutia ka thut lai chuan ka bulah hian sap nu pakhat tar lam tawh, kum 50 chu a ni ngei tawh ang tih hi a rawn thu a, ka en thuak a, lehkhabu chu ka chhiar san leh ta a. Nakinah chuan chu nu chuan phone a hmang ta a, a tawng zet zet a, a pasal a bia a lo ni a, a han be zo chuan, “Bye, love you..” a ti a Tar kiring zet tawhin a pasal a bia a, Love you a la ti zarh zarh khan ngaihtuahna thui tak min neih tir pek a.

He thumal pathum lek, sap tawnga I LOVE YOU tih leh mizo-in KA HMANGAIH CHE kan han tih hi a ril dan chu a in ang rengin a lang. Thusawi awlsam tak erawh a ni hauh lo. He thumal tawite chhungah hian thu ril inthup thuk tak leh sei tak, dam chhung daih tur a inphum tel a, khawlaia zurui pai mai mai sawi pawh nise, thuhriltu ropui takin a sawi nen a ropui dan leh a ril dan a lem chuang awm lo e. Hei vang hian kan Bible ngei pawhin thu ropui ber tiin a lo sawi reng a nih hi.

Hmangaihna hi enge ni ti ila, sawifiah dan a hrang nuaiin a rinawm a, kan hun tawn leh kan tawn dan angin hmangaihna kan hrilhfiah dan pawh a dang nualin ka ring. Tlangvalin nula a han hmangaih tawh vek vek hi chuan a inhuam thui thei khawp a, Kawlthei kung pawha lawn thei uk lo khan, “Ngiat lang, Siar ka man nang che..” an han ti ve thla rawk zel a.

Nimahsela, Tlangvalin Nula hnenah,‘I tan chuan si-ar lak pawh ka huam a, lui kawr thuk ber leh tlang sang ber kaltlang ngai pawh ni se, nang hmu tur chuan ka lo kal zel ang, nang nen hian thihna chauh lo chuan min then thei lo ang’, ti zuah zuah mah se, ‘Zaninah ruah a sur loh chuan ka lo leng ang’ ti-a a thusawi a tlip leh si chuan a inhuamna leh thusawi zawng zawng kha thu va-uk mai a ni.

Hmangaihna hi mi hrang hrangin an hrilhfiahin a awmzia an sawi a, nimahsela sawia fiah mai chi leh tawp mai chi erawh a ni lo a, tawna fiah chi a nih hmel. Mihringin hmangaih a neih chuan thiltihin a zui a, Nula tlangval karah chuan chu hmangaihna chuan par a chhuang a, rah duhawm tak thlenin chhungkua an din thin. Chu Hmangaihna chu mi pahnih inkara thil thleng tur a ni a, pakhat ringawt hmangaihna chu a famkim thei lo nachungin mi pakhatin a hmangaih em em khan a hmangaih let ve lo tlat thei.

Hmangaihna dik chuan lei leh van pawh a thlunzawm mai a, tuilian leh ral hlauhawmnain awmzia an nei thei lova...nu leh pate hmangaihna leh duhsaknate pawh an tlanchhiatsan dawr dawr a, chutiang hmangaihna chuan engkim hi a siam rem a, kum leh khawsak dinhmun inang lote mai mai chuan hranna aiin thlunzawmna nghet a siam zawk thin

Mizote hi hmangaihna la na viau hlawm si hian Induat hi kan thiam hlawm lo viau niin ka hre thin. Han ngaihtuah mah teh. Kan hmanlai Pi leh Pute phei kha chuan nupa an nih hnu-a mi hmuha induat hliau hliau kha an tih zawng a ni bau lo mai a, “I bai chhuan a so, rawn vil rawh” te hi an ti khur khur a, inbiak bak hluk tur emaw an ti tlat thin. Hmangaih thu chu nulat/tlangval laia an inhrilh kha an duh tawk ta mai em maw ni tih turin an inhrilh ngai tawh mang thin lo. Nimahsela, inneih hnu hlei hlei hian In Hmangaih thu hi inhrilh tawn fo tur a lo ni.

Hmangaihna-a pawimawh ber mai chu mi pahnih inhmatawna an inen mai ni lo-in thil thuhmun an thlir dun emaw thlir dan in anga an thlir emaw hi a ni, Nupa ni ve si engtik lai mai pawha an inhawitawn loh a, Ashoka Pillar ang maia an inhnungchhawn reng chuan Nupa nun hlawhtling an nei ngai lo ang.

Vawi khat chu Hnahlana ka awm laiin ka awmnate fapa chuan Aizawl lam nula a rawn ru haw ve ngawt mai a, a pa chuan eng dang a sawi lo, “Hmeichhia hi chu in huai teh e, in pasalte chauh in hriatna hmunah pawh in kal dawr dawr mai a..”a lo ti. A ni tak a, Hmeichhia leh mipa, ni danga in hmu leh inhre ngai hleilo, han inhmangaiha, kumkhua-a chen dun an han huam zui hi a mak ngawt mai.Hei hi Pathian remruat dan chu a ni tlat bawk si. Thenkhat duh leh hmangaih em em nia in ngaiin an han innei ta cheng a, khawsa dun rei hleithei lo a inthen leh an awm chawk. Hei hian khawvel mihringte in hmangaihna chu a tluantling lo a ni tih a ti lang chiang hle bawk. Hmangaihtu dik tak thinlungah erawh chuan a hmangaih kha nei thei lo mahse ani chu hlim taka a awm phawt chuan lawmawm a tiin tha a ti a, “Ka thai chang mah lo la, khiangawi mi tawnah, Hmangaih lung i dum phawt chuan lawm zel tang e,” a ti thei thin a ni. Hmangaihna in mahni hma a sial lo tih ti diktu pawh a ni thei awm e. Amaherawh chu hmangaihna dik tak inhlan tawnte inkarah chuan rinhlelhna leh huatna in hmun a chang ve thei lo a, an inhmangaihna chu a par vul reng thin, tin, rinhlelha awm turin a hmangaih tak chu a phatsan ngai bawk lo ang.

He Hmangaihna vang hi a ni ngei ang Pu Vankhama’n “I sakhmel tawn changin thinlai a eng a, I sakhming an sel leh kawl ang ka hnim a..” a lo tih le…

Hetiang a nih lai hian a hmei apa-in tih tur pawimawh kan nei theuh mai, chu chu RINAWMNA hi a ni. Nupui Pasal te laka rinawmna vawng thei lo-in a hrinchhuah chu chhungkaw buai a ni mai.

Eden huanah khan Evi khan ama thutlukna-in Pathianin thei ei loh tur a tih tlat kha a lo ei ta mai a, a pasal chu a pe ve a, a ni lah chuan ihe loin a lo ei ve mai ni awm tak a ni. Kha thutlukna pawimawh lutuk, an Nun pum ti chhe vek thei thutlukna Evin a siam lai khan Adama kha khawnge a lo awm bo ni ang le? Ramhnuai pilril zawkah a lo inthiar nge ni ang a, ramsa dang ngaihvenin a lo tei bo nge, boruak thianghlim dawn tumin a lo tei hawi ni ang? Evi teh reng pawh khan engvangin nge a pasal tel lo-a thutlukna pawimawh tak mai chu a lo siam mai le? Nupa chu khawsa duna thil engkim sawiduna thutlukna pawh siam dun tur an nih teh lul vei nen.

Bible chuan Hmangaihnain a dawhthei a, ngil a nei bawk thin; hmangaihnain a itsik lo va; hmangaihna a infak lo va, a uang lo va, a che mawi lo lo va, mahni hma a sial lo va, a thinur duh lo va, sual lamah a ngaihtuah lo va; fel lohnaah a lawm lo va, thutak erawh chu a lawmpui thin a; engkim a tuar hram hram a, engkim a ring a, engkim a beisei a, engkim a tuar chhuak thin.…. a ti. Chu chu hmangaihna dik Kristianten kan nunpui tur leh kan nupui/pasal, u leh naute laka kan nunpui tur chu a ni e, chu hmangaihna chu Pathian atang chauhin kan nei thei ang.

Pathian hmangaihna hian engkim mai a lo huap zo a, hmangaihna ropui ber chu a ni ngei mai - Chuvangin he hla hian I lo tlip teh ang…

Pathian hmangaihna ropuizia, Thu leh hla-in a hril seng lo
Van aia sang aw a zauzia, Sual hmun thim ber pawh a thleng zo
Sual bawih ata lungngai mangang, A fapa a pe a
Boral fate muanna a pe, An sual a ngaidam bawk

Tuifinriat zawng hlo tui chang se, Ziakna atan thing zar tinreng
Lehkha phekah Van khi chang se, Ziaktu atan chuan mitin reng
A hmangaihna ziak dawn ila, A kang zo ngei ange
A leng dawn lo, a hlai tawk lo, An hril seng chuang lawng e

Chawlh hahthlak..!!!

2009-11-05T04:09:00.000-08:00

Sap ho chuan, "Miin hna a thawh rim viau chuan chawlh a la ngei tur a ni" an ti thin an ti a, chumi chang chawi chuan chawl ve ila tiin Zoram lam panin ka thlawk haw ve vau vau a, mahse chawlh hman meuh chu rin aiin a lo hahthlak daih mai.

Ni 3 October-ah Maputo chhuahsanin zanlaiah Mumbai ka thleng a, Chhungte, Pa Rama, Nu Kawli Manuni leh Zomuana ten min lo hmuak, rei pawh awm lo-in Kolkatta lam-ah ka thlawhsan leh nul nul a, zanlai laia hah taka min lo hmuaktu te chu an zahawm duh ang reng hle. Kolkatta pawh tluang taka thlengin thiante nen chawhlui te kan kilho a, ka hlim tan hle, mahni rama awm ang maiin ka ri le lu tawh.

Ni 5 October chuan Zoram ngei-ah chuan ka han tum ta, a nawm dan a dangdai ngei mai. Mite chuan kumpui linglet mai ni lo, thangkhat lian lai pawh ani mai thei Zoram an chhuahsan a, kei ve chuan kum khat erh awrh ka chhuahsan hnu-ah ngai takin ka haw a ni a, Lengpui atanga kan han haw te chu, "E Khai, kan kawngte chu a lo zimin a lo va han chhe em!!!" ka'n ti tan pang a, a ni lah taka a kualin a zim si a, motor a tam ve si a, ni danga hlau eih ngai lo khan ka han hlau thar leh deuh vel a, hei vang hi a ni ngei ang sap lo kal thin ho hian Mizoram kawng an sawi nasat theih em em tiin kan ti ti chho bawrh bawrh a. Min rawn hruaitu Mafaka chuan, Hman deuha Sap ka hruai pakhat phei chuan a mit a hup asin a ti.

In kan thleng chu min hmuak tura an lo chhuahbo hlanin kan in chu an rawk chu lo niin. Gas bur 1, Consumer card 3, DVD player, Digital Camera, towel leh Bag te an lo la. Tui pump khawl pawh lak mai tuin Bag-a thun sa ap-in TV bulah a lo la in hung a, an hmanhmawh phelengin an la theihnghilh ta nge ni dawn ni???

Upa-in "Sawm thah ni-ah pawh vawi khat lungngaih a awm chawk" an lo ti mathlawn lo-in hlim takin In ka thleng chu kan ri chel chul ang chu tih nak alaiin kan thil Bo buaiin kan han buai leh rih a, tum lutuk loin Bawngkawn Police station-ah chuan kan han report a, anni lah an hmanhmawh lem lo khawp mai leh nghal. A ni hnihna velah kan inhnuai luahtu tlangval-in Digital Camera hralh an awm a, in ta a ni em va en teh u a ti a, thenkhatin an zu enzui chu a leitute chuan man to zawkin an lo hralh chhawng leh tawh a lo ni a, a pianhmangte an sawi danin kan ta ngei niin kan hria a, kan han zawng kual leh a. Police hnenah report-in a zuar hmasa bertu te inah chuan an han kal a, ani a lo awm lo, a Bialnu Kolasib-ah a zin a, a kal ve a niang an ti a, Police ho chuan nangman zu be chhin teh min ti, ka duh i-khaw si lo, anmahni chuan an zu be ta nge nge a, ani chuan Kan inhmu lo reng reng a lo ti si.

Kan misualpa chu ni 12-ah pawh chuan an la zawng ta zak zak a, tlai lamah chuan Aizawl lam-ah ni 8 khan an lo man daih tawh a ni tih kan hre ta a, thaw khat chu a veng deuh huai a, mahse kan thil ru-tu chu a ni ngei em tih zu fiaha zu dawp turin Police te chu an kal ang a, an zu ti fel mai ang chu tih laiin engmah an ti ta hlei lo a, vawiin thleng-in chanchin engmah kan la hre zui ta lo.

An hnu chhui tur pawh dik tak chuan keimahni kawhhmuh a ni a, a misuala ber an man hma-in Aizawl lamah an lo man tawh leh nghal nen, chumi bawhzui chu thil har vak pawh ni tawh lo-a kan hriat laiin engmah reng reng an ti lo chu mak leh hrilhhaithlak, thinrimthlak tak bawk si a ni. Bawngkawn Station lam kan biak lahin a case i\o Assembly-ah a duty an ti, amah puitu lah Darlawnah a zin an ti thul a mak thei khawp mai, Ka nu phei chuan, "Ka phone chhen dawn, an hmuhchhuah hma chu ka phone zel ang" a ti. Chung vel chu ka buaina pakhat a ni.

Thiantha leh chhungkhatten min lo ngai der-in chaw ei-ah te min han sawm ve a, a chang chuan kan thil bo vel chungchangah rilru pangkhing taka ka kal chang a awm a. chaw ei kham veleh thut pawh thu muang hman lo-a baklenga ka tlan haw chang a awm bawk.

Sunday-ah report pe tur leh thuchah sawi tur ten Corps hrang hrangin min lo sawm ve bawk a, ka chhuak reng mai bawk, kei akar thusawi hi tu tan mah malsawmna a ni lo ang tih hre reng chungin lawm tak-in ka kal zel a, vawi li lai chu thu pawh ka sawi tak kha. A hlimawmin a lawmawm khawp mai.

Ni 28-ah haw a lo hun leh ta reng a, dan pangngai te-in Mumbai chu zanlaiah bawk chuan ka thleng thla leh a, Nu Kawli leh a thuihhruaite ho, ka u fanu Manuni nen, kan nau Chhuansanga leh thianpa Zomuana te chuan min lo hmuak leh thap a, kar lo-ah ka tihdan pangngai bawkin ka thlawhsan leh ta vek hlawm a.

Mumbai atanga International flight-a chhuah hi a foreign ruih tawh mai hian ka hre thin, mi an tam ngang mai thin si, Kolkatta atanga connecting flight nei ka ni bawk si a, ka hnung hle. Ka hma-ah mi 1, hnungah 3, kan vaiin 5 kan la awm tihah chuan seat a full an rawn ti ta mai, a manganthlak leh ta khawp mai a, kan han buai deuh laih laih a, Mauritius lam kal turah kan thawn kual mai ang che u, Johannesburg chu dar 12-ah in thleng hman tho ang, an ti a, J´berg - Maputo flight chu dar 5pm a nih avangin ka hman tho turah ka in ngai a, Mauritius lam thlawhna ah chuan min beng liam leh ta a.

Mauritius kan thleng chu, J´berg kal tur thlawhna a lo inpeih leh ut tawh mai lo niin, keini ho chauh chu min lo nghak tawh a, hmanhmawh takin kan han in check vel leh zung zung a, security te pawh chuan anni kha tih hmasak tir rawh u an ti zel a, kan hming chu an lo lam lauh lauh tawh mai a, kan han in check fel a, Thlawhna bawkah chuan J´berg lam pan turin kan lut leh ta a, ka kalpui Sap nu pakhat chuan "Kan thiam loh a ni hleinem.. a pawi lo e" a lo ti ve bai bai a. J´berg kan thlen chuan dar 12 chu a ri chiah a, ka next flight chu ka nghak leh ta a, buaina dang ka la nei, ka bungrua kha J´berg thleng chauh an book thei si a, ngaihven ngei a ngai dawn a, counter ah lah chuan an la thu si lo, kal dawn tepah ka transfer fel thei ta chauh a, buaina a awm ang tih kha ka hlau sa reng a..

Rin ang ngeiin Maputo kan thleng chu ka bungrua a lo thleng ta hlek lo mai, hawihai rap, mahse midang 5 emaw vel lai pawh chu an buangrua a thleng lo a, next flight ah an rawn thawn a, lo nghak rawh u an ti, min hmuaktu te ka va zawng, ka va hmu mai lo, phone ka tum lahin ka Phone battery a ral thak nun pawh nung thei si lo, Security-ah chuan phone hman ka dil, anni lah an lo strick em em zui, phone hman an phal awzawng lo, mahse mi pakhat chuan hman tur kan zawnpui ang che a ti a, an office pakhatah chuan min luhpui a, thiante chu kan phone thei ta, anni lah inchung lamah an lo awm niin, an rawn chhuk thla ta vat a. Bungrua pawh chu dar 9;30pm velah chuan a lo thleng ta a, hlim tak chuan kan haw ta nal nal a.

In ka thleng chu Hauhuk kah thlak ang dera mut tum nak alaiin ka bungrua an lo theh thal kual nasa lutukin an ti silawng a, a ke a chhe deuh vek a, a huh hnup bawk si, loh theih lohin ka han phelh darh leh a, ka chau nen, ka mu chu ka mu tui ngei mai.

A tuk zing dar 7-a thiante rawn phone pawh ka chhang tha peih meuh lo a, dar 11-ah kan hotupan min rawn phone leh pawn ka la mu a, I la mu a ni maw ati pawh Aw tiin ka chhang hmiah a, "E khai, chawl hahdam rih rawh" a ti, kei lah chakai thi khai ang hnuang ka la ni mai "Ka chawlh hmang chu chawlh hahdam ka ngai a nih hi" tiin ka mu leh ta reng a.

"Chawlhna nuam Krista-ah
Hlimna kim Krista chu
Innghahna nei lote, innghahna a ni si"

tih hi ka sa ka sa pek a, Lal Isua ngeiin, "Nangni thawkrim leh phurrit phur zawng zawngte u, lokal ula, keiman ka chawlhtir ang che u" a ti a, Lal Isua-ah lo hi chuan Chawlhna tak tak a lo awm lo a nih hi tihte ka ngaihtuah kai ta zel a...

Khuangchawi thla...

2009-10-16T07:53:00.000-07:00

“Zanin thlâ a êng hle mai
Kuli nan a tha, a hahthlak na-a
Thim aiin a nuam..”

Buai lai-a sipai puak phur ho khan khi hla khi an sa thin a ni awm e, puak phurh chu ninawm viau mah se thlâ a han en phung mai chuan nuam an tih phahin an hah a dam phah sawng sawngte pawh ni fahmiang. Khatih lai khan tunlaia kan Electric eng ang hi la nei hek lo le, an eng neih chhun bati siam chawp chu in lamah pawh an chhi tha phal meuh lo a, nula tlangval inrim pawh mei engah an inrim mai thin. Tlangval zakzum deuh phei chu mei engah thu ngam lo-in tuium hunna bul thim lai an han chuh a, nula bengvar deuh chuan.. “Khai, i awmna a thim e mai, kan hmu thei hleinem che, lo thu hnai ve rawh..” tiin tleirawl zakzum tak chu an ko hnai chawk bawk.

Chutih laiin German râl rûn turin tlangval rual chu an chhuak ta teuh mai a, an bialnu te an ngaih ve hlawm dawn teh lul vei nen, ziak thiam lah kha an la tlem nasa mai si, tlangval, ral runa kal lunglengte chuan an thian ziak thiamte chu an han ruai ve leh chhawng a, thiam leh thiam lo-a kutziak kawi ngil ngela a arthai chu nula chuan engemaw chen hnu-ah a han dawng ve ta a, a lawm ngei mai.

Chhun lamah hnathawka chhuak reng an ni a, thiante zingah lehkhathawn chhiar a rem si lo, losul haw hnu-ah mah chuan inleng haw rem hnu-ah lukhama a lehkhathawn dah that chu mei engah rem leh rem lo-in a han chhiar ta a, bih uluk a ngai thin ngei mai. Lunglen a hnem nge a tizual sauh tih pawh hriat thiam a har ngawt ta ve ang, hei vang hi ni maw he hla an phuahna chhan hi-

“I thaikawi bawngte kan lo hmu a
Puan ang kan zar der e, kan run in chhungah
Ngaihruatin lunglen a hril chang chang”

Hetiang hi an dinhmun a nih miau avangin an tan Thla êng kha a va pawimawh teh lul ngai em!!! October thla bial hi a eng bik a ni tihte pawh an lo hriat phah thlip thlep a, chu October thla eng ngei mai chu Khuangchawi turte pawhin thlahlelin khuang an lo chawi thin ni awm ania, hei vang hi ni maw Khuangchawi thla an lo tih le??? Chu thla eng chu lawmin a thim lai lai pawh an lo chuh ve thin ngei ang le...

Chung turni chu thlang kawlah liamin Chhawrthlapui êng mawi tak chuan khuang a rawn chawi a, a êng mawi no ngei mai, van lah chu a thiang kuk mai a, arsi a pe eng un mai bawk nen, chu Khuangchawi thla eng hnuaiah chuan mi awmthei deuhin khuang an chawi a, chawng an chen a, nula tlangval an chai a, nuam an tiin an hlim em em mai. Leng zawng an hlim tak meuh a, an khuangchawi hman nawm zia chu a kum leh vahsan lak lai pawhin a khaw ti ti tui ber a la ni ta zel lo thei lo.

Chu Khuangchawi thla eng no ruai mai lawm-a lam thin kan pi/pute chuan mual an liam zo tawh a, a hunlai hre phak thangtharte zingah kan awm ta lo. Nimahsela, vawiin thlenga danglam lo chu, chu thla eng ngei chu a la ni fan a, khua a thim zawh poh leh thla chu a eng mawi ting mai thin a lo ni..... He Khuangchawi thla êng ang bawk hi kan hringnun pawh hi ni thinin zu hria ia!!!!

Africa - A thim chhah lai!!!

2009-09-24T05:13:00.000-07:00

Kawngpui, alkatra luan chu pensanin hnimbuk kara kawng tereuhte awmah chuan kan lut a, hnimbuk kan kal pelh chuan kawng atanga hmuh mai phak lohah khua a lo awm reng mai, he hmunah hian mi hausa ten khawvel hi ka ta emaw tia nuam tinreng an chen laiin mual eng hmu ve pha lo mi tam tak an lo khawsa ve mek a ni.

Kawng chu vaivut chhah takin a khat tlat a, kephah pil dawn dawnin kan dai thawih thawih mai, heng kawngah hian vaivut hian kal a ti harsa hle. Chu kawng ngeiah chuan nitin kalin, an duhtakte nen pawh an lo inhmu ve thin a, an hnathawhna panna kawng a ni a, khawpuiah leh khawdang leh an thenawmah an kal dawn pawhin he kawng tho hi an lo zawh thin. He kawng vaivut sen thurin a bawh khah vek hi an nitin chakkhai lam nana an hman rim ber a ni ve tlat.

Chhungkaw hrang hrang chu ram bial bik neiin in-te 4/5 emaw an sa thlih thliah a, chung inte chu zana an riah nan an hmang a, chaw erawh pawn lamah an chhum mai thin. Inleng an neih pawhin pawnah an inkawm a, inchhung chu an in hmuhpui tam lo hle awm e. Tin,Hmeichhia-in nau a neihin thla 3 chhung chu a naute nen pawnah an riak tur a ni an ti, duat ngai hmeichhe nausen pawm chu pawn-ah a mu a, a khawngaihthlak hle.

(Pawnah mei an chhem a, rawng an bawl mai thin.)

Naupangte chuan pheikhawk bun tur nei hek lo, an ke khir chat bir ber chuan vaivut an dai thawih thawih a, kelawnga kal a nih miau avangin rannung seh thei apui a tam a, hei vang tak hian Uihli sehna mai mai pawh a pan a, thenkhat phei chuan an thihpui hial mai. Damdawiin lian an khaw hnaiah a awm lo, Sub centre hnai ber pan turin km 12 emaw vel kal a ngai a, chapa(bus) chuan man Mt 20/- a ni, an han thleng ta teh cheng a, sub centre-a duty te chuan hetiang damdawi kan nei lo ti-a an lo hnar loh leh mi an tam, lo nghak rawh u tiin thingtlang atanga lokal te chu an ngaihthah em em mai a ni tih an sawi, an tan sum neih a harsat tehlul vei nen. Heng uihli seh atan hian damdawi an nei lo a, Baygon an tih mai Insect killer hi an spray thin a ni awm e, a na a chhawk em ni ti-a kan zawh chuan, “a thak lutuk tur a ti nep deuh a” an ti. “Hetiang in spray chuan vun tan hian a tha lo ang,” ka ti ve ringawt na-a a thlakna tur damdawi ka pe thei chuang si lo, an hman theih hnaivai ber chu insect killer kha a ni tlat, an hmang leh thin ang.

(Naupang ke, uihli sehna hmuamhma)

An thawmhnaw mai bakah an taksa a bal hle, han tawh nak alaiin hmuh nuam an ni lo khawp mai. Intihfaina turin Tui duh tawk nei miau hek lo le. Thenkhat chuan tuichhunchhuah an lai chawp a, hei hi Meter 20 chuangte kan lai an ti, a thuk khawp mai,mi nazawng neih theih a ni lo, NGO thenkhat chuan a laihna hmanruate pe-in hmun thenkhatah chuan Tui pump te pawh an siam, mahse hei hian khawtlang a chawm zo lo nasa, tuichhunchhuah pakhat hi chhungkaw engemawzatin an inhman tawm a ni.(An tuichhunchhuah laih hi a thuk khawp mai)

Power supply phei chu vana rah ang a ni, an mumangah pawh an la nei chhin lo ang, an transportation neih that ber pawh thirsakawr a ni a, a chhia repair thiamte hi an luck ve thin khawp mai. An tan HIV/AIDS chu a hlauhawm loh letling zawk, thil dang ngaihtuah tur apui an ngah lutuk tlat.

(An khaw cycle repairing workshop..)

Damdawi lam an nei chau bawk, invenna engmah nei bawk hek lo, Family Planning te chu hnai lo mai hi a ni a, an nawmchen vena awm chhun Sex chu dan rual pawh a ni lo, invenna nei hek lo le, kumchhirin fa an hring a, enkawl zo hek lo, chaw tha hmu lo naupang, ring rek ngit nget, dul kiar ling leng fa an nei teuh mai ani.(Hemite nupa hian fa 8 an nei, 2 dang an lo leng bo hlauh a ni)

He ram chhunga chengte nun hi a harsa, anmahni han kawm phei chuan an awki te hi a hniam chal mai bawk si a, an khawngaihthlak khawp mai. Chutih laiin mi tam zawk chu Pathian pawh hre lo, Pathian hming la lam reng reng lote an ni si. Ngaihtuah an ti thuiin hengte hi Pathian hmangaihte vek an ni si a, engvanginnge hetianga rethei tur hian a siam bik le tih mai palh awl a ni. Mi thenkhat ka kawmte chuan Africa mite hian Pathian anchhia an dawng niin an inngai ve tlat bawk. Eng tin tak awm zel ang maw le..????

"Thim chhahna lai ber pawh
A lo Eng thin,
A kutan an awm vek, Ama relin..."

Vanduai - Vannei ..

2009-09-17T00:49:00.000-07:00

Kar khat chhung ngawt Seminar neia kan tawmbo hnu-ah ka han lang leh a, seminar report ziah a chakawm rualin a lungchhiatthlak lam hian tun tum chu bul ka'n tan teh ang. Ka chunga thil thleng hi in hriat loh ka duh lo ve..

Kan Seminar hi Maputo atanga Km 700 chuang hreta hla Volanculo Province a nei kan ni a, Ni 8th September zing lam dar 6:45 velah Maputo atangin motor pali-inzuiin officer 17 kan chuang a, motor hmasa ber dawttu-ah keini kan tlan a, kan tluang khawp mai, kawng chanve-a chhun chaw faka kan ding leh zun ram thiara kan din zeuh loh chu kan tlan char char a, Vilanculo pawh dar 5pmah chuan kan thleng ngei turah kan in ngai a.

Vilanculo chu minute 15 emaw vel lek tlan a ni tawh ang tihah chuan kan motor ke hma veilam chu a puak ta mai a, kawng sirah chuan kan leng phei chawn mai, driver chuan theih tawp chhuaha controlin kawngpuiah a kual lut leh lai takin a ke hnung veilam bawk chu a puak leh ta a, thawngaleivir nuai nawk ang mai hian kawnglaiah kan motor chu a vingvial kual ta a, driver tana control ngaihna awm miah lo-in a in freeturn tawp mai a, chumi hnu chuan a vang zawngin a tawlh ta ruak ruak mai a, driver chuan steering chelhin a veng tawp a, a bak tih theih a nei tawh lo, a vang zawnga kawngpui sir lehlam kan tawlh phei hnu chuan a back zawngin engemaw chen a tawlh leh ta a, a ke puahna a tanga meter 30 emaw zeta hla-ah chuan kan kalna lam hawi hu chungin kawng sir chep zetah rem lo zetin a ding ta hram a, a khu chum chum a, motor ke kang rim chu a nam chum chum mai a ni.

He thil thlen chhung hi mitkhap kar lek tak tak a ni, a rang khawp a, keini a chhunga chuangte chuan kan dinhmun hlauhawmzia kha kan ngaihtuah hman lo mai pawh ni lo-in engtin nge kan awm tih kha kan hre hman lo reng reng a, hlau thlabara awrawl chhuah pawh kan awm lo, kan ngawi thap mai nia!!!! Hlauh ngaihna pawh kan hre lo a ni teh chek a niang, kei phei chu a front seata thu ka ni bawk a, driver chu puih ka han tum ta dah a, steering chu ka lo vuan ve ran a, a sawngsawhlawt lem hlei lo a.

Kan han ding fel chu kan hnunga mite an rawn tlan khawm a, khatia kan han vir vel lai khan engtin tak awm ang maw tiin kan hnungah chuan dingin min lo thlir tawp mai a ni awm a, a then an lo tawngtai mawlh mawlh bawk a, kan hnung chiaha tlan Capt. Felix phei chuan, “Deus, Deus, ajuda.. Beira, Beira Cuidado..”tiin Pathian leh kan motor khalhtu Beira hming chu a lo lam kawp sek mai a ni awm e.

Kan chetsualna hmunah hian 2002 August 16-khan Officer rual an lo chesual tawhin mi pakhatin nunna a chan a, a hmun ngaia hetiang kan han tawng chu an thin a thawng hlawm tak zet a, kan dinfel hnu chuan Nu-ho phei chu an rawn tlan phei a, min kuah chung chung a, mittui tla chungin, “Deus é bom, Deus é bom” an ti mawlh mawlh mai a ni. Mipui an rawn pung khawm chak khawp a, kan ri nuai nuai a, kan awm dan an han sawi chu kan thin a thawng ve leh hnuhnawh khawp mai.

Motor ke-te kan thlak a, tawngtaina te kan neih hnu-ah kan tlan leh ta a ni. Hla-ah "Keinin vanduaina-ah kan ruat, a hmangaihna lantirtu" tiin kan sa thin a, a dik hlein ka hria. Vanduaina kan tawh na-a Pathian min venna leh humhimna kan tawn hi a ropui lutuk a, Pathian kutin min chhanchhuak a ni kan ti lo thei lo. Upa-in Vanduai-Vannei an lo ti thin a, chutiang deuh chu niin ka hria.

(Kan motor ke hniak ka hmuh hnu hian kan awmdan ka hrethiam ve chiah!!)

Buai ve tawk a ni!!!!

2009-09-04T07:39:00.000-07:00

Vawiin chu mahni tawkah ka buai ve lutuk a, blog pawh ka update lo mai dawn emaw ni ka ti a, ka han lut hram a ni. Helama ka awm laiin saw lamin min ko a, saw lama ka awm laiin helamah puih an lo ngai leh bawk nen. Mawngvawmba ang sekin ka lutin ka chhuak a, a buaithlak khawp mai. Weekend nuam takin hmang vek mai teh u. Kar leh 8th - 15th September chhung zawng hian Seminar kan nei dawn leh nghal a, kan inhmu har leh dawn bawk si.

Vaukhanna.

2009-08-28T05:37:00.000-07:00

Ka Fanu,

Misualin an sawm che chuan, zawm suh
“Hawh teh, nawm chen tumin i fawr teh ang,
A vang engmah awm lovin damlai par i chen dun ang
Tichuan, kumtluang runlum nuthai atan ka pawm nang che”
Ti-a an sawm che chuan zui suh

I par mawina a thliah hun-ah
Ani, i par zu thlum a dawt zawh hnu-ah chuan
Puan ang hnawlin lunglai a hersan che’nga
Lam ang let tura i koh a, tanpui i dil laiin -
“Zal tura min thlem lai khan
In runsang kai min tiam kha,” ti-a i ngen pawhin
“Thlemsam run sang kaipui ai chuan,
Thliah loh tleitir thaleng dang buan ang pawm nang e,
Tiin a chhang ang che.

Chutih hunah chuan inchhirin ban a pel ang a,
Luaithli nulin ruam tin fang mah la
A sawt tawh lo - "A tlai lu ta,"
Tiin lu an thin khum ang che.

I Thianghlimna leh Zahawmna chu engtika hman tur nge ni??
I Pasal khum laizawlah ngei le…

Prison-break

2009-08-21T05:46:00.000-07:00

Prison-break hi hmuhnawm ka ti khawp a, nikum khan ka hre ve chauh nghe nghe a, a han tawp takah chuan season khatna atangin ka en nawn leh vel a, vawi hnih ngawt a Episode pum hi ka en chhuak, tunlai chu Aizawl local channel-ah mizotawngin an let a, an chhuah thin an ti, tunah an la chhuah em ka hre lo.

Alex Mahone hi tha ka han ti tlat pek a, ka tan thei khawp a, nizan phei chu amah ngei hian min rawn tlawh. (ka mangah ka hmu a!!!!) kan inah a lo leng a, a film kha ka mangphan pah deuh a niang chu mi-in an lo um a, ka lo thukru vel a, a va han buaithlak tak.

Tang tlanchhuak thian ho, Agent fing tak mai Alex Mahone-an an hnu a han chhui vel chu kawng engkimah hian a tlan khalh a ni hrim mai a, chutah a hnu chhuitu ngei buaina danga a inhnamhnawih lai tak mai leh a ni ngei pawh wanted a han ni chho a, SONA hmuna mi sual man tumtu leh a Man tumate an han tang ho leh thap mai kha chu a lungchhiatthlak ngawt mai.

Ziaktu ropui leh lar Shakespeare chuan kan hringnun hi Lemchanna dawhsan mai a ni tiin a lo sawi tawh a, he thu hi dik ti vak lo pawhin kan pawmpui vekin ka ring. Kan nun pum mai hi lemchan mai a ni a, kan chanpual a zawh huna thi mai tur, tawp mai tur vek kan lo ni, he khawvelah hian engmah kan luhpui lo a, kan chhuahpui dawn hek lo. He film-ah vek hian T Bag chuan “Mitin mai hi mahni nihna-in a phuar beh, saltang mai kan ni e..”a ti a, a dik hian ka hre khawp.

Kan hringnun lemchanna-ah hian saltang vek mai kan ni a, he sal tanna atang hian mahni-a inla chhuak thei pawh kan awm lo. Sual saltanna atanga min chhan chhuak thei chu kan Lal Isua chauh hi a lo ni e. Lincoln Burrows khan “Michael, min chhanchhuah hi tum tum suh, ka rawn chhuak dawn chuang lo, he tanina thih hi ka duh zawk e” tiin tan lo khawh fun mai se chuan thi leh thau pawlha chhanchhuah tumtu Michalea tan chuan a huatthlala ngawt ang chu.

Engmah ti thei hlei lo, sual sal tanna atanga chhanchhuaktu awm reng a, Isua hi ka ring duh lo, chhanchhuah ka ngai lo, ti hian ka tling ve tawk ani te hi kan lo tih khum mai thin hlawm a ni a, Isua tan chuan a na duh ngawt ang....

Zalenna Ni ropui

2009-08-14T08:23:00.001-07:00

India mi, India rama piang leh seilian, a lei thatna eia nung thin ni si hian Indian History hi ka hre lo em em mai a, ka zak zawk thin. School kal laiin History hi engtik laimaha ka tui ngai lohna subject a ni mauh mai a, chuvang chuan High School kal thlengin History and Civics kan zir thin kha ka tih chhiat ber subject a ni tluan parh.

Tun hnu-ah inzir lehna hun a awm tawh lo a, Indian History chu ka hre tlem ta ngang mai, hnathawhna ten a lo zir lo nen. Indopui II-na leh Zoram buai te ka hriat pawlh mai mai a, thil pakhatah ka ngai thin.

Tunah, mi ramah ka han awm a, mahni ram chanchin hriat chian a tulzia te ka hre chiang deuh deuh a, Mizoram chanchin mai nilo, India ram chanchin sawi a ngai ta fo mai hi a mangthlak chang a awm thin.

India-ina British awpna atanga chhuak tura a beih nasat zia te chu zir thin mah ila a chip a chiarin ka lo sawi thei lo tawp mai, kan zir thin British East India Company, battle of Buxar, Dalhousie policy Doctrine of Lapse, Quit India Movement etc tihte chu ka hre thawi thiak thuak. Nasa taka an beih hnu-ah 15th August 1947 zanlai-ah India chu Independent Nation a ni ve ta tih chu ka hriat chin a ni mai e. He Zalenna ropui tak sual chhuak tura Mahatma Gandhi te Nehru te beihna chu sawi ve ting tang ila kan ti bawrhbang zo ang tih a hlauhawm avangin a hre zawkte kutah ka dah mai ang.

He Zalenna hi keini Zoram, India chhak kila awm te pawhin kan lawm ve kum tin a, a phuk a phak hre lo hi Zofate zingah kan tam viau mai thei ani tihte ka ngaihtuah mai mai a. Chutih laiin Power leh Water supply tak ngial pawh hnianghnar lo ram hi mahni awmhmun-ah, a kaw tawpah thau khawhin kan tang a, engmah intodelh hlei lo hi kan inla milian a, Chawngchilhi raitu Rulpui ang mai khan, “Min pawt min pawt mah ula, ka meiin kawl a chhun..” te kan lo ti thum ve dut dut lo maw le..?

Pi Lalsangzuali Sailo hla phuah hi ka rilru-ah a rawn awm a, hei hian kumin Independence Day chu ka han lawm ve nghe nghe teh ang, hla tha tak a ni e.

Vanhnuai khuavela thang mawi chuang
India ram zau hnam chitin lenna
Lungrual tein leng zel ila
Chi inthliar leh inchemharnate
Hnutiang chhawnin I pen zel ang

Tuanna mual zawng a dang
A then phaizawl mite
Thenkhat tlangram thlifim kara kan len lai hian
Biahzai ze hrang leh sa hrang bia
Zeize hrang kimtlang pawh dang mah i
Pumkhatin pheilai I khai ang aw

Pu Nehru biahthu ngai teh u
Huan zau pangpar chi hrang kan ni e
Huan pakhata to leh par za
A lei thatna eia nung thin chu
Mawiten kan par vul zel dawn e

Chhak thlang chhim leh hmara lengte
Lungrualten puanzar pakhat hnuaiah
Lainat tanpui thinlung pu-in
Rindan leh chet zia dang mah sela
Hmangaih remna Lal ber rawh se.

Ka chhui phak lo!!!

2009-08-07T05:13:00.000-07:00

Mim ang pianga khawvel eng ka hmuh ve na kha a lo rei ta viau mai, mite angin kum 20 ka nih khan fa lo nei ta ila, ka fa pawh kum 10 lai chu a ni tawh ang. Khai... kum ka sawi leh ta.

Chutia him dam taka piang ve ta chu thing delh loh, lung delh loh ka lo seilian ve zel a, nu leh pa-te hnathawh avangin hmun hrang hrangah kan awm kual nasa khawp a, thian bulbal leh thian nghet pawh nei thei lo-in Zawhte no nei ang maiin kan insuan reng a, ka khawvel chu ka hmang kual khawp mai. Ka pianna chu Zobawk (Lunglei bul) a ni a, hmun hrang hrangah ka mur a ni deuh ber mai. He ka murna hmun hrang hrangah hian mihring dang ang bawkin mi chi hrang hrang ka hmu-in ka tawng ve bawk.

Tichuan, kum engemaw chen chu Khawvel-ah chuan ka ping pei kual vel a, a changin ka lawm a, a changin ka lungngai thin.

B.Com kan zir laiin Business Mathematics-ah theory in Computer hi tlem azawng kan zir a, ka thiam lo nasa mai, khata kan zir a ka la hriat reng awm chhun chu Arithmetic Logic Unit (ALU) tih leh Central Processing Unit (CPU) tih hi a ni a, a bak chu kan zirlai kha ka tangkaipui tak pawh ka hre lo. Khatih lai khan practical phei chu kan khawih miah lo.

Engemaw chen hnu-ah hnathawhna avangin Computer ka hnimhnai ve tan a, tunlai angin Computer zirna a la tam lo, tin zirna hun pawh kan nei lem lo, hnathawhna ah khan kan pu-in tlem azawng a hman dan kha min hrilh a, zo tawng a thiam lo em em zui, Mouse te kha ka vuan de de a, min han zirtir ve chuan mouse kha nghet deuhin hum rawh, a pawi lo, te a ti, hum dan tawk thiam a har ngei mai. Zawite-a ka tawlh de de amaw ka tih pawh-in a cursor kha a tawlh zut zut zel mai si, a chang-in khawiah nge a awm ka hmu mai lo thin, mouse hman mawlh mai kha a har thin ngei mai, chutih rualin short cut key ka la hre der bawk si lo. Account lama thawk kan ni bawk a, Exel ka zir hmasa ber a, ka buai thei hle. A chang lahin hriat loh laiin scroll bar lo hmet palh, hla tawkah a lo in scroll, ka hnathawh lai zawng zawng bo ta emaw tiin ka buai thin, Pu-te ko chul zel, an han scroll let leh a, buaithlak thei mep mep, tun hnu-a hetianga buai ka hmuh hian ka in hrechhuak thin. Buaina kha a ho thei teh e, a ho tih lah kan hre der si lo.

He khawl ropui tak hi mite chuan Computer World tiin an lo vuah dim diam tawh a, he Khawvel thar hmang hian thil ropui tak tak an ti a, hna ropui tak tak an thawk a, khawvel pawh tichhe thei khawp hiala hlauhawm nia sawi Nuclear Bomb te Atom bomb siam nante an lo hmang a, a va lo ropui tak em. Kei pawhin ka Khawvel Pahnihna ka ti ve mai.

Chutiang chuan mahni-in ka han arkhawthimdai chho ve nawk nawk a, risk lah ka risk hnem. Tun thleng hian zirna tak tak chu ka la nei ta chuang lo a, a tha lo ang reng khawp mai, nitin hriat belh tur a awm zel a, han luhchilh laklawh chuan a lo nuam khawp mai he khawvel hi. A ropui a, thil engkim mai ti thei hialin an sawi thin reng bawk a. Engkim mai hi a awm a, kut zungtangin hmehna tereuhte kan hmet a, khawvel dang dangah kan pakai zung zung mai chu a ni si a. He ka Khawvel Pahnihna ka hmelhriat tirh hi chuan a tangkaina tur angin ka la hmang thiam tak tak lo hle, tunah erawh kan hna tinreng thawh nan kan hmang ta mai chu a ni si a.

1998/9 vel bawr chho khan an han sawi hlauhawm khawp a, Khawvel a tawp dawn, Computer pawhin kum 2000 bak a hmu tawh lo an han ti chu awmhmunah kan lo thaw ve kawih kawih a, 2000 kum te kha nghahhlelh vang ni hauh lo khan tlumtea thlir takin kan thlir a nih kha, khawvel a tawp mai ring kha an tam em alawm.

Thenkhat lahin Computer ngei chu Sakawlh ang hialin an lo chhuah bawk. Nimahsela, a hriaten an han hrilhfiah a, computer-a date te chu an programme tha ang a, a awm leh mai dawn a ni an ti a, khawvel pawh chu tawp ta hlei lo, a kal ngaiin a kal buk buk reng a, a chhunga cheng te hian kan tlinlo a, nitin kan invui liam reng zawk chu a ni si a. Sakawlh tih pawh hi Ramsa hlauhawm, ki deuh ber bur, meng sen rem rum hmuh-a hmuh kan tum lai hian keimahni theuhah hian he sakawlh hi a awm zawk a ni lo maw, nitin hian he sakawlh kan chhunga awm hian min bei reng thin zawk a ni lo’m ni?

Chutiang chuan kum 2000 hnu lam te chu Computer chuan a lo la hmu thei nasa mai, a siamtute siam ang ang kha computer hmuh dan chu a ni mai a, a Khawl-a ai mah chuan a siamtu leh thununtu chu he mihring thluak tho hi a lo ni zawk si. Chu mihring ngei chu Pathianin duh taka a siamte kan la ni leh nghal, heng zawng zawng siamtu Pathian chu eng ang fakau-a ropui nge ni ang tih hi chhut chhuah rual a lo ni lo e…

I thiltih makte hi ka ngaihtuah chang hian
Hriatna famkim neitu thil tih a ni
Mihring finna chuan a hre zo dawn lo
A rilzia ka chhui phak lo.

Chhan loh aiah...!!!

2009-07-31T06:22:00.001-07:00

Khaw pakhat Sundle School exam pawh kha an thiam lo lutuk a, ka-a chhang an ni bawk si.. "Tu nge Israel Lal hmasa ber?" tih zawhna kha Pitar pakhat khan "Chhan loh aiah Petera ti mai ang.." a ti, Pitar pakhat thung kha chuan a lo hre khawp mai a, "Saula.." a ti, a zawttupa chuan "Dik lutuk, mark 10." a ti hman tawh a, Pitarte chuan inti hre tak mai khan, "Paula an ti bawk" a'n tih leh zauh pek a, a mark hmuh sa a paih then phah.

Tunlai chu kei pawh hi Zawlnei da lam ang mai ka ni, ka khawro ru riau a, thu ziah ka tum ve lah hi a turh tlat zel a, blog pawh ka update hlei thei lo, chutih rualin rial rei ka hreh ve khanglang si. Naktukah ka update ang ka ti kar tluan a, Pachhe kumtiam ang maiin ka zu zi leh thin. Mi blog erawh ka tlawh peih dun dun fu, ka leng kual a, mi thuziak tha tak tak ka chhiar, an van ziak tha-in ziah tur an va hre tak em, hengte chu kei pawhin lo ngaihtuah chhuah awm te ka inti.

Tunlai taka ka dinhmun chu kan Zoram politics dinhmun nente hian ka in tehkhin deuh reuh. Sawrkar thar apiangin mipui hnenah engemaw an tiam a, an lal hun chhung a rei tawk lo nge an thu tiam an ti hlawhtling hman lo thin, tun sawrkar pawh hian eng eng emaw chu an tiam leh ngei mai a, ti hlawhtling tak maw..???? Laiking pawnpui tah tur ang mai hi a ni leh ang tihte ka ngaihtuah. Mahse Politics dinhmun nen em chuan kan in ang leh si lo a nih hi, tu hnenah mah engmah ka tiam ve hleinem mawle..!!!

A.. duh tawk phawt teh ang, tun tum chu Chhan loh aiah...

Chhimbâl...

2009-07-16T06:51:00.000-07:00

Chhimbâl mawi zia hi chu kan hre theuh awm e, eng vanga Hmarbâl ti lo-a Chhimbâl kan han tih tlat na chhan hi ni ang tih erawh kan ngaihtuah ngai awm lo e, kei pawh ka ngaihtuah ngai lo, a chhan pawh ka hre lo a, tun tumah hian kan chhui dawn na hek lo....

Ruah a sur buan buan a, kar khat tawp maite khua a han cheng a, khawlai a diak pur mai. Naktuk chuan khua a tha tawh em ang chu kan ti tlai tin a, kut hnathawka eizawngte tan phei chuan a chang chuan a huatthlala thei hle ang. School naupangte tan lah school kal ti nuamlo rawih a lo ni bawk. Khawlai len a nuam lo a, hnathawh a phurawm loh a, in-a awm chawrh chawrh lah a ninawm riau mai bawk si. Thawmhnaw suk a ro thei na hek lo, chawmpangkar zawng zawng a hnawm churh a, thawmhnaw bal suk loh hlek lah a lo hmuar hman zel bawk nen!!! Chhûm a lo zing a, khaw hawi a tawi tuk mai, piah lawka tlangte pawh a fiah tawh lo. Hei vang hi a ni ngei ang Lalsangzuali Sailo chuan heti hian a lo phuah chhuah ni...

Zamualpui saw ka thlir reng laiin
Vanrang chhûmin a rawn tuam dul dul
Thang van zau leh sawmfang a lang lo
Puan ang hlih ka nuam e vanrang chhum zawng...

Chutianga ai ruah cheng kar khat ngawt mai han tawn hnu-ah tlai lama ni tlak hma deuhin ni a lo lang suar suar a, ruah chu a phingphisiau chauhin a sur a, nakin lawkah a reh fel ang tih hriat theih turin ni chu a rawn lang sur a, ni zung chuan thingkungte chu a chhuna, ni zung chu a lang kawkalh ta sung a, a mawi danglam em em mai. Ralkhata tlang lo langah chuan mawi tak maiin Chhimbâl a lo zam ta raih mai bawk a, chutah meuh chuan khua a tha tawh dawn a ni tih kan hria-in kan lawm em em thin a nih kha.

Ruah chuan khawlai bal chu a tlengfai a, chhum kara ni a rawn lang ta phung mai chu khawvel hi a fiah ta kuk mai hian a hriat a, thli thaw te chu a thianghlim a, boruak a tharlam ta vuk mai.

Khuangruahsur leh vanrang chhûm zawngte
A chhem kiang ta chhemdam thli lengin
Thang van zau leh khawtlang zawngte pawh
Fiara tui thiang ianga fimin ka hmu...

Nova hun laia ni 40 leh zan 40 ngawt mai ruah han sur tluk tluk mai kha chu a hrehawm ngawt ang, ruah sur satliah ni mai lo-in hremna ruah a ni leh nghal vei nen. Nimahsela, ruah a ban a, leilung a han lan hnu-ah chuan Pathianin lei tichhe turin tui ka tilet tawh lo ang tiin thu a tiam a, chu a thutiam tih nghehna atan chuan a zamtir ta a ni. He thutiam avang hi a ni ngei ang, fur khawchen laia Chhimbâl a lan chuan khua a tha tawh dawn e kan tih thin.

Genesis 9:13 Chhûmah ka chhimbâl ka zâmtîr a, chu chu kei leh lei kâra thuthlung chhinchhiahna tûr a ni ang, 9:14 Tin, heti hi a ni ang a, lei chunga chhûm ka zâmtîrin chhimbâl chu chhûmah chuan a lang ang a, 9:15 kei leh nangni leh tisa zawng zawng zînga mi thil nung tinrêngte kâra ka thuthlung awm hi ka hre reng ang; tichuan tui chu tisa zawng zawng tiboral tûrin a lo lêt leh tawh lo vang.(Chhimbâl :: 2007. Kan In, Chaltlang atanga ka lak...)

Vawi khatna...

2009-07-08T22:57:00.001-07:00

Thil reng reng hi a vawikhatna awm lo chuan tih hlawtlin theih a ni lo a, chu vawikhatna chu a chang chuan a nuam emaw hlimawm viau thei a, thenkhat erawh hrehawm tak, han tih zui a nuam chho leh hlimawm chho a awm a. Tin, thil thenkhat chu a vawikhatna-a hlawhtling lo emaw tha vak lo, han tih nawn hnu-a hlawhtling ta leh tha chho ta te a awm bawk a. Hei vang hi a ni ngei ang, sap ho pawhin - "Thil hlawhtling nghal mah suh se, Bei la, bei nawn rawh.."an lo tih na chhan.

U Nula pahnih ka neih avangin kohhran thalai ah leh YMA-ah hian ka in hmang har khawp mai a, u-te ka ring chawt mai thin a, mitthi an awm pawhin thing ka khawn chuan ka hna zo-ah ka inngai hmiah a, In lama kal enah hian ka en lo thin. Vawi khat chu mitthi ina kal turin thianten min rawn sawm ve, dik tak chuan min sawm ve fo a, ka kal lo leh thin a, hemi tum hi chuan ka Ute pawhin kal ve tawh rawh an ti a, ka puan bih tur puan dum pawh min rawn pe, puan ka la bih ngai si lo, puan bih khera kal ngai hian min ti chak lo tel bawk a, kal tum lem lo-in ka thu reng a, kal a hun ta, ka che chang si lo chu kan thianpa pakhat chuan, “Tun bak chu ka sawm tawh lo ang che, I zah loh chuan lo kal suh,” min ti a, ka zak deuh a niang peihlo zetin ka zi chhuak ve ta hram a, puan lah chu ka bih nghet thei na hek lo, ka pen apiang hian a dul zel mai a, ka kawngah chuan ka hum khawm reng mai a, min ti chhangchhe khawp mai.

Mitthi in kan thleng a, mi an lo tam tawh, kan lut ve chu khuangpu hnung langsar tak mai-ah chuan thutna a lo awl, kan han inzep ve, keimah ber kha langsar ta viau hian ka inhre tlat mai a, mi lo thute chu a mal te te in han intawk ila ka zah bik dawn loh nen a huho-a an han thut tak hmurah chuan an zahawm ta em em vek mai a, khatih hun lai khan tuna ka zahtheihlohna zatve tal hi lo nei tawh ila zia deuh tur hi a ni na ale, a ni chai si lo.

Thutna chu kan tawlh kan tawlh a, a tawpah ruang bul hnaite-ah chuan kan thu ta lurh mai, keima biang ngei pawh chu ka hmu phe hlurh hlurh mai. Kan han zai a, zai rin tur nge zai zawih tur pawh ka hrethiam lo, mi mitthi in kal tirten,"Ka zak lutuk a, zai pawh ka zai ngam lo,”an tihte chu ka hre ve ang lawi si a, zah thupna tha ber chu zai deuh vak kha ni maiin ka hria a, hla lah chu ka thiam nasa mai si, zak lo awm takin ka zai ta peng peng a, duh aiin ka zai ring ta mah mahin ka hre nghe nghe. Ka kalpuite chuan I zai ring lutuk min ti a, ka zai loh chuan ngawi reng suh, zai rawh min ti bawk si, an va han sual tak em ve aw… Min bawl tel deuh bawk a ni.

Thingpui sem pawh chu in ngei ngei tur an ti leh pek a, chak lo chung chungin ka han in ve a, a hang a lo ni zui… eng emaw ti ti chuan kan tlingtla ta hram a, ka thil vawikhat tihna-a ka zah ber a ni hial mai thei a ni.

A hnu-ah chuan ka ngaihtuah a, ka u Zaui hnenah, “Mithi in han kal ringawt mai chu aw, a felthlak mang e..” ka ti ta ringawt a, ani lah chuan, “A felthlak tih nachang I hriat chuan I puitling ve tawh tihna a nih chu” min tihsan et a.

Furpui khawcheng...

2009-07-02T23:43:00.000-07:00

Mizote’n sik leh sa hunpui kan then danah hian Nipui, Thlasik, Fur leh Thal kan ti a, heng zingah hian tu pawh mai hian Fur hi kan ankhum hnem ber mai awm asin.

Khawlaiah naupang an infiamin an ri chel chul a, Ui leh Ar-te pawh an tla sap sap mai, thawklehkhatah Van chu a rawn dum ta khuih a, chhum dum a rawn inzial tup tup a, Kawl a phe-in tek a tla a, khawpui a ri dur dur mai bawk, ruahthimpui a sur ngei dawn a nih hi tiin Nu chuan a fate khawlai leng chu haw hmanhmawh turin a au chul a, khawlaiah chuan thliin vaivut a len chum chum a, ruah a la sur tel loh avangin vaivut zingah chuan hnahthel leh bawlhhlawh dang a leng chum chum mai bawk.

Ran neiin an ran an ngaihven a, Arpui no hruai lawi tha duh lo neih phei chuan thin a rim tuk mai thin. Vawkte pawh an awm hmunah Ruahthimpui a lo thawk dawn ti niawm takin an nguk hrut hrut a. Ral khatah chuan Nu-in a fate a au lawng lawng a, Kelte pawh an be el el a, Bawng a lo bu ul ul bawk. Ruah sur chhungin inchhung a lum nuam lo palh ang tih hlau-in Nu chuan rapchungah chuan thing a ha mawlh mawlh a.

Ruah mal lian pui pui chu a rawn tla tan ta phuar phuar mai, hmanhmawh takin in tin chuan an kawngka an kalh nghet sauh sauh a, mahni in theuhah an tawmim ta diak a. Khawlai chu ruah chuan a ti huh tan ta a, kar lovah namen lo-in a rawn haw ta.

Zaleng naunawn run in chhungah
Taptual mawiin tuahmei an kil
Runlum nuthai hraileng awiin
Zate’n an bel kaina run nuam

He hun hi tu tan nge hrehawm ber thin ang le..

Khawlaiah chuan tuihawk a luang ta dum dum a, kal hleihtheih pawh a ni ta lo. Hetih lai hian thenkhat chuan natna tuarin khum an bel a, thawhah vei tan phei chuan natna a ti zualkai duh viau ang -

Awmlai vei laikhum bel tan zawng,
A sei a har tlaini len chu
Lamtluang zau-ah hawktui luang del
Laitual len zawng a har mang e

Hetih hun lai hian hmeichhia chu a awm mai mai ngai chuang lo a, inchhung sekrek khawih tur a la zawng hram thin a nih chu-

Lanu sekrek khawih bang ngai lo
Tahpuan khawn lai a rel ta e

Kei chu hetiang Furpui khawchen lai hian ka lung zu leng tlat thin a!!!!

Thawh belh r'u le..!!!

2009-06-25T05:26:00.000-07:00

Ka post tur hre lo-in a hnuaia mi hi ka han ziak mai mai a nih hi chhiar dik han tum teh, a dang hria chuan thawh belh chur chur theih....

A ã a ã a, a ã hlen ta a ni.
I Ipte chu a ah-a ah ah a va itawm ve
Nang leh keiin mut mawh hnar mawha kan neihna na na na chu
Khualkamlova Khiangkawi ipte akin Kawlkulh khaw kawngkawiah a kal kual a kal kual.
Mo ho lo zo lo haw lo ko lo lo bo lo, Koro kawngbo lo ko lo lo bo lo.
A man to lo lo kha lo la rawh
Tui in in in in-in, in in in puar thin
Zãwng zawng zawngin, Zãwng zawng zawng ãwmna awmna awm an zawng a, Zãwng zawng zawngin Zãwng zawng zawng ãwmna awmna awm an hmu lo
Luiah ka nu ka hmuak ka khup ka nawt
Lungphek tha thler thlawr
Tlanga thing khi thli tha chhem thluk nge thili chhe chhem thluk
Tlang pangah pangang panga a bet
Thul hlui ka phur thul, thul thar ka phur thul
Ka pi chhi kan duh, ka pu chhi kan duh, kan chhung chhungin chhi kan duh
(Updated) Sipaibutukbunkalbungauhngauh - Joseph_L
(Updated) Thuro chho thlawk thla zap rang - chhangte_ll
Zu zawng zawnga zing zu zet zawng - chhangte_ll
Ka pu Buara buar muala Buarchawm bu hualna muala buar kung chu - Fela
Sakawr hur hawi her, lawi hur hawi her - Vaiva
Maimawm mawng mawm ka mawng mawm - Vaiva
Saw awmpawng awngrawp tawh zawk saw, khaw sawm sawn khawm dawrawn mawng pawp thawm tawh zawk sawn dawh tawh zawk rawh aw! - Faka
Vawkte vawkte Vawkte vawkteVawkte vawkte Vawkte vawkte - Aduhi (hahahaha)
Tlang panga pang panga pang pangah pangang panga a bet - illusionare
Sai sa seh sawm sa sawi sel sawi sel suh - Tawia Pachuau
Khita Thing ding ro khi thli tha chhem thluk nge thli chhe chhem thluk - Geminiboyz
Hmawlte ulh kawih hmawlh ulh kawih - Tawia Pachuau
Zemabawka Bawka bawkah Bawka a bawk a, Bawka bawka Bawka bawk chu Bawka bawkin Bawka Bawka bawkah bawk bawk suh a ti bawk a. - Kiamlova
Ka nu ka chhawk, luiah ka khup ka nawt ka nawt - Zaia

Ka piangsual em????

2009-06-12T05:48:00.000-07:00

Hmanni-a ka kut ka tih palh an thuina chu ka en vang vang a, a ser kulh mai, “Chhe hei, ka piangsual zu ni ta reng a…” tiin ka ngaihtuah a, chutia ka ngaihtuah lai chuan Class VIII kan zir laia kan Mizotawng zirlaibu-a Mizo thufing kan zir thin kha ka rilru-ah a rawn lang zawk mai a..

# Uiin a luak a ei leh a, Vawk tuihawkah bawk a inbual leh thin
# Vawkpui pawh a vah a vah chuan ek thing a tawng nge nge
# Lampui chang khatah mi an be chhe ngai lo
# Thenawm do aiin khaw sarih do a thlanawm zawk
# Piangsual hmusit suh, piansualin tlai luat a nei lo

Salvation Army-te hian Fahrahte leh pianphunga rualbanlo te enkawlna hi kan nei hlawm a, Mitdel bikte enkawlna hi Kolasib-ah leh Kalimpongah kan nei a, Kolasib kan awm laiin heng Mitdelte bulah hian kan khawsa hnemin anmahni pawh ka hre chiang ve hlawm khawp mai, kan infiamin kan in chhawnchhaih a, pakhat hming mak deuh mai Lalrambuatsaiha hi a awm a, a hming vang hrim hrim chuan kan chhaih thin a, mitdel a nih vanga hmusita chhaih kan ni hauh lo a, a hming vanga chhaih mai kan ni. Naupangte kan la ni a, “Lalrambuatsaih, chatuan hmun ka chang ve ang a..” tiin kan zai khum thin a, a haw em em mai a, min um vak thin. Ani khaw hmu hlei lo-in min um kha hlauin kan tlanchhe nasa thei hle.

Mitdelte hi an khawhmuh loh vang hi ni maw, an hriatna dang hi a tha riau mai a, min hmu si lo kha kan awmna hi a hre thei em em mai a, vawi khat phei chu kan thiannu Thangpuii hi thing hmunah a dang chep tlat mai a, a mit khaw hmu mang hleilo kha a khap fuk fuk mai a, a phar duu mai bawk si, kan hlau hle, ani phei chu a tap pur mai a, “U Buat, kan chhaih tawh lo ang che...” kan ti chul a, min kalsan ta nge nge a. Chumi hnu chuan kan chhaih ngai tawh lo reng reng.

IITim 3:1-4 ah chuan ti hian kan hmu a, “Tin, hei hi hre rawh, ni hnuhnungahte chuan hun khirh takte a lo awm ang. Mi, mahni inhmangaihtu te, tangka ngainatu te, intivei te, chapo te, Pathian sawichhetu te, nu leh pa thu awih lo te, lawm nachang hre lo te, thianghlim lo te, hmangaihna pianpui nei lo te, huaikawmbawl te, hektu te, insum thei lo te, mi kawlhsen te, tha duh hauh lo te, vervek te, thuhnudawn lo te, inngaihlu te, Pathian hmangaih aia mahni lawmna mai hmangaih zawktu te an ni dawn si”

Taksa him pial, rualbanlohna nei miah lo-te hi a chunga Bible-in a sawi ang rilru pu khi kan ni thin, Mi thenkhat pianphunga rualban lohna nei miah lo mahse piangsual tlat mai hi an awm. Hei hi chu Rilrupiangsual ka ti mai a. Naupang pawisawi hleilo leh engmah pawh la hrethiam lo pawngsual chak tlat maite, mi thil lakruk chak tlat mai te, thiante zinga huaikawmbawl ching, Rotekawlasepa ang maia kawhmawhbawl ching tlat maite, an/kan awm thin. Tin, mi rethei chanai pawh laksak mai hnial lo, ka thatna tur a nih phawt chuan engmah ka pawisa lo ti ni awm taka lak theih apiang la duak duak mai duhte pawh hi awm theih ni awm tak a ni.

Chutiang-ah chuan politician leh rawngbawltu pawh kan bang chuang lo, mitin hi in enfiah kan ngai. Tisa-a piangsual ai mahin rilru piangsualte hi an khawngaihthlak zawk mah awm asin..!!!

Thopa zuanin aw..

2009-06-05T04:59:00.000-07:00

Thil hrethiam har chi ka ni hrim hrim a ni mai thei…

Vantirhkohin Mari hnena “I rai ang a, fapa I hring anga..” a tiha Mari chhanna khan rei tak min tibuai.“Chung chu engtinnge ni ang, Mipa ka nei si lo..” tih tak hi. Vantirhkoh khan i rai ang a ti chauh a, Mari lahin Mipa ka nei si lo a ti leh lawi si a, Mari hian fanu a lo hring reng tawh nge mawni ka ti a, ka rilru hi a buai thei em em mai. PU ka zir lai ni ta-in ka hria ka u-te ti ti ka ngaihthla a, tleirawl pakhat nau pai, nau a pai tih pawh inhre lo chanchin an sawi, ka U thiannu chuan, "A mawl ve reng reng, a thlatin hunbi a neih loha Mipa a neihte chuan in rinhlelh nachang hriat ve mai awm.." a ti a, Mipa nei tih awmzia chu chiang em ema hrilhfiah ang mai hi ka ni.

Mizo upaten “Tumna a san leh tlakna pawh a sang” an tih hi ka hrethiam leh miah pek lo a. Tumna a san viau chuan an tlak vek vek chuan an tla thum tawk a ni mai tih lam zawngin ka lo ngaihtuah thin a, Tumna san pawh tlakna asang a, insawhnat a awl mai mai tih ang zawng-in ka lo hrethiam thin a, a lo ni ikhaw si lo.

Tupawh mai hian hmalam thlirna leh ruahmanna hi kan nei vek mai, mahni dinhmun theuh atanga thlir-in kan ngaihtuahna pawh a in ang lo nuai ang tih a rinawm. Ek tak ngial pawhin TUM chu a nei alawm, tu fa nge hmasawn duh lo awm ang a, tu fa nge hausak leh dinhmun tha-a awm duh lo teh lul ang.

Chu hmabak/hmathlir banphak tur chuan Tumna kha a san phawt a lo ngai reng mai a lo ni. Zirlai exam-in ka fail tho ang tiin lehkha zir duh tlat lo se, a fail nge nge ang. Kha zirlai tho khan “Khawnge, pakhatna ni turin kan bei teh ang” ti se, zirlai thiam lo tak pawh nise, Pakhatna a nih phak loh pawhin a exam tal chu a passed ngei ang. Amah Pu James Dokhuma thukhawchang ang deuhin "Paikawng pawh hi tui paih nana kan hman chuan a sawt lo viau mai thei, mahse a paikawng tal khan a fai phah nge nge thin"

Tun hnaiah Slumdog Millionaire tih India film a rawn lar hluai mai, kei hian ka lo en ve vat pek lo, ka han en ve a, chuti lua-a han lar em em tur anihna pawh ka hre vak hlei lo bawk. Naupang rethei lutukin thawklehkhata sum tam tak a han nei ta thut mai kha ataka thleng pawh nise hahipa sawi tur kha a ni hrim hrim mai. Mahse han ngaihtuah chian chuan zirtir nei tha tak chu a ni phawt mai.

Kha naupang/tleirawlte khan kei, mi rethei, daikil kara tu fa ar-ah loh hian hetiang game lian tham lutuk hi entinnge ka hmachhawn theih ang ti se chuan a hlawhtlinna a hmu tawp lo ang. Engpawh ti ila, kan hmabakah eng hna leh tih tur pawh awm se, huaisen taka hmachhawn a, tawn tlang zel tur kan ni lo'm ni, “Lo neitu thawk rim chu a rah chang hmasatu a ni tur a ni” tiin kan Pathian thu ngei pawhin min hrilh si a. Thopazuanin nge khupsukin kan zuan ang?

Thu puarpawleng

2009-05-28T23:36:00.000-07:00

Tukin chu ka post ka enlet hlawm a, a van sei thei hlawm diah duah tak, tu pa sermon emaw ni se a ninawm ngawt thinin ka ring a ni.

Sermon sawi takah chuan, Pa pakhat sermon pawh kha a bei rei khawp mai a, darkar khat lai a sawi a, a ngaithlatu pakhat chu inah khan Vawiin chu eng thu nge in ngaihthlak? tiin an lo zawt, ani chuan Sual thu tih chauhin a chhang a, Sual thu chu engtinnge an sawi a? an ti leh, ani chuan A do-a do tur a ni awm e.. a ti ringawt e an ti. Darkar khat lai thusawi ngaithla si chuan sawi chhawn tur a nei chaurau khawp mai.

China dawr ka hmu fuh:
Hmanni lunch eia ka chhuak chu ka haw lam China dawr ka hmu fuh a, thawmhnaw nalh deuh deuh tlawm te te-in an lo zuar a, ka kual den den a, hun leh hai ka lo ngaihtuah miah lo a.

Nakinah chuan an nula pakhat hi ka bulah a lo kal a, Excuse me, a rawn ti, an chhun chawl turin dawr an khar duh chu lo niin, (Dar 1pm-ah an chawl a, dar 2-ah an hawng leh thin a lo ni.) ka han hawi chhuak chu thawktu zawng zawng chuan ding chungin min lo en thap tawh a, sorry tih paha chhuah mai loh chu hmabak awm tawh lo. Anni lah chuan Chinese i ni em? min la ti zui, a mihang ho-in min hai chu ka la hrethiam, anmahni chinese leh zelin Emaw, min ti chu mak ve tak a ni.

Englo lo chhuahna:
Hmanlai hian pa pakhat hian Sa Bel a ru a, a ei hma chuan a ek a chhuak ta tlat mai a, hmun pakhatah a bel chu a dah a, a ek san ta a, chutia a ek hlan chuan a sa bel chu a lo bo daih mai a, a thinrim hle. A han zawng chiam dawn a, ani pawhin a ruk ve tho ni bawk si, a ek hlan ber khera bo ni bawk si chu auchhuahpui ngaihna a hre lo hle, ti hian a rak ta chiam mai a ni.. “Tu nge helaia ka englo englo kha, ka englo hlanin lo englo, a englo duh ve leh englo ve se a ni mai a, mi englo sa lo englo te chu a..” a ti ta chiam ringawt a, chuta tang chuan ENGLO tih hi a lo chhuak ta ani tiin mithiam ten sawi lem lo mahse a nih hmel ve riau.

Thil tereuhte atangin...

2009-05-22T00:19:00.000-07:00

Zan khat chu thlipui leh ruahpui a rawn thawk nghek mai a, kawlphe, tek leh khawpui ri-te nen a maka makin a thawk a, kan ram atan chuan a mak hle.

A tuk office kan kal chu le, chhe thei zawng zawng hi a chhia a niang tih mai turin kan chhe nual ta mai. Power supply kan nei lo, Kan internet line a chhe bawk, kan mangang khawp mai.

A siam thiamte kan ko, anni lah an rawn kal mai thei nahek lo, “Pawih hren kang mahin muang marin an tih kha..” tihte chu an hre ve ni awm fahran hian quotation an rawn fax te te a, chu chu keiin ka lo sign a, seal nena kan tih thlap hnu-ah kan thawn let leh a, tuna duh tawha thlam bang pin nghah te chu tih ang vel hi kan ni..!!!! chumi hnu-ah technician an rawn kal chauh teh reng aaa… hotute zinbo lai lo ni vei nen Khawte Lal ang maiin ka vir chuk mai.

Chutah, kan technician chuan a han en vel a, a that lohna a hmu mai ta lo tawp mai. Mechanic thiam tawp ang deuhin a khawih ngai a khawih a khawih mai. A hnu chuan a main switch ka ti mai a, a bawm pui ber chu hawn a ngai a ti a, kan han hawng dawn, chabi kan hmu ta awzawng lo mai a, chabi hrang hrang kawlkhawmtu kan hotu pakhat lah a zinbo, kan han phone, a awmna a hre mai bik lo, buai tau a tet a ni ta hawt mai.

Chabi lam buaipui tur midang kan ko leh, ani a rawn kal, kan locker chu sam te-in a rawn hawng a, duplicate chabi kan siamtir nghal bawk. Chumi hnu-ah chuan kan Internet chhiatna chu an zawng hmu ta hram a. Chabi tereuhte hi a lo va pawimawh ngai emmm.

He chabi ang chiah pawimawh deuh mai te reuhte ni si, thunun har em em mai hi kan taksa bung hrang zingah hian a lo bet tel reng mai, chu chu kan LEI hi a ni.

Lei hi a te hle na-a ven zawh a har riau mai, kan sawi duh loh tha tha min sawitir a, midangte chhiatna leh tlin lohna lai ringawt maite hi min sawitir a, a ngeiawm reuh ngawt mai. Thenkhat leili phei chu hmunphiah bul ang maia nal hi a ni a, thenkhat erawh chu khandaih ang maia hriam a ni thung a, khawi ngam a har ber ani ti-a tirhkohin a lo sawi hi a mak hauh lo mai.Chuvangin, Thuhriltu pawhin Pathianina i kal laiin i lei veng tha rawh a lo ti hial reng a nih hi.

Class IX kan zir laiin, “A spark neglected burns the house” tih kan zir thin a, Meisi ngaihthah-in in a tikang e tihna ni awm tak a ni. Chhungkaw pahnih chanchin a ni a, Ivana leh Gabriel te chu inthenawm mai an ni a, an pa-te ve ve an dam that lai chuan chhungkaw inngeih tak an niin, thil engkim mai tlakchham nei se an inban tawm reng a, an inpuitawn reng thin. Naupang-in inchhunga ro an rel chinah thil a danglam ta, Nu pakhat-in tawngkam a chhehsual avangin an phek buai ta vek mai.

Ivana monu chuan arpui tui lai a nei a, tuk khat chu an pal zuan khumin an thenawmte ram chhungah a tui a ni tih hriain a va kal a, “Ka arpuiin kan pal a zuankhum a, in huan chhungah a lo tui mial lo maw?” tia a zawh dek dek laiin, thenawm pitar chuan “Kan arpui pawh a tui mek a, keimahni artui lo chu kan khawm ngai lo, tin, thenawmah artui zawng turin kan kal ngai lo bawk..” tiin mei nei takin a lo chhang khauh mai chu, nu thin tertek a chhuak a, an inhau ta chiam mai, an inhau thui zel a, sawi loh tur tha tha an sawi chhuak ta, kar hmasa-a kan nghawngkawl in hawh pawh min la pe lo, I pasala pa pawh I chawm zo lo an ti thul. Inhauhna chu a punlun zel a, an inbe tha hlei thei ta lo, a tawpah phei chuan Ivana-te in chu Gabriela chuan a hal ta mai a, a khaw chanve lai a kan phah ta a ni.

Ivana pa chuan thil awmdan a natna khum atang chuan a lo hmu vek a, pawi a ti em em mai, Ivan enge ka hrilh che kha, mei chu a kan hma khan meisi hmet mit turin ka hrilh che a ni lawm ni? A ti lawm lawm mai. Ni e, nu pahnihte khan an tawngkam lo veng fimkhur deuh ta se chuan thil a danglam ngei tur hi a nia le..

He lei tereuhte hi kan ven zawh loh avanga thu tha lo pui pui kan chhakchhuah thin hian mi rilru engzat nge a tihnat a, mi pawi eng ang chiahin nge kan sawi thin tih hi mahni theuh in en chian a, fimkhur a tul hle a ni.

Keini aia chan chhe zawk ni-a kan ngaihte hi diriam leh cheksawlh kan ching hle thin, thil tha lo ti ni-a kan hriatte chu kan sawi chhe bawng bawng a, ar chuk tuilo khawpin kan chhuah a, kan theih dan kawng kawngin, kawngro a su emaw su lo emaw, kan hriat chin chin kan ramtha sawi hmiah hmiah zel mai chu a nih hi. Hetih lai hian enge keimah-ah a sawhkhawk lo thleng thei tih hi kan ngaihtuah tel a pawimawh. Vawiinah hian ka thianin Hmingchhiatna emaw mualphona a tawrh ang hi tuar lo mah ila, engemaw tawng thei reng kan ni tih hi kan hriat reng a pawimawh.

Ziaktu pakhat chuan “Thil diklo hmu thei tak ni lo la, chhuih leh pet zuitu ni bawk hek suh” a ti a, a tha khawp mai. Thenkhat chu mahnin thiam nei mang si lo hian mi thil tihsa lo sawisela ram tang tlat an awm thin, a thil sawisel ngei mai kha ti tha turin ruai ta ila eng ruai chu a ang bik lo mai thei si a. Chuvangin, he kan LEI tereuhte hi I veng tha teh ang u, buaina lian tham chawk chhuak theitu a ni si a.

Tawpsi..

2009-05-15T02:53:00.000-07:00

Ziak leh chhiar ka thiam tantirh atangin lehkha chhiar hi ka hrat khawp mai a, ka unau dangte rawl tawp tawpa an zai lai pawh hian an bulah ngawi rengin lehkha ka lo chhiar mial mial a, mak an ti thin hle. Chutih lai chuan ka lehkhabu hmuh phak apiang mai hi ka Zawnghnahnemban chawt zel mai thin a, ka Pa lehkhabu bawm lah ka ching let hneh narawh, Class IV ka nih atangin Tirhkoh Paula chanchin, Mithianghlim Luka chanchin, Krista panna kailawn, An Danglamnate, A Lenlai nite, Sermona hman chi tehkhinthu, Bible hrilhfiahna bu hrang hrang, Sadhu Sandar Singh, Martin Luther King, Samuel Logan Brengle, Ka thlarau zin kawng, Tunlai Khawvel thlirna, Cotacomb martar-te, Ka Pa tiin ka ko ngam ta, Indona Thianghlim, Krista Pasalthate tih leh a dang lehkhabu thehlep te te pawh ka chhiar teuh mai ka hre seng tawh lo. Lehkhabu chhiar tur ka van viau chuan Bible (Thuthlunghlui) hi ka thawnthu chhiar hmiah zel.

Vawi khat chu khawi kawmkar atang emawni hian lehkhabu tereuhte, zawr zet, ung tawh tak, kawm pawh nei tawh lo, bul leh tawp pawh nei lo hi ka chhar chhuak nawlh a, ka han chhiar chu ngaihnawm ka ti em em mai a, a phek hmasa berah chuan…

“Bawihte tap suh, mi’n an hria ang che,” tih a ni a, bul awm lo, tawp pawh awm lo a nih avangin ka chhiar tanna a laklawh ang zetin a tawpna pawh chu a laklawh a. Eng lehkhabu nge ni-a engtinnge a tawp tih hrechiang chakin ka awm reng a.

Kum engemawzat liam hnu-ah he lehkhabu ngei hi a kim thlapin ka chhiar ta a, a ngaihnawmin lehkhabu tha tak a lo ni reng mai.

Pu Toma In (Uncle Tom’s Cabin) tih hi Harriete Biecher Stow-in kum 1852 –a a ziah tawh a ni a, Ka chhiar hmasak-a a intanna lai khi Pu Shelbyan sal naupang Harry-a loh theih loha a hralh avanga a nu-in a tlanbopui tur a siam lai vela a tawngkam a ni a, ka khawngaih em em mai, hnukulh teuhin ka chhiar a ni.

Tawpsi hi he lehkhabu hre pha chin chuan naupang bal leh ninhlei tehkhin nan an hmang fo thin. St Clair-an a cousin Awfeli (Ophelia) tana a leisak, I zirtir turin ka lei a tih kha a ni a. He nu-te hi ka lawm em em mai. A thu chu hetiang deuh hi...

Mihang hmeichhe naupang kum 8/9 vel tur hi a ni a. A dum chiang hle a, a mit chu a bial kal mai a, a de thiang rial mai a ni. A sam chu a theu re ru a, a kawh sung mai bawk a. Awfeli chuan a han be vel ta a..

“Kum engzat nge i nih Tawpsi”

“Ka hre lo, ka Pi”

“I kum zat i hre lo maw? Tuman an hrilh ngai lo che em ni, Enge i nu hming”

“Nu ka nei reng reng lo”

“Nu ka nei lo a, enge a awmzia, khawiah nge i pian?”

“Ka piang reng reng lo”

“Khatiangin ka zawhna min chhang tur a ni lovang. Fiamthu ka thawh lo a nia. Khawiah nge I pian a, tu nge I nu leh pate min hrilh rawh”

“Ka piang reng reng lo, nu leh pa pawh ka nei lo, tihian ka lo chawr chhuak ve tawp mai a ni”

Awfeli tan chuan beidawnthlak dawn hian ka hre thin khawp mai a, Tawpsi hi ka lawm reuh bawk si. Khum puan phah dan a zirtir laite hian a kutkawr leh ribbon-te a lo ru hman a, a kawrbana a rawlh luh chu a rawn lawr ta si, Hei naupang sual, I ru a ni maw? tiin a han sawi nawk nawk a, Ka pi, ka ru lo reng reng, ka kawrbanah hian a rawn lut ringawt a niang tiin dawt muhlum hlak chu a han sawi a... !!!! Awfeli beidawng mangang chuan engtinnge maw ka han tih ang che aw… a ti vang vang a, Tawpsi lah chuan, Ka pi, min vaw mai rawh, vuak loh chuan engmah ka ti duh ngai lo, ka awmna hmasate pawn min vaw thin a ti mai.

Chutia a pi Awfelin a vuak veleh chuan pawnah a chhuak a, a thiante ho bulah chuan Vawiinah ka pi-in min vua a, min vaw lo thei lo a ni tite-in a va sawi leh a, Mi hangte u, misual vek in ni, tupawh misual vek kan ni, mahse keini mihangte hi kan sual zual bik a ni, ka piin a ti te a ti a, a thiante zingah chuan a inuisalehlin a, a nui ver ver thin.

Tawpsi ang mihring hi a awm theih tak tak angem le tiin ka ngaihtuah thin a, khang hunlai, sal neia, mihangten nasa taka an tawrh hun lai khan naupang bul bal nei lo, an nu leh pa-te sala hralh, anmahni ngei pawh man tlawm zawka hralh, chhungkua pawh hmun hrang hranga awm darh hi an awm ngei ang tih a rin theih a ni.

He Pu Tawma In hian America ramah nasa takin hna a thawk réng bawk a, Civil War hial chhuah phahin a hnu-ah phei chuan Sal tihtawp a lo ni thei ta a, he lehkhabu ziaktu hi a ropui hle. 1862-a Abraham Lincoln-an Harriet Beacheri a chibai pawhin, “Ani-te hi maw he Indona ropui tak bul tantu chu?” a ti e an ti.

Tawpsi, naupang luhlul, bal bawk si chu naupang pakhat Eva, zaidam ngilnei leh Pathian thu-awih tak mai avangin a nun a inlet ve tlat mai. He lehkhabu ziaktu-in a tum bulpui ber chu ni chiah lo mahse, Pathian hmangaihna-in mihringte nun a tihdanglam theihzia hi Tawpsi nun a tang hian a lang chiang khawp mai.

Lei Ro Hlu

2009-05-07T23:52:00.001-07:00

“Khawvela thiltithei ber chu engnge ni?” tiin inzawt ta ila, kan dinhmun azirin kan chhanna a hrang thluah awm e, ziaktu pakhat chuan, “Khawvela thil tithei ber chu HMEICHHE MITTUI ANI” tiin a ziak a, he thu hi kawng tam takah a dik viau mai. Mipa, inti paa ve tak mai pawh hi Hmeichhia-in mittui nena an thlem chuan an duap zul fo thin nia.

Hmeichhia hi Pathian kutchhuak, mipa kawppui atana siam a ni a, Mipa-in a rahbeh tur atan emaw a thunun atan ni lovin a thurualpui tur a kawppui, amah tanpui turin mipa nakruh atangin Pathianin a siam a ni.

Kum 1872 khan Julia Ward Howe chuan United States-ah Nute Ni hman a rawt a, hei hi a hmasa ber ni-a ngaih a ni. Kum engemawchen hnu-ah Boston khua-ah Nute Ni pual inkhawm a huaihawt a, Mary Tawless Sasseen Kentuckey-a zirtirtu chuan kum 1887 khan Nute Ni lawmna a siam bawk a. Chumi hnu-ah chuan Anna Jarvis Grafton khua-a mi chuan ram pum huapa he Nute Ni hmanna tur hian a campaign tan ta a, May thla chawlhni vawihnihna chu hemi ni pual atan hian a thlang a, hemi ni hian Carnation pangpar a kawrah a tar thin a ni.chuan NUTE Ni hi an hmang a, Andrew Methodist Episcopal Church-ah chuan Anna Jarvis-I Nu Pi Anna Reeves Jarvis hriatrengna atan NUTE NI hi an lo hmang ta a ni.He NUTE NI hi Ram pum huapa hman a nihna leh hriat tan a nihna chu May 9, 1914 khan a ni a, hemi ni hian US President Woodrow Wilson chuan Nute Ni chu ram pum huapa hman a nihna tur thu chu a nemnghet a ni.

He Ni bik Zoram lamah kum hnih ka hmang ta lo a, ka blog lamah ka han riam ta hret a ni.

Miss Universe emaw America President emaw khawvel mi thiltithei ber pawh ni raw sek sek, an bul tanna chu an Nu te vek a ni. Nu-te hi an hlu em em a, tlema nu pharvar deuh, fa-te enkawl tha lem lo ni-a kan ngaihte pawhin Pai lai hrehawm thla kua chu an paltlang vek a, nau hrin natna hrehawm an tuar vek a ni. Khawvel eng hmu tawh zawng zawngte tan chuan he nu tawrhna hi theihnghilh leh hlamchhiah chi a ni lo.

Ka Nu hi nu azawnga nu mawl ber pawh ni mahse ka tan chuan a hlu a, unau hmeichhia hlir pathum pian tawh hnu-a a palina ni tura ka pian pawhin (Mipa neih an beisei tawh hle a ni..) phunnawi lo-in duat takin min enkawl a, min enkawlna zawng zawnga vawiin thlenga ka lawmna ber chu Krista hriatna kawnga min hruai hi a ni. A chhan chu Ka naupan tet atangin tah belh leh zakzum ka ni a, chhung inkhawm-ah pawh tawngtai ngam ngai lo ka ni. He ka hun harsa hi paltlang turin theih tawpin, Nu-in an tih theih ang zawng zawng chu a ti vek a, atawpah chuan Bible chhiar ringawt lo-a tawngtai ka ngam ve ta a ni. Vawiin ni-a ka dinhmun min hretu leh ka tunhma dinhmun hre tu chuan ka tun dinhmun ka thleng hi mak an ti vek ang, mi zakzum leh tahbelh, tuallim lo, thiante zingah pawh inkiltawih reng mai kha Pulpit-ah te sermon a thlak ve ang tih chu tuin nge ring pha teh lul ang.

Chu mai a ni lo a, Pathian rawngbawl tura ka inpekna kawngah pawh khawvel thil ngaihtuah chuan hna sang zawk leh awhawm, hlawh pawh tam zawk beisei ve thei tur ka nih lai pawha rawngbawlna kawnga kal ngei tura min fuihtu chu ka Nu tho hi a ni a, tlema ka rilru hnual deuh chang leh hwikir mai ka duh chang pawha min fuih harhtu chu amah bawk a ni.Ka pa-in min boralsan hma avanga a chunga mawhphurhna rip tak mai lo tla ta hi mi tam tak chuan an tuar zo lo ang. Nimahsela, ani chuan Pathiana rinna nghat tlat chungin tawngtaina-in min enkawl seilian a,“A dam chhung ni lo rei se, a thawhrim rul ve ila..” tih hi kan duhthusam a ni reng fo na-a eng chen pawh min dampui mahse kan tana a thawhrimna hi chu kan rul seng chuang lo ang. Nu-te hi kan lei ro hlu berte an ni e.

"Leimi hrinhniang zingah,
Chun anga Hlu awm maw..?
Senlai chun chawi loh lengte zawng
Rairah riang an lo ni"

Kum sawmthum leh....

2009-05-01T01:42:00.000-07:00

Lalawithawngpa’n..

Kan lenlai nghil nghiala D kan chhai
Sakhmel chul leh hai ang tar tur Awithangpa’n
Ka dawn khawl lung reng a awi thei lo,

a lo ti mathlawn lo-in, vanglai leh vullai hi chu a lo awm nameuh mai a lo ni.

Kan High School kal laiin kan Miss, kum 30 ral kai fe tawh hian, “In kumin ka kum hi sem teh u, a vawi engemawzat a chhuak ang,” a ti fo thin. Keini High School kai tantir, kum 13 emaw lek tan kha chuan sem tham feee hi a ni lah tak a, khatih lai khan amah kha kan hmu senior teng teng khawp a, mi hauh a thiam si, a nu lian si, kan hlau thei hle. “Nitin dawrawn-a phurh tham thu tha kan infah a, sunhlu hnaha fun tham pawh in hawn ngai si lo,” min han ti thin kha a nia. Tunah lah khatiang kum kha kan thleng chho tan der ta mai si.

Pasal nei ni ila, nu valai, nu naupangte tia sawi tur kha, neih miau loh vangin nula dam rei kan ni ta mai mai a. Kumte chu number mai mai ania pung thei alawm tiin han inhnem vel thin mah ila, hmel hian min phatsan tlat tawh, mitko leh hmui hmaiah upa sulhnu a lang tawh tlat alawm. Kum 30 ral han kai meuh hi chuan piancham pawh lawm ai mahin hei chen nula dam chu sunpui ang u tih zawk awm tak hi a ni tawh a. Hetih laia ka lo nin ve em em thin chu, a zo avai, a ngo a hang hian kalna lam apianga ‘Pasal neih I tum em?’ emaw ‘I nei dawn lo em ni,?’ an ti fo fahran hi a ni. Neih tur pawh kan hmu zo ve lo a nih hi tiin han chhang khawmawi ila, min zawnpui inpeih at vek hi an ni a!!!!

Tukin chu ka Birthday a nih vang pawh ni chuang lo-in International Labour Day a nih miau avangin Office kan chawl a, thawh hma ngai lo bawk a, mut kan am teh ang ti-a dar 10 vela thawh tum kha zing dar 4 atangin text message ka dawng tan teh reng a, a lawmawm khawp mai. (Mizoram lamah dar 7:30 ni duai tawh hek lee..) Thenkhatin min rawn call bawk a, ka awmna a hlat tehlul nen, mahriakten piancham ka hmang liam mai dawn emaw tih laiin thian bengvar tak tak, min theihnghilh lotu ka lo nei chu ka lawmna a sang khawp mai, zing hma takah min tiharh mah se ka ngaidam vek.

Kan dam chhung kumte hi Lal Davida chuan kum 70 a ni a, chakna avangin kum 80 pawh a ni thei, mahse a reina chu thawhrimna leh lungngaihna mai a ni a ti a, dam chhung ni chen viau ni-a inngaite pawhin lungngaihna bawk an seng leh thin. Hei vang tak hian Kan dam chhung ni chhiar dan thiam hi a pawimawh hle a lo ni, thihnate, natnate hi kan ta vek a ni si a, eng ang pawhin kan vanglai chu chen ila, he thihna hi kan tawh vek tur a ni, ka thi dawn lo kan ti ngawt thei lo, thawklehkhatah, thangawk ang phutin a lo thleng mai. Chuvangin Kum engzatpawh dam rawh I, theih tawp chhuahin inchhekarbawm vel mah ila kan tawpna chu thuhmun vek.. Feet 6, feet 3-a phumbo a, chumi hnu-a rorelsaka awm vek tur kan ni. Chu rorelpui hunah chuan thiam kan chang angem tih hi zawhna pawimawh ber chu a lo ni zawk e.

Englekhawle, Pathianin hei leh chen damna leh hriselna tha min pe-a min kaihhruai avang hian a hnena lawmthu sawi chu ka tih makmawh a ni tiin Pathian hnenah lawmthu ka sawi a ni.

(Updated... Ka birthday lawm dan tlem azawng ka'n thailang leh ang e.)

Ka thiannu Margarida-in Cake ka lo ursak ang che a ti a, chawhnu lam dar 2 velah thian dangte nen an inah kan va phei vang vang a, a lo bei tha khawp mai a, Cake lian tawk a lo ur bakah dinner a lo siam tel leh nghal a, puar el euha kan va ei tak kha. Thiannu Celeste-in puanthan nalh deuh min pe leh nghal. Lawm lo em em chu ka ni ta lo e.

A bilha tho lo!!!

2009-04-24T00:48:00.000-07:00

Kan naupan laiin Ka nu hian Bekang a um thin a, a bei uluk ve thin khawp mai. Kei hian bekang hi ka duh thin viau, a pum pumin ka hmawm thin.. !!!

Vawi khat a bekang um chu vawkchaw chhumna-a ur lo-in Electric Heater-ah a ur alawm mawle, heater kha a on tlaivar zak mai a, a engti teh lek nge ni, a um sual tlat mai a, Mei tak taka ur a nih loh vang nge a tuam fu lo nge ni, a bilhah a tho lo tlat. A uih dan kha a dik ta tlat lo mai a, a tler riau a, ei hleih theih pawh a ni lo, paih dawn chuan uiawm angreng bawk si kha, a rep ro ta ringawt a. A rep hnu paw'n Um tha pangngai rep chu a tluk lo nasa.

Thil Um chi reng reng hi uluk a ngai khawp a, Zu bilhte pawh bilh sual a awm ve fo ni awm tak a ni. Zufang chanchin, a siamdan vel hi kan sikul kal lai khan kan zir thin a, a tui hmel hi ka ti khawp mai thin a, ka ei chak thei hle. Vawi khat chu Sesawnga ka awm laiin thian pakhat hnenah "Zufang ka ei chak min lo siam chhin teh," ka ti a, a ram riah na-ah a siam a, min rawn hawnsak alawm mawle. Chu pawh chu a bilh sual a ni ngei ang, a kha hlur mai a, chini telh rawh a ti a, chini ka telh pawh chuan ka beisei ang reng rengin a tui ta lo, ka zufang ei chakna pawh a reh vek, ka ei nawn ta lo reng reng.

Kan ramah leh khawtlangah te, chhungkua-ah te hian thil diklo tam tak kan hmu fo a, dem tur kan zawngin mawhchhiat tur leh mawhpuh tur apui hi kan ngah thin hle. Hengte hi a bilha tholo ani ve thei angem le.. ni ta se siam that dan a awm hlawm angem???

Chauhthubarawh....

2009-04-16T00:00:00.000-07:00

Mi fa-te tih dan hria-in Blog ka han siam ve ri rawk a, update reng chu a lo har fu mai, hun chu ka nei a, ziah tur lam hi ka tlachham deuh a ni. Tunlai chu ka hmeichhe thi hul hiau mai a, han sawi tur em em ka nei lo, mahse engemaw tal han dah ka duh si. Thu sepsel te te ka han sawi mai mai ang e, chauhthubarawh-ah...

Police-in min um-
Inrinni vawi khat kan bazar haw hi Beach lamah len khawthawn pahin kan haw kual a, tlema a lun lo lai deuh kan thlen khan Police motor hian min rawn um ta tlat mai a, horn an rawn pek hnu pawh khan keini min um an ni tih ka lo hre mai lo, thui deuh fe ka tlan leh a, mahse motor dang awm hek lo le, keini tih kha a chiang ta khawp a, kawngsirah chuan kan lo ding ta a, eng vang chuan ni maw, kan tlan chak lutuk si lo, wrong side ni bawk si lo, ka hmel danglam vang hrim hrim ni maw ka ti a, Passport ka keng em, Driving License ka keng em tihte chu ka han in check leh a...

Min umtu-te chu silai nen an rawn phei ta mai, inring em em hian a silai chu a rawn lek a, a hnungah pakhat hian silai nen bawk hla deuh hlek atangin a lo veng bawk, min rawn Sakei veh hi a ni hrim mai a, kei chuan hlauhthawn ngaihna pawh ka hre lo, min um chhan tur kha ngaihdan ka nei lo reng reng.

An rawn kal hnai, kan motor an rawn hmu chiang chu engmah sawi lo-in kal turin min hui leh ta ringawt a, sawibuai erawh kan tum lem lo.

Min umna chhan kha engdang vang ni lo-in kan motor-a thu inziak vang lek kha a lo ni a. Exército De Salvação tih hma chiaha Igreja tih kha an lo hmu lo a, an rawn kal hnaiha an hmuh chian khan min release leh ta mai a lo ni. (Exército tih hi ARMY tihna a ni a, Igreja tih hi Church tihna a ni. Church tih hmu tel lo-a ARMY ringawt an hmuh khan eng ARMY hlauhawm deuh emaw turah min ngai a ni ngei ang.)

UISA vanga inhnialna-
Vawi khat leh chu Portuguese class kan neih lai-in thian pakhat (Oscara) hian China a kal tuma an uisa siam, uisa tih hre miah lo-a a ei tui a tihzia a sawi a, kan zirtirtupa Paul chuan Uisa an ei amaw? mak ti fe-in a lo ti a. Ei e, a tui lutuk mawle a la ti zui. Kei lah pek chuan Keini pawh kan ei ka lo ti hmanhmawh a, han zep ve mai mai awm kha a nih nen, inhnialna ropui a chhuah phah.

Paul chuan Uisa han ei chu ngaihtuah pawh ka ngaihtuah ngai lo, a mak e a ti ta vawng vawng mai a, uisa ei mak a tih thu hlir a sawi mai chu ka ning lutuk, keiin kan ei ka ti laklawh tawh si, Nangni pawh Mathapa in ei tho alawm ka ti a, (Mathapa chu pangbal hnah a ni a, thil eng eng emaw nen an chhumkawi thin a ni. Tui chu a tui fuu). Kan inhnial ta char char, ani lahin Khawlaia Ui in hmuhte hian ei chakin in chil a put thin lo maw? a ti fiamthu a, kei lah diau duh bik hek suh, Nang pawh arsa i ei a, ar i hmu apiangin i chil a put ami? ka ti zel a, za vak lo-in a nui ta ringawt a.

Chutah Oscar chuan min rawn thelh ta a, Khawvel ram hrang hrang hi ka kal hnem a, Russia chiah hi ka kal lohna a ni ang, thil tam tak ka tawng a, mak tih dawn chuan mak tur a tam, mahse kan hnam dan leh tih phung leh ei leh in dan a in ang lo a, heng hi chu ka hrethiam thei vek, an ei ang leh tih dan hi chu ka ti thei zel mai a ti a (Amah hi Pilot a ni a)

Tichuan, "Awmna ram azir zelin thil hi a danglamin ei leh in pawh a danglam a, mak han tih vak tur pawh a awm lo e" tiin kan inhnialna chu kan sirtluk thei ta hram a.

Ser Nung..

2009-04-09T04:04:00.000-07:00

Mi tupawh hi, "I taksa-ah SER (Scar) i nei em?" tiin zawt ila, pahnih/khat chu kan nei vekin a rinawm, taksa-a ser han neih hi a mawilo duh khawp mai, a langsar laia a awm phei chuan a hrehawm duh.

Ser kan neih dan hi chhan hrang hrang a awm a, naupanlai-a infiam na-ah kan inhliam, chetsual palh avangin kan inhliam, inzaina avanga ser leh a dang tam tak.

Hmanni lawka ka intihpalh-a ka kut an thuina pawh hei a ser reng dawn. Tin, ka nausen laia vaccine ka lakna ka banbulah pawh ser lian tawk a awm, chu lo pawh ser neuh neuh chu ka ngah mai. Mi thenkhat ser phei chu a thak thin a, han hiah vak dawn lahin na an ti bawk thin si a, ser zai leh te pawh an awm hial a ni awm e, heng hi SER NUNG an ti thin.

Mi thenkhat thung chuan mahni taksa-ah ser siam chawpin milem te an ziak thin a, chu chu an pu hlen thin. Taksa-a ser lang kher lo pawh rilru hliam, ser reh thei lo pai a awm theih bawk.

Mihring te hi Eden huana Evi leh Adama bawhchhiatna avanga suala piang kan ni, chu sual ser reh thei tawh lo tur chu Lal Isua kan tana Kraws-a a rawn inpekna avangin ngaihdam kan ni. Hla-ah chuan, "Juda maicham chunga, ran thisen luang tawh khan.. Rilru a thlamuan zo lo a, sual ser a tibo nang" a ti a.

Judaten sual thawi nana Temple-a ran an hlan thin chuan sual ser chu a tireh thei lo, chuvang chuan Isua thisen a chhuah a ngai ta a, "Van Beramno zet hian, a phur i sual zawng chu.."a lo ti leh ta a ni.

Isua an khenbeha, a kut, ke leh naka feia an chhunna hliamser leh an vuakna vualte kha vawiin thleng hian a reh lova, a nung reng zawk a ni. Chu SER NUNG hmang chuan kan sual ser zawng zawngte tihreh a lo ni ta a ni, "A vuakna vualte-a tihdamin kan awm ta"-tia Zawlnei Isaian a lo sawi ang khan.

(Good Friday pual a ni e)

Ropui-in lo lut se..

2009-04-03T00:46:00.000-07:00

Isua Jerusalema a luh khan nasa taka chawimawi a ni a, he thu hi Zak.9:9-ah sawi lawk a ni a, Inngaitlawm tak leh thuhnuairawlh taka Sabengtung No chunga chuanga a lo luh tur thu a sawi lawk a ni. Mipuiten nasa taka chawimawiin an lo au bawk a.

Isua Jerusalem-a a lo luha a tih hmasak ber chu Temple then thianghlim a ni. He Temple inrelbawl dan hi Isua chuan a duh lo em em mai a, hulhliapa mite inthawi tur zuara lo thute chu a hnawt darh ta ur ur mai a, “Ka In chu hnam tin tan tawngtaina In an ti ang, tih ziak a ni nangni erawh chuan suamhmangte pukah in siam zawk si" tiin a sawi a ni. Tin, Pathian biakinah chuan mitdelte, kebaite an lo kal a, anmahni a tidam tih kan hmu a, chumi hnu-ah chuan fakna chu a lo chhuak a ni.

Tun chawlhni (5th April) hi Lal Isua ropui taka Jerusalema a luhna champha a ni a, kan rilru theuhah lo inngaihtuah ila, Isua chu ropui taka lo lut turin lo beisei ila, Isua chu a takin kan hmu tawh dawn lo a, amaherawhchu kan thinlung lamah hian kan lo dawnsawn a pawimawh a ni. Lal Isua hi kan biak inah lo lut ve ta se, eng thil sualte nge keimahni-ah a paih ve ang le?

Temple pawimawh ber chu keimahni hi kan ni, “Chu In chu nangmahni in ni “ II Korinth 3:16. He Temple-ah hian Lal Isua chu lo luh a duh a, ropui taka lut turin kan lo lawm em? Ropuina Lal a lo luh dawn chuan a daltu bangte kan chhut chhiat a ngai a, kulh kawngkate kan chawisan a ngai. Kan chaponate, tha kan intihnate, hre ve tawk kan intihnate hian Isua chu a lo hnar fo thin a ni.

Keimahni-ah Isua a lo luh chuan kan hriat loh, kan hmuh theih loh keimahni-a sual awmte chu anin min tihfaisak thei a, chu chu kan phalsak tur a ni, Lal Isua a lo luhna dal theitu keimahnia awm te hi thiat ang u, kan kulh kawngkhar nghet takte hi chawisang ila, Ropuina lal chu a lo lut thei dawn nia.

Buaibuti

2009-03-27T05:35:00.000-07:00

2007 kum tawp lam khan office hna tulah Kolkata kal a ngai hlauh mai a, hlauh taka, Christmas hnai tawh bawk a, chakkhai lam pah rem fu ang tiin phur takin ka insiam vei surh surh a, thiante leh chhungkhat te pawhin chutia a hun tak maia phai kal tur chu mamawh min chah nasa nangiang, thil chahte chu ka note bu te-ah chuan ka list vei thlap a.Tluang takin ka tum ram pawh ka thleng a, note bu-a ka ziah lohte pawh phone hmangin thil hawn tur min la rawn chah lawp lawp hlawm bawk a, ni danga khawih pawh ka la khawih ngai loh Tennis racquet thlengin min rawn chah a, keimah rau rauah chuan ka luck ve lai tak niin ka hria a, inti fel em emin ka rawn hawn ang tiin ka promise liam puat puat hlawm a.

Pathian tha takin min awmpui a, ka kal chhan ber ka hna chu Kolkata-a thiante zarah ka thlen tuk chuan ka zo fel ta mai a, zawh hman loh hlau-in return ticket lah chu ni hnih hnu-ah ka OK daih si, bazarna hun thawl duhthusam ka nei thei ta.

Tichuan, tih tur ber zo tawh bawk a, kawlpui ka kheng thla e, ti ang maiin bazar lamah chuan chakkhai chi hrang hrang lam turin ka phek chhuak ta a, kalna tur leh lei tur ka ngah em avangin thiante pawh ka hruai duh lo a, an nin palh takin tih thu-ah keimahin ka'n ar kawh chhuah ve tawp mai a ni.

A hmasa berin ka u pakhatin trolley suitcase min chah kha tiin new market lam ka'n hma phawt a, suitcase tha tak hnuh kal theih chu tlawm takin ka'n lei ta pang mai a, mahse ka tisual chiang hle mai, a lian si, pawm bo mai mai theih ni tawh hek lo, ka hnuk ka hnuk ta mai a, thil dang pawh ka lei belh zel a, new market-ah chuan ka suitcase chu ka hnuk ri ta rum rum reng mai a, vai ho chuan min en zui vawng vawng zel bawk a....

Duh tawka new market lam ka riam hnu chuan ka pawisa ken sa chuan daih ngaihna awm hek lo, inti changkang leh inti fimkhur-in pawisa fai keng tam duh lo-in ka account-ah mi pawisa min thawn vete chu ka dah vek si. ATM lam pan a ngai ta. Bag leh pheikhawkte ka lei duh bawk a, BK Market bul lawkah ka hman than em em ATM chu a awm kha tiin BK lam chu ka pan ta vang vang a, mahse aw, ngai teh, BK market bula ka ATM hriat chu a lo chhe hlauh mai, pawi thei ve... khawnge SBI ATM dang ka hriatna ka'n ngaihtuah chiam chiam a, tichuan taxi la-in ka zawng ta ngat ngat mai a, taxi driver pawhin min buaipui na-rawh e, hmun pakhat-ah chuan ka hmu ta hlauh mai, taxi atang chuan ka chhuk sawk sawk, ruah a sur suap suap zui, taxi driver pawh chuan ka tlanbo mai a hlau teh chek nge, ka buai lutuk a hlau zawk min rawn um ve dawr dawr zel a, ATM chu lo tha hlauh mai, ka duh ang pawisa ka la chhuak thei ta bawk a, ka thaw huai mai, mahse khua a lo tlai tawh em em, lei tur ka la ngah si. Market lam chu ka pan leh ta nal nal a.

Duhthusama bazar ka zawh fel chuan tlai lam dar 7 a ri der tawh, ka thlenin te chuan kei, mahni-a chhuak ta ringawt, dar 7 pawha la haw lo chu min ngaihtuah nasa mai a lo ni, min rawn phone ta chul a, khawnge I la awm em em, rawn haw vat rawh min ti. Kei lah ngaihtha em em in ka lo la bazar veng veng si a, e, ka lo haw dawn e tiin thlamuang takin kan inthlah ta a.

In ka thlen chuan buaina dang a chhuak leh ta. Ka thil lei zawh zai chu khawiah nge ka vawmbo zawh tak ang le.... suitcase lian tak 2 chu ka nei ngei a, ka thleninpa lah chuan a U-te signboard tur Puana siam poster lian pui, ka Dung chen lai tur chu min thawn a lo tum ve chhen a, hawnsak loh ka hreh bawk si. Ka thil lei vel chu ka'n pack ta tak tak a, ka cabin baggage takngial pawh chu zahthlak khawpa rit hi a ni a. Engemaw ti ti-in ka inbeng zo thei ta hram a, khawi lai mai pawh chu a khat tha em em vek mai a ni.

Tichuan, ka haw tur ni chu kawl-ah a lo chhuak ta, thiante leh chhungkhat laina-te thil tur ka hawn hnem bawk a, phur em em-in bungraw tam tak nen Bapui tuai loh ang tuamin ka thleninte nen chuan kan invai liam ta a. Airport-ah erawh rin aiin buaina ka tawk ta lo hlauh, theih tawpa cabin baggage-ah thil rit chi hlir ka beng avangin ka luggage chu kg 5 chiahin a excess a, min chawitir lo hlauh mai. Hlim em emin, tluang takin Aizawl lam pan chuan thlawk chho ve leh ta nal nal a.

Tin, ngai teh, Lengpui airport tluang taka ka thlen chuan kan thawnthu chu a tawp mai tura ka ngaih laiin a lo ni hauh lo, Arrival-a bungrua kan chang chu ka suitcase pakhat lo thleng ka chawi thla ka bula ka hung, a dang ena khaw dang ka hawisawn hlanin miin an lo la daih mai, ka buaizia leh mangan zia chu sawiin a siaklo, sawi loh pawn a siak chuang lo. Ka bula mi pakhat chu ka suitcase a hmuh leh hmuh loh ka zawt, mipa naupang pakhatin a lak kha, a chhuak tawh a ti ta mai.... duty ho ka ko, ka suitcase 1 mi-in an la ka ti, security an ko, air office ka lut, awm an awm mumal lo, ka chhuak leh, uite vawihkhum ang maiin ka vei tuak sek tawh mai, pawnah khi...tah parking vel-ah mi haw tur kan han enkual, kan hmu silo, ka bungraw dang ka la la bawk si lo, kha hun kher kha chu zawng mang chhe mang ang maiin ka talbuai. Min hmuaktu lah chu ka be lum lam hman lo, enge thil thleng tih hre mailo khan ka kalna apiangah min rawn um tak lawp lawp a...

Airport authority lam-a thianpa Vala ka phone ta ringawt, ani lah thlawhna bulah a lo la awm a, tikhan lo awm reng rawh, ka lo kal ang a ti a, a rawn tlan phei, chanchin ka'n sawi vel a, I suitcase chu I tag nen I enmil em? I ta ngei a ni maw? a ti, ka chiang ta hauh lo, ka lo enmil hauh lo mai a, I ta a ni lo mai thei asin a ti. Bungraw off-load a lo tam em em mai niin, report-ah hian ziak ve phawt mai la, naktuk lamah a lo thleng em tih ka lo ensak ang che, tunah chuan tih theih engmah a awm chuang lo a, haw phawt rawh a ti a, rilru bet lo zetin ka haw ta hnak hnak a.

In ka thleng pawh chu sai sawm kap ang maia luh tum kha, a thla tliak ang hna hna-in ka lut ta a, ka thil bo dan ka'n sawi suam suam a, naupang ho thil hawn nghak ho pawh an lo awm kim thap a, hrilh a hai duh ngei mai. Ka nu chuan, “In zin zing ve tawh a, harsatna leh thil bo pawh in sawi ngai lo a, mi chan in hriat ve na a nih chu, tawngtai ila, I hmu leh mai ang” tiin awlsam te-in min hnem a, rilru chu hahdam deuh huai a. Kolkatta lam thiante pawh phone-in ka zu hrilh, min mangan pui hle,kan lo tawngtaipui ang che an ti.

A tukah chuan Omega travels-ah bungrua a rawn thleng em? Mahni bungrua lo la palh rawn dah an awm em? tiin ka kal deuh chhen, anni pawn an ning viau mai thei. Mahse tha takin min chhang a, I la hmu mai ang an ti, an buangrua lo an la a nih chuan rawn dah mai awm tak a nih laia chu chen chen thawm ka hre lo chu thenkhatin min manganpui a, passenger list dil rawh an ti. khami ni-a thlawhna chuang ho list ka dil, min pe ve mai bawk, detective story te pawh a ang tan ta riau mai, airport-a lo hmutu khan mipa naupang a tih avangin hmeichhe ho chu chhui a ngai lo phawt, chutah mipa-ah pawh puitling chu kan paih leh thei, mipa naupang chuang chu an lo tam lo hle mai, kan sawr zim sawt viau e. Mipa naupangte chu a kalpuitute nen an hming ka la a, an phone number nen, hemite hi phone a, an bungrua ni lo an hawn em? tih zawh chauh chu hmabak a ni ta.

Mahse a la awm tlat, khami te khan tum rengin thurualpui neiin lo la ta se, kan bungrua ni lo kan hawn lo, lo ti ta tlat se, kei hian phone ringawt ila, min chhang tha duh dawn em ni?

Chutia hawina lam ber tur hre lo-a ka inngaihtuah buai lai chuan chung lam chhanna chu airport lama thianpa Vala atang daihin a rawn ri ta a, I bungrua a vaiin kan hmu a rawn ti. Halleluiah.............. Aw Lalpa thatzia hi tih a ni ringawt mai.

Ka bungrua kha a vaiin an lo off-load vek a lo ni, ka suitcase emaw ti-a ka lak ngawt kha ka ta a lo ni reng reng lo, keima thiam loh vek alo ni, thianpa Vala'n I tag nen I enmil em a tih chiah kha, lo enmil ila chuan ka ta a ni lo tih kha ka hre ngei dawn si a.. aw,... kan mipa naupangte kha ka lo phone hman ang tih a va hlauhawm tak em... Vala chuan Lengpui atangin tlaiah a rawn phur haw leh ta zel a, mite hi chu an va fel zozai tak em tihte ka ngaihtuah a, Pathianin kan tawngtaina a chhang a nih hi tiin ka NU erawh a lo lawm em em thung a, Kolkatta-a ka thiannu thung chuan Ka rinna a la chak tha a nih hi tiin Pathian a lo fak thung a.

Cohabitation leh Sex

2009-03-20T03:40:00.000-07:00

Kan mizo pi pute khan thih hnu hun hi an lo thlir thui ve viau aniang, Mithi thlarau kalna tur kha hmun hnihah an then ve thlap a, Mitthi khua leh Pialral tiin. Mitthi khua chu mitthi zawng zawngte kalna tur leh Pialral chu mi chungchuang, Khuangchawite, pasalthate kalna tur niin an ngai.

Tlangval, nula ngai lo chu mitthi khaw kawtchhuahah Pu Pawlan sairawkherh lianpuiin a lo sai thin a, nula, tlangval ngai pawh a lo sai tho thin an ti. Hei vang hian Tlangval chuan Nula ngaih ngei a tum laiin Hmeichhia erawh chu a in veng hram hram thin. Hlate pawh an lo phuah hial ni awm a ni…

“Di neilo Pawlan a sai an ti
Fam mah ila min sai bil tawh hlei lawng e
Ka nemrang puan tial Ka Di zawnna” tiin.

He ngaihdan vang hi ni maw ka hre law, mipa-te hian hmeichhe ngai thei nih hi intihtheih nan an hmang fo mai, tun thleng hian a la ni em maw ni chu aw tih turin thil a thleng leh thin.

Mizote Kristian kan nih hnu-ah thil a danglam nasa viau a, Pialral leh Mitthi khua chu Vanram leh Hremhmunin a thlakthleng tawh a, kan pi pu-te sakhaw lama an ngaihdan tam tak kha Kristian kan nih hnu hian thlak a ni tawh. Nimahsela, a chunga ka han sawi Sex chungchanga kan ngaihdan thlak hi harsa kan tih ber leh Ringtute min ti thuanawptu vawiin thleng hian a la ni ti ila kan sawisualin ka ring lo.

Tin, “Hmeichhe finin tuikhur ral a kai lo..” an lo ti fo bawk, tunlaia Hmeichhiate, Thiamna leh Finna lama kan san tawh zia ngaihtuah chuan he thu hi chu sawi chhuah ziah tlak loh a ni tawh hial. Nimahsela, hmeichhiate hian atna riau hi kan la nei tlat mai ni awm a ni. Chuvangin mak tak maia bumthlukin kan awm leh mai thin a lo ni, hemi kawnga min veng thei chu kawng khat chiah a awm.

Pathian thu zawm aiin mahni thu-a kal mai hi kan tum fo thin. He thlemna hi fing tak maiin a thawk a, kawng tam takah chuan a dan ve tur reng ni-a ngaih mai pawh awl zawk khawpin leh thil pangai ni maia ngaihna a awm fo thin. Television kan en a, Magazine hrang hrang kan chhiar a, Nupa ni si lo-a hlim taka khawsa dun, Pathian duhzawng leh A thu kalh tlat si kan hmu fo thin, hei hian zawi zawiin khawvel mite nun dan nena min siamrem tirin, he thil hi Pathian mithmuhin a dik lo a ni tih ngaihtuahna kan nei tlem tial tial thin a lo ni.

I Korinth 6:12 –ah khan Tirhkoh Paula chuan. “Thil engkim tih ka tan a thiang a, nimahsela thil engkim tih a tha kher lo; thil engkim tih ka tan a thiang a, nimahsela eng bawihah mah ka inphal lo ….”a ti a. Kan nundan tam tak hi khawvel Danah chuan thiam loh chan phahna a tling lem lo pawh a ni thei e, nimahsela, Chungnungbera hmaihma-ah hian ka tlinpui zo angem tih kan ngaihtuah a ngai hle.

Mi thenkhat chuan, mipat hmeichhiatna (Sex) kan hman loh phawt chuan Chendun hian sum leh pai, tha leh zung leh hun hlu tak kan save a ni tiin an inthiam chawp ani mai thei, dikna chen pawh a awm ngeiin ka ring, amaherawhchu, Pathian thlir dan hi a pawimawh ber chu a ni tlat si a, Bible chuan Diabola dodal rawh u tiin min hrilh a, han chendun ngat chuan thianghlim taka nun dun tum ni mah se sual tihna kawng chu zau takin an hawng huau tihna a ni.

Hei bakah hian ngaihdan dik lo tak pakhat awm leh chu Kan innei dawn tho a, kan inhual vek tawh a sex hman hi a pawina a awm lo tih hi mi tam tak ngaih dan a ni bawk . Ka awmna hmun (Mozambique)-ah hian hei hi thalai tam takte ngaihdan a ni. Bible zirtirna-ah chuan Inneih hma-a inngaih chu thil dik lo a ni tih a ni. He thu-ah hian Pathian hian a ngaihdan hi a thlak dawn lo a, Mihringten he thu hi kan ngaih pawimawh loh avang maiin engtikawng mahin a thu hi a sut dawn nahek lo.

Nupui pasal neih hma-a sex hman reng reng chu Hmangaihna zauthau mai a ni, hei hian mi tam tak chu mi famkim nena Nun famkim chen turin ngaihtuahna a siam sak a, nimahsela hei hian a daih rei lo hle, an nihna tak tak an han inhmuh meuh chuan mi famkim lo, tlin lohna tam tak nei an lo ni ve tho thin si a, inlaichinna ziktluak chuan Pathian atanga chhuak Hmangaihna nena inbiakpawhtawnna leh inpekna tak tak a keng tel a ni.

Pathian hian kan thinlung ruak hnawhkhat tura mi dang zawnga van ruai turin min duh lo a, he kan thinlung chhungril ber ruak huai nia kan ngaih, hmangaih leh duh tak, kan thinlung hmunruak luahkhat tura kan zawn ruai lai hian Amah Pathian chauh hi he thinlung ruak hnawhkhat theitu chu a ni. Midang tumah rengin an thei lo, dik tak chuan midang tan phurrit kan siam mai zawk a ni.

Mi tu emaw I hmangaih tak zet a nih chuan, sex hmanpui mai emaw, chendunpui mai ai chuan chu hmangaihna tak tak chu ti thangliana, nupa in nih ngei theih nana tan I lak leh I nghah hram hram kha a pawimawh zawk. Tin, Hmangaihna hi thutlukna pawimawh tak mai a ni tih kan hriat reng a ngai, hmangaihna kawnga thutlukna kan siam dawn anih chuan Pathian duhdana engkim kan tih hi kawng tha ber chu a ni tih hi kan vawn reng a tul tak meuh a ni.

Nghilh loh Zuapa

2009-03-17T06:09:00.000-07:00

17 March 1993, tlailam dar 5 vel a ni a, chaw kan ei tawh na-a khua a la thim lo deuh. Matric exam lai kan nih avangin ka U nen chuan khumah bawhzal mai mai pahin lehkha kan chhiar a, ni hnih kan exam tawh a, Mizo leh English, a tuk chu Physics kan exam ni tur a ni.

Chutia lehkha kan zir mawlh mawlh lai chuan Officer pathum hi an rawn lut hlawl mai a, ni danga rawn chuangkai ngai lemlo an nih avangin kan lo chiauau vat a, eng eng emaw an sawi luam hnu chuan an rawn kal chhan tak chu an sawi ta a. “I pa a bial fang haw lam Scooter-in an accident a, a na hle mai a..” an ti a, Damdawiinah an hruai ang a, biak theih lohin a awm ni turah ka dah nghal mai a. nimahsela an sawi tlang ta law law a, “An tlukna hmunah a thi nghal a ni” tih an sawi chu ka mang hriat riau ruai chauh a ni tawh.

Ka pa kha khatih lai khan Divisional Officer-in Midland Division-ah a awm a, bial fangin Sesawng leh CTI lamah an kal a, a haw lam chu Thingsulthliah-ah te chawl phei zelin Chhingchhip daiah an accident ta a lo ni. Zah pawh dawn lo-in kan tap nghal rawih rawih a, chutia thawklehkhata tap thawm awm ta chu thenawm khawveng an lo lut nghal vat a, kar lo-ah mipui chu an rawn awm ta sup sup mai a, thiante ho pawh an lokal a, keini unau chu tumah chiauau thei dinhmunah pawh ding loin kan tap reng ringawt a. Tichuan, a zan azana Aizawl pan tur chuan kan inbuatsaih a..

Tu te emaw hian Motor an lo buatsaih a, Ka Nutei ho-in Major N Thanga nen kan unau chuan zan Dar 9 velah Aizawl lam panin kan chho ta a ni.

Ka Pa ruang pawh chu an awmna Serchhip, Chhiahtlangah an phur phei a, chuta tang chuan YMA ho chuan "Khawiah nge a ruang hi dah I duh, I duhna hmun hmunah kan dahsak ang che" tiin ka nu chu an hrilh a. Ka Nu tan pawh thutlukna siam a har ngawt mai.
Aizawl Chaltlangah Kan pu-te an awm a, Chaltlanga a lu nghah mai ka duh e a ti a, tichuan a zana zan bawk chuan an rawn phur thla ta a. Keini Kolasib atangin kan chho a, anni Chhiahtlang atangin an rawn chhuk bawk a ni.

Chaltlang chu zanlai-ah kan thleng a, Ka pu-te inah chuan YMA an lo thu khat hmur mai a, ruang nghak mai an ni na-a an lo zai thup thup mai a, tu emawni hian An fate Kolasib atangin an lo thleng tih hi a sawi lawng lawng a, tichuan Ka Pa chu a lo la thleng ve lo bawk a, inhnuai lamah chawl hahdam turin min hruai thla a, Mu chawl ula, an lo thlenah kan kaitho dawn che u nia an ti a. Kan mu ta a, mahse ka muhil lo.

Inchungah chuan YMA chu an zai thup thup a, Sual thimah hian kan vakvai rei tawh lo ang tih leh Hla taka khaw dur leh ruahpui sur tih chu an hla sak ka la hriat reng ani, an zai thiam em em mai. Mu meng kar chung chuan ka ngaithla reng a, ka nu-te lah chu kalkawnga khaw tin deuhthaw chu an bialte an ni a, an lo hmuah hlawm avangin an lo thleng har em em mai. Zing lam dar 4 velah chuan an rawn thleng ta a, Ka pa ruang dai tawh chu kuang atang chuan an phawrh a, ka lung hi a awi mawlh lo. kan tap chel chul a, sawi tur a vang kher mai, ka nu ngei pawh chuan “Mate.,Ka hrilh ngam lo che u a, an lo hrilh tho che u a ni maw?” te a ti mai mai.

Dar 6am velah chuan Kolasib lamah exam turin min hruai thla leh ta a, exam chhunzawm chu kan duh lo a, kei phei chu ka kal dawn lo ka ti a, ka tang nasain ka tap nasa hle. Nimahsela, Pa pakhat (tun thlengin tu nge tih ka hre lo) hian, “Tunah exam lo ringawt ula in tan awmzia a awm lo e, hetah awm pawh ni ula i pa hi in kokir thei dawn chuang lo a, zu exam phawt mai rawh u, tlaiah in lo chho leh dawn nia” a ti a. Duhthlan tur dang awm chuang hek lo le, kan kal ta poh a.

Kolasib kan thlen leh chuan a tlai tawh hle, chaw pawh ei lo-in kan insiam sawk sawk a, exam tur chuan kan chhuak leh nghal a, darkar chanve zetin kan tlai na-a exam buaipuitute chuan min hrethiam takin luh min phalsak a, ka motor rui nen, tap nasa lu na nen, mu tha lo nen, ka luak chhuak chuan chhuah ka dil a, ka chhuak chu Brother Jose (Khatih laia St Johns H/S Headmaster) chuan min zui chhuakin a office-ah min hruai a, damdawi a laktir a, chu bakah ka paper leh ka thil zawng zawng chu a han lakthlaktir a, exam hall-ah pawh lut tawh loin a office-ah chuan min chhunzawm tir a, a fel ka va ti tak em ve aw.

Ka zo ka chhuah chuan thiante chuan an lo zo vek tawh a, pawnah chuan an lo ding vek a, ka zak ngawt mai, zah hleih theih ni bawk si lo. Sawi tur hre lo hian an lo ding ngawi nghiai hlawm a, kei pawn sawi tur ka hre lo, ka kal phei a, an bul ka thleng a, ka kal leh ta ringawt a, anni pawh chuan min zui ta vek a, tichuan kan kal ta zel a, Venglai peng kan thlen chuan min hruaitu motor nen kan intawk ta a, thiante nen chuan kan inthen ta a ni. Min lainat taka min zuitute kha vawiin thleng hian mitthla-ah an cham reng thin.

Diakkawnah Major Thanhranga te in-a chaw kan ei zawh chuan Aizawl lam kan pan leh ta a, tlai lam dar 3 velah Durtlang road, Bawngkawn kan thleng a, chiang em emin Chaltlang thlanmual chu a lang thei a, ka Pa chu an lo vui mek a, kan ding a, Bawngkawn atang chuan ka pa an vui lai chu kan lo thlir liam ta ringawt a.

Ka Pa kha mi hlim thei, kawm nuam, rualpawl thiam tak mai a ni thin, a zaidam a, awka vin a hmang khat hle. A thawhpui leh thiante chanchin a tha lo zawngin a sawi ngai lo. Keini ho hi ka nu ho hian rawl ring tak vek kan ni a, kan hmeichhe rual deuh bawk nen, han inbakkaih hluk hluk chang kan nei thin, chung hunah pawh chuan, “Vin vak vak te, ring tak taka tawng thinte hi a mawi lo ania, sim rawh u” tiin a sawi fo. Min dampui reng tura ka duh vei nen khan aw....

Pathian thu sawi a thiam hle, ka ngaithla kham thin lo, Pathian hmangaihna a hre chiangin Amahah a innghat hneh hle niin ka hria. Vawi khat chu naupangte ka nih laiin mi hla sak pakhat ka hre sual a, ka sa ve a, “Chhandam ka ni tiin uang mai suh..” tih hian ka sa lauh lauh a (Muang mai suh… tih tur a ni a..) Ka pa chuan rang lutukin, “Chutiang hla duk dak lo tak a nih chu, Chhandam kan nihte chu uanpui tur kan ni zawk alawm, sak fo chi pawh a nih loh chu…” a ti a, a hla thu chu a hnu-ah a dik ka hre leh chauh.

“Pathian hmangaihtu amaha ruat anga a kohvate tan chuan, an thatna turin engkimin a thawhsak hlawm thin tih kan hria” (Rom 8:28) tih thu hi lusun chhungte leh manganna, vanduaina tawkte kan hnemna thu a ni fo thin, nimahsela a tuartu dinhmuna han din chuan he thu hian min thlamuan zo lo fo.

He vanduaina kan tawh lai ngei pawha ka rilru-a awm chu he thu hi a ni, Mahse kan thatna tur a nih ngaihna ka hre lo.

Tihian ka ngaihtuah ta a, Engkim kan tawh apiang atang hian Pathian chuan kan tana tha turin rem a ruat zawk thin tih hi. Ka Pa thih kha kan thatna tura a remruat a ni ngawt lo a, nimahsela kha thihna kawrruam, lungngaihna kan tawh mek lai khan kan tana tha tur kawng min lo ruatsak zawk a lo ni.

Ka lungngaih mittui tla mah se
Ka tan a tuar na zawk
Ka pumin ka inpe ange
Chu chauh chu ka theih tawk

(vawiin hi ka pa Major Thangseia thih champha a ni a, awmna hmun a hla bawk nen, apualin tun tum chu ka han ziak a ni...)

Ka chesual palh hlauh... !!!!

2009-03-13T00:34:00.000-07:00

Kan Pi Pu-te khan "Tuithiam chu tuiah an chesual a, thing thiam chu thingah bawk an chesual nge nge" an lo ti thin a, Hmeichhia erawh an chetsualna hi hmun rualrem leh Khumlaizawl te a ni duh riau.

Mahni chanchin kan sawi hnem poh leh keini ang mi tlawktlaw hi chu kan intimualpho mai ting chu a ni a, 'marawhchu lenna kar a hla em a, rualduhten ka chetsual thu tlangkamah in lo hre bawk nen, a chipchiarin helai hmun, duh duh ka sawi theihna-ah hian ka han tlangaupui law law ang e...

6th March 2009 kha Khawvel Pum Hmeichhiate tawngtaina Ni a ni tih thenkhat chuan kan hre awm e, kha Ni kha helaiah pawh Kohhran hrang hrangte inzawmkhawmin kan Biakinah tawngtai turin kan inbuatsaih a, office atangin thiante nen kan haw a, Biakin chu ka In bul mai a nih avangin "I inah Lunch siam ang u" an ti a, kei pawh ka phur vei surh surh viau.

Chutia kan buai chuk chuk lai chuan eng eng emaw lak tumin Fridge (Refrigerator) ka va hawng chu Coke bur lian bottle hi a rawn lum chhuak, chhuatah chuan a puak keh chhuai mai a, chhar tuma ka kut ka lek lai tak mai leh a puak chu a inrual a ni chek a niang chu ka kut dinglam zungu ah tak mai chuan a rawn per ta, a hik chuai hian ka hria a, thi chu a per nghal chhuai mai a, bangah nen, chhuatah nen ka kawr awmah nen coke bua nen chuan kan inchiahpiah ta nuai mai.

Thiante an rawn tlankhawm a, Damdawiin kan pan nghal. Kan veng damdawiin kan kal, thawktute lunch eiin an lo chhuak bo vek, hmun dang kan pan leh, thin hi a rim deuh tun mai. Aizawl angin Emergency roomah min hruai lut ang a, an thui chuk chuk mai turah ka ngai deuh a, a lo ni teuh lo, counter-ah chuan lehkha kan la te te a, ka hming min zawt kha chu ka hrethiam, ka Nu hming min han zawt leh kher a.. Engemaw chen kan han vahvaih kual hnu chuan min hruai lut ve ta hram a. Ka kalpui ber Beira lah chuan Motor park turin min chhuahsan leh daih a, min enkawltupa chuan kahhikna pawh hmang ta lem lo chuan Painkiller a spray thuak thuak a, a han thui ta reuh ale... a na ta khawp mai a, ka au chhuah loh nan ka kut na lo lam chuan ka ka ka hup a....!!!! vawi khat a vih khan painkiller hnathawh kha chu a zo vek tawh, vawi thum lai a thui ta mai a, vawi li a la tum cheu a, i ti leh dawn alaw, a ngai tawh a mi, thuina hmun tur pawh a awm tawh loh hi te ka lo ti vel a, a nih leh aw, ngai lo i tih chuan thui lo mai ang chu a ti sam ve leh et a. Beira tal kha chu rawn lut leh se thla a muang deuh tur hi a ni na ale.. rawn lut tange ti ta lo chuan pawnah min lo nghak veng veng a...

Dik tak chuan hetiang taka inhliam hi Pathian zarah ka nei khat khawp mai a, ka taksa-ah hian pem tenau deuhte chu nei ve nin nian thin mah ila, thui ngai ema hliam chu ka vawikhat neihna a ni a, chhungte hmuh phak loha hliampui kan tuar rup mai hi chu a manganthlak thin khawp mai. Mahse le, Pathian zarah mite hi an tha a, helai mihang ram rehah pawh hian min lainattu leh khawngaihtu hi min pe zel a, chhungkhat lainate hmu phak lo mah ila ka awmna hmun apiangah hian min thlahthlam lo ani tih leh min enkawl reng a ni tih hi a takin ka dawng leh a, lawmawm ka ti hle. Ka kut hliam chu ka lawm lo. Mahse zana ka han tawngtai chu mak tak mai hian ka kut damna tur dil ta lo chuan lawmthu ka sawi zawk ta hlauh a, kha bur keh them khan ka kutah mai per lo-in ka mit-te per ta se, a force kha a na ropui si a, ka mit te chu a del phah thei ani tihte ka ngaihtuah a, vannei tak chu ka niin ka inhre leh ang lawi a.

He ka thil tawnin a kaihhnawih thu lawmawm thenkhat chu:

THISUK ka nei lo a ni tih ka hmuchhuak, nei ila chu ka thidang chiang ngawt ang.

Kan hotute'n i frigde a te lutuk a nih hi an ti a, frigde thar lian tawk kan lei phah hlauh.

Thenawmten min insuksak vek

Rawng min bawlsak turin an rawn kal loh leh rawng bawlsa min rawn pe thin :)

Theihai buk hnuaiah

2009-03-03T22:26:00.000-08:00

Theihai buk hnuaiah han tih takah chuan Zikpuii Pa lehkhabu ziah 'Kraws bulah chuan' tih kha rilru-ah a rawn lang zawk mai.

Malsawma'n a tleirawl ngaihzawng, nupui atana neih a duh em em Thanchhingi chu nu leh pa-te avangin a nei thei lo.. nupui fanau neih duah hnu-ah a tleirawl ngaihzawng nen an han intawng leh chu an tan khawvel a par leh a, thla eng-te pawhin awmzia a nei leh a.. Damdawiin kawta mi ri nuai nuai karah pawh Thanchhingi aw dar ri chher chhiai chu a hai ngai lo a, Theihai Buk hnuaiah te chuan an thu XXX tuar tuar ta mai..

Nimahsela, he thawnthu ngawihnawm tak hi ka sawi tum a ni law...

Nunna thing daihlim hnuaiah chuan
Min chawlhtir ve rawh aw, Lalpa

ti-a zai thin Mizo-te hi thinghlim hnuaiah chuan Inkhawm ngai tak tak ta se engtin nge kan tih hlawm ang le…????

Hmanni khan Thingtlang khaw pakhat Matola-ah ka thiannu nen kan inkhawm a, a lungchhiatthlak zawnga ngaihtuah chuan lungchhiatthlak tak mai hi a ni a, an inpekna lam ngaihtuah chuan kan tluk lo hle-in ka hre lawi si.

Biakin an neih loh avangin ni sa lutuk laka him nan naupang tezualte chu zing dar 7:30-ah Sundle School an lo neihpui a, dar 9 vela kan va thlen chuan an inkhawm chu an lo tui tawh hle. Kan han thut thlandaih hnu-ah chuan Inkhawm chu kan zawm ve ta nghal mai a, midang inkhawm tura lokal pawh chuan min rawn zawm ve nghal zel bawk a, naupang ho SS an zawh chuan puitling inkhawm chu kan tan chho ve zat a.

(Naupang-in S.S. an kai hmasa a...)

Theihai buk hnuai daihlimah chuan Inkhawm chu kan han tan ta phawt a, kan bei tui chho tan dawn viau tihah chuan ni chu a rawn sa tan ta tlat mai, thutna chu an her kual a, daihlim lamah chuan kan insawn phei ta dial a.. keini pawh kan hawi zawng chu kan thlak ve nghal a…

Hetiang hian thingbuk hlim lam apiang belin kan inkhawm chhung chuan vawi li emaw zet chu kan inher kual a, nuih chu a za duh angreng, anni erawh chuan an lo tihthan tawh avangin an nui lem lo a, a hlim lam lam chu an pan mai a ni.

(Puitling ho an inkhawm ve meuh chuan hawi zawng a danglam vek tawh a..)

Mihang ho hi an tih tawh lam chu ti ve vak mai chi an ni a, an han lamte reng reng hi an bei nasa thei khawp a, hetia pawna thinghlim-a inkhawm mai mah ni se, kan han zai chu hlim tak mai hi kan ni, an lam nghawng nghawng tho mai.

He hmunah hian puitling hming ziak chu 30 kan ni an ti a, hemi ni hian mi 26 an inkhawm a, 86% lai chu an inkhawm tihna ania, an tha thuai thuai khawp mai.

Keini ramah ni ta se, tihian thinghlim hnuaia inkhawm ngai ta se kan peih ang em aw, ka ti a, Biakin lian leh nalh tak tak kan neih ngir khup lai hian a chhunga inkhawm erawh chu a member ngaihtuah chuan archilzat emaw lek kan ni leh thin si tihte ka ngaihtuah a. Kan Mizorama mi thilphal leh nei deuh ten he hmun hi rawn hre fuh se, an Biakin sakna tur hi rawn pe thei hlauh se an va'n lawm dawn em aww..... tih ngaihtuah rauh rauh chungin ka haw ta hne hne a..

India mi nih hi......

2009-02-19T22:58:00.000-08:00

Ka tawn ang tawng hi an awm ve nual chu ka ring. Khawilo vah chhuah nikhua hian khawi ram mi nge ka nih tih hi ka zawhna tawn chamchi a ni a, Indian ka ni ti-a ka sawi apiangin an awih lo ziah bawk. Chinese emaw Filipino emaw ka nih ring an tam ber. Khawlai ka han kal te hi thenkhat hian China.. tiin min lo ko thin. Airport-ah takngial pawh ka passport an thlek vang vang hnu-ah Indian I ni maw? An la ti hram zel a, Sibut ti khawpa han chhip thlak ngheng tak hi an chakawm thin.

Indian ka tihin tuman an ring ngai lo a, Mizoram atanga lokal ka ni ti then ila, tiin a chang chuan Mizoram ka han sawi ve bawk a, an bo tulh tulh a, Mizoram chu khawia awm nge hrilhfiah leh tho a ngaih thin avangin India chu ka ti leh nge nge thin.

Vawi khat chu wholesale dawr lian zet mai-ah thil leiin kan kal a, a neitute chu Indian an lo ni a, ka thiannu chuan Hei hi Indian ve tho a nih hi tiin keimah chu min kawk a, anni chuan Indian tih takah chuan an ngaihven ve viau a, mahse Indian ka nih chu an ring ta tlat lo mai a, khawmaw I passport an ti hram a, ka pe lo chiang khawp mai, ka voter ID ka entir a, Ashoka pillar an hmu a, an awih ve hram, chutah an rinhlelhna tibelhchhah tur tingin Hindi ka la thiam lo zui. Kan han inhriatchian hnu chuan kan inkawm ngeih ta phian a, a hnu phei chuan Biryani te min rawn kensak vel a…!!!!

Kar kalta mai khan Finance Training, MANGO buatsaihah ka tel ve a, mi 18 kan niin ram hrang hrang an ni nawk a, UK, USA, Canada, Zimbabwe leh Mozambique te kan nih pawlh nuai a. kan chhun chaw ei lai hian kan ti ti luai luai thin a, a ni tawp bera ka thutpui pa chuan, “Midang ho khan Indian I nih an ring lo a..” a ti a, Ni e, ka ti a, thu dang deuh a sawi dawn emaw tih nak laiin, “An ti dik chiah, I anglo a lawm” zu la ti hram a…

Thil lungchhiatthlak tak mai pakhat tunhnai lawk khan ka tawng leh pek a. South Africa ram chhung ami Kruger Park tlawh kan tum a, ka thiante Brazillian pahnih leh Swedish pakhat nen. Mozambique ram chhung atang chuan kan chhuak mai a, S Africa kan lut tur chu ka passport a tang ta tlat a, S Africa chu ka lut ve thei ta reng reng lo mai a, Thiante chu Commonwealth Country an nih vangin Visa hran an mamawh lo a, kei INDIAN PASSPORT humtu chuan Visa ka mamawh bik a…!!!!!! Thina rim rawh tih hi a ngai hran lo, a thinrimthlakin a zahthlak ang reng bawk sia, Refusal letter an siam a, min thawn kir leh ta daih a, chutih laia ka rilru-a awm chu DEPORTEE tih hi zu ni teh tlat a… Mexican Deportee nen ka intehkhin deuh roh a, thiante chu kal tlang tho rawh u ka tih luih tlat avangin rilru bet zan lo chuan an kal ta poh a. Office atangin min lam tur motor an rawn tir a, South Africa border-ah chuan motor chu ka nghak ta ran a. CID leh Custom duty ho nen chuan kan inkawm ta vel mai mai a.

Kan pi leh pu-te kha khawchhak lam atanga thlang tla zel an ni tiin an sawi a, engtia Mizoram an thlen tak hnu a thlang tla zel ta lo nge maw an nih hlawm ni, hei India ram mi kan nih reng phah a, kan hmel leh zia, pianphung, nungchang, duhzawng (ei leh in leh incheina thlengin) a dang em em si a, tawng a dang nen. Kan duhzawng hi a Indian lo em em mai si a, engvanga Indian dang, vai kan tih maite hi haw em em thin nge kan nih le..? ti te-in ka ngaihtuah a.

Kan naupan lai lah khan Hindi kha kan zir tha duh lo a, Bari Bara Vaimawngkhak te kan ti vel mai mai a, tun hnu-ah pawh vai ram hmun hrang hranga kan han bazar ve nikhua pawhin an bazar tawng fahrah te te-in kan rak khum mai mai a, Lei duh leh hralh duh na na na chu kan indawr ve zel mai bawk a, tawng thiam tumna tak tak kan nei ngai lem lo kha a lo pawi a ni.

Englekhawle, hnam dang pasal ka nei emaw, ram dang passport ka nei emaw a nih ngawt loh chuan ka duh emaw duh lo emaw Indian chu ka ni kumkhua dawn a, chuvangin ka tih tur pawimawh tak pakhat chu Hindi thiam hi ni ta berin ka hria. India ka haw leh hun chu Hindi hi ka vaibel tih tluka thiam turin ka va han zir rua em!!! ti te-in ka insawh ka insawh thin. Ka hmel leh pianhmang-in India hnam dangte ang mah suh se, an tawng anga ka tawng zarh zarh theih phawt chuan min hmu Indian ve mai ang chu maw… INDIAN NIH TAK HI CHU…

Enge ka tih tur...????

2009-01-30T03:38:00.000-08:00

Tlai khat chu ka thenawmnu, thiannu ni bawk, nitina inhmu a, ka nuihpui thin hi a lokal a, kan ti ti a, Damdawiinah nu pakhat (HIV positive) a tlawh a, a lo haw chiah a ni, chu chuan a rilru a uai rit hle a, engemaw vei nei tih hriat takin ni dang angin a rawn tawng bawrh bawrh lo.

Eng eng emaw kan sawi hnu chuan a rilru tak tak chu a rawn phawrh ta a, “Captain, thil pakhat theihnghilh ka duh deuh mai a awm a, mahse ka theihnghilh thei si lo a, ka tawngtai thin a, a chang hian thiante zingah ka awm a, ka hlim a, mahse a hnu rei lote-ah ka hrechhuak a, ka rilru a hah leh thin a..” a ti a, a thil vei chu sawi chhuak chiah si lo-in a tap ta hlawp hlawp mai a, tihngaihna ka hre lo kher mai, a lungchhe zualpui reh hun chu nghakin ka thu ngawi reng a, a hnu-ah chuan a han inhrufai deuh a, a la tawng thei chuang lo. “Ka tawngtai ang aw..” ka ti a, a lu a bu ringawt a, tichuan, enge ka tawngtaina chhan tur pawh hre lo chuan ka han tawngtai ta ringawt a… Ka amen chuan a rawn inthingharh deuh a, “Naktuk-ah ka hrilh ang che” a ti a, “Ni e, I duh hun hunah min hrilh dawn nia, ka inpeih reng e, eng pawh nise, I chhungkua emaw, I mamal thil emaw, I Nu chungchang emaw pawh nise, tawngtai zel la, theihnghilh tum tlat lovin, I harsatna chu hmachhawn zawk la, I hneh thei zawk ang ka ring” ka ti ve luam ringawt a.

Naktukah ka hrilh ang che a tina-a a sawi ta tho a. A Unaunu HIV positive a lo awm hi a lo ni a, a unaupa pakhat lah Johannesburg-ah kum 5 chhung awm tawhin engtinnge a awm pawh a hre lo a, chumi ni-a nu pakhat HIV positive a tlawh chuan a unaunu tawrhna chu a ti hrechhuak thar leh a lo ni a. Chutah a nu-in a rawn phone a, a nau chu a damlo hle a, ei tur pawh an nei lo a ni tih a rawn sawi a, pawisa thawn tur a nei bik si lo.

Han hnem ngaihna ka hre lo hle. A dik tak chuan counseling hrim hrim pawh hi ka tih ngai loh tak mai a ni a, a dinhmun lek phei hi chu a harsa leh zual.

Eng ti turin nge min beisei ni ang? Ka lakah chuan engmah a beisei ka ring hran lo, a harsatna min hrilh ringawt khan engmah puih theihna ka nei si lo a... Tichuan, ka lo tawngtaipui zel ang che tiin kan inthlah ta ringawt a.

He mite chauh hi an ni lo. He ramah hian mi harsa, dinhmun khirh taka ding, chhuah ngaihna awm chai lo hi engemaw zat an awm a ni. Chung mite tan chuan enge tih theih ka neih le..?

An ei tur pe dawn ila, vawi khat chaw ei mai a tawk si lo, pawisa pe ila kan inpe seng dawn si lo. Tawngtaisak ringawtin an puar si lo. Hna thawh tur neiin inhlawhna siamsak thei dinhmuna ding lo ni teh reng pawh ni ila, anmahni kha hnathawk thei dinhmunah an ding lawi si lo.

Hei vang tak hian UNAIDS te, WORLDVISION, TEARFUND, NGO hrang hrang, hetiang mite enkawl tur hian an awm reng alawm, annin an hna chu thawk teh se tiin han thlahthlam dawn ila, a tam zawkte hi hetiang enkawlna dawng pha chuang lo an la ni leh ta zel si.

Hetiang dinhmun khirh tak mai hmachhawn lo-a ka awm ringawt pawh ka vanneih ziate ka inhre chhuak thar leh a.

Vawiin thleng hian “An tan hian enge ka tih theih ang?” tih hi ka inzawhna ka chhan theih si loh chu a la ni reng a nih hi.

Ka D rim..!!!!

2009-01-23T00:36:00.000-08:00

Puma Zai pakhatah chuan heti hian a awm a….

“Lamkawiah Thingsiri par lo tla e
Ka chhar dawn lo zaiin ka pel mai dawn e
Ka D rim reng reng a nam lo e”

Eng rim nge ni ngai???

Thlangdar hi a rimchhe hle a, kuta khawih phei chuan kutah a nam reng thei a, silfai vat a ngai thin. Kan naupan lai phei chuan mita a zunkhum chuan mit a del thei an ti thin, tak a nih leh nih loh erawh ka la fiah lo. Phivawk pawh hi a rimchhia an ti, mahse a rim ka la hre miah lo.

Makpazangkang pawh hi a rimchhe rap, a rah hi inkhualtelem nan hian kan hmang fo, (Kan naupan laiin..) chhang lem atan hian a tha si, a rimchhe bawk si a, kutah a nam rei thei hle.

Bermai hi mihringin an ei tawhah chuan a rimchhia ka la tih ber pawl a ni, a uih thang nghur mai a, ei chu sawi loh a rim ringawt pawh ka ter thei lo.

Thil rimchhia rau rau-ah chuan Mihring rimchhia hi ka ngaihtheih loh tak a ni.

Rim hi chi hrang hrang a awm a, ka awmna rama mite (Mihangho) hi rim danglam tak nei an ni a, (tu huatthu suh-ah) thlalak-ah hian an rim hi lak tel theih nise ka ti thin ngawt mai, theih chu nise blog-ah hian ka han tarlang tel chhuai chhuai tura..

Mahse a theih si loh a, thla lak a hnehin sawifiah pawh a harsa lam a ni e.

A chunga ka sawi rim hrang hrang ang khi a ni lo, an rim hi a mak a, sawi thiam theih pawh a ni lo, zakkha rim ni chiah si lo, rim tler deuh hi an nam tlat mai a, a bikin a hang zual bik hian an nam nasa zualin ka hre thin a. An vun hi a hang a, an pianhmang pawh hi a danglam ve hrim hrim mai, heng danglamna hrang hrang hi chu thla han la ila, a lang mai thin a, chhungte leh thiante pawh ka thawn a, an hmelhmang chu an hre mai. Mahse rim mawlh hi thla lakah a lang ve thei tawh si lo, hei mawlh hi thawn tel ka chak thin.

Vawi khat chu ka office bang motor-a ka lut chiah hi Driver a lo thu a, a rim a lo nam nasa lutuk kha ka luak tep a, glass ka hawng nghal sawk sawk a, ka mualpho lo hram.

Uisathiam hian rim atangin hnu a chhui thin a, mihring pawh hian rim atangin thenkhat chu kan inthliarhrang ve thei a, thenkhat chu an perfume hman atangte, shampoo atangte, aftershave leh sahbon rim atangte pawhin kan hre hrang thei a, mahse chung mite thliar hrang thei tur chuan hnar fin a ngai ve khawp mai.

Isaaka’n a fapa Jacoba mal a sawm khan, "Ngai teh, ka fapa rim hi LALPA malsâwm ram rim ang a ni (Gen. 27:27) a ti a, keini hi eng rim nge kan nam ve le...????

A chang chuan Setana hian kan duhzawng tak hmangin thlemna-a lut turin min thlem fo thin a, Lalpa malsawm ram rim nam lo thil tam tak kan tih phah thin a nih hi.

Chutiang hun kan thlen chuan heti hian I zai thin ang u

“Lamkawiah thingsiri par lo tla e

Ka chhar dawn lo zaiin ka pel mai dawn e

Ka D (Isua) rim reng reng a nam lo e”

Grrrrrr...!!!!!

2009-01-15T22:53:00.000-08:00

Khualzin mi-te hian an vawi khatna-ah emaw engtikah emaw chuan chet chhiat chang hi an nei vekin ka ring, an sawi lo mai mai aniang. Thufingah hian, “Mi aa pawh a ngawih reng chuan mi finga ngaih a ni” tih leh “A hmui a chip chuan remhria-a ngaih a ni” tihte a awm a. Thufing tih takah a thu a fing hi ka ti thin khawp a, ka kan an hnem poh leh mahni kan inmualpho mai ting a ni tih hre mah ila kei chu hei ka thil hmuh leh hriatte, tawnte hi sawi lo-in ka awm thei lo a nih hi.

Ka Kenya zin kha khualzinphur thlawhna lian ve tawk tak Boeing 737-a thlawk ka ni a. Mite chu intichangkang takin an vei suau suau a, kil khatah kei chu ngawi rengin ka thu a, gate an hawn veleh an intlar sup sup a, ka tho chhuak ve thalh thalh a, thlawhna lianpuiah chuan kan lut diah diah a, kawngka chu an kharphui a, kan thlawk chhuak tan ta.

Boruakah kan kangfel ta tihah chuan ka zun chhuak chu zung turin ka phei dek dek a, ka thutna hi a hmalam deuha a awm avangin hmalama Toilet hman tumin Puanzar awm chu ka keu dek dek a, Executive class ho thutna a lo ni a, an lo awm khup a, ka kal tlang phei den den a, toilet amaw tiin kawngka-te lo awm hmasa ber chu ka’n hawn rawp mai ale… Cabin Crew thawmhnaw ho chu a lo in khai tuar mai a, an thawmhnaw bawm ka hawng lek lo niin. Ka khar rang kher mai. Airhostess pahnih chuan min lo hmu reng a, an lo nui a, toilet chu a dawt chiah kawngkhar zawk a lo ni a, ka lut ta a.

Ka chhuak leh lam chu hostess pakhat chuan “I tih leh hun chuan fimkhur tawh rawh aw, chuti lo chu chhuahna kawngka I hawng ang a, I tla daih mai ang” tiin min lo fiam a, an nuih chu a za ve khawp mai. Kei pawhin nui chungin ka chhang liam ve ta mai mai a. A hnu-a an thil rawn sem thleng chuan kan la innuih a.

Airport kan thleng chu kan tam deuh a, ka chhuak hnung khawp a, Terminal ka luh ve chuan an lo intlar put tawh a, hnung tawkah chuan line awm sa chu ka han chhunzawm ve ringawt a, kan tawlh hma zel a, hmalama thu intar chu ka hmu thei ve ta, TRANSIT tih hi a lo ni kuau a, ka hma-a mi chu “Connecting flight I nei em?” tiin ka zawt dek dek a, ani chuan a lo nei Nigeria kal tur a lo la ni, Ka line a dik lo tih ka hre nghal, an hrui zam hnuaiah chuan ka kun ket ket a, ka chhuahsan ta daih a. Arrival pangai chu ka va zawng hmu ve leh a. Immigration-ah lah chuan ka passport an en a, ka hmel an en leh a, Indian i ni maw? min ti sek a, Ni e Ni e ka ti a, I hmel chu a Indian lo an la ti cheu a. Ka hmel hian kawng hrang hrangin mi tam tak atibuai fo reng a ni. (Ka nui)

Ka haw lamah lah tlemin flight an delay a, Maputo Departure chu Gate 3 a ni a, ka thu ve ran a, ka pum nuamlo inthiar ngai leh ta tlat mai chu kan hmalama kawngkhar inhawngah chuan ka lut phei a, ka va inthiar, ka let leh chuan kawngkhar chu TALA lian tawk hian an lo kalh daih mai, kawngkhar chu ka sawi a, ka thutna hma-a thu Pakistan pa pakhat chuan thawktute a ko a, min rawn hawnsak leh ta a, “Use upstairs next time” a ti a, next time a awm tawh awm lo e mai a ti rilru thruai thruai chungin ka aw liam ta mai mai, dik tak chuan ka kal hma lawk pawn midang an lut zut zut ka hmu reng a, chuvanga kal ngam chauh ka ni a, ka kal tak avanga kalh kher kha ka ngaihdan a ni bik hlek lo. Hahahaaa

Mozambique kan thleng chu Mahni ram thleng teh chawk ka inchan ve deuh a. Ka che chukchu tawh bik lo. Mahse Mingo tam tak an che chhe ve thung, Immigration-ah chuan National, Foreigner, Foreigner Resident tihte a intar a, Foreigner Resident tihah chuan Confi' takin ka intlar vang a, ka hnung leh pek hle mai a, mahse engemaw chen hnu-ah chuan ka hma-a mite chu tlar dangah an insawn ta pheuh pheuh a, an line an hai ve ni lekin. Foreigner lamah chuan an pakai ta teuh a, kei chuan ka hma phah ta phian a, chung mite chuan min thlamuan hle, mi pawhin engkim an lo hriat bik awzawng loh hi ka ti vel ta mai mai.